1, 2. (a) Eidhidhimiko lyaGideon naalumentu ye 300 otali tu longo shike? (Tala kethano lyopetameko.) (b) Omolwashike eidhidhimiko lya simana, ngaashi sha popiwa muLukas 21:19?

KALA ando wa fa wu wete olugodhi olululu noitaalu nuwa meya ndoka lwa li pokati kAaisraeli naatondi yawo. Aaisraeli oya li taya wilikwa komutokolihapu, Gideon. Ombiimbeli otayi hokolola shoka sha ningwa po, tayi ti: “Gideon netanga lye lyaalumentu omathele gatatu oye ya komulonga Jordan noye gu taaguluka. Oya li ya loloka nayi.” Oshike sha li she ya lolodha? Gideon naalumentu ye oya li ya tidha uusiku awuhe Aamidian netanga lyawo, uule wookilometa 32. Pethimbo mpoka kaya li natango ya sindana molugodhi, molwaashoka oya li ye na okukondjitha aatondi yawo 15 000. Aatondi mboka oya kala taya thenyene Aaisraeli kongudhi uule womimvo odhindji. Onkee Gideon naalumentu ye oya li ye na okupula komeho natango. Oya tsikile okutidha aatondi yawo sigo ye ya sindi. — Aatokolihapu 7:22; 8:4, 10, 28.

² Sha faathana, natse otu li molugodhi olululu ndoka itaalu nuwa meya. Aatondi ye tu taalela oyo Satana nuuyuni we nosho  wo okwaagwanenena kwetu. Yamwe yomutse otwa kala tatu kondjitha aatondi mbaka omimvo odhindji. Kekwatho lyaJehova otwa sindana momalugodhi ogendji, ihe iita onkee ngaa tayi pwakele. Omathimbo gamwe otashi vulika tu vulwe okukondja nenge okutegelela ehulilo lyuuyuni mbuka wa kolokosha. Jesus okwe tu londodha kutya pomasiku gahugunina otatu ka taalela omamakelo omadhigu notatu ka hepekwa nonyanya. Ashike okwa popi kutya ngele otwi idhidhimike, otatu vulu okusindana. (Lesha Lukas 21:19.) Eidhidhimiko oshike? Oshike tashi ke tu kwathela tu idhidhimike? Oshike tatu vulu okwiilonga kwaamboka ya li yi idhidhimike? Ongiini tatu vulu okupitika ‘eidhidhimiko li tu endithe ondjila ayihe pwaa na omapunduko’? — Jakob 1:4.

3. Eidhidhimiko oshike?

³ Ombiimbeli otayi yelitha eidhidhimiko kutya kali shi owala okukondjitha nenge okutaamba ko onkalo ondhigu. Olya kwatela mo nkene hatu dhiladhila nankene tu uvitile omamakelo. Eidhidhimiko ohali tu kwathele tu kale tu na omukumo, tu kale aadhiginini naatalanteni. Embo limwe otali ti kutya eidhidhimiko ohali tu kwathele tu kale tu na einekelo lya kola nokaatu tyololoke, uuna tu li muudhigu. Ohali tu kwathele tu kale twa thikama oshimati, itaatu tengenya, nonando omashongo oga kale ga tya ngiini. Ohali tu kwathele wo tu sinde omashongo, notu gandje eitulomo mokugwanitha po omalalakano getu, ihe hakuuwehame mboka tu li muwo.

4. Omolwashike tatu vulu okutya ohole ohayi tu inyengitha tu idhidhimike?

⁴ Ohole ohayi tu kwathele tu idhidhimike. (Lesha 1 Aakorinto 13:4, 7.) Opoompito dhini mbela? Ohole yetu yokuhola Jehova ohayi tu inyengitha tu idhidhimikile kehe shimwe a pitika. (Lukas 22:41, 42) Ohole yetu yokuhola aamwatate ohayi tu kwathele tu idhidhimikile omapuko gawo. (1 Petrus 4:8) Ohole yetu yokuhola kuume ketu kopandjokana ohayi tu kwathele tu idhidhimikile ‘uudhigu,’ mboka hawu adha nokuli naaihokani mboka taye shi enditha nawa. Ohole ohayi tu kwathele tu kale tu na ekwatathano lya kola mondjokana. — 1 Aakorinto 7:28.

