1. La kore thu kanu ej’ ore ciroi?

IEHOVA kore “Madaru me ci wieni ko.” (Jeremia 10:10) Nubonengo kore Thu puli eje ka hna kanu ej’ ore ciroi. Tusi Hmijoc ci ie ko: “Buango ha hna popol’ o re nodei ac’ ileoden, ka wen’ o re alaieni buango ha omewaore ko re nodei ac’ ileoden, ka ha hna popole te.” (Ahngabot 4:11) Eje ciroi wen’ ore alatone ni Iehova. Ore ciroi kore kado me nidi ace wenei Madaru.—Ieielo Ta Salamo 36:9.

2. Nge kore eje co rue ha thu co opodon?

² Iehova ci kanu ej’ ore nodei ace me nidi ace son’ ore ciroi ni ej, inom’ ore kodraru ne tin. (Ta Ruace 17:28) Ke Nubonengo se ci alane joko ko, ciroi ni eje co opodon. (Ta Ruace 14:15-17) Nidi ace ke eje co ninen’ ore nodei wathebo ni Iehova, ngei eje me ci alane co opodon.—Isaia 48:17, 18.

3. Ri rane Kaina hna atangoni Abela, nge kore Iehova hna rue?

³ Tusi Hmijoc ci yeno eje ko, ore ciroi ni eje ne il’ ore ciroi no osotene nidi ace ri tadani Iehova. Eje dai ule seson’ ore tu ni Kaina, ore tei Adamu ne Eva me hna dan. Bone nidi hna cenge nia Abela, celua ni bon. Hale i Iehova me awa bone ko, co kone waamion’ ore ci cenge nia bon. Ke Kaina deko hna taedengi Nubonengo. Bone hna “serelo ri poni Abela celuaieni nubon, ne ci  atangoni nubon.” (Genese 4:3-8) Iehova hna hnaelo Kaina ti ore hna atangoni ngom’ omelei. (Genese 4:9-11) Nidi tho kore cenge nia ne ekeco. Ngome thuni co lata me tace ne lata me tho hnen’ ore cenge nia ne ekeco. Ngei o se ngome ma inomelei, tha thuni ko ke bone co numu ore waruma tha thu ase ko. (Ieielo 1 Ioane 3:15.) Ngei eje me ci alane co aopodoneni Iehova, nidi ace ke eje co yenone co hnorone ileoden’ ore ngom.—1 Ioane 3:11, 12.

4. Se wathebo ci yeno ej’ ore nge ri pon’ ore kakailen’ ore ciroi?

⁴ Ri ta milliers kore kenerekene thuben’ omelei, Iehova hna kanu Mose 10 kore wathebo. Lene sen’ ore nodei wathebo omelei, Iehova hna aehngeni ko, nidi ace kore ciroi ri tadani Nubonengo. Se wathebo ci ie ko: “Nubo hage kucokuco.” (Deuteronomi 5:17) Ngei o se ngome ma atangoni o se ngome ri nidi hna uan, ha co atangoni bone te.

5. Nge kore uane ni Iehova ri pon’ ore ci the tubun?

⁵ Nge kore uane ni Iehova ri pon’ ore ci the tubun? Du Madaru, nidi ace joko kore ciroi nore wa morowe ri uri ni hmani bon. Ore wathebo Iehova hna kanu si Iseraela hna ie ko, ngei o se ngome ma aeaceni o se hmenewe me tubun, ka ma tango kore morow, ile me co atangoni ore ngom’ omelei. (Ieielo Esodo 21:22, 23; Ta Salamo 127:3.) Melei ci yeno eje ko, nia kore co the tubun.—Ule ore Note 28, ri page 254.

6, 7. Eje co aehngeni korione du Iehova ko, eje ci nidi acon’ ore ciroi?

⁶ Eje co aehngeni korione du Iehova ko, eje ci nidi acon’ ore ciroi ni eje ne il’ ore ciroi no osoten? Eje deko co rue o se ace ngei me da aniani ore ciroi ni buic. Inome ko, eje deko co uti sixa, ka se deko joko co yo drogue.  Tho son’ ore ciroi ni eje kore co uti sixa ne co yo drogue. Eje thuni co tangoti.

