1-3. (a) Aakriste oyu ulike ngiini kutya oya lenga okugongala pamwe? (Tala kethano lyopetameko.) (b) Oshike tatu ka kundathana moshitopolwa shino?

YINA yomumwameme Corinna okwa li a kwatwa po e ta tuminwa kokamba hoka a ka kala ta longithwa iilonga iidhigu. Shoka osha ningwa owala sho Corinna e na omimvo 17. Lwanima, Corinna naye okwa tuminwa kofaalama yimwe yi li koSiberia, kokulekule noyaandjawo. Okwa li ha longithwa shomupika. Omathimbo gamwe okwa li ha thiminikilwa okulonga pondje muutalala wamemememe, inaa zala oonguwo dhuupyu. Esiku limwe Corinna nomumwameme gumwe oya tokola ya ye kokugongala.

² Corinna okwa ti: “Mofaalama otwa zi mo kongulohi, e tatu yi kosasiona yomashina notwe ende oshinano shookilometa 25. Eshina olya katuka pombali yuusiku. Meshina otwa kala mo uule woowili hamano notwa heluka mo. Otwe ende natango ookilometa omulongo, opo tu thike pokugongala.” Corinna okwa li a nyanyukwa sho a thiki pokugongala. Okwa ti: “Pokugongala otwa li twa konakona Oshungolangelo e tatu imbi omaimbilo gUukwaniilwa. Shika osha li she tu tungu nosha koleke  lela eitaalo lyetu.” Konima yomasiku gatatu aamwameme mbaka yaali oya shuna kofaalama, ihe mwene gwofaalama ka li e shi nongela kutya omasiku agehe ngoka kaye mo.

³ Aapiya yaJehova ohaya yuulukwa aluhe okugongala pamwe. Pashiholelwa, Aakriste yopetameko oya li haya kala ya hala okulongela Jehova pamwe nokwiilonga kombinga ye. (Iilonga 2:42) Osha yela kutya nangoye oho kala wa halelela okukala pokugongala kehe. Otashi vulika hashi kala oshidhigu omathimbo gamwe okukala po aluhe, ngaashi naanaa hashi kala oshidhigu kaamwatate naamwameme yalwe. Otashi vulika iilonga yoye hayi ku pula wu longe oowili odhindji nenge wu na iinakugwanithwa oyindji, nenge pamwe ho kala aluhe wa vulwa. Mbela oshike tashi ke tu kwathela tu kale aluhe pokugongala? ^[1] (Tala enyolo lyopehulilo.) Oshike tu na okuninga tu ladhipike aakonakonimbiimbeli yetu nosho wo yalwe ya kale aluhe haye ya kokugongala? Oshitopolwa shika otashi ka yelitha kutya omolwashike okukala pokugongala (1) taku ke tu kwathela, (2) taku ka kwathela yalwe, (3) nohaku nyanyudha Jehova. ^[2]— Tala enyolo lyopehulilo.

4. Okugongala pamwe ohaku tu kwathele ngiini tu ilonge kombinga yaJehova?

⁴ Okugongala ohaku tu longo. Pokugongala kehe ohatu ilongo oshindji kombinga yaJehova. Pashiholelwa, omagongalo ogendji opo owala ga mana okukonakona embo Hedha popepi naJehova pEkonakonombiimbeli lyEgongalo. Owa li wu uvite ngiini sho tamu kundathana omaukwatya gaJehova naasho wu uvu nkene aamwaho ye mu uvitile? Osha yela kutya shoka oshe ku kwathele wu kale wu hole Jehova shi vulithe nale. Pokugongala ohatu ilongo po oshindji kombinga yOmbiimbeli, uuna twa pulakena nawa sho tayi leshwa, sho tatu pulakene twi itula mo kiipopiwa nokomauliko. (Nehemia 8:8) Dhiladhila wo kuuyelele owundji mboka hatu ilongo oshiwike kehe sho tatu ilongekidhile elesho lyOmbiimbeli naasho hatu pulakene kwaashono ooitaali ooyakwetu yi ilonga mo.

