1-3. Ta ngome ci etone ko nge ri pon’ ore tango? Ta hmi ci ie ko nge ri pon’ ore tango?

TUSI HMIJOC ci ie ko ri se rane ha “deko co tango yawe.” (Ahngabot 21:4) Ri Yeno 5, eje hna yenone ko, eje thuni co numu ore waruma tha thu ase ko wene ri itico waruma. Ke onome di, eje ngome ci iara tango ko. (Thu Pule 9:5) Wen’ omelei, hmaiai kore ngome ci etone ko: ‘Ha o kore nodei tango?’

² Eje ci nidi alane co uni ore ne cedi son’ ore hneng’ omelei, ri eziene ma tango ko se kani ej. Eje ngei ci etone ko: ‘Ha o ke bon’ onom? Ilo, bone ci ule inu? Bone thuni co konenatu inu? Inu thuni co ule bone yawe ri se ran?’

³ Etha pengene kore ta ne cedi nodei hmi ci kanon. Numu ta hmi ci ie ko, nodei ngome me roi co hue ri aw, ka nodei ngome me nia co hue ri iei me tha thu bi ko. Osoten’ ore ta hmi ci ie ko, ngei ma tango ko se ngom, bone ha co uiene di, ka co menenge ne ta re kani bone me hna tango da. Ka osoten’ ore ta hmi joko ci ie ko, ri thubenelo ore hna tango, co hnengo eje kei Madaru, ka eje ha co hnapo kabesi ri se hnengome ko, hnengome nore ngom, ca hnengome nore ia.

4. Hmaiaiil’ ore ta hmi ci ie ko nge ri pon’ ore tango?

⁴ Ta hmi ci yeno ej’ ore ta uane me etha pengene ri pon’ ore tango. Ke hmaiaiil’ ore ta hmi ci ie ko, ngei ma tango ko se ngom, ore uieni bone ciroi ko. Ilo, seseko komelei?

5, 6. Eje ci nge di, thubenelo ore hna tango?

⁵ Iehova ha ule ko ci nge ke eje thubenelo ore hna tango. Nubonengo ci ie du eje ko, ngei o se ngome ma tango, ha ase kore ciroi ni bon. Ore tango, melei deko lo ma ciroi yawe. Koiko, ngei ma tango ko se ngom, ore ta ace me nidi ile ri hnore ni bon, ne il’ ore ta uane ni bone hna dan, tangoko ma ciroi ko ri se guhne *. Ngei eje ma tango, eje ha deko ci ule, ha deko ci taedrehngi, ka se ha deko joko ci uan.

⁶ Solomona Doku hna xiwamomone ko, nodei tango “tha ule ko se ac”. Nodei tango tha thuni ko co numu ciran, ka se tha thuni ko co numu ci ekeco. “Deko ruac, ne laelawata, ne ule kacen, ne ngome nata ri pua.” (Ieielo Thu Pule 9:5, 6, 10.) Ri Ta Salamo 146:4, Tusi Hmijoc ci ie ko, ngei o se ngome ma tango, “ta uane ni nubon” ci tango joko.

7. Iesu hna ie ko nge ri pon’ ore tango?

⁷ Lazaro hna kani Iesu. Ri eziene bone hna tango, Iesu hna ie du nodei re kokonieni Nubone ko: “Ha thaeti kei Lazaro, o re kaj.” Iesu deko ma hna alane co ie ko Lazaro ci thaet. Thubenelo ore enengoco omelei, Nubone hna ie ko: “Ha tango kei Lazaro.” (Ioane 11:11-14) Melei bane aehngeni ko, Iesu hna aekoweni ore tango ne il’ ore ci thaet. Nubone deko hna ie ko, Lazaro hado ri aw, ca ile ne ta re kani bone me hna tango da. Nubone deko hna ie ko, Lazaro ile ri iei me tha thu bi  ko. Ka se deko hna ie ko, Lazaro hna roilo yawe ri se hnengome ko. Ore tango ni Lazaro inome lu ko ore bone ci thaet. Osoten’ ore ta kotre ri Tusi Hmijoc ci aekoweni ore tango ne il’ ore ci thaet hnedungon. Ore Tusi Hmijoc ci ie ko, ri eziene hna atangoni Setefano, ha “ile nubone me thaetilu.” (Ta Ruace 7:60) Paulo aposetolo se hna xiwamomone ko, osoten’ ore ta sinemenenge ni Iehova “ha thaet.”​—1 Korinito 15:6.

8. Eje ci ule korione ko, Iehova deko ma hna puze ore ngome ha thu co tango?

⁸ Ri eziene Iehova hna puli Adamu ne Eva, ilo, alatone ni Nubonengo ko bushengone co tango ri se ran?  Tangoko! Iehova hna puli bushengone thu co roi ko e iara oiru, ka ri engetac. Nubonengo se hna kanu bushengone joko ore co alane co iara roi ko e iara oiru. (Thu Pule 3:11) Seseko, ta cecene ne ta hmaiene ci ke co ule ore ta tei bushengone ci mohmalu ne ci tangolu. Melei se ineko du Iehova. Ke ngei Iehova me hna puli eje ha thu waruma tha thu ase ko, tan’ ore nge di eje ci tango?

