1, 2. Dai ielo ore ta yele nore ta kani Iehova.

LA KORE ngome bua ci alane co kane ne il? Ore ngome bua ci nidi hnorone ka ci etaedrehngio ne bua. Bua ci alane co kan’ ore ngome me roi re hnor, ne lata me roi.

² Numu ta ngome Iehova ci ureie ha thu co kani Nubonengo, inomei Aberahama. Bone hna kani Iehova. (Isaia 41:8; Iakobo 2:23) Iehova se hna hnoro Davita joko. Nubonengo hna ie ri poni Davita ko, bone ‘ngome leu’ o re hnore ni Nubonengo.’ (Ta Ruace 13:22) Ka perofeta Daniela se ngome me “hna nidi hnoron” hnei Iehova.​—Daniela 9:23.

3. Tan’ ore nge Aberahama, Davita ne Daniela hna kani Iehova?

³ Hna nge kei Aberahama, Davita ne Daniela ha thu co kani Iehova? Iehova hna ie du Aberahama ko: “Nubo hna taedengi o re lanengocego.” (Genese 22:18) Iehova co Kan’ ore ngome me lata waiami ne ci ninen’ o Nubonengo. Iehova se thuni joko co Kan’ o se co nod. Nubonengo hna ie ahngane du si Iseraela ko: “Taedengi o re lanengocego, ile inu co Makaze ni buhnij, ka buhnije co nodego.” (Jeremia 7:23) Ngei bua me ci nidi alane co kani Iehova, ninen’ o Nubonengo lo.

4, 5. Iehova ci konekatu korion’ ore nodei kani Nubonengo?

⁴ Tusi Hmijoc ci ie ko, Iehova ci there co konekatuon’ ore ngome me ci nidi hnoro Nubonengo. (2 Ta Rane No Re Nodei Doku 16:9) Ri Ta Salamo 32:8, Iehova ci ie sesekone du nodei kani Nubonengo ko: “Inu co yeno nubo (angomenatani nubo), ne co anetitini du nubo o re lene bane huone ke nubo ; inu co ininata nubo, ono re waegogoiego co ile ri poni nubo.”

⁵ Numu sa kore icuhma ne eje ci ke ko, eje co kani Madaru. Roinedi ko, Iehova ci alane co cagoreni ej. (Ieielo Ta Salamo 55:22.) Eje ci sinemenenge ni Iehova hnen’ ore hnore sa odene ni ej, wen’ ore eje kani Nubonengo. Eje ci menenge seseko du Madaru, kacene me ushiwa di. Ka eje ha ule ko, Iehova co konekatu ej, inom’ ore hnei Nubonengo hna konekatu Davita. Bone hna ie ri poni Madaru ko: “Ile inu deko co uke (cara) wen’ o re nubonengo ha ile ri gula natago.” (Ta Salamo 16:8; 63:8) Ke Satana ci rue di ore nge, ha thu deko ke eje co kani Madaru?

6. Satana ci iala nian’ ore ngome ti ore nge?

⁶ Ri Yeno 11, eje hna yenone ko, Satana hna iala nia Iehova ko, Iehova thu waiao. Satana se hna iala nia Iehova joko ko, Nubonengo deko ma netit, wen’ ore Nubonengo deko hna nue Adamu ne Eva co ureie ore roi, ne il’ ore nia. Ore tusi Iopu ci yeno eje ko, Satana se ci iala nian’ ore ngome ci alane co kani Madaru.  Satana ci ie ko, ngome ci sinemenenge ni Madaru ha thu co kedi hnahneone so, ke deko ma hnen’ ore ci hnoro Nubonengo. Satana se ci ie joko ko, bone thuni co ujeni etha pengen’ ore ngom, ha thu co sere etha ne Madaru. Eje dai ule sesonelo ko, korione kei Iehova hna cagoreni Iopu, ka nge di kore tu ni Iopu bane so ej.

7, 8. (a) Nge kore uane ni Iehova ri poni Iopu? (b) Satana hna ie ore nge ri poni Iopu?

⁷ La kei Iopu? Iopu, melei se cahmane hna ciroi ri ta 3600 kore kenerekene hna dan. Iehova hna ie ko ri ezien’ omelei, deko se ngome me inomei Iopu ome ri ten. Nidi hna hmijoc’ o Iehova kei Iopu, ka bone se hna kuon’ ore nia. (Iopu 1:8) Nidi hna kani Madaru ke bon.

