1, 2. Nge kore alatone ni Iehova son’ ore ta fami?

HNEI IEHOVA hna ithurajeuon’ ore cahmane ne hmenewe me hna dan. Tusi Hmijoc ci ie ko, Nubonengo hna pupul’ ore hmenewe me hna dan, ne hna “lenge te nubone du Adamu.” Nidi hna opodone kei Adamu, ile bone me ie ko: “Ome nubone durekaze wene ri so durekazego, ka iaile wene ri ta iaile inu.” (Genese 2:22, 23) Melei ci yeno eje ko, Iehova ci alane ko, nodei ngome hna ithurajeu co opodon.

² Nianedi ko, hmaiai kore ngome me deko sa te hna numu opodone ri fami ni buic. Roidi, ri Tusi Hmijoc, hmaiai kore ne anetitini bane konekatuon’ ore nodei ngome ri fami co menenge sese ri opodon.​—Luke 11:28.

3, 4. (a) Nge kore lata nore cahmane du hmenueni bon? (b) Wen’ ore nge cahmane ne hmenewe co nuebut’ ore etha nia ni bushengone ko?

³ Tusi Hmijoc ci ie ko, ore cahmane co hnoron’ ore hmenueni bon, ka co hmijoc’ o bon. Ieielo Efeso 5:25-29. Ore cahmane co iara rue ore roi du hmenueni bon, co cagoreni bone ne co ule tedreni bon. Deko lo ke bone co rue ore nia du hmenueni bon.

⁴ Co nge kore cahmane ngei hmenueni bone ma menu? Tusi Hmijoc ci ie jeu’ ore nodei mocahmane  ko: “Nodei mocahman, buhnije co tacebute co etha ra hmenueni buhnij, ka hage keco (hage cenge nia) buic.” (Kolose 3:19, MN) Ngei bua me cahman, uanelo ke bua ko, bua joko thuni co menu. Ka ngei bua ma alane ko Madaru co nuebut’ ore ta nia ni bua, melei bua se co nuebuti joko ore ta nia ni hmenueni bua. (Mataio 6:12, 14, 15) Ha thu co roi kore hna ithurajeu, netiti kore cahmane ne hmenewe co nuebut’ ore etha nia ni bushengone ko.

5. Wen’ ore nge cahmane co hmijocon’ ore hmenueni bon?

⁵ Iehova ci awan’ ore nodei mocahmane co hmijocon’ ore nodei hmenueni buic. Ore cahmane co ua roione ko, korione co kone enone son’ ore hnengom, ne son’ ore hnore nore hmenueni bon. Nidi ace komelei. Ngei ore cahmane ma deko ma rue ore roi du hmenueni bon, inom’ ore hna awane hnei Madaru, melei Iehova co ke co taedrehngi ore ta ci hne ni bon. (1 Peteru 3:7) Iehova ci hnoron’ ore nodei mohmenewe ne nodei mocahman. Nidi ace ko se ngome du Iehova, ngei bone ma nidi hnoro Nubonengo.

6. Ore cahmane ne hmenewe “ha hnengome sa.” Melei ci ie ko nge?

⁶ Iesu hna ie ahngane ko, se cahmane ne hmenueni bon “ha deko yawe xara rew, roi di ha hnengome sa.” (Mataio 19:6) Bushengone co menenge seseko ko. (Ta Onatre 5:15-21; Hebera 13:4) Roi kore cahmane co there co aopodoneni ore hmenueni bone ma ci thaeti sese ke bushengon. Ka se ineko kore hmenew, co there co aopodoneni ore cahmanieni bone ri ci thaeti sese ke bushengon. (1 Korinito 7:3-5) Ore cahmane deko co hnedungone ko “deko se ngome wene koda hna kecon’  o re hnengome ni nubone ko ; roi di ci thueile ne ci hian.” Koiko, ore cahmane co hnoron’ ore hmenueni bone ne co ule tedreni bon. Ore alaien’ ore hmenewe ko, ore cahmane co roi du bon, ne co hnoro bon.​—Efeso 5:29.

7. Wen’ ore nge ore fami co numu hawon?

⁷ Ri etha fami, nidi ace kore co numu hawon. Ore hawo, melei ore ngome ci hueti ore fami, ha thu ruace sese kore nodei ngome ri fami omelei. Ri 1 Korinito 11:3, eje ci ieie ko: “Keriso ko re hawo no re mocahman’ ileoden ; ka ono re cahmane ko re hawo no re hmenew ; ka Madaru ko re drai ni Keriso.”