9. Tan’ ore nge deko ma ushiwa du Adamu ne Eva co hue lewe ore hnei Iehova hna awan?

⁹ Ri hnoren’ ore gadrane Edrena, Iehova hna awa Adamu ko: “Kaka ni nubo ko re wawen’ o re nodei sereie ileodene ri toto ; roi di nubo deko te co kakan’ o re wawen’ o re sereie me bane ule kacen’ o re roi ne il’ o re nia ; ka ri rane nubo ma co kakan’ omelei, nubo ha co . . . tango.” (Genese 2:9, 16, 17) Ore hna awan’ omelei netit, ka deko ma ushiwa du bushengone co hue lewe. Ka se netiti du Iehova co musion’ ore roi, ca ore nia bane so Adamu ne Eva. Kacene bushengone hna ninen’ o Iehova, bushengone co aehngeni ko bushengone ci hmijocon’ ore musi ni Nubonengo, ka bushengone se ci nidi acon’ ore nodei ace hnei Nubonengo hna kanu bushengon.

10, 11. (a) Satana hna amenuni Eva korion? (b) Nidi nia kore hnei Adamu ne Eva hna rue. Tan’ ore nge?

¹⁰ Nianedi ko, Adamu ne Eva hna ureie co cie ore wathebo ni Iehova. Satana hna eto Eva ko: “Ilo, seseko hnei Madaru hna beredone, ko, Hmengo deko co kakan’ o re wawen’ o re nodei sereie ileodene ri toto?” Eva hna cedi bone ko: “Ehne co kakan’ o re wawen’ o re nodei sereie ri toto ; ka Madaru ha hna beredon’ o re  wawen’ o re sereie ri nidin’ o re toto, ko, ‘Hmengo deko te co kakan’ omelei, . . . da tango ke hmengo.’”​—Genese 3:1-3.

¹¹ Hale i Satana di ko: “Hmengo deko co nidi tango ; wen’ o re ha rowone kei Madaru, ko, ri rane hmengo co kakan’ omelei . . . ile me ineko rue makaze ke hmengo, thu ule kacen’ o re roi ne ile ko re nia.” (Genese 3:4-6) Satana hna alane ko Eva co ua sesekone ko, bone thuni co ureie odenon’ ore roi, ca ore nia. Satana hna waiao du bone ri pon’ ore tharan’ ore co cie ore wathebo ni Madaru. Satana hna ie du bone ko, deko lo ke bone co tango. Hale i Eva me kakanelo ore wawen, ka thue Adamu te. Adamu ne Eva ha ule ko, Iehova hna awa bushengone ko deko co kakan’ ore wawen. Deko ma ushiwa kore hna awane hnei Iehova. Ke bushengone hna ke co ninen’ o Nubonengo. Melei ci aehngeni ko, bushengone deko hna hmijocon’ ore Ceceni bushengon, Cecene me cece hnei ciran. Ka bushengone se deko ma numu se ace bane thakuie ore hna rue inomelei!

12. Adamu ne Eva deko hna hmijoc’ o Iehova. Ilo, Nubonengo hna sheusheu ri hnor?

¹² Nidi hna sheusheu kei Iehova co ule ko Adamu ne Eva deko hna hmijoc’ o Nubonengo! Ome ko se aekoweni: Bua hna rue ileoden’ ore hna thuni ni bua ha thu hia roion’ ore tei bua aicahman, ne tei bua cenew. Ke bushengone di ha ci hulolia du bua, ka deko ma rue ore hnei bua hna awa bushengon. Ilo, ri hnore ni bua, nge kore uane bua? Bua ngei ci nidi sheusheu.

13. Iehova hna ie du Adamu ko: “Nubo ha co thothothotho yawe”. Melei ci ie ko nge?

¹³ Tan’ ore Adamu ne Eva hna cie ore wathebo ni Madaru,  bushengone hna luzion’ ore waruma tha thu ase ko. Iehova hna ie du Adamu ko: “Thothothotho ke nubo, ka nubo ha co thothothotho yawe.” (Ieielo Genese 3:19.) Melei ci aehngeni ko, Adamu ha co yewe yawe jeu’ ore rawa. Melei inome ko deko sa te ko hna puli bone kei Iehova. (Genese 2:7) Adamu hna rue ore nia, hale bone ma ha tango: ciroi ni bone ha bun.

14. Tan’ ore nge eje ci tango?

¹⁴ Kacene Adamu ne Eva hna ninen’ o Madaru, bushengone co roi ko onom. Ke tan’ ore bushengone deko hna taedrehngi Nubonengo, bushengone ha rue ngome me nia, ca ma ha tango ke bushengon. Ore nia inom’ o se uedre me nidi tho hnei Adamu ne Eva, ceceni eje ne hmani eje me hna dan, hna kanu ej. Hnapo eje buti ileoden, eje ha nodei ngome me nia so, melei kore tane eje ci tango. (Rome 5:12) Roidi, deko ma alatone ni Iehova son’ ore ngome komelei. Nubonengo deko sa te ko hna alane ko ngome co tango. Tusi Hmijoc ci ie roione ko, tango kore “icuhma.”​—1 Korinito 15:26.

