Da ule o re waicahmane ri wangom. Ineko inom’ o re bone so oden ka bone ci pareu, seseko? Bo ngei ha hna inomelei joko inome bon?— Ac’ omelei thuni co pina du nodei ngom. Tusi Hmijoc ci lae natan’ o re nodei ace hna pina jeu’ o re ta nidi kani Madaru ci uane ko buice so odene hale buice me pareu. Xara sa ni buice Elia. Eje dai etha nata te bonelo.

Bone hna hmalo i Iseraela be deko ma hnapo kei Iesu. Ahaba, doku ni si Iseraela deko ma thidilu du Iehova me nidi Makaze. Yeleni ni hmenueni bone Jezebel. Bushengone sese ci hmi du Baala. Inomelei o re nodei si Iseraela ci thidilu du Baala. Doku hmenew me nidi nia; bone hna alane co atangoni o re nodei nidi thu hne, ne Elia joko! Du bo nge kore hnei Elia hna rue?—

Ilei Elia me sic! Bone hna sice thuaiai ri hnahnerec ne hna oe ri malu. Du  bo nge kore tan bone hna sic?— Seseko bone hna pareu. Bone deko tan co pareu. Nge kore tan? Bone ha ule ko Iehova co konekatu bon. Iehova ha hna aehngeni o re engetace ni Nubonengo. Ri se ezien, Iehova hna kedi o re hmi ni Elia hnen’ o re iei hna sianelu sere ri aw. Inomelei Nubonengo thuni co konekatu bon onom!

Be ile ri malu kei Elia, Ilei Iehova me eto bon: “Bo ci nge om?” Elia ci cedi: “Inu di so kore ci thidilu du bua. Inu di oden, ka inu ci pareu ko ha co atangoni inu.” Elia ci uane ko nodei nidi thu hne ha hna atangoni. Ka Iehova ci cedi: “Tangoko ma inomelei. Be numu ko 7 000 kore ngome ci thidiluko du nu. Hage pareu. Inu be numu ko ruace so bo!” Bo ci uane ko Elia ci opodone co taedengi omelei?—

Nge kore yeno so bo ri wanata ni Elia?— O re wanata’om bane yeno bo ko bo deko co uane ko bo oden, ka bo deko co pareu. Numu ta kanibo ci hnoro Iehova ne bo joko. Seseko, Iehova nidi engetac ka Nubonengo co iara konekatu bo! Ilo, bo ci opodone co cara jewe ko bo deko ma bo so oden?—