8. Korione kore hmenewe co aehngeni ko, bone ci nidi hmijocon’ ore cahmanieni bon?

⁸ Nodei mocahmane thuni co menu. Ke roidi, ore hmenewe ma konekatuon’ ore ta uane ni cahmanieni  bon, ne ma ruace sese ne cahmanieni bone ne il’ ore hnor, melei co hnahneone kore fami ni bushengon. (1 Peteru 3:1-6) Tusi Hmijoc ci ie ko: “Ono re hmenewe co pareuone di o re cahman.” (Efeso 5:33) Ka ngei ma deko ma ekowe sese kore ta ci une ni bushengon? Bone co nidi hmijocone ko ore cahmanieni bon. Tusi Hmijoc ci ie ko: “Se inomelei ke buhnije nodei mohmenew, ninenelo o re re cahmanieni buhnij, sone ngei osotene me deko ma ninen’ o re eberedo, ha co ahnarani buice hnen’ o re lata no re nodei mohmenew, ke deko hnen’ o re eberedo ; ma ci ule o re lata ni buhnije me gada ne nidi hmijoc.” (1 Peteru 3:1, 2, MN) Ore lata me roi nore hmenew, thuni co konekatuon’ ore cahmanieni bone co carajewe, ne co hmijocon’ ore ta ci une ni bon.

9. (a) Ngei ore hmenewe ma deko ma hnore sa ne cahmanieni bon, thuni ke bone co rue ore nge? (b) Nge kore ta ininata eje ci uni ri Tito 2:4, 5 son’ ore ta mohmenew?

⁹ Co rue ore nge kore hmenew, ngei bone ma deko ma hnore sa ne cahmanieni bon? Roi kore hmenewe co ie hmijocon’ ore uane ni bon, inomei Sera. Ri se ran, bone hna ie o se ace du cahmanieni bon, Aberahama. Ke cahmanieni bone deko hna opodoneti. Ke roidi, Iehova hna ie du Aberahama ko: “Nubo thati ninenelo o re hna ie du nubo hnei Sera.” (Genese 21:9-12) Ore cahmane ekalesia deko sa te co yose o se uane me deko ma icojeu ne il’ ore ci ie kei Tusi Hmijoc. Koiko, ore hmenewe co konekatuon’ ore cahmanieni bon. (Ta Ruace 5:29; Efeso 5:24) Ome te, ore hmenewe ci ruace ngome nata, ci ule tedren’ ore fami ni bon. (Ieielo Tito 2:4, 5.) Ngei ore cahmanieni bon, ne re tei bone ma ci ule ore ta ruace me tace ci rue ke bon, melei  buice co nidi hnoro bon, ne co nidi hmijoc’ o bon.​—Ta Onatre 31:10, 28.

10. Ci ie ko nge kei Tusi Hmijoc ri pon’ ore ci etha meneng, ne ci icil?

¹⁰ Ri se ta ezien, ta ace hmenuene ci canga uane co etha meneng, ca co icil. Ke Tusi Hmijoc ci ie ko: “Ono re hmenewe hage co hue cil’ o re cahmanieni nubon.” Tusi Hmijoc ci ie joko ko: “Ono re cahmane se hage co cil’ o re hmenue ni nubon.” (1 Korinito 7:10, 11) Ri se ta eziene me nidi ushiwa, thuni kore ace hmenuene co etha meneng. Ke ri dan’ ore co etha meneng, roi ke bushengone dai co ua roion. Ka onom, nge kore ci ie kei Tusi Hmijoc ri pon’ ore ci icil? Tusi Hmijoc ci yeno eje  ko, sa so kore tane bane icil: ore ace hmenuene thuni so co icil, ngei ome sa ni bushengone ma kaeno cahman, ca ma kaeno hmenew.​—Mataio 19:9.

11. Nge kore ci nidi alane kei ehna morow?

¹¹ Ngei hmengo me numu re tenen, roi ke hmengo co iara ile ne buic. Re tei hmengo ci nidi alane ko, hmengo co ile ne buic. Ke nidi ace joko ko, hmengo co konekatu buice co ule kaceni Iehova.​—Deuteronomi 6:4-9.

