1. Nge kore alatone ni Madaru son’ ore ngom?

NIDI roi kore alatone ni Madaru son’ ore ngom. Nubonengo hna puli Adamu ne Eva, ore cahmane ne hmenewe me hna dan, ha thu co menengone ke bushengone ore gadrane me karuia. Ore alatone ni Madaru ko, bushengone co hnapo hmaiai but, co ruacon’ ore ten’ ore awe ha thu co paradrais, ne co cumon’ ore nodei ia.​—Genese 1:28; 2:8, 9, 15; ule ore Note 6, ri page 238.

2. (a) Ha ule korione ke eje ko, Madaru co ilon’ ore hnei Nubonengo hna uane co rue? (b) Kei Tusi Hmijoc ko, la kore co menengon’ ore ten’ ore awe e iara oiru?

² Uane bua ko ri se rane eje thuni co menenge ri paradrais? Iehova hna beredone ko: “Inu ha hna ie . . ., ka inu ha co ilon.” (Isaia 46:9-11; 55:11) Koiko, Madaru co ilon’ ore hnei Nubonengo hna uane co rue, ka deko se ace co akedini Nubonengo. Madaru ci ie ahngane du eje ko, Nubonengo “deko hna puli gupan’” ore ten’ ore aw. (Isaia 45:18) Nubonengo ci alane ko ten’ ore awe co menengon. Hnei la? Ca pina hodrael? Tusi Hmijoc ci cedi ko: “Ono re nodei ngome lata me netiti co numu o re nod, ne co menengon’ omelei e iara oiru.”​—Ta Salamo 37:29; Ahngabot 21:3, 4.

3. Eje ma ci ule ore ngome ci uedre ne ci tango, nge kore ace eje ci eton?

 ³ Onom, ngome ci uedre ne ci tango. Hmaiai kore node ci irue ko buice ne ci atangoni ngom. Roidi, tangoko ma alatone ni Madaru komelei. Tan’ ore nge komelei? Tusi Hmijoc so kore thuni co ie ahngan’ ore tan’ omelei.

4, 5. (a) La kore hna nengoce du Eva lene sen’ ore un? (b) Hna korione kore ngome me netiti co thu eno di?

⁴ Tusi Hmijoc ci ie ko, Madaru numu icuhma, sa kore angela ci kaione ko “Diabolo” ne “Satana.” Satana hna nengoce du Eva lene sen’ ore une ri hnoren’ ore gadrane Edrena. (Ahngabot 12:9; Genese 3:1) Satana hna amenuni Eva thu co ua sesekone ke bone ko, une kore ci nengoce du bon.​—Ule ore Note 7, ri page 240.

⁵ La kore thu puli Diabolo Satana? Madaru? Tangoko! Ri eziene Madaru hna hngoronatan’ ore rawa so Adamu ne Eva, xaranumu kore ta angela ri aw. Sa kore angela hna cejan’ ore hnore ni bon, hale ma ha Diabolo di. (Iopu 38:4, 7) Hna pina korione komelei? Ome ko se aekoweni. Korione kore ngome me netiti, co thu eno di? Hnapo bone but, tangoko ma thu eno ke bon. Hue kore ta ezien, ri se ran, bone ha ci nidi didion’ ore se ace me deko ma ace ni bon. Iara uane ko ke bon’ ore ac’ omelei, ile me rothi bone lu kore uane me nia. Ri se ran, hale bone me enonelo ore ac’ omelei. Bone ha se  pengen: ha thu eno di.​—Ieielo Iakobo 1:13-15; ule ore Note 8, ri page 240.

6. Korione ko se angela hna icuhma di ne Madaru?

⁶ Se ineko kore ace hna pina jeu’ ore angela omelei. Thubenelo ore hna puli Adamu ne Eva, Iehova hna beredrone du bushengone ko, co hnapo hmaiai buti ne “co aceceni o re ten’ o re aw.” (Genese 1:27, 28, MN) Ore angela omelei hna uane inome ngei ko: ‘Roi kore ngome co thidilu du nu ri pon’ o re co thidilu du Madaru!’ Iara uane ko ke bon’ ore uane me nia omelei, hale bone ma nidi rereuon’ ore hna doku ni Iehova. Bone hna alane ko ngome co thidilu du bon. Ha ile bone me hna waiao du Eva ne hna amenuni bon. (Ieielo Genese 3:1-5.) Inomelei kore angela ma ha Satana Diabolo di, ore icuhma ne Madaru.

