1, 2. Nge kore ci etone kore hmaiaiil’ ore ngom?

SE UE ci nian’ o se pa hnameneng. Se cahmane ci cori kupa ne ci kupani ore ta ngome ri hnoren’ ore ’ma hmijoc: bone ci aeaceni ne ci atangoni hmaiai kore ngom. O se hmenewe ci tango hnei cancer: 5 kore tei bone ha deko hmaien.

² Ma ci pina kore ta nia, ca ta sheusheu, hmaiai kore ngome ci etone ko: “Wen’ ore nge ten’ ore awe ha cece hnei ekeco ne ci jo?” Ka bua, bua ngei ha hna eto bua ko ri pon’ omelei?

3, 4. (a) Nge kore ta hnenge ni Habakuka? (b) Nge kore hnei Iehova hna cedi du Habakuka?

³ Tusi Hmijoc ci ie ko, nodei ngome joko me ci nidi une du Madaru hna eto buice ko ri pon’ omelei. Inomei perofeta Habakuka hna eto Iehova ko: “Wen’ o re nge bua ci aehngeni du nu o re nia, ne ci atadani (nue) nu jeu’ o re lata thu icie? wen’ o re ha ile ri tadago ko re ci ninia ne lata me tac ; ka ci puja ko re ci isesero ne ci icakore.”​—Habakuka 1:3.

⁴ Madaru hna cedi du Habakuka. Ri tusi Habakuka 2:2 ne 3, Iehova hna ie dane du Habakuka ko, Nubonengo co atakoni ore ci jo. Iehova ci nidi hnoron’ ore nodei ngom. Tusi Hmijoc ci ie ko: “Nubonengo ci uato buhnij.” (1 Peteru 5:7) Hale me Madaru ci nidi kecone ri poni ej, co ule ore ngome ci jo. (Isaia  55:8, 9) Ka wen’ ore nge di me nidi hmaiai kore ci jo?

5. Hmaiaiil’ ore ta naca hmi ci ie ko nge ri pon’ ore ci jo nore ngom? Ka Tusi Hmijoc ci yeno eje di ore nge ri pon’ ore ci jo?

⁵ O se ngome ma ci jo, ta nata ca ta prêtres ne ta naca hmi ci iara ie ko: “Melei alatone ni Madaru.” Se ta ran, buice ci ie joko ko, Madaru ha ule dan’ ore nodei ace co pina jeu’ o se ngom, ca ta sheusheu co pina du bon, ka tha thuni ko ke eje co carajewe ore tan. Ma ci tango joko ko se ngome, ca se wa morow, melei buice ci ie ko, Madaru hna alane ko, ore ngom’ omelei co menenge ne Nubonengo ri aw. Ke nidi waiao komelei. Ore nodei sheusheu deko lo ma wenei Iehova. Tusi Hmijoc ci ie ko, Madaru tha thu ajoni ko ore ngom, ne tha thu ruace nia ko.​—Iopu 34:10.

6. Hmaiai kore ngome ci ie ko, ore nodei ci jo nore ten’ ore awe wenei Madaru. Wen’ ore nge?

⁶ Hmaiai kore ngome ci ie ko, ore nodei ci jo wenei Madaru. Wen’ ore nge? Wen’ ore buice ci uane ko, Madaru kore ci musion’ ore ten’ ore aw. Ke eje hna yenone ri Yeno 3 ko, Satana Diabolo kore ci musion’ ore ten’ ore aw.

7, 8. Wen’ ore nge ten’ ore awe ha cece hnen’ ore ci jo?

⁷ Tusi Hmijoc ci ie ko “ten’ o re aw’ ileodene ci hmore ri ten’ o re thu nia.” (1 Ioane 5:19) Hale me Satana, ore ci musion’ ore ten’ ore aw, kore ci ajoni ore ngom. Bone ci “amenuni o re ten’ o re aw’ ileoden.” (Ahngabot 12:9) Ka hmaiai kore ngome ineluko i Satana. Wen’ omelei ten’ ore awe ha cece hnen’ ore ci waiao, ci ekeco, ne ci rue ore nia.

 ⁸ Ten’ ore awe ha cece joko hnei ci jo hnene joko o se ta tan. Adamu ne Eva hna icatace ne Iehova, hale bushengone me kanone joko ore nia jeu’ ore nodei re tei bushengon. Hnen’ ore nia, ta ngome ci ajoni osoten. Hmail’ ore ta ran, buice ci alane co musion’ osoten. Ta ngome ci isesero ko buic, ci rue ore nia ko buic, ne ci irue ko buic. (Thu Pule 4:1; 8:9) Ka numu ta ci jo “ci pina kedine.” (Thu Pule 9:11) Ci pina jeu’ o se ngome ko se accident, ca se sheusheu, wen’ ore bone hna ile ri guhne, ca ri eziene me deko hna uane ri dan.