5. Omolwashike Jehova oye a gwana oku tu kwathela tu idhidhimike?

⁵ Pula Jehova e ku pe oonkondo. Jehova oye “Kalunga, ngoka oluthithiya lweidhidhimiko nolwomukumo.” (Aaroma 15:5) Oye owala u uvite ko thiluthilu oonkalo dhetu, omaiyuvo getu neputuko lyetu. Oku shi nawa shoka twa pumbwa, opo tu idhidhimike. Ombiimbeli otayi ti: “Mboka haye mu simaneke, ote ya pe ashihe shoka ye shi pumbwa, notu uvu omaindilo gawo e te ya hupitha.” (Episalomi 145:19) Jehova ohe tu pe ngiini oonkondo tu idhidhimike uuna tatu dhi mu pula megalikano?

6. Ngaashi Ombiimbeli ye shi uvaneka, ongiini Jehova he tu “pe ompito okuza mo” momamakelo?

⁶ Ngele otwa pula Jehova e tu kwathele tu idhidhimikile emakelo, ohe tu “pe ompito okuza mo mulyo.” (Lesha 1 Aakorinto 10:13.) Ohe shi ningi ngiini? Olundji ohe tu pe oonkondo, ‘opo tu wape okwiidhidhimikila  ashihe shoka tashi tu adha.’ Omathimbo gamwe ohe tu kutha mo mulyo. (Aakolossa 1:11) Jehova ke na siku e ethe onkalo yi tu dhigupalele, e tatu kala itaatu vulu oku yi idhidhimikila. Omolwashike mbela ite shi ningile? Ye oku shi omangambeko getu nawa.

7. Gandja oshiholelwa tashi ulike kutya omolwashike twa pumbwa iikulya yopambepo, opo tu idhidhimike.

⁷ Iikulya yopambepo nayi koleke eitaalo lyoye. Omolwashike iikulya yopambepo ya simana? Natu tye nduno omuntu ota londo kondundu ondeendeeka. Opo a londe ko, esiku ndyoka okwa pumbwa okulya iikulya mbyoka omuntu ha li muule womasiku gatatu nenge gane, opo a kale e na oonkondo dhokulonda ko. Sha faathana, opo tu idhidhimike sigo ehulilo, otwa pumbwa okulya iikulya yopambepo oyindji ngaashi tashi vulika. Otu na okukala twa tokola toko okukonakona aluhe Ombiimbeli paumwene nokuya kokugongala pandjigilile. Iinima mbika oyo tayi ke tu kwathela tu kaleke eitaalo lyetu lya kola. — Johannes 6:27.

8, 9. (a) Okutala kuJob 2:4, 5, oshike hashi kala sha kwatelwa mo uuna tatu yelekwa? (b) Uuna wa taalelwa keyeleko, ethano lini wu na okukaleka momadhiladhilo?

⁸ Kala omudhiginini kuKalunga. Uuna tatu makelwa opu na iinima oyindji mbyoka hayi kala ya kwatelwa mo. Emakelo ihali tu ehameka owala, ihe ohali vulu wo okuteya po uudhiginini wetu. Omukalo moka hatu inyenge uuna tu li memakelo ohagu ulike ngele Jehova otwe mu tala ko ngaa shili e li Omupangeli gweshito alihe. Ngiini mbela? Satana, omutondi gwaJehova, noku li ompinge nuunamapangelo we. Okwa sheke Jehova sho a ti aantu otaye mu longele owala netompelo lyokwiihola mwene. Satana okwa ti ishewe: “Omuntu ota gandja po iinima ye ayihe, opo a kale e na omwenyo.” Satana okwa popi kombinga yaJob a ti: “Ngele to gumu olutu lwe, nena ote ku sheke montaneho!” (Job 2:4, 5) Mbela Satana okwa lunduluka okuza sho a popi oohapu ndhoka? Hasho nando! Omimvo odhindji dha ka landula ko, konima sho a u umbwa mo megulu, okwa kala ta tsikile natango okutamaneka aapiya yaKalunga. (Ehololo 12:10) Kunena Satana onkee ngaa ta humitha komeho iifundja mbyoka, kutya aantu otaya longele owala Kalunga netompelo lyokwiihola mwene. Okwa halelela kaatu simaneke uuthemba waKalunga wokupangela notu ethe po oku mu longela.   

