Ushiwa ngei du bo kore co ru’ o re roi?— Hmaiai kore ta ngome ci uane inomelei. Tusi Hmijoc ci ie o se waicahmane yelene Josaia. Nidi ushiwa hmaiai du bone kore co ru’ o re roi. Roinedi ko bone numu ta nidi kane hna konekatu bon. Eje dai eacidanelo ne bone ne ta kani bon.

Ceceni bone kei Amona, se doku no Juda. Amona nidi tho; bone ci hmi du wangom. Ma tangolu ke bon, ilei Josaia me doku lu di, bone eit so ko re kenereken. Bo ngei ci uane ko bone co ineteom’ i ceceni bon?— Deko te!

Ri bone be nidi waicahmane, Josaia nidi hna alane co ninen’ o Iehova. Hna ureie so ke bone di o re nodei ngome me nidi ala Iehova. Ile buice me konekatu bone co ru’ o re roi. Eje co ule so ko xara tru ke bushengon.

Ome sa Zefania, perofeta ke bon. Zefania hna perofetane du si Juda o re nodei hnaelo so buice ngei buice ma thidilu du  ta wangom. Josaia hna ninen: bone hna thidilu du Iehova so.

Jeremia joko ko se kani Josaia. Bone ededo ne Josaia, hna hma ke bushengone ri rue guhnen me deko ma ithua. Nidi eaceno ke bushengon, ka ma tango kei Josaia, ilei Jeremia me thurule sa kore era ha thu iara ua bone. Jeremia ne Josaia hna ekonekatujeu ha thu ru’ o re roi, ne thu nineno Iehova.

Nge kore yeno so bo ri pon’ o re tu ni Josaia?— Ri bone be nidi waicahman, Josaia hna nidi alane co ru’ o re roi. Bone ha ule ko co tedre so ne nodei ngome me ci ala Iehova. Bo joko, ureielo so bane kani bo o re nodei ngome ci ala Iehova ne thuni co konekatu bo co ru’ o re roi.