UUKALELE wetu owa simana nowu na ongushu. Haantu ayehe mboka hatu uvithile yu uvite ko oshinima shika. Nonando aantu oye na ohokwe mwaashoka Ombiimbeli tayi ti, haaluhe haya kala yu uvite kutya osha simana okukonakona natse Oohapu dhaKalunga.

Natu tale koshiholelwa shaGavin. Okwa li ha ka gongala kOshinyanga shUukwaniilwa, ihe ka li a hala okukonakona Ombiimbeli. Okwa ti kutya okwa li e shi kashona kombinga yOmbiimbeli, ihe ka li a hala aantu ye shi dhimbulule mo. Okwa li a tila okupulwa a ninge oshilyo shelongelokalunga, noka li a hala e endwe mevi. Mbela sho to tala, Gavin okwa li ngaa ta vulu okukwathelwa? Dhiladhila owala kuuwanawa mboka omuntu ta vulu okumona uuna a longwa Ombiimbeli. Jehova okwa lombwele Aaisraeli a ti kutya “noohapu dhandje nadhi ndonde ngomume,ngaashi omata komwiidhi gwohuluhulu.” (Deuteronomium 31:19, 30; 32:2) Otatu ki ilonga iinima yimwe kombinga yomume nokuyelekanitha uukalele wetu nomume, opo tu vule okukwathela “aantu ayehe.” — 1 Timoteus 2:3, 4.

Omata gomume. Omume ohayi ya molupe lwoshitsime nohayi ndonda kashona nakashona. Oohapu dhaJehova ongiini dha ‘ndonda ngomume’? Okwa li a popi noshigwana she nelaka etalala, momukalo gwombili nogwohenda. Ohatu mu holele mokusimaneka shoka yalwe yi itaala. Ohatu ya ladhipike ye shi ndhindhilike mo yo yene noya ninge omatokolo kuyo yene. Uuna tatu ulike ohokwe ndjono, aantu otaya ka kala ye na ehalo lyokutaamba ko shoka tatu ya lombwele, nokungawo uukalele wetu otawu ka pondola.

Omume ohayi talaleke. Uukalele wetu otawu ka talaleka yalwe, ngele ohatu dhiladhila omikalo dhi ili nodhi ili ndhoka tatu vulu okulongitha tu ya kwathele yi ilonge oshindji kombinga yoshili. Omumwatate Chris, ngoka a konakona tango naGavin, ina kambadhala oku mu thiminika a tameke ekonakonombiimbeli. Pehala lyaashono, okwa kambadhala okulongitha omikalo dhilwe, opo a ningithe Gavin a kale a mangulukila oonkundathana dhawo kombinga yOmbiimbeli. Chris okwa lombwele Gavin kutya mOmbiimbeli omu na etumwalaka lya simana. Ngele okwe li ilongo otali ke mu kwathela u uve ko nawa okugongala. Okuza mpono, Chris okwa yelitha kutya omahunganeko gOmbiimbeli oge mu tompa paumwene kutya oyi li paushili. Oshizemo, oya kala taya kundathana olundji kombinga yomahunganeko ngono ga gwanithwa. Oonkundathana ndhoka odha talaleke Gavin, nokonima okwa tameke okukonakona Ombiimbeli.

Omume oya simana monkalamwenyo. Pethimbo lyuupyu nolyoluteni muIsraeli, otashi vulika ku kale inaaku lokwa oomwedhi dhontumba. Ngele kapu na oshimuke shoka hashi etwa komume, iimeno ohayi ganya nokusa. Jehova okwa popi kutya pethimbo lyetu otaku kala oshikukuta. Osha shike mbela? Oshopambepo, molwaashoka aantu “otaa ka sa ondjala nenota lyohapu yOmuwa.” (Amos 8:11) Jehova oku uvaneka kutya aagwayekwa otaya ka “fa omata gomume ga tumwa kOmuwa,” sho tayu uvitha onkundana ombwanawa yUukwaniilwa, taya ambidhidhwa ‘koonzi dhilwe.’ (Mika 5:7; Johannes 10:16) Etumwalaka ndyoka hatu uvitha olimwe lyomomasiloshimpwiyu gaJehova, okugandja omwenyo kwaamboka ya sa enota lyoshili. Mbela owa lenga ngaa etumwalaka ndyono?

Omume eyambeko lya za kuJehova. (Deuteronomium 33:13) Uukalele wetu otawu vulu okukala eyambeko kwaamboka taya pulakene. Ekonakonombiimbeli olya li eyambeko kuGavin, molwaashono olye mu kwathele a mone omayamukulo komapulo ge agehe. Okwa ningi ehumokomeho nziya, e ta ninginithwa. Ngashingeyi oku hole okuuvitha onkundana ombwanawa yUukwaniilwa pamwe nomukadhi, Joyce.

Okuyelekanitha iilonga yetu yokuuvitha nomume otaku vulu wo oku tu kwathela tu uve ko kutya oonkambadhala dhetu pauhandimwe muukalele, odhi na ongushu. Ngiini mbela? Eta kehe lyomeya ohali kwathele kashona, ihe ngele opu na omata gomeya ogendjigendji, nena evi oli na okututa. Sha faathana, kehe gumwe shono ha longo muukalele otashi vulika e shi tale ko shi li okanima okashona. Ongiini ngele owa tula kumwe oowili omamiliyona ndhoka aapiya yaJehova ya longa? Oto ke shi mona kutya “iigwana ayihe” oyu uvithilwa. (Mateus 24:14) Mbela uukalele wetu owu li ngaa eyambeko ndyoka lya za kuJehova? Eeno, etumwalaka lyetu otali ka kala lya fa omume kuyalwe, ndjoka tayi ndonda, ya talala noya simana monkalamwenyo!