⁹ Uuna to mono iihuna sho wa taalelwa keshongo, kala wa fa wa tala Satana noompwidhuli dhe ya gama kombinga yimwe. Oya tala shoka to ningi notaya ti kutya ono ka shuna ngaa omutse miipeta. Kombinga onkwawo, kala wu wete Jehova nosho wo Omukwaniilwa gwetu Jesus Kristus. Kala wo wu wete aagwayekwa mboka ya yumudhwa nosho wo aayengeli omayuvi. Ohaya kala ya nyanyukwa oku ku mona to kondjitha eshongo ndyoka. Ohashi ya nyanyudha wo sho ye wete kutya oto vulu okwiidhidhimika nokukala omudhiginini kuJehova. Ando kala nduno wu uvite Jehova te ku lombwele ta ti: “Mumwandje, ninga oondunge, u nyanyudhe omwenyo gwandje, opo ndi wape okuyamukula ngoka ta sitha ndje ohoni.” — Omayeletumbulo 27:11.

10. Ongiini to vulu okuholela eidhidhimiko lyaJesus mokukala wa tala kondjambi?

 ¹⁰ Tala kondjambi. Kala ando wa fa wu li molweendo. Ohaluka ondjila ndjoka wu li oya pita kohi yontopa. Sho wu li kohi yontopa, kehe mpoka to tala omilema dhowala. Ngele owa tsikile okuya komeho, ono ka adhe ngaa uuyelele. Onkalamwenyo otayi vulu okuyelekanithwa nolweendo ndoka. Otashi vulika wu pite moonkalo oondhigu notashi vulika wu kale wu uvite dhe ku gwilila po. Jesus otashi vulika naye osho a li u uvite ngawo. Sho a alelwa komuti gwomahepeko, okwa sithwa ohoni, ye okwa li muuwehame uunene. Ndika oli na okukala olyo lya li ethimbo edhigu monkalamwenyo ye. Oshike sha li she mu kwathele i idhidhimike? Ombiimbeli otayi ti kutya okwa li a tala ‘kenyanyu ndyoka lya li lye mu tegelela.’ (Aahebeli 12:2, 3) Jesus okwa li a tala kondjambi ndjoka a li ta ka mona, ngele okwi idhidhimike. Shoka sha li sha simanenena kuye, osho okukala e na ombinga mokuyapulitha edhina lyaKalunga nokuyambidhidha uunamapangelo we. Jesus okwa li e shi shi kutya emakelo ndyoka olyopokathimbo, nonokutya ondjambi ndjoka ta ka mona megulu oyaaluhe. Kunena uudhigu mboka ho tsakaneke otashi vulika wu ku gwilile po noku ku ehameka, ihe dhimbulukwa kutya uudhigu mboka owopokathimbo owala.

11. Omolwashike tu na okukundathana omahokololo gaamboka “yi idhidhimike”?

¹¹ Hatse atuke twa pumbwa okwiidhidhimikila omamakelo. Omuyapostoli Petrus okwa nyola oohapu tadhi landula, opo a tse Aakriste omukumo yi idhidhimikile omamakelo gaSatana. Okwa ti: “Kaleni mu na eitaalo lya kola, opo mu vule oku mu kondjitha. Oshoka omwa tseya nooitaali ooyakwetu yomuuyuni auhe otaa pitile momahepeko ogo tuu ngoka.” (1 Petrus 5:9) Omahokololo gaamboka “yi idhidhimike” otage tu longo tu kale aadhiginini notage tu kwathele tu mone kutya natse otatu vulu okusindana. Otage tu longo wo kutya otatu ka mona ondjambi, ngele otwi idhidhimike. (Jakob 5:11) Natu taleni kiiholelwa yimwe po. ^[1]— Tala enyolo lyopehulilo.

