1, 2. Nge kore ta ace eje ci eton?

EHNA morowe hmaiai kore ace buice ci eton. Ngei eje ma ci ie ahngane du buice sa kore ac, buice ci etone ko, ‘Nge ko?’ Ka ngei eje ma tubuhnidi co cedi buic, buice ci etone yawe ko, ‘Ka e, ke nge ko?’

² Eje ileodene numu ta ace ci eton, inome ngei ko: ‘Inu co kodraru o nge?’ ka ‘Inu co kokoe o nge?’ ca ngei me ‘Inu co lae nge?’ Eje numu joko ta ace ci etone ri pon’ ore ci roi, ne ri pon’ ore eziene co pina. Ke, ngei eje ma deko ma uni ore so ne cedi, hmaiaiile eje ha deko ma didione co there.

3. Hmaiai kore ngome numu ta ace ci eton, ke buice ci uane ko, deko ma numu ne cedi son’ omelei. Wen’ ore nge?

³ Ilo, Tusi Hmijoc numu so ne cedi? Numu ta ngome ci uane ko e. Niane di ko, nidi ushiwa co carajewe. Buice ci uane ko, so ne cedi ile so sei nodei naca hmi. Osotene di ci hnana tan’ ore buice deko ne cedi. Ka bua, nge kore uane ni bua?

4, 5. Nge kore ta ace ci etone ke bua? Wen’ ore nge bua co therelo ko ore so ne cedi?

⁴ Ome kore ta ace bua ngei ci eton: ‘Nge kore pengen’ ore ciroi?’ ‘Ci nge ke eje ma ha tango?’ ka ‘Nge kore singeni Madaru?’ Bua ngei ci alane co numu ore ne cedi son’ omelei! Iesu, ore Thu Yeno  me thawalan, hna beredrone ko: “Buhnije sibonelo, ile me kanu buhnij; buhnije therelo, ile me unilu; buhnije bebe kada lo, ile me toebote du buhnij.” (Mataio 7:7) Therelo ko, ile bua me unilu ore so ne cedi me seseko.

⁵ Ngei bua ma “therelo” ko, ile bua me uni ri Tusi Hmijoc. (Ta Onatre 2:1-5) Ka deko ma ushiwa co carajewe. Nodei ace bua co yenon, co aopodoneni bua onom, ka sone oiru, ore ci uroi me shed. Ule sesonelo ke eje sa kore hnenge hmaiaiil’ ore ngome ci eton.

6. Hmaiai kore ngome ci uane ko Madaru deko ma ua ushiwa buic. Tan’ ore nge?

⁶ Hmaiai kore ngome ci uane ko, Madaru deko ma ua ushiwa buic. Buice ci uane ko, kacene Madaru ci ua ushiwan’ ore nodei ngom, ten’ ore awe deko co inome onom. Ci mece kore irue, ci mece kore icuhma ne nur. Eje ileodene ci uedr, ci jo, ne ci tango. Wen’ omelei, osotene ci etone ko: ‘Kacene Madaru ci ua ushiwa ej, wen’ ore nge Nubonengo deko ma atakonibut’ ore nodei ci jo?’

7. (a) Numu ta ngome ci uane ko Madaru, Madaru me thu ajoni. Tan’ ore nge? (b) Ngei ma pina kore tubuhnid, eje deko co ie ko nia ni Madaru. Wen’ ore nge?

⁷ Se ta ezien, nodei naca hmi ci amenuni ore ngome ne ci ie ko, Madaru, Madaru me thu ajoni. Ngei ma pina kore sheusheu, buice ci ie ko, melei alatone ni Madaru. Ile me du nodei naca hmi,  nia ni Madaru. Roidi, Tusi Hmijoc ci aehngeni ko deko sa te ko ma nia ni Madaru. Iakobo 1:13 ci ie ko, Nubonengo deko ma tubuhnid’ o se ngome hnei nia. Kotr’ omelei ci ie ko: “Hage ie ko se ngome ma ci tubunidi, ko, Ci tubunidi nu siwai Madaru; wen’o re tha thu ni ko co tubunidi Madaru hnei nia, ka nubonengo se deko ma tubunid’ o se ngom.” Seseko, Madaru deko ci akedini ore tubuhnidi co pina. Roidi, nidi deko ma Nubonengo kore ci apinani ore tubuhnid.​—Ieielo Iopu 34:10,12.

