Ma hnapobut sa ko wa morow, melei ci aopodoneni o re ace hmenuene ne ci kanu bushengone te o re unia. Hmengo onome ha numu tenen. Ha ci ule ko ha deko ma nidi numu eziene so hmengo. O re ezien’ omelei ne engetace ni hmengo ha bane so wa tei hmengo. Ha deko ci thaeti roi ri ridri. Se rane ci roi, ka se rane deko ma oniil. Ile me nure du hmengo. Hmengo sese deko co kurehmuge co eroio ha thu roi ko re mariage. Korione kei Tusi Hmijoc co konekatu hmengo son’omelei?

CI IE KO NGE KEI TUSI HMIJOC: “Ono re ci rane ci kuni iwon, ne thu nidra.” Ka ome joko, ono re ci ran “deko ma there o re ace ni nubone ko, deko ma lata me nia.” (1 Korinito 13:4, 5) Bua onome ha hmani morow. Netiti ke bua co ule tedren’ o re wa tei bua. Nianedi ko cahmanieni bua ngei co uane ko bua ci nua cili bon. Deko co hneduhngone ko bone melei joko. Kunilu ke bua ne co roi du cahmanieni bua. Ile bone co opodone co cumo wakuku joko.

“Se inomelei ke buhnije nodei mocahman, . . . menenge sese ne buice leu’ o re ngome nata.” (1 Peteru 3:7) Uanelo ko hmenue ni bua ci kanu engetace du wakuku. Ka ha hmaiai ko re ruace me kabesi ci anidranidra ni bone ne ci anureni bon. Bone ngei co sheusheu ca co ued. Ri se ta ezien, bone co cenge nia bua. Roidi, nidralu ke bua wen’ o re “nubon’ o re thu kurehmuge co kaicaraate roi ri pon’ o re cahane yaeate.” (Ta Onatre 16:32) Ra bonelo ne konekatu bonelo. —Ta Onatre 14:29.

NGE KO RE HMENGO THUNI CO RUE:

• Nodei cecen: Konekatu hmenue ni bua co ule tedren’ o re wa morow kacene ngei me ridr. Nuebut’ o re soteno ta ruace. Ka ile seselo ne hmenue ni bua ne wa tei hmengo.

• Nodei hmaien: Cahmanieni bua cidi konekatu bua, roi ko melei. Kacene me deko ma nidi oniile ko re la rue, hage ilo bon. Aehngenilo du bone korione ko re co rue.

CI IE KO NGE KEI TUSI HMIJOC: “Ile bushengone ha co hnengome sa.” (Genese 2:24) Onome, wa morow ha ile ne hmengo. Deko co hneduhngone ko hmengo “hnengome sa.” Tacebut co aserepodeni o re mariage.

Nodei angaishola, oreonelo du re cahmanieni buhnije o re konekatu omelei. O re ci ore ni buhnije, inom’ o re “ci aroini.” (Ta Onatre 12:18) Nodei mocahman, ielo du angaishola ni buhnije ko buhnije ci wahnacoro buic. Iala roio buicelo ti o re ta ruace ni buic.—Ta Onatre 31:10, 28.

“Hage co there ko se ngom’ o re roi ni nubone ko, roi di ko re roi ni se ngome ko.” (1 Korinito 10:24) Co iara rue o re roi du cahmanieni ca hmenueni bua. Co numu eziene bane enengoco, bane iala roion, ne bane taedengi. Deko co ua bua so ngei hmengo ma ci thaet sese. Ke co ua hmengo sese. Tusi Hmijoc ci ie: “Hage ekeo ke hmengo, roi di ngei me hnore sa ke hmengo.” (1 Korinito 7:3-5) Rue enengoco ti lo ri pon’ omelei. Ka ma ci hue ko re ta ezien, ile me serepodelu ko re mariage.

NGE KO RE HMENGO THUNI CO RUE:

• Deko co hneduhngone co iara numu eziene so hmengo oden

• Ruelo ta wa ace bane aopodoneni bon. Kanu bone ta wa kado

CI IE KO NGE KEI TUSI HMIJOC: “Ka nubo ha hna ule kacen’ o re ta eberedo hna xiwamomone me hmijoc wene ri be morow, ka omelei ha thuni co angome natani nubo jeu’ o re waruma.” (2 Timothi 3:15) Enengocoti lo ko co korione ke hmengo co yenon’ o re wa morow. Be deko ma hnapo, bone ha thuni co yenon’ o se ace ne se ac. Be ile ri ore ni hmani bon, wa morow thuni co acikacen’ o re la nengoce ni hmengo sese. Ma ci opodone ca ci sheusheu kei hmaien, wa morow se ci inomelei. Co ieie o ta wa nata du bon. Bone ngei deko ma nidi cara jewe. Ka ma hmalo di, ile bone co alane co ieie.

Deko co uane ko bone nidi morow. Nengoce te Madaru lo du bon. Hnelo du Iehova bone thu taedengi. (Deuteronomi 11:19) Ma ci eleda ne bon, ielo du bone o re nodei ace hnei Madaru hna rue. (Ta Salamo 78:3, 4) Ri ci hmalo ke bon, ile bone co acidanon’ o re ci nidi hnoro Iehova hmengo. Ile bone co yenone te inome hmengo.

NGE KO RE HMENGO THUNI CO RUE:

• Sibonelo o re ngomenata sei Madaru bane hian’ o re wa tei hmengo

• Ielo ka ielo o re nidi ta enengoco ne ta nidi uane du bon. Ile bone co cara jewe ibetuon.