9. Wen’ ore nge eje thuni co ua sesekone ko, nidi numu tane kei Iehova co nue ore nodei ci jo?

⁹ Deko sa ko ma wenei Iehova kore nodei ci jo. Deko ma Nubonengo kore ci apinani ore ta irue, ca ore ci atangoni ngom, ca ore lata me tac. Se deko joko ma Nubonengo kore ci apinani ore ta wowene, ca ta wene, ca ta ue. Ke bua ngei ci etone ko: ‘Ngei ko Iehova kore Thati Thunitone ri awe ne ten’ ore aw, wen’ ore nge Nubonengo ci nue di ore nodei sheusheu omelei co pina?’ Eje ha ule ko, Madaru ci nidi hnoro ej. Koiko, nidi numu tane kei Nubonengo co nue ore nodei ci jo.​—1 Ioane 4:8.

10. Satana hna iala nia Iehova korion?

¹⁰ Ri gadrane Edrena, Satana Diabolo hna amenuni Adamu ne Eva. Satana hna iala nia Madaru ko, tho kore la musi ni Nubonengo. Satana hna ie du Adamu ne Eva ko, Madaru ci cakoro bushengon’ o se ace me roi. Satana hna ie du Adamu ne Eva ko, roi kore la musi ni bon, ka deko ma nidi ace kei Madaru du bushengon.​—Genese 3:2-5; ule ore Note 27, ri page 253.

11. Nge kore hnenge eje co cedi?

 ¹¹ Adamu ne Eva deko hna ninen’ o Iehova, ka bushengone hna icatace ne Nubonengo. Bushengone hna uane ko, ekowe ke bushengone ko co ureie ore roi, ne il’ ore nia. Ke nianedi ko bushengone hna amenuni bushengone ko. Iehova ha ule ore roi son’ ore ngom. Korione kei Nubonengo co asesekoni omelei?

12, 13. (a) Wen’ ore nge Iehova deko hna canga atangoni Adamu ne Eva? (b) Wen’ ore nge Iehova hna nue Satana co musion’ ore ten’ ore aw? (c) Wen’ ore nge Iehova hna nue ore ngome co musi’ o bone ko?

¹² Iehova deko hna canga atangoni Adamu ne Eva. Nubonengo hna nue bushengone co numu ta re tenen. Ka Madaru hna nue ore re tei Adamu ne Eva co ureie ko, la kore co neceni buic. Ore alatone ni Madaru ko, ore ten’ ore awe co cece hnen’ ore ngome me deko yenian. Ka melei ha co iu, kacene ko Diabolo ci icatace ne Madaru.​—Genese 1:28; Isaia 55:10, 11.

¹³ Satana hna iala nia Iehova ri tadan’ ore ta millions kore ta angela. (Iopu 38:7; Daniela 7:10) Wen’ omelei, Iehova hna nue eziene du Satana, thu co asesekoni ke bone ko, tho kore la musi ni Iehova. Madaru hna nue eziene joko jeu’ ore ngome thu co aehngeni ko, ilo bone thuni co musi’ o bone ko, ngei me tako kei Madaru sei bon. Iehova hna nue ore ngome co aseri ore ta hna doku ome ri ten, lene sen’ ore musi ni Satana.

14. Ci asesekoni ore nge kore eziene me iwe hna nue?

¹⁴ Ha ta milliers kore ta kenereken, ngome ci tubuhnidi co musi’ o bone ko. Ke nianedi ko, ngome tha thuni ko co musi’ o bone ko. Melei ci asesekoni ko,  Satana thu waiao. Nidi ace kore ngome co numu ore ne ekonekatu ni Madaru. Perofeta Jeremia hna ie sesekone ko: “Inu ha ule, ca Iehovango, ko, deko ma pani ngome ko re lani nubon; deko pani ngome o re ci hue co anetitini o re hue nubone ko.”​—Jeremia 10:23.

15, 16. (a) Wen’ ore nge Iehova ci nue iwon’ ore ci jo? (b) Iehova be deko hna atakoni ore nodei nure hna apinani hnei Satana. Wen’ ore nge?

¹⁵ Wen’ ore nge Iehova ci nue iwon’ ore ci jo? Wen’ ore nge Nubonengo ci nue ore nodei sheusheu co pina? Iehova hna nue eziene thu co asesekoni ko, tho kore la musi ni Satana. Ta ngome hna tubuhnidi hmaiai kore ta hna doku ome ri ten. Ke nianedi ko, deko se hna doku hna ruace roi. Ngei me ci ruace tace kei ta scientifiques ca ngei me hmaiai kore ta techniques me kabesi, ke ha nidi cece ko kore lata me deko ma netiti, ne deko ac, ne atangoni ngom, ne ta irue ri pon’ o koda. Hale me tha thuni ko kore ngome co musi’ o bone ko, ngei me tako sei bone kei Madaru.