8, 9. Ngei ma pina du eje kore ta ushiwa, wen’ ore nge deko ma netiti co ie ke eje ko nia ni Madaru? Ielo se aekoweni.

⁸ Ome ko se aekoweni. Se yenakunu ci menenge ne cecen, ne hmani bon. Cecene ci wahnacor’ o bon, ka hna yeno bone co ua ngome natan’ ore ta ruac. Se ran, yenakunu ha numu uan: ‘Inu ha ci ke co taedrehngi caca, inu ha co hue sere i hnameneng!’ Ruelo ke bon’ ore ta ace me nia, hale me pina du bone hmaiai kore ushiwa. Buhnije co ie ko nia ni cecen? Ilo, tenene ha hmaiai kore ushiwa tan’ ore ceceni bone hna nue bone co hue sere i hnameneng? Tangoko! (Luke 15:11-13) Numu ta ngome hna ke co ninen’ o Madaru, ka hna alane co rue ore nia. Madaru hna nue buice co rue ore alaieni buic, inom’ ore cecene ri aekoweni. Wen’ omelei, ngei ma pina kore nur, eje co ua roione ko, deko ma wenei Madaru. Deko ma netiti co ie ko nia ni Nubonengo.

 ⁹ Tan’ ore nge Madaru deko ma atakonibut’ ore nodei ci jo? Nubonengo nidi numu tan. Ri Yeno 11, bua co ule ore ci ie kei Tusi Hmijoc ri pon’ ore tan’ omelei. Ke ua roionelo ko, Madaru ci hnoro ej, ka ngei ma pina du eje kore ta ushiwa, deko ma nia ni Madaru. Roidi, Nubonengo so kore thuni co cengi eje buti wene ri nodei ushiwa.​—Isaia 33:2.

10. Ilo, eje thuni co une ko Madaru co atakoni ore nia?

¹⁰ Hmijoce kei Madaru. (Isaia 6:3) Nodei ace Nubonengo ci rue nidi roi so. Wen’ omelei, eje thuni co une du Nubonengo. Nodei ngome di deko ma inomei Madaru. Se ta ezien, buice ci rue ore ta ace me nia. Se inom’ o se necene me hma ri politik. Kacene me roi di kore hnore ni bon, tha thuni ko ke bone co atakoni ore nodei tharan’ ore nia. Deko ma numu se ngome me nene inomei Madaru. Nubonengo thuni co atakoni ore nia e iara oiru, ka co aiuni. Se co atakoni joko ore nodei tharan’ ore nia.​—Ieielo Ta Salamo 37:9-11.

11. Ngei Madaru ma ci ule bua ci jo, ilo, Nubonengo se ci jo joko?

¹¹ Ngei Madaru ma ci ule ore nia ri ten’ ore aw, ca ci ule eje ci jo; ilo, Nubonengo ci jo joko? Tusi Hmijoc ci yeno eje ko, Madaru ci “alaton’ o re netit.” (Ta Salamo 37:28) Ore roi ne il’ ore nia nidi ace du Nubonengo. Kece i Madaru co ule ore ngome ci jo. Ri eziene me hna dan, Nubonengo  hna jo ma ci ule ore ten’ ore awe ma ha hmaiai kore nia. (Genese 6:5, 6) Onom, Nubonengo oniileko. (Malaki 3:6) Tusi Hmijoc ci ie ko Madaru “ci uato buhnij.”​—Ieielo 1 Peteru 5:7.

12, 13. (a) Wen’ ore nge eje ci ran’ osoten? Ka ngei eje ma ci ule ore nodei sheusheu ri ten’ ore aw; ilo, eje ci sheusheu joko? (b) Wen’ ore nge eje thuni co ua sesekone ko, Madaru co atakoni ore nodei sheusheu ne nodei ace me deko ma netit?

¹² Tusi Hmijoc ci yeno eje joko ko, Madaru hna puli eje yeahngani Nubonengo. (Genese 1:26) Melei ci aehngeni ko, ore ta singeni eje inom’ ore ta singeni Nubonengo. Koiko, ngei bua ma ci sheusheu co ule ore ta ngome me roi ci jo, sheusheu ni Madaru thawalan’ ore ci sheusheu ni bua! Korione ke eje co ua sesekon’ omelei?

