1. Nge kore gure hmi me nidi thuni kore ngome eje co etha nata ti?

TA MILLIONS kore ta ngome ha thuni ore gure hmi eje ci kaione ko Cecewangoiehnij. Iesu hna kanon’ ore gure hmi omelei bane yeno nodei re kokonieni Nubone co hmi. Nge kore ta ace Nubone hna hmi son? Ka wen’ ore nge nidi ace kore gure hmi omelei bane so ej?

2. Iesu hna yeno eje co hmi son’ ore theri kore ace me nidi ac. Nge kore ade ac’ omelei?

² Iesu hna ie ko: “Wen’ omelei buhnije co hne inome, ko, Cecewangoiehnij’ ile ri awe ke ! Hmijocengo ko re acekiwangoieni buango. Wieni me ashedonilu o re baselaia ni buango. Ilewatonelo ore alatone ni buango omewaore ri tene thu ekowe ne il’ omewaloi ri aw.” (Ieielo Mataio 6:9-13.) Tan’ ore nge Iesu hna yeno eje co hmi son’ ore theri kore ac’ omelei?​—Ule ore Note 20, ri page 247.

3. Nge kore ace me nidi ace eje co yenone ri pon’ ore Baselaia ni Madaru?

³ Eje hna yenone ko Iehova kore yele ni Madaru. Eje se hna yenone joko ore alatone ni Madaru son’ ore ngom, ne son’ ore ten’ ore aw. Ke ri eziene Iesu hna ie ko: “Wieni me ashedonilu o re baselaia ni buango”, Nubone hna alane co ie ko nge? Ri yeno om, eje co ule ko, nge kore Baselaia ni Madaru, ka  nge kore nodei ace Baselaia omelei co rue, ka korione kore Baselaia omelei co ahmijoceni ore yeleni Madaru.

4. Nge kore Baselaia ni Madaru, ka la kore Doku nore Baselaia omelei?

⁴ Iehova hna ane cedene sa kore hna doku ri aw. Ore Tusi Hmijoc ci kaion’ ore hna doku omelei ko: Baselaia ni Madaru. Iehova hna ure Iesu ha thu co doku nore Baselaia omelei. Iesu kore “Retoke no re nodei retok, ne Doku no re nodei doku.” (1 Timothi 6:15) Ore roi Iesu co rue, melei co nidi thawalan’ ore roi co rue kore nodei necene me hma ri politik. Ka Iesu nidi numu nene ri pon’ ore nodei necene me hma ri politik ileoden.

5. (a) O kore Baselaia ni Madaru? (b) Ore Baselaia ni Madaru co musion’ ore nge?

⁵ Iehova hna aroini Iesu lo, ka thubenelo ore 40 kore ran, Nubone hna yewe yawe jeu’ ore aw. Hue kore ta ezien, Iehova hna aseri Nubone co Doku nore Baselaia ni Nubonengo. (Ta Ruace 2:33) Tusi Hmijoc ci ie ko, ore Baselaia ni Madaru melei sa kore “baselaia . . . ile ri aw.” (2 Timothi 4:18) Koiko, Baselaia omelei ile ri aw. Ka Baselaia omelei co musion’ ore ten’ ore awe sere ri aw.​—Ahngabot 11:15.

6, 7. Wen’ ore nge Iesu thawalan’ ore nodei doku ome ri ten?

⁶ Iesu thawalan’ ore nodei doku ome ri ten. Tusi Hmijoc ci ie roione ko, Nubone so kore “tha thu  taeto ko.” (1 Timothi 6:16) Ileoden’ ore ta necene me hma ri politik ci tango so, ke Iesu di deko sa te ko co tango. Ore nodei ace Nubone co rue so eje deko co bun.

⁷ Numu se hna perofetane ri Tusi Hmijoc ci ie ko, Iesu ha co Doku me netiti ka Doku me cece hnei ci ran: “Co toene ri poni nubonengo ko re Uiewaieni Iehova, ono re uieni re ngome nata ne ci cara jewe, ono re uieni re anetitini ne il’ o re nene, ono re uieni re thu ule kacene ne il’ o re ci pareuo Iehova.” Iesu deko co hnengone wene ri Nubone ci ule, ca wene ri ta ngome co ie du Nubon. Iesu co “hnengo netitone son’ o re nodei ngome deko ac.” (Isaia 11:2-4) Ilo, bua ci alane co numu doku inomei Iesu?