¹⁶ Iehova be deko hna atakoni ore nodei nure hna apinani hnei Satana. Kacene ko Madaru hna atakoni ore nodei nur, melei Nubonengo ci konekatu Satana co musion’ ore ten’ ore aw. Ke deko sa te kei Iehova co konekatuon’ ore musi ni Satana! Ka ngome thuni joko co uane ko, bone thuni co musi’ o bone ko. Ke waiao komelei. Ka deko sa kei Iehova co rue o se ac, bane konekatuon’ ore ngome co ua sesekon’ ore waiao omelei! Iehova tha thu waiao ko.​—Hebera 6:18.

17, 18. Iehova co rue ore nge ha thu co atakoni ore nodei sheusheu hna apinani hnei Satana?

 ¹⁷ Ore icatace ni Satana ne il’ ore ngome ci nidi apinani ore sheusheu. Ilo, Iehova thuni co thati atakoni ore sheusheu? Egewa. Madaru Thati Thuniton. Iehova ha ule ore eziene co asesekoni ko, ileoden’ ore ta enengoco me nia ni Satana, waiao so. Thubenelo, Nubonengo co ureie ore ten’ ore aw, ha thu co paradrais inom’ ore hnei Nubonengo hna uane koda co rue. Hale me nodei ngome ileodene ri “nodei pua”, ha co roilo yawe. (Ioane 5:28, 29) Ha deko yawe co uedr, ka ha deko yawe co tango kore ngom. Iesu co atakoni ore nodei sheusheu hna apinani hnei Satana. Iehova co ujeni Iesu co “atakonibot’ o re ta ruace ni Diabolo.” (1 Ioane 3:8) Eje ci opodone ko, Iehova be ci kuni iwone son’ ore roi so ej. Iehova ci nue du ej’ ore eziene ha thu ule kaceni Nubonengo, ne ci nue eje co ure Nubonengo co Neceni ej. (Ieielo 2 Peteru 3:9, 10.) Ka eje ma ci jo, Iehova ci konekatu eje co kuni.​—Ioane 4:23; ieielo 1 Korinito 10:13.

¹⁸ Iehova deko ci musi’ o eje co ure Nubonengo co Neceni ej. Nubonengo hna kanu ej’ ore kado me nidi shed: ono re hna nue gupan. Melei ci ie ko, Iehova ci nue eje co ureie ore alaieni ej. Eje dai ule sesonelo ko, korione ke eje co ruacon’ ore kado omelei.

19. Nge kore kado Iehova hna kanu ej? Ka wen’ ore nge eje co nidi acon’ ore kado omelei?

¹⁹ Ore ci nue eje co ureie ore alaieni ej, melei kado  me nidi shede wenei Madaru. Melei ci aehngeni joko ko, eje deko ma inom’ ore nodei ia. Deko ma ekowe sese kore ngome nata ni ej, ne ngome nata nore nodei ia. Buice tha thuni ko co ureie ore roi ne il’ ore nia. Ke eje di thuni co ureie ore ciroi eje ci alan, ca co ureie co aopodoneni Iehova. (Ta Onatre 30:24-28) Eje se deko joko ma ekowe sese ne ta machines. Ileoden’ ore machines ci rue ore alaieni ej. Ke eje ngome thuni co ureie ore singeni eje ci alan, ca co ureie ore ta kani ej, ca co ureie ore eje co rue ri ciroi ni ej. Iehova ci alane ko eje co menenge opodon.

20, 21. Nge kore bua co ureie roion’ onom?

²⁰ Iehova ci alane ko eje co hnoro Nubonengo. (Mataio 22:37, 38) Iehova inom’ o se cecene ci opodon’ ore tei bone ci ie du bone ko “Inu ci hnoro bua” ne il’ ore hnore sa odene ni bon. Ke deko se ngome ci musi’ o bone co ie inomelei. Iehova ci nue eje co ureie co sinemenenge ni Nubonengo, ca deko. Satana, Adamu ne Eva deko hna ureie co sinemenenge du Iehova. Ka bua, korione ke bua co ruacon’ ore hna nue gupa bua hnei Iehova?

²¹ Ta millions kore ngome hna ureie co ninen’ o Iehova, ke deko ma Satana. Bua joko, ruaconelo ore hna nue gupa bua hnei Iehova bane sinemenenge du Nubonengo. (Ta Onatre 27:11) Ri ten’ ore awe me kabesi, Iehova ha co ane bun’ ore nodei ci jo. Nge di kore bua co rue ha thu menenge ri ten’ ore awe me kabesi? Ore Yeno 12 ha co cedi ore hneng’ omelei.