1, 2. (a) Du bua, wen’ ore nge kado me nidi shede kore ci hne? (b) Wen’ ore nge nidi ace kore co ule ore ci ie kei Tusi Hmijoc ri pon’ ore ci hne?

NIDI waami kore ten’ ore aw, eje ma ci ulelo ore “univers” ileoden. Du Iehova, ore nodei co node inom’ o se wathera ri bagetr. (Ta Salamo 115:15; Isaia 40:15) Seseko, nidi waami ngei ke ej, eje ma ci ulelo ore “univers”. Roidi Ta Salamo 145:18, 19 ci ie ko: “Ha co acetone kei Iehovango du buic’ ileoden’ ore ci tua (hne du) nubonengo ri seseko. Nubonengo co aiuni ore alaien’ o re nodei ngome ci pareuo nubonengo ; ka nubonengo co caceuon’ o re (taedrehngi ore) la kaie ni buic, ne co awarumani buic.” Koiko, Iehova, ore Thu Pupul me thati thuniton, ci alane co aceno ej. Nubonengo ci alane co Kani ej! Ka Nubonengo se ci alane joko co taedrehngi ore nodei ci hne ni ej! Madaru ci nidi ac’ o eje etha xara sa lene ri ci hne ni ej. Melei ko se kado me nidi hmajiadra wenei Nubonengo.

² Ke Iehova co taedrehngi eje so, ngei eje ma ci nengoce du Nubonengo leu’ ore alatone ni Nubonengo. Koiko, eje dai ule sesonelo ore ci ie kei Tusi Hmijoc ri pon’ ore ci hne.

3. Wen’ ore nge netiti ke bua co hne du Iehova?

³ Iehova ci alane ko, bua co nengoce du Nubonengo  ri ci hne. Eje ci ule korion? Ieielo Filipi 4:6, 7. Dai ua roionelo ore Madaru ci eamo bua co rue: ore Doku nore awe ne ten’ ore awe ileoden, ci uato bua. Ka Nubonengo ci alane ko, bua co thati ie du Nubonengo ore ta uane ri hnore ni bua, ne ta nure ni bua.

4. Ngei bua ma iara hne du Iehova, ore eala hmengo ha co nidi thawalan. Wen’ ore nge?

⁴ Ore ci hne melei co aengetaceni ore ci eala bua ne Iehova. Melei inom’ ore rue kan. Ngei bushengone ma iara ethanatati ore ta uane ne ta nure ni bushengon, ha co nidi thawalane kore ci eala bushengon. Ekowe sese joko ngei eje ma ci hne du Iehova. Ri Tusi Hmijoc, Madaru ci ie du bua ore uane ni Nubonengo, ne ta uane ri hnore ni Nubonengo, ne il’ ore nodei ace Nubonengo co rue ri eziene co pina. Thuni ke bua co nengoce du Madaru ri nodei ezien. Thuni ke bua joko co ie du Nubonengo ore ta uane ri cerugoce nore hnore ni bua. Ngei bua ma rue inomelei, ha co nidi thawalane kore eala bua ne Madaru.​—Iakobo 4:8.

5. Eje ci ule korione ko, Iehova deko ma taedrehngi ore nodei ci hne?

⁵ Ilo, Iehova ci taedrehngi ore nodei ci hne? Tangoko. Ri ezieni perofeta Isaia, Nubonengo hna ie du si Iseraela ko: “Ka ngei buhnije co ha waace (hmaiai) hne du nu, inu deko co taedengi ; ha cece hnei dra ko re ta aranine ni buhnij.” (Isaia 1:15) Ngei eje ma deko ma hnecon, eje thuni co rue o ta ace me co aithuani eje ne Iehova. Hale me deko co taedrehngi ore ta ci hne ni eje kei Nubonengo.

6. (a) Wen’ ore nge nidi ace kore ci une? (b) Bua co asesekoni korione ko bua ci une du Madaru?

 ⁶ Nidi ace ke eje co une du Iehova, ngei eje me ci alane ko Nubonengo co taedrehngi ore nodei ci hne ni ej. (Mareko 11:24) Paulo aposetolo ci ie ahngane ko: “Ngei me tako ko re ci une tha thu ni ko co aopodoneni nubonengo ; wen’ o re nidi ace ke nubon’ o re ci huebote du Madaru co une, ko, nubonengo onekoil, ka thu lae dune du buic’ o re ci nidi there nubonengo.” (Hebera 11:6) Ke deko ma kueile kore co ie ko, eje ci une du Madaru. Nidi ace co asesekoni omelei ri ci ninen’ o Iehova ri nodei ran.​—Ieielo Iakobo 2:26.