⁷ Iehova kore thu kanu ej’ ore hnengome ne il’ ore ciroi. Koiko, nidi ace ke eje co cumo roion’ ore hnengome ni eje ne il’ ore ciroi ni ej, leu’ ore alatone ni Nubonengo. Ngei ma deko ma rue inomelei, eje ha co aniani eje ko ri tadani Madaru. (Rome 6:19; 12:1; 2 Korinito 7:1) Iehova kore thu kanu ej’ ore ciroi. Eje tha thuni ko co thidilu du Nubonengo, ngei me deko ma nidi ace du eje kore ciroi. Nidi ushiwa ngei kore co nue cil’ ore ta hna acidanon’ omelei me tho. Roidi, ngei eje ma hmijocon’ ore ciroi, eje co tace co nue cil’ ore ta hna acidanon’ omelei. Ka Iehova co konekatu ej.

8. Eje co rue ore nge ha thu deko co aniani ore ciroi ni ej, ca ore ciroi no osoten?

⁸ Eje hna yenone ko, ore ciroi kado me nidi ac. Ka Iehova se ci une du ej. Nubonengo ha ule ko, eje deko co rue o se ace da aniani ore ciroi ni ej, ca ore ciroi no osoten. Inome ko, eje co hnecone ma ci huete loto, ca moto, ca etha pengen’ ore loto. Eje deko ci eledan’ ore ta la eleda me tac, ca ta la eleda me thu apinani ore tango. (Ta Salamo 11:5) Ka eje ci thati rue ore thuni ni ej, ha thu deko co pina kore nia ri hnamenenge ni ej. Iehova hna awa si Iseraela ko: “Ngei nubo ma co aseri o re ’ma kabesi, nubo co ceini wagoren’ ore elen’ o re ’ma ni nubo.” Wen’ ore nge? Wen’ ore ngei o se ngome ma nara sere ri pe ’ma nore hnameneng, du Iehova melei nia ni aca hnameneng.—Deuteronomi 22:8.

9. Nge kore lata ni eje du nodei ia, Iehova ci kedi?

⁹ Nidi ace joko du Iehova kore lata ni eje du nodei ia. Nubonengo ci nue eje co atangoni ore ta ia bane ia, ca ngei o se ia da co atangoni ej. (Genese 3:21; 9:3; Esodo  21:28) Ke deko lo ke eje co nian’ ore ta ia, ca co atangoni buice bane eleda.—Ta Onatre 12:10.

10. Eje ci ule korione ko, ore dra, melei ore ciroi?

¹⁰ Hmijoce kore dra ri tadani Iehova, wen’ ore dra melei ore ciroi. Thubenelo ore hnei Kaina hna atangoni Abela, Iehova hna ie du bone ko: “Ono re lanengoce no re dra no re celuaieni nubo ci kaie du nu wene ri rawa.” (Genese 4:10) Hna aekoweni ore dra ni Abela inom’ ore ciroi ni bon. Ka Iehova hna hnaelo Kaina ti ore hna atangoni Abela. Thubenelo ore hna Ue ri ezieni Noa, Madaru hna auaneni yawe ko, ore dra melei ore ciroi. Nubonengo hna ie du Noa ne fami ni bone ko: “Nodei ia . . . bane ia buhnij. . . . Roi di ono re iaile ne il’ o re ci roi ko, ono re dra komelei, hage co ian.” (Genese 1:29; 9:3, 4) Iehova hna nue du Noa ne fami ni bone co ian’ ore ta ia. Ke Nubonengo hna wathebo buice co ian’ ore gu ia sese ne il’ ore dra, wen’ ore dra, melei ore ciroi.—Ule ore Note 17, ri page 245.