8. Eje ci ule korione ko Iesu deko co doku oden?

⁸ Madaru hna ureie ore ta ngome ha thu co doku sese ne Iesu hado ri aw. Paulo aposetolo hna ie du Timothi ko: “Ngei eje ci kuni, ile eje co doku sese ne nubonengo.” (2 Timothi 2:12) Xara ele kore ngome co doku sese ne Iesu?

9. (a) Xara ele kore doku co musi sese ne Iesu? (b) Whane hodraele Madaru hna whane co ureie ore ta doku ha thu co musi sese ne Iesu?

⁹ Ore Yeno 7 nore gu tusi’ om, ci nengocone sa kore hna ahngabot, hna ule hnei Ioane aposetolo. Bone hna ule Iesu ma ha Doku ri awe ne 144000 kore doku joko. La kore nodei doku omelei? Ioane ci ie ahngane ko buice “numu acekini nubonengo [yele ni Iesu] ne acekin’ o re Cecewaieni nubonengo  hna xiwamomone ri ta gupadi ni buic.” Ka Ioane se ci ie joko ko: “Buic’ ome ko re ci hue lewe jo ko o re Arenio [Iesu] jeu’ o re nubonengo ci lenge il. Buice ko re hna iticone wene ri nidin’ o re nodei ngome.” (Ieielo Ahngabot 14:1, 4.) Nodei 144000 melei ta sinemenenge me netiti hnei Madaru hna ureie ha thu co “musion’ o re ten’ o re aw” sese ne Iesu. Ngei buice ma tango, buice co roilo yawe ri aw. (Ahngabot 5:10, MN) Iehova hna ureie ore ta sinemenenge me netiti whane sei nodei aposetolo, ha thu co kane te co doku sese ne Iesu. Buice ile ri hnoren’ ore nodei 144000.

10. Iehova hna uane co adokuni Iesu ne nodei 144000 ha thu musion’ ore ngom. Tan’ ore nge melei ci aehngeni ore ci rane ni Nubonengo so ej?

¹⁰ Iehova nidi hna ra ej. Wen’ omelei Nubonengo hna uane co adokuni ore ta ngome sese ne Iesu. Co doku me roi kei Iesu. Nubone thuni co carajewe du eje wen’ ore Nubone hna ngome ome ri ten, ka se hna jo joko. Paulo hna ie ahngane ko Iesu ci ra ej. Bone se hna ie joko ko, Nubone thuni co kane re ci jo ri nodei nidranidra ni ej, ka “hna tubunidi nubonengo sa so ne eje ri nodei ac’ ileoden.” (Hebera 4:15; 5:8). Nodei 144000 joko thuni co carajewe du eje ri ta ushiwa ni ej. Inome ej, buice hna tace ne il’ ore ta lata me nia ri hnore ni buic. Inome ej, buice hna uedr. Koiko, eje thuni co ua sesekone ko, Iesu ne nodei 144000 co carajewe ore ta uane ri hnore ni ej, ne ta ushiwa ni ej.

11. Iesu hna yenore kokonieni Nubone co hmi ha thu co iu kore alatone ni Madaru ri aw. Wen’ ore nge?

¹¹ Iesu hna yenore kokonieni Nubone co hmi ha thu co iu kore alatone ni Madaru ri aw. Wen’ ore nge? Ri Yeno 3, eje hna yenone ko, Diabolo Satana hna icuhma ne Iehova. Thubenelo melei, Iehova hna nue Satana ne osoten’ ore ta angela me deko hna ninen (nodei demoni), co menenge ko ri aw, ke co gukokode so kore ezien. Koiko, deko ma ileoden’ ore angela kore hna rue ore alatone ni Madaru ri aw. Ri Yeno 10, eje co yeno hmaiaione di ri poni Satana ne nodei demoni.

12. Ahngabot 12:10 ci ie ko tru kore ace me nidi ac. Nge kore rue ac’ omelei?

¹² Tusi Hmijoc ci aehngeni ko Iesu ha co Doku. Ka thubenelo melei, Nubone ha co irue ne Satana. (Ieielo Ahngabot 12:7-10.) Ahngabot 12:10 ci ie ko tru kore ace me nidi ac: 1) Ore Baselaia ni Madaru, hna dokuone hnei Iesu, ha whane co musi ri aw. 2) Ha hna uwo Satana sere ri aw, ka hna cedo bone di ome ri ten. Ha hna aiuni kore rue ac’ omelei. Eje co ethanatati yawe omelei ri ta yeno osoten.