12. Co rue ore nge kei cecene ne hmaien, ha thu co cagoren’ ore ta tei bushengon?

¹² Ore ten’ ore awe ni Satana ci nidi nia hmalu ko. Numu ngei ta ngome ci alane co rue o se ace me nia du re tei hmengo, ca co nia buic. Ushiwa jeu’ ore ta cecene ne ta hmaiene co ethanatati ore ta ac’ omelei. Ke roi ke buice co auaneni ore ta tei buic, ne co ie ahngane du buice ko, korione kore co sicon’ ore ta ngom’ omelei me nia. Ngei hmengo ma numu re tenen, hmengo co cagoreni buic. *​—1 Peteru 5:8.

13. Korione kore cecene ne hmaiene co yenon’ ore re tei bushengon?

¹³ Hnapan’ ore cecene ne hmaiene co yenon’ ore re tei bushengone co lata me roi. Korione ke hmengo co yeno buic? Roi ke hmengo co yenon’ ore re tei hmengo. Ke hmengo ma ci begi buic, deko co nidi tac, ka se deko co nia ngom’ o buic. (Jeremia 30:11) Deko sa co begi buice hmengo ma ci cenge nia. Deko co aeaceni buice hnen’ ore ta enengoco “inom’ o re hna wie  hnei soad.” (Ta Onatre 12:18) Ie ahnganelo ke hmengo du buic’ ore tane buice co ninen.​—Efeso 6:4; Hebera 12:9-11; ule ore Note 30, ri page 254.

14, 15. Wen’ ore nge nodei morowe co iara ninen’ ore ta cecene ne ta hmaien?

¹⁴ Iesu hna iara ninen’ o Ceceni Nubon, kacene me ushiwa. (Luke 22:42; Ioane 8:28, 29) Se inomelei, nodei tenene co iara ninen’ ore ta cecene ne ta hmaien, wen’ ore melei alatone ni Iehova.​—Efeso 6:1-3.

¹⁵ Ngei bua me morow, bua ngei ci uane ko, ushiwa kore co ninen’ o ceceni bua, ne hmani bua. Ke uanelo ke bua: bua ma ci ninen, melei Iehova, ne ceceni bua, ne hmani bua ci nidi opodo bua. *​—Ta Onatre 1:8; 6:20; 23:22-25.

16. (a) Satana ci ujeni korion’ ore ta warangi, ha thu co rue ore nia? (b) Wen’ ore nge nidi ace di kore ta kani bua co hnoro Iehova?

 ¹⁶ Satana thuni co ujeni ore ta kan, ca osoten’ ore ta warangi ha thu asisini bua co rue ore nia. Satana ha ule ko, se ta ran, ushiwa kore co sere etha ne il’ ore alaien’ osoten, inomei Dina, tei Iakobo me cenew. Ore ta kani Dina deko ma hnoro Iehova. Hnen’ omelei, bone ne fami ni bone nidi hna sheusheu. (Genese 34:1, 2) Ngei ore ta kani bua me deko ma hnoro Iehova, thuni ke buice co ujeni bua co rue o se ace ci kecone kei Nubonengo. Ngei bua ma rue ore nia, melei bua co asheusheuni ore fami ni bua, ne Iehova, ne bua joko. (Ta Onatre 17:21, 25) Hale me nidi ace kore ta kani bua co hnoro Iehova.​—1 Korinito 15:33.

17. Nge kore alatone ni Iehova son’ ore nodei ngome ri fami?

¹⁷ Ngei ore nodei ngome ri fami ni bua ma rue ore alatone ni Madaru, melei buice ci ithua ne hmaiai kore nur. Ngei bua me cahman, hnoronelo ore hmenueni bua, ka ruelo ore roi du bon. Ngei bua me hmenew, hmijoconelo ore cahmanieni bua, ka ninen’ o bone lo. Ruelo inom’ ore hmenewe ci nengocone ri tusi Ta Onatre 31:10-31. Ngei bua me cecene ca hmaien, yenonelo ore re tei bua co hnoro Madaru. (Ta Onatre 22:6) Ngei bua me cecen, “musi roion’ o re” fami ni bua. (1 Timothi 3:4, 5; 5:8) Ngei bua me tenen, ninenelo ore ceceni bua ne hmani bua. (Kolose 3:20) Ka uanelo ko, eje ileodene thuni co menu. Koiko, eje co lata me waam, ne co waamiti ore ta menu ni eje etha xara sa. Nodei ngome ri fami thuni co uni ri Tusi Hmijoc ore ta ininata me ekow, wenei Iehova.