Hmaiai kore ngome ci ua sesekon kore hmi ni buic netit. O re nata me roi ko Madaru ci rowon’ o re nodei ngom’ omelei ne ci uato buic. Nianedi, o re nodei hmi hna iara yose bane hueti jeu’ o re nia. (2 Korinito 4:3, 4; 11:13-15) Ken’ o re ta ci lae nata, ko, numu ta hmi ci asisini o re atangoni ngom, thu co atakoni o se gula nod, irue, ka ci kumu ti o re ci nian’ o re ta morow. Ile me hmaiai kore sheusheu sen’ o re nodei ngome ci ua sesekon ko hmi ni buic netit.​—Ieielo Mataio 24:3-5, 11, 12.

Ore hmi me seseko ci ahmani Madaru, ka nodei hmi me cihmug kogo du Nubonengo. Nodei hmi omelei ci yenon’ o re nodei uane me deko ma ile ri Tusi Hmijoc, inom ko: ci citho ri poni Madaru, ci citho ri poni nodei tango. Roinedi, Iehova ci alatone ko nodei ngome co carajewe o re seseko ri poni Nubonengo.​—Ieielo Ezekiela 18:4; 1 Timothi 2:3-5.

Roinedi, tha thuniko ko re nodei hmi me cihmug co ie ko buice ci hnoro Madaru co iao Nubonengo, wen’ o re buice ci wahnacoron’ o re nodei ace nore ten’ o re awe ni Satana. (Iakobo 4:4) Ri Tusi Hmijoc, hna ato yelen’ o re nodei hmi me cihmug “Babulona me Hmaiai.” Babulona koda, melei kore guhne hna whan ko re hmi me cihmug, thubenelo ore hna ue ri ezieni Noa. Dai asasa, Madaru ha co atakoni kedinon’ o re nodei hmi ci amenuni ne ci konewaamion’ o re ngom.​—Ieielo Ahngabot 17:1, 2, 5, 16, 17; 18:8.

Ke be deko ma as kore nata me roi: Iehova tangoko ma hneduhngon’ o re nodei ngome hna kawilonebut ri nodei hmi me cihmug ri nodei conod. Nubonengo ci asani buicelo ha thu co yeno buic’ o re seseko.​—Ieielo Mika 4:2, 5.

Iehova ci uaton’ o re nodei ngome ci alan’ o re seseko ne il’ o re roi. Nubonengo ci taco buic’ omelei co nuecilebut’ o re nodei hmi me tho. O re ngome ci hnoro Madaru deko co kurehmug co ureie o re ci roi ni bon ha thu co aopodoneni Nubonengo.​—Ieielo Ahngabot 18:4.

Ri ezieni nodei aposetolo, o re nodei ngome ci ua sesekon hna kedi opodon’ o re nodei nata me roi hna pulon hnei nodei aposetolo. Iehova hna yeno buic o se la ci roi me kabesi cece hnei opodon, ka numu thuben ne numu ci uroi. Buic’ omelei tu so eje onom wen’ o re buic hna canga kedi o re nodei nata me roi omelei, ne canga ane Madaru da ri ci roi ni buic.​—Ieielo 1 Thesalonaika 1:8, 9; 2:13.

Iehova ci kediton ri hnamune ni Nubonengo o re nodei ngome ci nue cilebut’ o re nodei hmi me cihmug. Ka ngei buhnije ma kedi o re la kaie ni Madaru, ile buhnije co kani Nubonengo, ne co kani nodei nidi thu hne, ne co kedi o re waruma tha thu aseko.​—Ieielo Mareko 10:29, 30; 2 Korinito 6:17, 18.

Ha acene kore co hnengon’ o re nodei hmi me cihmug, melei nata me roi. O re co hnengon’ omelei ha co aneroini o re ten’ o re awe ileoden wene ri hna kone waamion. Deko lo yawe kore nodei hmi me cihmug co amenuni ne co aithubani o re nodei ngom. O re nodei ci roi ha co wasanelo so ri hmi nore Madaru me seseko ne sa oden.​—Ieielo Ahngabot 18:20, 21; 21:3, 4.