7. (a) Tan’ ore nge Adamu ne Eva ha tango? (b) Tan’ ore nge eje ci mohma ne ci tango?

⁷ Adamu ne Eva deko hna ninen’ o Iehova, ka hna kakan’ ore wawen’ ore serei. (Genese 2:17; 3:6) Bushengone hna cie ore wathebo ni Iehova. Inom’ ore hna beredrone hnei Iehova, ha tango ke bushengon. (Genese 3:17-19) Re tei bushengone ha nodei ngome me nia joko, hale buice ma ha tango joko. (Ieielo Rome 5:12.) Tan’ ore nge buice ha nodei ngome me nia te? Ome ko se aekoweni ha thu carajewe. Ngei bua ma rue ore ta gato ri sa kore ne canga gato me hna shici, ileoden’ ore so gato co numu joko hna shici. Adamu deko hna ninen’ o Iehova, ile bone ma ha ngome me nia. Adamu kore ceceni  ej, wen’ omelei eje ileodene ha nodei ngome me nia. Eje ha numu “hna shici” inome bon. Eje joko ci mohma ne ci tango tan’ ore nia.​—Rome 3:23; ule ore Note 9, ri page 240.

8, 9. (a) Nge kore Satana hna alane ko Adamu ne Eva co ua sesekon? (b) Tan’ ore nge Iehova deko hna canga atangoni Satana, Adamu ne Eva?

⁸ Satana hna whane co icatace ne Iehova, ri rane bone hna ujeni Adamu ne Eva co cie ore wathebo ni Nubonengo. Satana hna alane ko bushengone co ua sesekone ko, Iehova ci waiao du bushengon, ka doku me nia kei Nubonengo, ka Nubonengo ci ke ko bushengone co opodon. Satana hna ie joko ko, nodei ngome deko co taedrehngi Madaru, ke buice co rue ko ore ta alaieni buic. Ka pani Adamu ko ne Eva co uane ri hnore ni bushengone ko, nge kore nia, ka nge kore roi. Ka nge di kore uane ni Iehova? Nubonengo thuni co canga atangoni Satana, ne Adamu ne Eva. Ke kacene Madaru hna rue inomelei, ilo, Nubonengo co aehngeni ko Satana thu waiao? Tangoko!

⁹ Tan’ omelei, Iehova deko hna canga atangoni buic. Nubonengo hna kanu eziene du nodei ngome sone buice co musi o buice ko. Melei co asesekoni ko Iehova so, kore ule ore roi son’ ore nodei ngom, ke Satana di, thu waiao. Ore Yeno 11 ha co ie hmaiaion’ ore so uan’ omelei. Ka nge kore uane bua ri pon’ ore hnei Adamu ne Eva hna rue? Bushengone hna une du Satana, hale me deko hna ninen’ o Iehova. Ilo, netiti kore hnei bushengone hna rue?  Iehova hna thati kanon’ ore nodei ace me roi so bushengon: ciroi me deko nia, guhne me karuia, ka ruace me deko ma ushiwa. Ke Satana di, deko se ace ke bone hna rue so bushengon. Ka bua di, nge kore ace bua co rue?

10. Eje co ure la ha thu co musi o ej?

 ¹⁰ Inomei Adamu ne Eva, eje ileoden’ onome co ureie ko, la kore eje co une jewe. Eje thuni co ureie ko Iehova kore co musi o ej, melei bane aehngeni ko Satana thu waiao. Ca nge eje co ureie ko, Satana kore co musi o ej. Nidi ace kore co ureie roione ko la kore co musi o ej, tan’ ore tru so kore len: lene la tango, ca lene la waruma. (Ta Salamo 73:28; ieielo Ta Onatre 27:11.) Deko ma hmaiai kore ngome ci ninen’ o Madaru. Melei ci aehngeni ko, deko ma Madaru kore ci musion’ ore ten’ ore aw. Ngei ma deko ma Nubonengo, la di kore ci musion’ ore ten’ ore aw?

11, 12. (a) Nge kore Satana hna alane co kanu Iesu? Melei ci aehngeni ko nge? (b) Nge kore so kotre ri Tusi Hmijoc ci aehngeni ko, Satana kore necen’ ome ri ten?