7. (a) Wen’ ore nge eje co lata me waiami ne lata me hmijoc, ngei eje ma ci hne du Iehova? (b) Eje co aehngeni korione ko eje numu hnore me seseko ri eje ci hne?

⁷ Eje co lata me waiami ne co lata me hmijoc, ngei eje ma ci hne du Iehova. Wen’ ore nge? Kacene ko eje co nengoce jeu’ o se doku ca jeu’ o se necen, eje co lata me hmijoc. Iehova kore Madaru me Thati Thuniton.  Koiko, eje co nidi lata me hmijoc ne nidi lata me waiam, ngei eje ma ci nengoce du Iehova. (Genese 17:1; Ta Salamo 138:6) Nidi ace joko ke eje co nengoce du Iehova ne il’ ore nidi hnore ni ej. Ngei eje ma numu hnore me seseko, eje deko co iara ie ore ta enengoco me ekowe sese so du Nubonengo.​—Mataio 6:7, 8.

8. Ngei eje ma ci hne son’ o se ac, nge kore eje co rue?

⁸ Ngei eje ma ci hne son’ o se ac, nidi ace joko ke eje co hue leu’ ore ta ci hne ni ej. Inome ngei ko, ngei eje ma sibo Iehova co kanu ej’ ore ta ace me ekowe son’ ore ciroi, eje deko co leize. Eje deko co ahnguni ko Iehova co kanu ej’ ileoden’ ore ace son’ ore ciroi ni ej, ngei eje me thuni co ruac. Eje co ruace tac, ka co kedi ore ruace ci kanu ej, me thuni ke eje co rue. (Mataio 6:11; 2 Thesalonaika 3:10) Ka ilo, ngei eje ma ci hne du Iehova thu co konekatu eje co haroilu hna rue o se ace me nia? Melei eje co sicon’ ore nodei ngome ne nodei guhne me thuni co tubuhnidi ej. (Kolose 3:5) Onom, eje dai cedi sesonelo ore ta hnenge nore hmaiaiil’ ore ngom, ri pon’ ore ci hne.

9. (a) Eje co hne du la? (b) Ioane 14:6 ci yeno ej’ ore nge ri pon’ ore ci hne?

⁹ Eje co hne du la? Iesu hna yeno eje co hne du “Cecewangoiehnij’ ile ri awe.” (Mataio 6:9) Iesu hna ie joko ko: “Inu ko re len, ne ile ko re seseko, ne ile ko re waruma. Deko ngome ci hue du Cecewaiene, me deko hna lene sego.” (Ioane 14:6) Koiko, eje co hne du Iehova so. Ka eje co hne lene sei Iesu, ri yeleni Iesu. Melei ci ie ko nge? Ngei eje me ci alane ko Iehova co kedi ore nodei ci hne ni ej, nidi ace ke eje co hmijocon’ ore hnapane  hnei Nubonengo hna kanu Iesu. Eje hna yenone hna dane ko, Iesu hna huelu ome ri tene ha thu co awarumani eje wene ri nia ne tango. (Ioane 3:16; Rome 5:12) Ka Iehova se hna ure Iesu co Toka-Thu-Hule ne Thu Hnengon.​—Ioane 5:22; Hebera 6:20.

10. Ilo, sa so kore la menenge ni eje ma ci hne?

¹⁰ Ilo, sa so kore la menenge ni eje ma ci hne? Tangoko. Iehova deko ma ci ie du eje co aseri kared, ca co meneng, ca co ser, ngei eje ma ci hne. Tusi Hmijoc ci yeno eje ko, eje thuni co hne du Madaru ri etha pengen’ ore la menenge me ci ahmijoceni Madaru. (1 Ta Rane No Re Nodei Doku 17:16; Nehemia 8:6; Daniela 6:10; Mareko 11:25) Deko ma nidi ace kore la menenge ni eje ri ci hne du Iehova. Nubonengo ci nidi acon’ ore la uane ni eje ri ci hne. Eje thuni co hne ri ci nengoce ca co hne paekoc. Eje thuni co hne ri etha pengen’ ore guhne, ka ri etha pengen’ ore kacene nore rane ne ridr. Eje thuni co ua sesekone ko, Iehova co taedrehngi ej, kacene me deko ma taedrehngi eje kore ngom.​—Nehemia 2:1-6.