11. Nge kore wathebo ri pon’ ore dra hnei Madaru hna kanu si Iseraela?

¹¹ Ta 800 kore kenereken, thuben’ ore hnei Iehova hna wathebo Noa co ian’ ore dra, Nubonengo hna awa si Iseraela yawe ko: Ore ngome “co cahnewo (cori) ia, ia re woce ca ia dede me bane ia ; co athani o re dran, ne co ceringidelu hnei rawa.” Ka Iehova hna ie joko ko: “Buhnije deko co ia dra.” (Levitiko 17:13, 14) Iehova hna iara alane ko, ko nodei sinemenenge ni Nubonengo co hmijocon’ ore dra. Buice thuni co ian’ ore gu ia, ke deko ma dra te. Ngei buice ma atangoni o se ia bane ia, buice co athani ore dra nore ia omelei ri rawa.

12. Nge kore uane nore nodei kerisiano ri pon’ ore dra?

 ¹² Ri ta kenerekene thubenelo ore tango ni Iesu, ta aposetolo ne ta hmaian’ ore ekalesia no Jerusalema hna eked. Buice hna enengocoti ore ta wathebo co ninenone kore nodei kerisiano. Ore ta wathebo omelei wene ri Cenge Wathebo hnei Mose hna kanu si Iseraela. (Ieielo Ta Ruace 15:28, 29; 21:25.) Iehova hna konekatu nodei aposetolo ne nodei hmaiane co carajewe ko, nidi ace ko kore dra ri tadani Nubonengo, ka nidi ace du nodei kerisiano co hmijocon’ ore dra. Nodei ekalesia ri ezien’ omelei deko ci ian’ ore dra, ka se deko ci kua dra. Ka buice se deko ci ian’ ore gu ia me deko hna athani roion’ ore dra. Ore ci ian’ ore dra, nidi nia hmaiai, inom’ ore ci hne jeu’ ore ta wangom, ca inom’ ore ta ci ru nia nore hnengom. (othewaea) Nodei kerisiano me seseko hna iara ke co ia ne co kuan’ ore dra. Ka eje di onom? Iehova ci alane ko ko, eje co hmijocon’ ore dra.

13. Nodei kerisiano ci nidi cakoron’ ore ci ane dra ri hnengome ni buic. Wen’ ore nge?

¹³ Ilo, melei ci ie joko ko, nodei kerisiano co nidi cakorone ore ci ane dra ri hnengome ni buic? Egewa. Iehova ci awa eje ko, deko co ian’ ore dra, ka se deko co kuan’ ore dra. Ngei o se droketra ma ie du bua ko deko co kua kec, ilo, bua co ane ore kua me kec’ omelei ri hnengome ni bua, lene sen’ ore la dra? Tangoko! Koiko, inom’ ore eje ci nidi cakorone co ia ne co kuan’ ore dra, eje se ci nidi cakoron’ ore ci ane dra ri hnengome ni ej.—Ule ore Note 29, ri page 254.

14, 15. (a) Nge kore uane ni nodei kerisiano ri pon’ ore ciroi? (b) Ilo, nodei kerisiano ci cie ore wathebo ni Madaru ha thu co aiweni ore ciroi ni buic? Dai ie hmaiaionelu.

¹⁴ Ka ngei o se droketra ma ie di du eje ko, eje ha co  tango ngei eje ma nidi ke co ane dra ri hnengome ni ej? Pani etha xara sa ni eje co ureie co ninen’ ore wathebo ni Madaru ri pon’ ore dra. Nodei kerisiano ci nidi hmijocon’ ore ciroi, wen’ ore melei kado wenei Madaru. Wen’ omelei buice ci there kan’ ore ta la rue ni ta droketra, bane aroini ore ta uedre ni buic. Ke buice ci nidi ke co ane dra ri hnengome ni buic.

¹⁵ Eje ci thati rue ore thuni ni ej, ha thu co engetace ko ke ej. Ke eje ci nidi ke co ane dra, wen’ ore dra, melei ore ciroi. Ka hmijoce kore dra ri tadani Madaru. Nidi ace kore co ninen’ o Iehova ri pon’ ore co tubuhnidi co aiweni ore ciroi ni ej, ne co cie ore wathebo ni Nubonengo. Iesu hna ie ko: “Ngei me alane ko re ngome co awarumani o re ciroi ni nubon, nubone co atakoni ; ka ono re ngome ci atakoni o re ci roi ni nubone tane re inu, co uni yawe komelei.” (Mataio 16:25) Eje ci alane co ninen’ o Iehova wen’ ore eje ci hnoro Nubonengo. Madaru ha ule ore roi so ej. Ka inomei Nubonengo, eje ci nidi acone ne ci hmijocon’ ore ciroi.—Hebera 11:6.