5. Okugongala okwe ku kwathela ngiini wu tule miilonga shoka wi ilonga mOmbiimbeli nokuhwepopaleka omukalo gwoye gwokuuvitha?

⁵ Kokugongala ohatu longwa nkene tu na okutula miilonga monkalamwenyo yetu shoka twi ilonga mOmbiimbeli. (1 Aatessalonika 4:9, 10) Pashiholelwa, mbela owa li nale pEkonakono lyOshungolangelo e to zi po wu uvite wa hala okulongela Jehova shi vulithe shito? Nenge wa hala okuhwepopaleka omagalikano goye nowa hala wu dhimine po omumwameme nenge omumwatate gwontumba? Okugongala hoka hatu kala tu na mokati koshiwike ohaku tu longo nkene tu na okuuvitha onkundana ombwanawa. Ohaku tu kwathele wo tu uve ko oshili yOmbiimbeli. — Mateus 28:19, 20.

6. Ongiini okugongala haku tu tsu omukumo noku tu kwathela tu kale twa pama?

⁶ Okugongala ohaku tu tsu omukumo. Uuyuni waSatana otawu kambadhala okunkundipaleka eitaalo lyetu. Otashi vulika  wu tu kaleke tu uvite twa dhigupalelwa notwa teka omukumo. Okugongala ohaku tu tsu omukumo nohaku tu koleke tu tsikile okulongela Jehova. (Lesha Iilonga 15:30-32.) Olundji ohatu kundathana nkene omahunganeko ngoka taga adhika mOmbiimbeli taga gwanithwa. Shika ohashi tu kwathele tu kale tu wete kutya nani naangoka ge li komeho onaga ka gwanithwe. Aamwatate naamwameme ihaye tu tsu owala omukumo niipopiwa yawo. Omayamukulo gawo nosho wo oondjimbohambelelo dhawo tadhi imbwa nomwenyo aguhe ohadhi tu tsu wo omukumo. (1 Aakorinto 14:26) Ohatu kala wo tu uvite twa pepelelwa sho tatu popi nayo manga okugongala inaaku tameka nongele kwa piti mo, molwaashoka otatu popi nookuume mboka ye tu hole shili. — 1 Aakorinto 16:17, 18.

7. Omolwashike okukala pokugongala kwa simana?

⁷ Ombepo ondjapuki ohayi tu kwathele sho tu li pokugongala. Oyo hayi longithwa kuJesus okuwilika egongalo. Jesus ote tu lombwele mOmbiimbeli kutya natu “uve ko shoka Ombepo te shi lombwele omagongalo!” (Ehololo 2:7) Otayi vulu oku tu kwathela tu kondjithe omamakelo notu uvithe nuulaadhi. Otayi vulu wo oku tu kwathela tu ninge omatokolo ge li mondjila. Onkee ano, otu na okukambadhala twa mana mo tu kale pokugongala, opo tu mone ekwatho lyombepo ondjapuki yaKalunga.

8. Okukala kwetu pokugongala, omatyokosha getu nosho wo sho tatu imbi, iinima mbyono ohayi kwathele ngiini aamwatate? (Tala wo oshimpungu: “Pokugongala oha zi po aluhe a pepelelwa.”)

⁸ Uuna tu li pokugongala otu na ompito yokuulukila aamwatate naamwameme ohole. Oyendji megongalo otayi idhidhimikile oothina. Omuyapostoli Paulus okwa nyola a ti: “Tu silathaneni oshimpwiyu.” (Aahebeli 10:24, 25) Shika otatu vulu oku shi ninga ngele ohatu gongala pamwe, opo tu tsaathane omukumo. Ngele ohatu yi kokugongala otatu ulukile aamwatate kutya otwa hala okukala nayo, okupopya nayo notu na ohokwe mushoka yu uvite. Ohatu ya tsu wo omukumo sho yu uvite tatu gandja omayamukulo naasho  tatu imbi nomwenyo aguhe. — Aakolossa 3:16.