11. Eje thuni co ie ore nge du Iehova?

¹¹ Eje thuni co hne son’ ore nge? Eje thuni co hne du Iehova son’ ore etha pengen’ ore ac, ngei me icojeu ne il’ ore alatone ni Nubonengo. Tusi Hmijoc ci ie ko “ngei eje ma sibon’ o se ace leu’ o re alaieni nubonengo, nubonengo ci canaeo xej.” (1 Ioane 5:14) Ilo, eje thuni co hne son’ o se ace me ile ri hnore ni ej? Egewa. Eje ma ci hne du Iehova, melei inom’ ore eje ci nengoce du se nidi kani ej. Eje thuni co ie du Nubonengo ore nodei unia ni ej, ne nodei uane ri hnore ni ej. (Ta Salamo 62:8) Eje thuni co sibo Madaru ore uiewaieni hmijoc me nene ni Nubonengo, eje ha thu rue ore roi.  (Luke 11:13) Eje se thuni joko co sibo Iehova ore waetea ni Nubonengo, bane ureie roion’ ore ta hna uan, ne bane sere etha ne il’ ore nodei ushiwa. (Iakobo 1:5) Nidi ace ke eje co sibo Iehova co nue ore nodei nia ni ej. (Efeso 1:3, 7) Ka se nidi ace joko ke eje co hne son’ osoten, inom’ ore fami ni ej, ne ta ace re celuaiene ne re isingene ni eje ri ekalesia.​—Ta Ruace 12:5; Kolose 4:12.

12. Nge kore ace me hna dane eje co hne son?

¹² Nge kore ace me hna dane eje co hne son? Iehova ne il’ ore alatone ni Nubonengo. Netiti kore co oreone du Iehova ne il’ ore nidi hnore ni ej, ri pon’ ore nodei ace Nubonengo ci rue so ej. (1 Ta Rane No Re Nodei Doku 29:10-13) Eje ci ule korion? Ri eziene Iesu hna ome ri ten, Nubone hna yeno nodei re kokonieni Nubone co hne. (Ieielo Mataio 6:9-13.) Iesu hna ie ko, co hne dane ha thu co ahmijoceni ore yele ni Madaru. Ka co hne joko ha thu co shedolu kore Baselaia ni Madaru, ne co iu kore alatone ni Nubonengo ri ten’ ore awe ileoden. Iesu hna ie ahngane ko, eje thuni co hne son’ ore nodei sibo ni ej, ngei eje ma hna hne dane son’ ore nodei ac’ omelei me nidi ac. Ngei eje ma ci hne dane son’ ore yele ni Iehova ne il’ ore alatone ni Nubonengo, melei eje ci aehngeni ko, nge kore nidi ace du ej.

13. Ilo, ta ci hne ni eje co iw?

¹³ Ilo, ta ci hne ni eje co iw? Deko ma cedi kei Tusi Hmijoc. Ore ta ci hne ni eje thuni co iw, ca co gukokode leu’ ore eziene eje ci hne. Inome ko, dan’ ore co kodraru ta ci hne ni eje gukokode lu so. Ke eje thuni co hne iwe du Iehova ngei eje ma ci ore du Nubonengo, ca ngei eje ma ci ie du Nubonengo ore ta ushiwa ni ej. (1 Samuela 1:12, 15) Eje deko ci hne iwe bane aehngeni  eje ko du ngom, inom’ ore ta ngome hna rue ri ezieni Iesu. (Luke 20:46, 47) Deko ma ci aopodoneni Iehova kore ta la hne omelei. Ore nidi ace so Nubonengo ko, nodei ci hne ni eje co wene ri hnore ni ej.

14. Ilo, eje co iara hne? Ka melei ci yeno ej’ ore nge ri poni Iehova?

¹⁴ Ilo, eje co iara hne? Egewa. Iehova ci eamo eje co iara nengoce du Nubonengo. Tusi Hmijoc ci ie ko, nidi ace ke eje co iara “hne”, co “kamomocone ri ci hne” ne  “hage nono ko re co hne.” (Mataio 26:41; Rome 12:12; 1 Thesalonaika 5:17) Iehova co iara ibetu ko co taedrehngi ej. Nodei ran, eje thuni co oreoneti du Nubonengo ore ci rane ni Nubonengo, ne il’ ore nodei ace Nubonengo ci rue so ej. Eje se thuni joko co sibo Iehova co anetitini ej, co aopodoneni eje ne co kanu ej’ ore engetac. Ngei eje ma ule ore ci hne inom’ o se la rue ni Iehova bane anidiaceni ej, melei eje ha co iara hne du Nubonengo ri nodei ezien.

15. Wen’ ore nge eje co ie ko “amen” ri bun’ ore ci hne?

¹⁵ Wen’ ore nge eje co ie ko “amen” ri bun’ ore ci hne? Ore enengoco “amen” melei ci ie ko “seseko komelei” ca “melei ha co iu”. Ngei eje ma ci ie ko “amen”, melei eje ci aehngeni ko eje numu hnore me seseko,  ka eje ci ua sesekon’ ore eje hna ie ri ci hne. (Ta Salamo 41:13) Tusi Hmijoc se ci yeno eje joko ko, roi kore co ie ko “amen” (ri ci nengoce ca ri ci paekoc) ri bun’ ore ci hne, ngei eje ma xaranumu. Melei bane aehngeni ko, eje ci kedi ore hna ie ri ci hne.​—1 Ta Rane No Re Nodei Doku 16:36; 1 Korinito 14:16.

