Ilo ha hna ie du bo o se ace hna ulan?— * Tusi Hmijoc ci lae natan’ o se ace hna ulan ci kaione ko “ace hna ulane me hmijoc.” Hmijoc wen’ o re wenei Madaru. Ci kaione ko cerugoc wen’ o re nodei ngome tha ule ko. Se ineko kei nodei angela hna there co carajewe o re ac’ omelei. Ilo, bo ci alane co thuni te omelei?—

Ha nidi koda, Madaru hna puze o re cahmane ne hmenewe me hnadan. Yeleni bushengon ko Adamu ne Eva. Madaru hna kanu bushengon’ o re guhne me nidi kariroi bane menengon o re Toto Edena. Kacene ko Adamu ne Eva hna taedengi Nubonengo, bushengone ne re tei bushengone co ruace roion’ o re ten’ o re awe ileoden ha thu co Paradais inom’ o re Toto Edena. Ka bushengone co meneng’ omelei co iara oiru ko. Ka ilo bo ci uan’ o re hnei bushengone hna rue?—

Adamu ne Eva deko hna taedengi Madaru. Tan’ omelei eje onom deko ma ile ri paradais. Madaru ha hna beredone ko ten’ o re awe ileodene ha co kariroi yawe. Nodei ngome ileodene ha co menenge ri opodone me deko bun. Co korion ke Nubonengo co ilon? Iwe ko re nodei ezien, ka deko ma numu se ngome hna cara jewe omelei. Wen’ o re ace hna ulan.

Ma pinalu ome ri ten, ilei Iesu me whane co ie ahngan’ o re ace hna ulan du nodei ngom. Nubonengo ci acarajeweni du buice ko melei ci ie pengen’ o re Baselaia ni Madaru. Nubonengo hna sibo buice co hne thu co apinani o re Baselaia. O re Baselaia ko re co ruac’ on’ o re ten’ o re awe ha thu co paradais me kariroi.

Ilo, bo ci opodone co cara jewe o re ace hna ulan’ omelei?— Deko co hneduhngone ke bo ko buice so, o re ci taedengi Madaru kore co meneng’ on’ o re Paradais. Tusi Hmijoc ci lae natane ko hmaiai ko re ta cahmane ne ta hmenewe me hna taedengi Iehova. Ilo, bo ngei ci alane co cara jewe ri poni buic?— Eje dai eacidanelo ne buic, ne dai ulelo ko co korione ke eje co rue te inome buic.