¹¹ Iesu ha ule ko, la kore ci musion’ ore ten’ ore aw. Ri se ran, Satana hna “aehngeni du nubonengo o re nodei baselaia ileodene no re ten’ o re aw, ne ile ko re sanangomeil’ omelei.” Hale bone me ie du Iesu ko: “Inu co kanu bua o re nodei ac’ ileoden’ omelei, kacene ngei bua co caralu ne co thidilu du nu.” (Mataio 4:8, 9; Luke 4:5, 6) Kacene ko nodei baselaia omelei deko ma ace ni Satana; ilo, bone thuni co kanu Iesu? Tangoko. Koiko, Satana kore ci musion’ ore nodei baselaia ome ri ten.

¹² Bua ngei ci ie ri hnore ni bua ko: ‘Deko ma Satana kore ci musion’ ore ten’ ore aw! Hnei Iehova, me Thati Thuniton, hna pupul’ ore awe ne ten’  ore aw!’ (Ahngabot 4:11) Seseko, Iehova kore Thu Pupul. Ke Iesu hna ie roione ko Satana kore “necen’ ome ri ten.” (Ioane 12:31; 14:30; 16:11) Paulo aposetolo hna ato yele ni Satana ko “makaze nome ri ten.” (2 Korinito 4:3, 4) Ka Ioane aposetolo hna xiwamomone ko “ten’ o re aw’ ileodene ci hmore ri ten’ o re thu nia.”​—1 Ioane 5:19.

13. Tan’ ore nge nidi ace kore ten’ ore awe me kabesi so ej?

¹³ Ten’ ore awe ha nidi cece hnei nia. Ci mece kore irue, lata me tac, ta ruace me deko ma netiti ne waiao. Ngome ci tacebuti co atakoni ore nodei nia omelei, ke ha tha thuni ko ko. Ha acene kei Madaru co atakoni ore ten’ ore awe ome me nia, ri irue Amagedo. Ka Nubonengo co ane di ore ten’ ore awe me kabesi ne netit.​—Ahngabot 16:14-16; ule ore Note 10, ri page 241.

14. (a) Iehova hna ure la ha thu co Doku nore Baselaia ni Nubonengo? (b) Nge kore Tusi Hmijoc hna auaneni ri poni Iesu?

¹⁴ Iehova hna ure Iesu co Doku nore Baselaia ni Nubonengo ri aw. Ha ta milliers kore ta kenereken, Tusi Hmijoc hna auaneni ko Iesu co “Doku no re dongodongo” ka, ore baselaia omelei co deko bun. (Isaia 9:6, 7) Iesu hna yeno nodei re kokonieni Nubone co hne son’ ore baselaia omelei, inome ko: “Wieni me ashedonilu o re baselaia ni buango. Ilewatonelo o re alatone ni buango omewaore ri tene thu ekowe ne il’ omewaloi ri aw.” (Mataio 6:10) Ri Yeno 8, eje co ule ko korione kore Baselaia ni Madaru  co lae win’ ore nodei hna doku nore ngom, ka korione joko kore co ilon’ ore paradrais.​—Ieielo Daniela 2:44; ule ore Note 11, ri page 241.

15. Nge kore “ten’ o re awe me kabesi”?

¹⁵ Tusi Hmijoc ci ie sesekone ko: “Eje ci ahnunguni . . . o re awe me kabesi ne il’ o re ten’ o re awe me kabesi, ka co hnen’ omelei te kore lata me netit.” (2 Peteru 3:13; Isaia 65:17) Ri se ta ezien, Tusi Hmijoc ci kaione ko “ten’ o re aw” melei nodei ngome ci menengon’ ore ten’ ore aw. (Genese 11:1) Koiko, “ten’ o re awe me kabesi” me netiti, melei nodei ngome ci ninen’ o Iehova, ne ci kedi ore hnahneone wenei Nubonengo.

16. (a) Nge kore hnahneone me nidi roi Madaru co kanu buice ore co menengon’ ore ten’ ore awe me kabesi? (b) Ka co rue di ore nge ke eje ha thu co kedi ore hnahneon’ omelei?

¹⁶ Iesu hna ie sesekone ko, numu ta ngome co menengon’ ore ten’ ore awe me kabesi, ka co numu ore “waruma tha thu ase ko.” (Mareko 10:30) Ka co rue di ore nge ke ej, ha thu co kedi ore hnahneon’ omelei? Dai ieielo Ioane 3:16 ne Ioane 17:3 ha thu co uni ore ne cedi. Eje dai ule sesonelo ore ci ie kei Tusi Hmijoc ri pon’ ore ciroi ri Paradrais ome ri ten.