16. Ilo, Iehova ci cedi ore ta ci hne ni ej?

¹⁶ Ilo, Iehova ci cedi ore ta ci hne ni ej? Egewa. Tusi Hmijoc ci ie ko, Nubonengo kore Thu “canaeon’ o re ci hne.” (Ta Salamo 65:2) Hale me Iehova ci taedrehngi ore nodei ci hne me wene ri hnore nore ta millions kore ngom. Ka etha pengene kore la cedi ni Nubonengo.

17. Iehova ci cedi korion’ ore ta ci hne ni ej, lene sen’ ore ta angela ne ta sinemenenge ni Nubonengo?

¹⁷ Iehova ci cedi ore ta ci hne ni ej, lene sen’ ore ta angela ne lene sen’ ore ta sinemenenge ni Nubonengo. (Hebera 1:13, 14) Inome ko, hmaiai kore ta ngome ci hne du Madaru ha thu co carajewe ke buic’ ore Tusi Hmijoc. Deko ma tui, ke di me pinalu ko se Témoin ni Iehova co etha nata ne buic. Tusi Hmijoc ci aehngeni ko, ta angela numu hnapane ri ci pulon’ ore “evangelia.” (Ieielo Ahngabot 14:6.) Ka hmaiaiile eje hna hne ri pon’ o se ushiwa, ca ri pon’ o se sibo ni ej. Ke di me pinalu ko se celuaien, ca se isingeni eje co kanu ej’ ore konekatu me ekow.​—Ta Onatre 12:25; Iakobo 2:16.

18. Iehova ci cedi korion’ ore ta ci hne ni ej, lene sen’ ore uiewaieni hmijoc ni Nubonengo, ne lene ri Tusi Hmijoc?

¹⁸ Iehova se ci cedi joko ore ta ci hne ni ej, lene sen’ ore uiewaieni hmijoc ni Nubonengo. Ngei eje ma ci sibo Iehova co konekatu eje co sere etha ne il’ o se  ushiwa, Nubonengo ci anetitini eje ne ci kanu ej’ ore engetace lene sen’ ore uiewaieni hmijoc ni Nubonengo. (2 Korinito 4:7) Ka lene sen’ ore Tusi Hmijoc, Iehova se ci cedi joko ore ta ci hne ni ej, ne ci konekatu eje co ureie ore ta uane me waetea. Ngei eje ma ci ieie ore Tusi Hmijoc, eje thuni co uni ore ta kotre bane aengetaceni ej. Ka Iehova se thuni joko co ujeni o se ngome ri hna sanelo, co kanon’ o se ne cedi me ekowe bane so ej. Iehova se thuni joko co ujeni o se hmaian’ ore ekalesia, co ethawan’ o se uane me nidi ace so ej, wene ri Tusi Hmijoc.​—Galatia 6:1.

19. Ta se rane ngei, eje ci uane ko Iehova deko ma cedi ore ta ci hne ni ej. Wen’ ore nge?

¹⁹ Ke numu se ta eziene ngei, eje ci eto eje ko ko: ‘Wen’ ore nge Iehova be deko ko ma cedi ore ta ci hne inu?’ Iehova ha ule ore eziene co cedi ore ta ci hne ni ej, ka korion. Ka Iehova se ha ule ore ta ace eje ci kamomoceti. Ri se ta eziene ngei, eje co iara hne ko du Iehova, ha thu aehngeni du Nubonengo ko, eje ci hne ne il’ ore nidi hnore ni ej, ka eje ci une du Nubonengo. (Luke 11:5-10) Ka numu ta rane ngei, se pengene kore Iehova ci cedi ore ci hne ni ej. Inome ko, ngei eje ma hne son’ o se ace me ushiwa ci pina du ej, Iehova deko co atakoni ore ushiwa omelei. Roidi, Nubonengo co kanu ej’ ore engetace bane sere etha ne il’ ore ushiwa omelei.​—Ieielo Filipi 4:13.

20. Wen’ ore nge eje co iara hne du Iehova?

²⁰ Kolo, se ace me nidi ace kore co nengoce du Iehova ri ci hne! Eje thuni co ua sesekone ko Nubonengo ci taedrehngi ej. (Ta Salamo 145:18) Ngei eje ma iara hne ne il’ ore nidi hnore ni ej, ha co nidi thawalane kore eala eje ne Iehova.