12. Oshike tatu ilongo mo moshiholelwa shaakerubi mboka ya li ya langela poshikunino shaEden?

¹² Aakerubi, aayengeli mboka ye na ondondo yopombanda. Konima sho Adam naEva ya yono, Jehova okwa pe aakerubi yamwe oshinakugwanithwa oshipe kombanda yevi. Osha li sha yooloka ko noonkondo kwaashoka ya li ye na megulu. Oshiholelwa shawo otashi tu longo twi idhidhimike, ngele otwa pewa oshinakugwanithwa oshidhigu. Ombiimbeli otayi ti kutya Jehova “okwa langeke ko aakerubi ye na egongamwele tali yeta omulilo, opo li keelele shaa ngoka ta hedha komuti gwomwenyo.” ^[2] (Tala enyolo lyopehulilo.) (Genesis 3:24) Ombiimbeli itayi popi nando kutya aakerubi mboka oya li taya nyenyeta nenge yu uvite ya simana unene nokugwanitha po  oshinakugwanithwa shoka. Inaya kala ya sa ezaza nenge ya teke omukumo. Pehala lyaashono, oya kala taya longo oshilonga shawo sigo sha pu. Otashi vulika ya kala po omimvo dha konda 1 600, manga Eyelu inaali ya.

13. Oshike sha kwathele Job i idhidhimikile omamakelo?

¹³ Job, omulumentu omudhiginini. Omathimbo gamwe otashi vulika wu uvithwe nayi koohapu ndhoka tadhi teya omukumo dhakuume koye nenge dhomuntu gwaandjeni. Nenge otashi vulika wu kale to ehamenene nenge wa nika oluhodhi, omolweso lyomuntu ngoka wu hole. Oshiholelwa shaJob otashi vulu oku ku hekeleka, kutya nduno owu kale monkalo yini. (Job 1:18, 19; 2:7, 9; 19:1-3) Job ka li e shi kutya omolwashike ta monene iihuna unene ngawo, ihe ina sholola. Oshike she mu kwathele i idhidhimike? Oshinima shotango, okwa li e hole Jehova nokwa li a tila oku mu geyitha. (Job 1:1) Okwa li a hala oku mu nyanyudha momathimbo omawanawa nomawinayi. Oshikwawo, Jehova okwe mu kwathele sho e mu lombwele kombinga yiinima yimwe mbyoka a shita, opo a mone kutya Ye oku na oonkondo. Shika osha gwedha ko keitaalo lyaJob, i itaale kutya Jehova ota ka hulitha po omamakelo agehe pethimbo lyo opala. (Job 42:1, 2) Shika osho Jehova a ningi. Ombiimbeli otayi ti kutya “Omuwa okwe mu yambapaleke ishewe nokwa ndambula uuyamba we mokuyeleka naambwiyaka wotango.” Job ‘okwa si omusamane a kulupilila.’ — Job 42:10, 17.

14. Eidhidhimiko lyaPaulus olya kwathele ngiini ooitaali ooyakwawo, ngaashi sha popiwa mAakorinto aatiyali 1:6?

¹⁴ Omuyapostoli Paulus. Mbela oto patanekwa nenge nokuli to hepekwa? Mbela owu li omukuluntugongalo nenge omutonatelishikandjo, nowu uvite iinakugwanithwa yoye ya fa ye ku gwilila po? Ngele osho, oshiholelwa shomuyapostoli Paulus otashi vulu oku ku kwathela. Paulus okwa li ta hepekwa nonyanya nokwa li ha kala aluhe ti ipula naamwahe momagongalo gi ili nogi ili. (2 Aakorinto 11:23-29) Ashike ina sholola, noshiholelwa she osha kumika oyendji. (Lesha 2 Aakorinto 1:6.) Eidhidhimiko  lyoye nalyo otali vulu okutsa yalwe omukumo nayo yi idhidhimike.