¹³ Tusi Hmijoc ci yeno eje ko “era so kei Madaru.” (1 Ioane 4:8) Nodei ace Nubonengo ci rue, ci rue hnei ci rane so. Madaru thu ran, wen’ omelei eje numu ci ran. Kacene bua me numu nene bane atakoni ore nodei sheusheu ne nodei ace me deko ma netit; ilo, bua co rue? Egewa, wen’ ore bua ci ran’ ore ngom. Madaru numu nene bane atakoni ore nodei sheusheu, ne nodei ace me deko ma netit. Nubonengo ha co rue wen’ ore Nubonengo ci ra ej. Ri hna whan’ ore gu tusi om, numu nodei eberedro hnei Madaru hna ie koda. Nodei eberedro melei ha co aiuni kei Nubonengo. Bua thuni co ua sesekon! Ke nidi ace kore co nidi carajewe roione du Madaru, ha thu co une jeu’ ore nodei eberedro omelei.

14. (a) La kore yeleni Madaru? (b) Eje ci ule korione ko nidi ace kore co nengocon’ ore yeleni Madaru?

¹⁴ Bua ma ci alane co kan’ o se ngom, nge kore ace me hna dane bua co ie du bon? Yeleni bua. Ka Madaru se numu yel? Hmaiai kore hmi ci ie ko yeleni Nubonengo melei Madaru ca Retok. Ke tangoko ma ta yele komelei. Madaru ne Retok melei ta hna ato yele inom’ ore ci ie ko “doku” ca “toan.” Madaru ci beredrone du eje ko yeleni Nubonengo Iehova. Ta Salamo 83:18 ci ie ko: “Buango so ko re Meloikorerane ri pon’ o re ten’ o re awe ileokon, ka Iehovango ko re acekiwaieni buango.” Ore ta ngome hna xiwamomon’ ore Tusi Hmijoc hna nue ore yeleni Madaru thawalan’ ore 7000. Iehova ci alane ko bua co carajewe roion’ ore yeleni Nubonengo, ne co nengocon. Madaru ci ie du bua ore yeleni Nubonengo sone bua co kani Nubonengo.

15. Nge kore kakailen’ ore yele “Iehova?”

 ¹⁵ Nidi ace kore kakailen’ ore yeleni Madaru. Nge kore kakailen? Ko Madaru thuni co aiuni ore alatone ne nodei hna beredrone koda hnei Nubonengo. Deko se ace me thuni co akedini Nubonengo. Ore yel’ omelei ekowe so du Iehova. *

16, 17. Nge kore kakailen’ ore hna ato yel (a) “Thati Thu Niton”? (b) “Doku me tha thu ase ko”? (c) “Thu Pupul”?

¹⁶ Ahngabot 15:3 ci ie ko: “Kebene ne bane urane ko re ta ruace ni buango, ca Dokungo, Madarungo me thati thu niton ; netiti ne thethelako ko re nodei kara ni buango.” Nge kore kakailen’ ore hna ato yele “Thati Thu Niton”? Ko Iehova kore nidi numu nene ri awe ne ri ten’ ore aw. 1 Timothi 1:17 ci ie ko, Madaru “Doku me tha thu ase ko.” Nge kore kakailen’ ore hna ato yel’ omelei? Ko Madaru tha thu ase ko. Nubonengo deko whan, ka se deko bun. Ta Salamo 90:2 ci aehngeni ko Nubonengo “wenekoda ko, ca e iara oiru.” Se ace me hmajiadr!

¹⁷ Sa so kore Thu Pupul, Iehova. Ahngabot 4:11 ci ie ko: “Ekowe ke buango, ca Doku ne Madaru ni ehnijengo, co kediton’ ore ci iala roion, ne il’ o re ci ahmani, ne il’ o re nen; wen’ o re buango ha hna popol’ o re nodei ac’ ileoden, ka wen’ o re alaieni buango ha omewaore kore nodei ac’ ileoden,  ka ha hna popole te.” Nge kore kakailen’ ore hna ato yele “Thu Pupul?” Ko Iehova hna thati pupul: nodei angela, nodei wajekol, nodei wawen, nodei ia, ne ileoden’ ore ac.