⁸ Ke Satana di hna ie ko, Iopu ci sinemenenge ni Madaru tan’ ore bone ci there ore alaieni bone ko. Satana hna ie du Iehova ko: “Ilewao, buango tangoko hna ca kage guru nubon, ne gurul’ o re hnamenenge ni nubon, ne gurul’ o re nodei ac’ ileodene nubone ma numu . . . bua ha hna hnahneon’ o re ruace no re rue aranine ni nubon, ka ha manabote ri node ko re so ace ni nubon. Kacene bua da co ngeni o re arathemie (aranine) ni bua onome ne rueton’ o re so ac’ ileodene nubone ha numu, kacene nubone ha co canga iala nia bua.”​—Iopu 1:10, 11.

9. Nge kore Iehova hna nue Satana co rue?

⁹ Satana hna iala nia Iopu ko, bone ci sinemenenge ni Iehova sone so thu kedi hnahneon. Satana hna ie joko ko, bone thuni co asereni Iopu co sinemenenge ni Madaru. Iehova deko hna etaedrehngio  ne Satana. Ke Nubonengo hna nue Satana co tubuhnidi Iopu. Melei bane aehngeni ko, Iopu ci hnoro Madaru, ca deko.

10. (a) Satana hna nia ngom’ o Iopu korion? (b) Nge kore hnei Iopu hna rue?

¹⁰ Danelo, Satana hna ujeni ngome co atangoni, ca co kaenon’ ore nodei ia ni Iopu. Hale bone me atangonilu te ore hmaiaiil’ ore sinemenenge ni Iopu. Ha deko lo ace kei Iopu. Ri bun, Satana hna atangoni ileoden’ ore re tei Iopu hnen’ ore yengu me tac. Roidi, Iopu hna menenge seseko ko du Iehova. Deko sa te kei Iopu hna iala nia Madaru.​—Iopu 1:12-19, 22.

11. (a) Satana hna nia ngom’ o Iopu yawe korion? (b) Ka nge kore hnei Iopu hna rue?

¹¹ Deko ma melei so kore hnei Satana hna rue. Bone hna iala nia Madaru. Bone hna ie du Nubonengo ri poni Iopu ko: “Bua da . . . rueton’ o re ta dune ni nubone ne iaile ni nubon, ile nubone co canga iala nia bua ri parowo ni bua.” (Iopu 2:5, 7) Hale i Satana me auedreni Iopu lu. Roidi, Iopu hna menenge seseko ko du Iehova, kacene me nidi hna jo ke bon. Iopu hna ie ko, bone co sinemenenge ni Iehova ko, ca pina ri tango!​—Iopu 27:5.

12. Iopu hna aehngeni korione ko, Satana thu waiao?

¹² Tha ule ko kei Iopu ore ta hna iala nia bone hnei Satana. Bone se tha ule ko joko ore tane bone nidi hna jo. Bone hna uane ko, wenei Iehova kore nodei ushiwa ni bon. (Iopu 6:4; 16:11-14) Roidi, Iopu hna menenge seseko ko du Madaru. Whan’ omelei, ha seseko  ko, Iopu deko hna there ore alaieni bone ko. Bone hna kani Madaru wen’ ore bone ci nidi hnoro Nubonengo. Waiao kore nodei hna iala nia bone hnei Satana!

13. Nge kore tharan’ ore hnei Iopu hna menenge seseko du Madaru?

¹³ Seseko, Iopu tha ule ko ore hnei Satana hna ie du Iehova ri aw. Roidi, bone hna menenge seseko du Madaru. Ka bone hna aehngeni roione ko, tho kei Satana. Wen’ omelei Iehova hna hnahneo Iopu wen’ ore bone hna menenge seseko du Nubonengo.​—Iopu 42:12-17.

14, 15. Satana ci iala nian’ ore ngome ri pon’ ore nge?