13. Ri eziene hna uwo Satana sere ri aw, nge kore ace hna pina?

¹³ Tusi Hmijoc ci ie ko, ri eziene Satana ne nodei demoni hna uwone sere ri aw, nidi hna opodone kei nodei angela me hna menenge netiti du Madaru. Tusi Hmijoc ci ie ko: “Opodonelo, ca nodei aw, ne buice te o re ci meneng’ omelei.” (Ahngabot 12:12) Ri awe onom, ha dongodongo so, ka ha salu  so, wen’ ore ileoden’ ore angela ri awe ci rue ore alatone ni Madaru.

14. Whane ri eziene hna uwo Satana sere ri aw, nge kore ta ace ci pina ome ri ten?

¹⁴ Ome ri tene di deko ma ekowe sese ne il’ ore aw: hmaiai kore ta ace me tho ci pina du ngom. Wen’ ore nge? “Wen’ o re ha hna icelu . . . ko re diabolo” ome ri ten. Ka Satana ci “cenge nia hmaiai, wen’ o re nubone ha cara jewe, ko, ha gukokode so ko re ezieni nubon.” (Ahngabot 12:12) Nidi cenge nia kei Satana. Ha hna uwo bone sere ri aw, ka bone ha ule ko ha bathu pina kore bune ni bon. Wen’ omelei, bone ci rue ore nodei thuni ni bon, ha thu co asheusheuni, ne co ajoni ore ngom.

15. Nge kore alatone ni Madaru son’ ore ten’ ore aw?

¹⁵ Oniileko kore alatone ni Madaru. Iehova ci alane ko, ngome me deko yeniane co waruma tha thu ase ko ri paradrais, ome ri ten. (Ta Salamo 37:29) Ke korione di kore Baselaia co aiuni ore alatone ni Madaru?

16, 17. Daniela 2:44 ci yeno ej’ ore nge ri pon’ ore Baselaia ni Madaru?

¹⁶ Daniela 2:44 ci ie ko: “Ka ri nodei rane no re nodei doku omelei Madarungo ri awe co akurunilo o re baselaia me tha thu ni ko co atakonibot ; ka ono re baselaia omelei deko co nue jeu’ o se nod ; roidi co tha nemunamane bot ne ka thenon’ o re nodei baselaia ileoden, ka ha co sere pode e iara oiru.” Ci yeno ej’ ore nge kore hna perofetan’ omelei, ri pon’ ore Baselaia ni Madaru?

 ¹⁷ Ci yeno eje ko: 1) Ore Baselaia ni Madaru co whane co musi “ri nodei rane no re nodei doku omelei.” Melei ci ie ko, ri ezien’ ore Baselaia ni Madaru co whane co mus, osoten’ ore ta hna doku be ci musi ko ome ri ten. 2) Ore Baselaia ni Madaru co serepode e iara oiru, ka deko lo te se hna doku co win’ ore Baselaia ni Madaru. 3) Ore Baselaia ni Madaru co irue ne nodei hna doku ome ri ten; ka ore Baselaia omelei ha co ridi ore so hna doku nome ri ten. Hale me ten’ ore aw’ ileodene ha co musione hnen’ ore sa so kore hna doku: ore hna doku me nidi thawalane son’ ore ngom.

18. Nge kore yele nore irue nore Baselaia ni Madaru ne il’ ore nodei hna doku nore ngom?

¹⁸ Amagedo kore yele nore irue nore Baselaia ni Madaru. Baselaia ni Madaru co irue ne il’ ore nodei hna doku nore ngom. Nge kore ace co pina ri dan’ ore irue omelei? Nodei demoni co amenuni ore “nodei doku ome ri ten’ ileoden, thu co asani buice lo jeu’ o re ci irue ri ran’ omelei me hmaiai ni Madaru me thati thu niton.” (Ahngabot 16:14, 16) Ore nodei baselaia nore ngome co irue ne il’ ore Baselaia ni Madaru.—Ule ore Note 10, ri page 241.

19, 20. Tan’ ore nge nidi ace so eje kore Baselaia ni Madaru?

¹⁹ Tan’ ore nge nidi ace so eje kore Baselaia ni Madaru? Numu theri kore tan. 1) Eje nodei ngome me nia. Wen’ omelei eje ci uedre ne ci tango. Hale me nidi ace so eje kore Baselaia ni Madaru. Ke Tusi Hmijoc ci ie ko, eje co waruma tha thu ase ko ri ezien’ ore Baselaia ni Madaru ma co musion’ ore ten’  ore aw. Ioane 3:16 ci ie ko: “Madaru hna raton’ o re ten’ o re aw, ca ile nubonengo me nunuone te o re Tei nubonengo xara sa so thu deko ma tango ko re ngome me sa ci une du nubon, roi di nubone co numu o re waruma tha thu ase ko.”