18. Ta ngome ci uane ko buice deko sa te co kani Madaru. Tan’ ore nge? Tusi Hmijoc ci ie ko nge ri pon’ omelei?

¹⁸ Ta ngome ci kabe yenon’ ore nodei singeni Iehova, ci ie ko: ‘Kolo, Madaru nidi nen, nidi  meloi kore ran, ka se nidi thuaiai o nu! Wen’ ore nge Nubonengo co uato nu?’ Uane ni Iehova komelei? Tangoko! Nubonengo ci alane co Kani bua, ne co aceno bua. Tusi Hmijoc ci ie ko Nubonengo “deko ma ithua ne ej’ ileoden.” (Ta Ruace 17:27) Nubonengo se ci alane ko bua co aceno Nubonengo. Ngei bua ma rue inomelei, Nubonengo ci ie sesekone ko “nubonengo se co acenonelu du buhnij.”​—Iakobo 4:8.

19. (a) Korione ke bua co kani Madaru? (b) Nge kore ta singeni Madaru bua ci nidi hnoron?

¹⁹ Korione ke bua co kani Madaru? Iesu hna beredrone ko: “Omewaore ko re waruma tha thu ase  ko, ko, Buice co rowo kaceni bua, o re nidi Madaru me hnasa so, ne Iesu Keriso, o re naeni bua hna siaton.” (Ioane 17:3) Yenonelo ko co carajewe du Iehova ne Iesu. Ile bua co numu ore waruma tha thu ase ko, ore ciroi me deko bun. Bua ngei ha hna yenone ko “era so kei Madaru.” (1 Ioane 4:16) Ke roidi, Nubonengo numu kan’ ore ta singen. Tusi Hmijoc ci ie ko Nubonengo “thu ra gupan, ne thu kuni iwon, ka hmaiai ko ko re roiile ne seseko.” (Esodo 34:6) “Thu wieni ke buango ca Retokengo, ne ibetu co nuebot’” ore nia. (Ta Salamo 86:5) Nubonengo thu kuni iwone ne lata me seseko. (2 Peteru 3:9; Ta Salamo 18:25) Bua ma ieie ore Tusi Hmijoc, melei bua co yenone joko ore ta nodei ace ri poni Madaru, ne il’ ore ta singeni Nubonengo.

20, 21. Korione ke bua co kani Madaru ngei bua me deko ma ule Nubonengo?

²⁰ Korione ke bua co kani Madaru ngei bua me deko ma ule Nubonengo? (Ioane 1:18; 4:24; 1 Timothi 1:17) Bua ma ieie ore Tusi Hmijoc, melei bua co nidi carajewe du Nubonengo. (Ta Salamo 27:4; Rome 1:20) Ka ngei bua ma yenonelo ko ore nodei singeni Nubonengo, bua co nidi hnoro Nubonengo, ile me co ataceni ore ci eala bua ne Madaru.

²¹ Bua co carajewe ko Iehova Ceceni ej. Nubonengo hna nunuone du ej’ ore ciroi, ka  Nubonengo ci alan’ ore ciroi me shede so ej. (Mataio 6:9) Melei kore alaien’ ore nodei cecene me thu rane son’ ore ta re tei buic. (Ta Salamo 36:9) Tusi Hmijoc ci ie ko bua thuni co kani Madaru. (Iakobo 2:23) Iehova, me Thu Pupul’ ore awe ne ten’ ore aw, ci alane ko bua co kani Nubonengo!

22. Ngei o ta ngome ma alane co akedini bua co yenon’ ore Tusi Hmijoc, bua co rue ore nge?

²² Numu ta ngome ngei co alane co akedini bua co yenon’ ore Tusi Hmijoc. Buice ngei ci pareu ko bua ngei ha co nue ore hmi ni bua. Ke deko lo ke bua co nue o se ngome co akedini bua co kani Madaru. Iehova so kore nidi Kani bua me thawalan.

23, 24. (a) Wen’ ore nge bua co iara numu ko ore ta ace co eton? (b) Ci ie ore nge kore Yeno 2?

²³ Numu ta ace ri Tusi Hmijoc bua deko co carajewe. Deko co hnana co eton, ca co sibo ne ekonekatu. Iesu hna ie ko eje co inom’ ore ta ehna morow. (Mataio 18:2-4) Ehna morowe deko ma lata me hma, ka hmaiai kore ace buice ci eton. Madaru ci alane ko bua co uni ore ta ne cedi. Koiko, nidi yenonelo ore Tusi Hmijoc, ha thu ule ke bua ko, ore bua ci yenon, melei seseko.​—Ieielo Ta Ruace 17:11.

²⁴ Ri Tusi Hmijoc so kore bua co nidi carajewe du Iehova, wen’ omelei yenonelo. Ri Yeno 2, bua co uni ko Tusi Hmijoc deko ma inom ore ta gu tusi osoten.