YENO 5
Nge Kore Alatone Ni Madaru Son’ o Re Ten’ o Re Aw?
1. Madaru hna pupul’ o re Ten’ o re aw, bane nge?
Iehova hna kanon’ o re ten’ o re aw du nodei mocahman ne nodei mohmenew: guhne ni eje sese. Deko ma hna puli Adamu ne Eva bane meneng’ on’ o re aw; Nubonengo ha hna puze o re nodei angela son’ o re aw. (Iopu 38:4, 7) Madaru hna ane o re ngome me hnadan ri hnoren’ o re paradais me karuia, yelen ko Toto Edena. (Genese 2:15-17) Iehova hna kanu Adamu ne il’ o re ta matrani nubon co meneng’ iwon’ o re ten’ o re aw.—Ieielo Ta Salamo 37:29; 115:16.
Ri hna whanelo, Toto Edena so kore Paradais. Adamu ne Eva co hnapo coedebut. Bushengon co konewaamion’ o re ten’ o re aw’ ileoden, ha thu co Paradais. (Genese 1:28) Ten’ o re aw deko lo co atakoni. Ka co iara guhnen’ o re ngome ko.—Ieielo Ta Salamo 104:5.
Ulelo ore video Wen’ Ore Nge Madaru Hna Pipul’ Ore Ten’ Ore Aw?
2. Ten’ o re aw be deko ma Paradais onom, tano re nge?
Adamu ne Eva deko hna ninen’ o Madaru, ile Nubonengo me uwo bushengonebut sere ri toto. Ha luz kore Paradais, ka deko ngome hna thuni co ane yawe. Tusi Hmijoc ci ie: “Ten’ o re aw ha hna kanon jeu’ o re wanine no re ngome me nia.”—Iopu 9:24.—Ieielo Genese 3:23, 24.
Iehova ha hna nuecilebut o re uane ni Nubonengo me hnadan? Deko! Nubonengo nidi nen. Deko hna berede gupa ko. (Isaia 45:18) Nubonengo co ayeweni yawe o re ngom jeu’ o Paradais, inom’ o re hna ie ri hnen.—Ieielo Ta Salamo 37:11, 34.
3. Co korion kore co apinani yawe o re Paradais?
Ri ezien Iesu co Doku, ten’ o re aw ha co Paradais yawe. Ri irue yelen ko Amagedo, Iesu ne nodei angela ha co atangoni buic’ o re ci icatac ne Madaru. Thubenelo melei, Iesu ha co cedo Satana ri kalabus co wan thausan kore ta kenereken. Nodei sinemenenge ni Madaru deko co tango wen’ o re Iesu co huete buic ne co cagoreni buic. Buic co menenge opodon ri Paradais ome ri ten e iara oiru ko.—Ieielo Ahngabot 20:1-3; 21:3, 4.
4. O re ci jo co ase hodrael?
Hodrael kei Madaru co atakoni o re nia ome ri ten? Iesu hna kanon’ o re “kacen” bane aehngeni ko ha acen kore bun. O re nodei ac ci ule onom, ci apareuni o re ngom, ne ci aehngeni ko eje ci menenge ri “bun’ o re ten’ o re aw.”—Ieielo Mataio 24:3, 7-14, 21, 22.
Ri thausan kore ta kenereken, Iesu me ile ri aw co musion o re ten’ o re aw. Nubonengo ha co atakonibut o re nodei ci jo. (Isaia 9:6, 7; 11:9) Doku ne Thu Hule, Iesu ha co tiribut o re nodei nia ni buic’ o re ci hnoro Madaru. Lene sei Iesu, Madaru ha co atakoni o re ued, ne eteshet, ne tango.—Ieielo Isaia 25:8; 33:24.
5. La kore co meneng’ on’ o re Paradais ma co pina?
At the Kingdom Hall, you will meet people who love God and want to learn how to please him
Buic’ o re nodei ngome ci nineno Madaru. (1 Ioane 2:17) Iesu hna sian’ o re re kokonieni Nubonengo co there ne co yenon’ o re nodei lata me nidra co kedi roio Madaru. Onom, Iehova ci. hngoronatan’ o re hmail’ o re ngom ha thu co meneng’ on o re Paradais co pina. (Zefania 2:3) Ri hnoren’ o re nodei guhne re Hmi yelen ko Hneruala no re Baselaia, ci yenon co cahman ne co cecen me thawalan, ne co hmenew ne hmaiene me thawalan. Cecen ne hmaien ne nodei tenen co hne sese ne co yenon co numu ci roi me roi lene ri Tusi Hmijoc.—Ieielo Mika 4:1-4.
