YENO 14
Madaru Numu Hmi Hna Hngoronatan, Wen’ o Re Nge?
1. Kodrihne Madaru hna wasanelo o re si Iseraela, wen’ o re nge?
Madaru hna wasan’ o re ta matrani Aberahama ha thu co node ni Nubonengo, ka hna nunuone du buic’ o re cenge wathebo. Hna ato yelen’ o re nod’ omelei ko “Iseraela,” ka hna ure buic thu co uletedren’ o re hmi me nidi seseko, ne il’ o re Eberedo ni Nubonengo. (Ta Salamo 147:19, 20) Inomelei, co hnahneone wenei si Iseraela kore nodei conod ileoden.—Ieielo Genese 22:18.
Madaru hna ure si Iseraela bane asesekoni Nubonengo. O re hna lae nata ri poni buic ci aehngeni ko co hmaiai kore hnahneone ngei buice ma ninen’ o re nodei wathebo ni Madaru. (Deuteronomi 4:6) Wenei si Iseraela so kore co yenon’ o re seseko ri poni Madaru ke buic’ osoten.—Ieielo Isaia 43:10, 12.
2. O re nodei nidi thu hne numu hmi hna hngoronatan, wen’ o re nge?
Hue kore nodei ezien, ilei si Iseraela ma ha luzion’ o re ci ra gupane ni Madaru. Ilei Iehova me lae wini si Iseraela hnen’ o re Ekalesia ni Keriso. (Mataio 21:43; 23:37, 38) Onomedi, ha nodei nidi thu hne di kore ci wini si Iseraela, bane asesekoni Iehova.—Ieielo Ta Ruace 15:14, 17.
Iesu hna hngoronatan’ o re re kokonieni Nubonengo ha thu co pul ne co akokonieneni o re nodei co nod’ ileoden. (Mataio 10:7, 11; 24:14; 28:19, 20) Ha ci nidi iu onome, ri ezien’ o re bun, kore hnei Iesu hna awa konekonon. Be kabe inomelei, Iehova hna wasanelo nidi hmaiai kore ngome wene ri nodei co nod’ ileoden ri hnoren’ o re hmi me seseko. (Ahngabot 7:9, 10) O re nodei nidi thu hne ci kone enon ha thu co eamojeu ko buic ne co ekonekatujeu. Ri ten’ o re awe ileoden, ri nodei ci sanelo buic, ekowe sese so kore buice ci yenone wene ri Tusi Hmijoc.—Ieielo Hebera 10:24, 25.
3. Hna whane korione kore hmi nore nodei Témoins de Jéhovah onome?
Ri ta kenereken 1870, ade sitruden nore Tusi Hmijoc hna uni yawe o re nodei seseko nore Tusi Hmijoc me hna nidi hneduhngon. Ma ha carajewe ke buice ko Iesu hna hngoronatan’ o re Ekalesia ni Nubonengo ha thu co pul, ile buice me pucalo co pul’ on’ o re Baselaia ri se node ne se nod. Ri kenereken 1931, ile buice me kedilu o re yele ko: Témoins de Jéhovah.—Ieielo Ta Ruace 1:8; 2:1, 4; 5:42.
4. Ci hngoronata korione ko re nodei nidi thu hne?
Ri ezieni nodei aposetolo, o re nodei ekalesia ni Keriso hna kawilonebut ri nodei gula nod, hna konekatuone hnen’ o re Kotre Ci Necen me ci Hawone kei Keriso. (Ta Ruace 16:4, 5) Se inomelei, ri eziene onom, o re Kotre Ci Necen ci konekatuon’ o re nodei Témoins de Jéhovah ri ten’ o re awe ileoden. O re nodei hmaian’ omelei (thu cumo mamoe nore uien) me nidi thuni ci uletedren’ o re nodei Guhne osoten ci ureie, ci xiwamomo, ne ci ethawan’ o re nodei gu tusi hna ureie ri thawalan’ o re 600 kore la nengoc. O re Kotre Ci Necen ci kanone joko re nodei eamo wene ri Tusi Hmijoc, ne ile ko re laene son’ o re thawalan’ ore 100 000 ko re ekalesia ni Keriso ri ten’ o re aw. Ri hnoren’ o re nodei ekalesia ni Keriso, nodei mocahman me thuni ci rue o re hnapan’ o re hmaian. Buice ci ule tedrene roion’ o re nodei mamoe ni Madaru.—Ieielo 1 Peteru 5:2, 3.
O re nodei Témoins de Jéhovah hna hngoronatan ha thu co pulon’ o re nodei nata me roi nore Tusi Hmijoc, ne co akokonieneni. Ehnije ci ilone inome i nodei aposetolo, ci pul ri se ’ma ne se ’ma. (Ta Ruace 20:20) Ehnije ci ie jeu’ o re nodei ngome ci hnoron’ o re seseko co yenonelo o re Tusi Hmijoc. Deko ma ci ru hmi so ke ehnij. O re hnamenenge ni ehnije numu Cecenhn’ ij me Thu ran; ehnije ace re celuaien ci era ko ehnij. (2 Thesalonaika 1:3) O re nodei nidi thu hne ci aopodoneni Madaru ne ci konekatuono soten, inomelei buic ha nidi hnahneon ome ri ten.—Ieielo Ta Salamo 33:12; Ta Ruace 20:35.
