Bo ci nge bo ma ci pareu?— Bo ngei ci kaio caca ca nene. Numu joko se ngome thuni co konekatu bo. Bone kore nidi engetac thawalan’ o re nodei ngome ileoden. Bo ha ule ko la ke bon?— Ka e, Iehova. Eje dai enengoco ti o se aicahman me thathu pareu ko, wen’ o re bone ha ule ko Iehova co iara konekatu bon. Yeleni bone Davita.

Ri bone be wamorow, ceceni bone ne hmani bone hna yeno bone co ala Madaru. Hnen’ omelei, Davita deko te hna pareu ma ci pina du bone kore nodei ace me pareu re ngom. Bone ha ule ko Iehova ci nidi Hnoro bon ka co iara konekatu bon. Ri se ezien, Davita hna cumon’ o re ehna mamoe, ile me kurubut kore gara liona ne canga kuze sa kore mamoe. Bo ha ule o re hnei Davita hna rue? Bone hna leu liona ne hna atangoni hnene so, o re rue wanine ni bon! Se ine te, sa kore bea hna dedelo co kuze o re ehna mamoe, ilei Davita me canga atangoni bone te! Nge kore uane bo, hnei la hna konekatu Davita?— Hnei Iehova.

Numu se ezien Davita nidi hna hnore tac. Ri ezien’ o re si Iseraela hna irue ne si Filisiti. Ka sa kore shoja si Filisiti me nidi kata iw: bone nidi nidi hma! Yeleni bon Goliatha. Bone ci teon’ o re nodei shoja si Iseraela ne Iehova. Bone ci kaio ered ne buic. Ka si Iseraela ci nidi pareu co etha ne bon. Ma taedengi kei Davita omelei, ile bone me ie du Goliatha: “Inu co erede ne bo! Iehova co konekatu nu, ka inu co tace ri poni bo!” Bo ngei deko ma uane ko Davita tace re hnor?— Kori, bone nidi tace re hnor. Ka bo ci alane co taedengi o re kan’ o re wanata ni bon?

Davita canga yose o re wajeri ni bone ne faiv kore ade waete me ta wa purobe, ne canga hue co irue ne Goliatha. Ma canga ule waicahmane kei Goliatha, ile bone me teo bon. Kei Davita ci ie du bone ko: “Bo ci huebut du nu hna ade soad, roidi inu ci huebut du bo ri yeleni Iehova!” Ile bone me canga anelu sa kore waete ri wajeri ni bon, ne canga nyanyade du Goliatha ne canga cedo engetacon’ o re waete hnei wa jeri. Ile me iu netitilu ri gupade ni Goliatha, ile me caralu ke bon, ha tango! Ha  nidi pareu kei si Filisiti, ile buice me etha sic. Hna korione kei Davita me be waicahman co ridi Goliatha?— Hnei Iehova hna konekatu bon, wen’ o re Iehova nidi tace hmaiai!

Ci yeno bo ko nge kore wanata ni Davita?— Ko Iehova so, kore nidi engetace ri pon’ ileoden. Ka Nubonengo kani bo. Koiko ri se ta eziene bo co pareu, uanelo ke bo Iehova thuni co konekatu bo co hnoretac!