9, 10. (a) Yelitha nkene oohapu dhaJesus ndhoka dhi li muJohannes 10:16 tadhi tu kwathele tu uve ko esimano lyokugongala naamwatate. (b) Ngele ohatu kala pokugongala pandjigilile, otashi ka kwathela ngiini gumwe ngoka ke niwe naye kuyaandjawo?

⁹ Otatu kwathele egongalo li kale lya hangana, ngele ohatu yi kokugongala. (Lesha Johannes 10:16.) Jesus okwi ifaathanitha nomusita gwoonzi, naalanduli ye ongoonzi moshigunda. Dhiladhila ando oonzi mbali dhi li komulondo, omanga mbali dhi li mesilu nayimwe yi li kumwe kwi ili. Mbela oonzi ndhino otatu vulu ngaa okutya odhi li moshigunda shimwe? Aawe. Oonzi ohadhi napele pamwe nohadhi landula omusita gwadho. Sha faathana, natse katu na okufaula okugongala nenge tu kale kokule naamwatate. Otu na okugongala nayo, opo tu kale “oshigunda shimwe” tatu landula “omusita gumwe.”

¹⁰ Okugongala ohaku tu kwathele tu kale twa hangana twa fa iilyo yegumbo limwe. (Episalomi 133:1) Yamwe megongalo oye ekelwahi kaavali yawo nenge kaamwayina. Jesus okwe ya uvanekela kutya ote ke ya pa oohe, ooyina naamwayina mboka ye ya hole nohaye ya sile oshimpwiyu. (Markus 10:29, 30) Oto vulu okuninga he, yina nenge omumwayina gwomuntu gwontumba megongalo ngele owa kala ho yi aluhe kokugongala. Ngele otwa dhiladhila nawa koshinima shika, otatu ka kambadhala twa mana mo tu kale pokugongala kehe.

11. Okugongala ohaku tu kwathele ngiini tu pe Jehova shoka e na okupewa?

¹¹ Ohatu pe Jehova shoka e na okupewa, uuna tu li pokugongala. Otu na oku mu pandula, oku mu simaneka noku mu  tanga, oshoka oye omushiti gwetu. (Lesha Ehololo 7:12.) Shika ohatu shi ningi sho tatu mu galikana, tatu mu imbile notatu popi kombinga ye pokugongala. Uuthembahenda owu thike peni sho hatu pewa ompito yoku shi ninga oshiwike kehe!

12. Jehova oha kala u uvite ngiini sho tatu vulika kelombwelo lye tu kale pokugongala?

¹² Otu na okuvulika kuJehova, oshoka oye e tu shita. Ote tu lombwele tu kale hatu gongala pamwe, unene tuu sho ehulilo tali hedha popepi. Jehova oha kala a nyanyukwa sho tatu vulika kelombwelo ndyoka. (1 Johannes 3:22) Oku wete kutya otwa hala okukala pokugongala nokwa hokwa oonkambadhala ndhoka tatu ningi, opo tu kale po. — Aahebeli 6:10.

13, 14. Omeityo lini hatu hedha popepi naJehova nosho wo naJesus ngele tu li pokugongala?

¹³ Ngele ohatu yi kokugongala, otatu ulukile Jehova kutya otwa hala okuhedha popepi naye nosho wo nOmwana. Pokugongala ohatu longwa kuJehova shoka tu na okuninga nankene onkalamwenyo yetu yi na okukala, sho tatu konakona Ombiimbeli. (Jesaja 30:20, 21) Mboka ihaaya longele Jehova, ngele oye ya kokugongala kwetu ohaya dhimbulula kutya oye te tu wilike. (1 Aakorinto 14:23-25) Jehova oha wilike okugongala kwetu nombepo ye ondjapuki, naashoka tatu ilongo ko ohashi zi kuye. Onkee ano, pokugongala ohatu pulakene kwaashoka Jehova ta ti. Ohatu kala tu uvite kutya oku tu hole nohatu hedha popepielela naye.