16. Wen’ ore nge nodei sinemenenge ni Madaru ci ninen’ o Nubonengo?

¹⁶ Nodei sinemenenge ni Madaru ci nidi alane co ninen’ ore wathebo ri pon’ ore dra. Buice deko ci ia ka se deko ci kuan’ ore dra. Ka buice se deko joko ci ane dra ri hnengome ni buic, ngei me hna musione di hnei droketra. * Roidi, buice ci kedi osoten’ ore ta la rue ni ta droketra, bane aroini ore ta uedre ni buic. Nodei sinemenenge ni Madaru ci ua sesekone ko, ore Thu Pupul’  ore ciroi ne il’ ore dra, ha ule ore roi so ej, ri poni eje ko. Ka bua, bua ci uane ko Nubonengo ha ule ore roi so bua?

17. Sa so kore la ruacon’ ore dra Iehova hna nue si Iseraela co rue. Nge kore la ruacon’ omelei?

¹⁷ Ore Cenge Wathebo hnei Madaru hna kanu si Iseraela lene sei Mose, hna ie inome ko: “Hulo ri dra ko re ci roi no re hnengom ; ka inu ha hna kanu buhnije ri pon’ o re atarau bane itico waruman’ o re ta ci roi ni buhnij ; wen’ o re bane itico waruman’ o re ci roi ko re dra.” (Levitiko 17:11, MN) Ngei si Iseraela ma rue ore nia, thuni ke buice co sibo Iehova co nuebut’ ore ta nia ni buic, ngei buice ma hulon’ o se ia. Ore thu hule co athani ore dra me waami so nore ia, ri pon’ ore atarau nore hneruala. Melei so kore la ruacon’ ore dra, Iehova hna nue si Iseraela co rue.

18. Nge kore eje ci uroione lene sen’ ore hule ni Iesu?

¹⁸ Iesu hna atakoni ore wathebo ri pon’ ore ci hulon’ ore ta ia. Korion? Iesu hna kanon’ ore ciroi ni Nubon, ca dra ni Nubon, bane hule sone i Iehova co nuebut’ ore ta nia ni ej. (Mataio 20:28; Hebera 10:1) Nidi ace kore ciroi ni Iesu: Iehova hna aroini Iesu lo yawe. Ka lene sen’ ore hule ni Iesu, Nubonengo thuni co kanon’ ore waruma tha thu ase ko, son’ ore nodei ngom’ ileoden.​—Ioane 3:16; Hebera 9:11, 12; 1 Peteru 1:18, 19.

19. Eje co rue ore nge ha thu “deko co te eje ko re dra no se ngom”?

¹⁹ Iehova hna kanu ej’ ore ciroi. Ka eje ci tohnaroiti ore kado omelei me nidi shed. Ore opodone ni eje ci ujeni eje co ie jeu’ ore nodei ngome ko, thuni ke buice  co numu ore waruma tha thu ase ko, ngei buice ma une du Iesu. Eje ci hnoron’ osoten, ka eje ci rue ore thati thuni ni ej, ha thu aehngeni du buice ko, korione ke buice co numu ore waruma tha thu ase ko. (Ezekiela 3:17-21) Hale me thuni ke eje co ie inomei Paulo aposetolo ko: “Deko co te inu ko re dra no se ngom. Wen’ o re inu deko hna ngoma tho hna aehngeni du buhnij’ o re uatone ni Madaru ileoden.” (Ta Ruace 20:26, 27) Wen’ omelei, pul’ o Iehova lo ke eje jeu’ osoten. Ka ielo ke eje du buice ko, nidi ace kore ciroi ri tadani Nubonengo. Inomelei eje co aehngeni ko, eje ci hmijocon’ ore ciroi ne il’ ore dra.