¹⁴ Ore ta tubuhnidi hna pina du Iopu ci yeno ej’ ore ta ace me nidi ac. Onom, Satana ci iala nia eje ko, eje ci sinemenenge ni Iehova wen’ ore Nubonengo co hnahneo ej. Ri ezieni Iopu, Satana hna ie ko: “Co thati kanone ko re ngom ileoden’ o re ace nubone ha numu bane win’ o re ci roi ni nubon.” (Iopu 2:4) Koiko, Satana deko ma hna iala nia Iopu so. Bone hna ie ko, ileoden’ ore ngome ci there ore alaieni buice ko. Ta handredre kore kenerekene thubenelo ore tango ni Iopu, Satana hna iara iala nia Iehova ko. Ka bone hna iara iala niane joko ore nodei sinemenenge ni Nubonengo. Ome kore ci asesekoni omelei, ri Ta Onatre 27:11, Madaru hna ie ko: “Tenego, ngome nata bot, ne akatrani o re hnorego, inu ha thu cedi nubon’ o re thu iala nia nu.”

¹⁵ Bua thuni co ureie co ninen’ o Iehova, co kani  Nubonengo ne co menenge seseko du Nubonengo. Hale bua co asesekoni ko, Satana thu waiao. Seseko, bua ngei hmaiai kore ta ace bua co cejane ri ciroi ni bua, bane kani Madaru. Roidi, melei kore hna ureie me deko te co sheusheuti ke bua! Ka melei kore hna ureie hnei bua me nidi ac. Satana ci ie ko, bua deko co menenge seseko du Madaru ngei ma pina du bua kore ta ushiwa. Ka Satana se ci there co amenuni ej, ha thu deko ke eje co sinemenenge ni Madaru. Nge kore ta la rue ni bon?

16. (a) Nge kore ta la rue ni Satana ha thu akedini ore ngome co sinemenenge ni Iehova? (b) Satana thuni co akedini bua korione co sinemenenge ni Iehova?

¹⁶ Satana hmaiai kore nodei la rue, ha thu co aniani ore ci e ala eje ne Madaru. Bone ci nidi apareuni eje “inom’ o re liona ci hali shrongo”, thu co ia ej. (1 Peteru 5:8) Deko lo ke bua co tija: ta kani bua, ca ta fami ni bua, ca ta ngom’ osotene ngei co tubuhnidi co akedini bua co yenon’ ore Tusi Hmijoc, ne co rue ore roi. Bua ngei ci uane ko, bua inom’ ore hna “nia ngomon.” * (Ioane 15:19, 20) Ome te, Satana ci ureie bone ko “bane angela re neren”: Satana ci tubuhnidi co amenuni ej, ha thu deko ke eje co ninen’ o Iehova. (2 Korinito 11:14) Ka Satana se ci alane ko, eje co ua sesekone ko, deko sa ko ma ekowe ke eje co kani Madaru.​—Ta Onatre 24:10.

17. Nge kore tane eje ci ninen’ o Iehova?

¹⁷ Eje ma ci ninen’ o Iehova, melei eje ci asesekoni ko, Satana thu waiao. Nge kore co konekatu eje co ninen’ o Madaru? Tusi Hmijoc ci ie ko: “Nubo co ala Iehovango Madaru ni nubo ne il’ o re hnore saodene ni nubo, ne il’ o re uieni saodene ni nubo, ne il’ o re engetace saodene ni nubo.” (Deuteronomi 6:5) Eje ci ninen’ o Iehova wen’ ore eje ci hnoro Nubonengo. Ka ngei eje ma nidi hnoro Madaru, eje co nidi alane co rue ore alatone ni Nubonengo. Ioane aposetolo hna xiwamomone ko: “Ome ko re ci hnoro Madaru, ko, eje co ninen’ o re nodei wathebo ni nubonengo; ka deko ma nure ko re nodei wathebo ni nubonengo.”​—1 Ioane 5:3.

18, 19. (a) Iehova ci ie ko numu ta ace me tho. Nge kore ta ac’ omelei? (b) Deko sa te kei Iehova co sibo eje co rue o se ac, eje me tha thuni ko co rue. Eje ha ule korion?

 ¹⁸ Iehova ci ie ko numu ta ace me tho. Nge kore ta ac’ omelei? Ore encadré “Keconelo ke bua o re Iehova ci kecon” ci ie ahngan’ ore ta ac’ omelei. Whanelo, bua ngei co uane ko, deko ma nia kore ta ac’ omelei. Ke ieielo ore so kotre ri Tusi Hmijoc ci aehngeni ore nia il’ ore nodei ac’ omelei. Ka dai ua roionelo ke bua ore so kotr’ omelei, ha thu carajewe ko, ngome nata kore ngome ci ninen’ ore nodei wathebo ni Iehova. Ka bua ngei se co ule ko, nidi ace ke bua co cejan’ ore ta lata ri ciroi ni bua. Ngei bua ma rue inomelei, bua co uni ore dongodongo, ne opodone me  ile sen’ ore nodei kani Madaru. (Isaia 48:17, 18) Seseko ushiwa, ke bua thuni co ninen’ ore nodei wathebo ni Iehova. Korione ke eje co ua sesekon’ omelei?