15, 16. (a) “Ondjila” yini edhidhimiko li na oku tu enditha? (b) Gandja oshiholelwa nkene ‘eidhidhimiko tali tu endithe ondjila ayihe pwaa na omapunduko’?

¹⁵ Omulongwa Jakob okwa nyola a ti: “Eidhidhimiko nali mu endithe ondjila ayihe pwaa na omapunduko, opo mu kale mwa gwana, mwaa na oshipo ne inamu pumbwa sha.” (Jakob 1:4) Ongiini eidhidhimiko tali vulu oku tu ‘enditha ondjila ayihe’? Otashi vulika uuna tatu makelwa hatu mono kutya nani otwa pumbwa okugwedha ko kontalanteni yetu, kolupandu nokohole yetu. Sho tatu idhidhimikile omamakelo otashi tu kwathele tu ulike uukwatya mboka shi vulithe shito. Uuna tatu shi ningi, otatu hwepopaleke uukwatya wetu wopaKriste.

¹⁶ Molwaashoka eidhidhimiko otali vulu okuhwepopaleka uukwatya wetu wopaKriste, inatu hala nando okuteya ompango yaJehova, opo ando tu ze mo memakelo. Pashiholelwa, ngele oho kala to dhiladhila kombinga yiipala, kotoka waa ethe omadhiladhilo ngono ge ku fale meyono. Galikana Jehova e ku kwathele wu ga kondjithe. Mbela opu na omuntu gwaandjeni ha kala te ku pataneke? Shono inashi ku teya omukumo. Kala wa tokola toko okukala to longele Jehova. Shoka otashi ke ku kwathela wu koleke einekelo lyoye muYe. Dhimbulukwa kutya opo wu kale wa hokiwa kuKalunga owu na okwiidhidhimika. — Aaroma 5:3-5; Jakob 1:12.

17, 18. (a) Gandja oshiholelwa tashi ulike esimano lyokwiidhidhimika sigo ehulilo. (b) Otu na einekelo lyashike, sho ehulilo tali hedha popepi?

¹⁷ Katu na owala okwiidhidhimika okathimbo, ihe sigo ehulilo. Dhiladhila ando kosikepa tayi ningine mefuta. Opo aayendifuta ya hupithe oomwenyo dhawo, oye na okuyoga sigo okomunkulo. Ngele omuntu okwa tameke okuyoga e ta hulile ondjilakati, ota si omeya. Omuntu wo ngoka ta yogo sigo olwopomunkulo, ihe ina thika komunkulo, naye wo ota si omeya. Ngele otwa hala oku ka kala muuyuni uupe, natse otu na okwiidhidhimika. Otu na okuholela iikala yomuyapostoli Paulus ngoka a ti: “Itatu si uunye.” — 2 Aakorinto 4:1, 16.

¹⁸ Otwi itaala ngaashi omuyapostoli Paulus ngoka a li i itaala thiluthilu kutya Jehova ote mu kwathele i idhidhimike sigo ehulilo. Okwa nyola a ti: “Otatu sindi nokusindilila omolwaangoka e tu hole. Oshoka ondi shi shili kutya kaku na nando oshinima shimwe tashi vulu oku tu topola ko kohole yaKalunga: haeso nenge omwenyo, haayengeli nenge aapangeli naanankondo yomegulu, haambyoka yongashingeyi nenge mbyoka tayi ke ya, hauyuni wokombanda nenge wokohi. Meshito kamu na sha tashi vulu oku tu topola ko kohole yaKalunga yi li muJesus Kristus, Omuwa gwetu.” (Aaroma 8:37-39) Odhoshili kutya omathimbo gamwe otashi vulika tu vulwe. Ngele otwa kala tu uvite ngawo, natu holeleni Gideon naalumentu ye. Oya li ya vulwa, ihe oya pula owala komeho. Ombiimbeli otayi ti kutya ‘oya landula aatondi yawo.’ — Aatokolihapu 8:4.