15. Co yenon’ ore seseko ri pon’ ore tango kore ci cengi eje but. Tan’ o re nge eje thuni co ie inomelei?

¹⁵ Ngei eje ma ule ore pengeni eje thubenelo  ore tango, melei inom’ ore ci cengi eje buti wene ri ta yeno me waiao. Tusi Hmijoc ci ie ko, nodei tango deko ci jo, ka se deko joko ci sheusheu. Eje tha thuni ko co nengoce du buic, ka buice se tha thuni ko co nengoce du ej. Eje tha thuni ko co konekatu buic, ka buice se tha thuni ko co konekatu ej. Buice tha thuni ko co rue ore nia du ej. Wen’ omelei, eje deko co pareu o buic. Ke hmaiai kore ta hmi ci ie ko, nodei tango ciroi ko ri se guhne, ka eje thuni co konekatu buic. Korion? Eje co kanon’ ore ta mane du ta naca hmi sone buice co hmi son’ ore tango. Roidi, onome eje ma ha ule ore seseko ri pon’ ore tango, nodei yeno me waiao ha deko co amenuni ej.

16. Nge kore yeno me waiao hmaiaiil’ ore hmi ci ie ri pon’ ore nodei tango?

¹⁶ Lene sen’ ore nodei hmi me waiao, Satana ci amenuni ej. Bone ci alane ko eje co ua sesekone ko, nodei tango be ciroi ko. Numu ta hmi ci ie ko, ngei ma tango ko se ngom, gula sa ni bone ciroi ko. Ilo, hmi ni bua ci yeno bua ore uan’ omelei? Ca nge ci yeno bua ore ci ie kei Tusi Hmijoc ri pon’ ore nodei tango? Satana ci asesekoni ore ta yeno me waiao du ngom, ha thu aithuani bone ne Madaru.

17. Tan’ ore nge ore yeno nore hna iei me tha thu bi ko, ci iala nia Iehova?

¹⁷ Nidi nure kore ta yeno nore hmaiaiil’ ore hmi. Inom’ ore yeno me waiao om: ta hmi ci ie ko nodei ngome me nia, ha co reu buice ri iei me tha thu bi ko, e iara oiru. Ore yeno me waiao omelei ci iala nia Madaru. Deko lo sa te kei Iehova co nue ore ngome co jo inomelei! (Ieielo 1 Ioane 4:8.) Ome ko se aekoweni: Ruelo ore nia ko se morow, hale i ceceni bone me canga ane  ore rue wanine ni bone ri hna iei bane anetitini bon. Nge kore uane bua ri pon’ ore cecen’ omelei? Bua ngei co ie ko nidi hnore me nia ke bon! Ka bua ngei se co ke co ule kaceni bon. Melei lu ko kore alaieni Satana, ko eje co uane inomelei ri poni Iehova!

18. Tan’ ore nge eje deko co pareuon’ ore nodei tango?

¹⁸ Numu ta hmi ci ie ko, ngei ma tango ko se ngom, bone ha uiene di. Ke buice ko, nidi ace ke eje co hmijocone ne co pareuon’ ore nodei uien, wen’ o re buice thuni co ta kani eje me nen, ca ta icuhma ne eje me nidi pareu re ngom. Hmaiai kore ngome ci ua sesekon’ ore yeno me waiao omelei. Buice ci pareuon’ ore nodei tango. Hale buice me ci hmi du nodei tango, ka deko di ma thidilu du Iehova. Ke ua roionelo ke bua ko, nodei tango ha deko ma numu ciran, ca numu ci ekeco. Koiko, eje deko te co pareu o buic. Iehova kore Thu Pupule ne nidi Madaru. Nubonengo so kore eje co thidilu jewe.​—Ahngabot 4:11.

19. Nge kore ta hnahneone so ej, ngei eje ma yenon’ ore seseko ri pon’ ore tango?

¹⁹ Ngei eje ma yenon’ ore seseko ri pon’ ore tango, melei inom’ o re ci cengi eje buti wene ri ta yeno me waiao nore ta hmi. Ka ore seseko melei, ci konekatu eje co carajewe roion’ ore nodei uroi me nidi shede wenei Iehova, ri pon’ ore ciroi ni eje oiru.

20. Ci ie ore nge kore Yeno 7?

²⁰ Ri eziene hna dan, Iopu, ore se sinemenenge ni Madaru, hna etone ko: “Kacene me tango ko re ngom, ilo, nubone co roi yawe?” (Iopu 14:14) Ri Tusi Hmijoc, Iehova ci kanu eje sa kore ne cedi me shed. Eje ha co ule seson’ omelei ri Yeno 7.