¹⁹ Deko sa te kei Iehova co sibo eje co rue o se ac, eje me tha thuni ko co rue. (Deuteronomi 30:11-14) Iehova nidi Kani ej. Ka Nubonengo ha nidi ule kacen’ ore pengeni ej, ri poni eje ko. Nubonengo ha ule ore ta singene me roi, ne ta lata me tho ni ej. (Ta Salamo 103:14) Ome kore eamo ni Paulo aposetolo bane so ej: “Thethelako (Netitiko) kei Madaru o re deko co nue buhnije bote jeu’ o re tubunide buhnije me tha thu ni ko ; roi di nubonengo co lae bane sicone ma ci tubunid, ha thu tace ke buhnije co kuni.” (1 Korinito 10:13) Eje thuni co ua sesekone ko, Iehova co kanu ej’ ore engetace bane rue ore roi. Nubonengo co kanu bua ore “hmajiadraile no re nen.” Melei ci ie ko, Iehova co kanu bua ore nene me ile ri pon’ ore nene ni bua ko, bane konekatu bua co kuni ore nodei ushiwa. (2 Korinito 4:7) Ri ta ushiwa ni bon, Paulo hna ule ore ne ekonekatu ni Iehova ci aengetaceni bon. Wen’ omelei bone hna ie ko: “Inu ha thuni co ruʼ o re nodei acʼ ileodene hnei Nubonengo o re thu aengetaceni nu.”​—Filipi 4:13, MN.

20. Nge kore ta singene me roi eje co ruacon? Tan’ ore nge eje co ruacon’ ore ta singene me roi omelei?

²⁰ Ngei eje me ci alane co kani Iehova, nidi ace ke eje co haroilu hna rue ore nia ri tadani Nubonengo. Ke melei deko ma kueil. (Rome 12:9) Nodei kani Madaru  ci hnoron’ ore Madaru ci hnoron. Ta Salamo 15:1 ca pina ri 5 (ieielo) ci ie pengeni buic’ omelei. Nodei kani Iehova ci yose ore tu ni Nubonengo. Buice ci ruacon’ ore “ci ran, ne ci opodon, ne dongodongo, ne ci kuni iwon, ne ci hnon, ne lata me roi, ne ci un, ne lata me nidra, ne ci kone waamion.”​—Galatia 5:22, 23, MN.

21. Nge kore co konekatu bua, ha thu co ruacon’ ore nodei singene me roi Iehova ci hnoron?

²¹ Nge kore co konekatu bua, ha thu co ruacon’ ore nodei singene me roi omelei? Nidi ace ke bua co yenon’ ore nodei ace Iehova ci hnoron. Wen’ omelei, ieielo ne yenonelo ore Tusi Hmijoc ri nodei ran. (Isaia 30:20, 21) Ngei bua ma rue inomelei, bua co nidi hnoro Iehova. Ka ngei bua ma nidi hnoro Iehova, ile bua co nidi alane co ninen’ o Nubonengo.

22. Nge kore tharane bua co kedi, ngei bua ma ninen’ o Iehova?

²² Ma cejan’ ore ta lata ni ej, melei inom’ ore ci cil’ ore ta kokoe me hneren, ka ci kokoeone di ore ta kokoe me kabesi. Tusi Hmijoc ci ie ko, nidi ace ke eje co cil’ ore “ngome me wenekoda” ka co kokoenelo di ore “ngome me kabesi.” (Kolose 3:9, 10) Seseko, ushiwa ngei kore co rue inomelei. Roidi, ngei eje ma ninen’ o Iehova, co “hmaiai ko re tharan” bane so eje wenei Nubonengo. (Ta Salamo 19:11) Melei kore hnei Madaru hna ie sesekone du ej. Wen’ omelei ninen’ o Iehova lo ke bua, ne asesekonilo ko, Satana thu waiao! Sinemenenge ni Iehova lo ke bua, wen’ ore bua ci hnoro Madaru, ke deko ma sone so ore tharane bua co kedi. Ngei bua ma rue inomelei, bua co nidi kani Madaru.