²⁰ 2) Nidi ace so eje joko kore Baselaia ni Madaru wen’ ore eje ci menenge ri nidin’ ore ta ngome me lata me nia. Hmaile ci waiao ne ci kaeno. Osotene ci othewaea. Eje tha thuni ko co akedini buice co rue ore ta ac’ omelei me nia. Ke ri irue Amagedo, Madaru ha co atakoni ore nodei ngome me ci ke co lerei. (Ieielo Ta Salamo 37:10.) 3) Nidi ace so eje joko kore Baselaia ni Madaru, wen’ ore hmaiaiil’ ore ta hna doku deko ma numu nen, ca ngei lata me tho, ca ngei lata me kug. Nodei hna doku omelei deko ci konekatuon’ o re ngome co ninen’ o Madaru. Tusi Hmijoc ci ie ko, ngome numu nene ri pon’ ome sa, bane aniani bone ko.”​—Thu Pule 8:9.

21. Korione kore Baselaia ni Madaru co aiuni ore alatone ni Madaru ome ri ten?

²¹ Thubenelo ore irue Amagedo, ore Baselaia ni  Madaru ha co aiuni ore alatone ni Madaru ome ri ten. Inome ko, ore Baselaia ni Madaru ha co atakoni Satana ne nodei demoni. (Ahngabot 20:1-3) Ha deko se ngome co uedr, ka se ha deko joko co tango. Hnen’ ore itico waruma, nodei ngome me hna menenge netiti du Madaru co menengon’ ore Paradrais e iara oiru. (Ahngabot 22:1-3) Ore Baselaia ni Madaru co ahmijoceni ore yeleni Madaru. Melei ci ie ko, ri ezien’ ore Baselaia ni Madaru co musion’ ore ten’ ore aw, ileoden’ ore ngome co ahmani ore yeleni Madaru so.​—Ule ore Note 21, ri page 247.

22. Iesu deko hna whane co Doku ome ri ten. Ka se deko joko hna whane co Doku ma ha roilo yawe. Eje ha ule korione ko Nubone hna ahnguni?

²² Iesu hna yeno nodei re kokonieni Nubone co sibone ri ci hne ko “Wieni me ashedonilu o re baselaia ni buango.” Koiko, o re Baselaia ni Madaru deko hna shedo ri ezieni Iesu. Danelo, Iehova co  ane ceden’ ore Baselaia omelei, ka co adokuni Iesu. Ri eziene Iesu hna yewe yawe jeu’ ore aw, ilo, Nubone hna canga whane co doku? Tangoko. Iesu hna dai ahnguni. Eje ha ule korione ko Nubone hna ahnguni? Thubenelo ore hna aroini Iesu lo, Peteru ne Paulo hna ie ko, ore hna perofetane ri Ta Salamo 110:1, melei ci nengoco Iesu. Ri hna perofetan’ omelei, Iehova hna ie du Iesu ko, Nubone co “menenge ri gula nata” ni Nubonengo ka co ahnguni “ca ile Nubonengo me ilon’ ore nodei icuhma ne Nubone” bane cada arada ni Nubon. (Ta Ruace 2:32-35; Hebera 10:12, 13) Iesu hna ahnguni ele kore ta kenereken?

23. (a) Iesu hna whane co Doku nore Baselaia ni Madaru hodrael? (b) Eje co yenon’ ore nge ri Yeno 9?

²³ Ri ta ade kenereken, ri dan’ o 1914, numu ta kerisiano me nidi roi ri hnor, hna yenon’ ore ta hna perofetane ri Tusi Hmijoc. Hale buice me hna carajewe ko, co nidi ace kore kenerekene 1914. Whane ri kenerekene 1914, ore nodei ace ci pina ome ri tene ci aehngeni ko, seseko kore hnei buice hna ie. Iesu hna whane co musi ri kenereken’ omelei. (Ta Salamo 110:2) Thubenelo melei, ha hna uwo Satana jeu’ ore ten’ ore aw. “Ha gukokode so ko re ezieni” bon. (Ahngabot 12:12) Ri Yeno 9, eje co ule seson’ ore ta kacene ci ie sesekone ko, eje ci menengon’ ore ezien’ omelei me “gukokode”. Eje co yenone joko ko, ore Baselaia ni Madaru ha bathu aiuni ore alatone ni Madaru ome ri ten.​—Ule ore Note 22, ri page 248.