17, 18. Ten’ ore awe ileodene co dongodongo so, ka ngome se deko co pareu. Eje ci ule korion?

¹⁷ Ha co deko nia, ne irue, ne atangoni ngome ne lata me tac. Ha co deko ngome me nia ome ri ten. (Ta Salamo 37:10, 11) Madaru co “lae bun’ o re ta ci irue.” (Ta Salamo 46:9; Isaia 2:4) Ten’ ore  awe ha co cece so hnen’ ore ta ngome me ci hnoro Madaru, ne ci ninen’ o Nubonengo. Ka ha co dongodongo joko e iara oiru.​—Ta Salamo 72:7.

¹⁸ Ngome ha deko co pareu. Ma hna ninen’ o Madaru kei si Iseraela, Nubonengo hna cumo roio buic, ile buice me deko hna pareu. (Levitiko 25:18, 19) Ri Paradrais, eje ha deko co pareuon’ o se ace, ca se ngom. Eje deko co pareu e iara oiru.​—Ieielo Isaia 32:18; Mika 4:4.

19. Eje ci ua sesekone ko ha co nidi cece kore kodraru. Wen’ ore nge?

¹⁹ Ha co nidi cece kore kodraru. “Ngei me ile ri node ri elen’ o re wece ko re ta wa whiitre me cece so ko re aranin.” (Ta Salamo 72:16) Iehova, “ono re Madaruj, ha co hnahneo xej” ka, onore rawa ha co kanon’ ore kodraru.”​—Ta Salamo 67:6.

20. Eje ci ule korione ko ha co paradrais kore ten’ ore aw?

²⁰ Ha co paradrais kore ten’ ore awe ileoden. Ngome co menengon’ ore ta hnamenenge me kariroi, ka co ruacon’ ore ta gadrane me karuia. (Ieielo Isaia 65:21-24; Ahngabot 11:18.) Ten’ ore awe ileodene co kariroi inelukom’ ore gadrane Edrena. Iehova co iara kanone ko ore ace me ekowe so ej. Tusi Hmijoc ci ie ri poni Nubonengo ko: “Buango thu toetonebot’ o re arathemie ni buango, ne ci anelini o re nodei ac’ ileodene me ci roi ko hnei kaka.”​—Ta Salamo 145:16.

21. Eje ci ule korione ko nodei ngome ne nodei ia, ha co menenge sese ri dongodong?

²¹ Nodei ngome ne nodei ia ha co menenge sese ri dongodong. Ta ia ha deko co nian’ ore ngom.  Ta wa morowe thuni co acenon’ ore ta ia me tho ne nia ri ta ezien’ onom.​—Ieielo Isaia 11:6-9; Isaia 65:25.

22. Iesu co rue ore nge son’ ore nodei uedr?

²² Ngome ha deko co uedr. Ri eziene Iesu hna ome ri ten, Nubone hna aroini cece kore ngom. (Mataio 9:35; Mareko 1:40-42; Ioane 5:5-9) Ke ri hnapane ni Nubon, Doku nore Baselaia ni Madaru, Iesu ha co aroini ileoden’ ore ngom. Deko se ngome co ie ko: “Inu ci ued.”​—Isaia 33:24; 35:5, 6.

23. Iehova co rue ore nge son’ ore ta tango?

²³ Ta tango ha co roilo yawe. Madaru ci ie sesekone ko Nubonengo co aroinilo yawe ore ta millions kore ngom. “Ha co roilo yawe sere ri hna tango kore nodei ngome me netiti ne nodei ngome deko ma netit.”​—Ieielo Ioane 5:28, 29; Ta Ruace 24:15.

24. Ilo, bua ci alane co menenge ri Paradrais? Wen’ ore nge?

²⁴ Ileodene eje thuni co ureie ore eje co rue. Eje thuni co yenone co ule kaceni Iehova, ne co rue ore alaieni Nubonengo. Ka eje se thuni co rue ore alaieni eje ko. Ngei eje ma ureie co rue ore alaieni Iehova, co nidi roi kore ta ciroi ni eje oiru. Ri se ran, se cahmane hna sibo Iesu co uane te du bone ri thubenelo ore hna tango ni Nubon. Iesu hna ie sesekone du bone ko: “Nubo co ile sego i Paradais.” (Luke 23:43) Ri soten’ ore ta yeno eje co ule, eje co nidi carajewe ri poni Iesu. Eje co yenone joko ko, korione kei Nubone co aiuni ore nodei hna ie koda me shede hnei Madaru.