¹⁴ Jesus, omutse gwegongalo lyetu, okwa ti: “Mpoka pu na yaali nenge yatatu ya gongala medhina lyandje, ongame wo ondi li mokati kawo.” (Mateus 18:20) Ombiimbeli otayi ti wo kutya Jesus ote “ende pokati” komagongalo. (Ehololo 1:20–2:1) Osha yela kutya Jehova naJesus ohaya kala pamwe natse nohaye tu koleke sho tu li pokugongala. Mbela sho to tala Jehova oha kala u uvite ngiini, sho e ku wete to kambadhala wa mana mo wu hedhe popepi naye nosho wo nOmwana?

15. Okuya kokugongala ohaku ulike ngiini kutya otwa hala okuvulika kuKalunga?

¹⁵ Ngele ohatu yi kokugongala otatu ulukile Jehova kutya otwa hala okuvulika kuye. Jehova ihe tu thiminike tu ninge shoka te tu lombwele. (Jesaja 43:23) Ngele otwa tokola okukala pokugongala ngaashi e tu lombwela, otashi ulike kutya otu mu hole notwi itaala kutya oku na uuthemba woku tu lombwela shoka tu na okuninga. (Aaroma 6:17) Pashiholelwa, otatu ka ninga po shike ngele omuhona gwetu okwa hala tu longe oowili odhindji, shoka tashi ke tu ningitha tu kale hatu faula okugongala? Nenge pamwe epangelo lyoshilongo shetu otali ti kutya ngele otwa adhika twa gongala tatu longele Jehova otu na okufutithwa, okutulwa mondjedhililo nenge okugeelwa negeelo lilwe lya kwata miiti nokuli. Nenge omathimbo gamwe tashi vulika tu kale twa hala okwiipyakidhila niimpwiyu yetu yilwe, pehala lyokuya kokugongala. Moompito adhihe ndhika, otse tatu ka tokola shoka tu na okuninga. (Iilonga 5:29) Otu na okudhimbulukwa  kutya ethimbo kehe tatu tokola okuvulika kuye, otatu mu nyanyudha. — Omayeletumbulo 27:11.

16, 17. (a) Otu shi shi ngiini kutya Aakriste mboka ya li ko omimvo 2000 nasha dha ka pita oya li ya simaneka okugongala? (b) Omumwatate George Gangas okwa li ha kala u uvitile ngiini okugongala?

¹⁶ Aakriste oya kala haya gongala aluhe pamwe ya longele Jehova, okuza pokugongala hoka kwa ningilwe pOpentekoste yomomumvo 33. Ombiimbeli otayi ti: “Oyo oya kala taa longwa kaayapostoli e taa topola shoka ye shi na naayapostoli.” (Iilonga 2:42) Sho ya li taya hepekwa kepangelo lyaRoma nokaawiliki yelongelokalunga lyOshijuda, inaya etha po okugongala. Kasha li oshipu, ihe oya ningi ashihe shoka taya vulu, opo ya tsikile okugongala pamwe.

¹⁷ Sigo okunena aapiya yaJehova oya pandula noonkondo sho haya gongala pamwe nohaya kala ye shi nyanyukilwa. Omumwatate George Gangas, ngoka a kala oshilyo sholutuwiliki uule womimvo 22, okwa ti: “Okugongala naamwatate ohaku etele ndje enyanyu enene monkalamwenyo yandje nohaku tsu ndje omukumo. Ondi hole okukala nda kwatelwa mo maantu mboka haya thiki tango pOshinyanga shUukwaniilwa nondi hole okukala mwaamboka taya hugunine po, ngele otashi vulika. Ohashi pe ndje ombili yokomutima uuna tandi popi naapiya yaKalunga. Uuna ndi li nayo ohandi kala nda manguluka, oshoka ondi li naantu yaandjetu moparadisa yopambepo.” Okwa gwedha ko a ti: “Muule womadhiladhilo gandje nowomwenyo gwandje ohandi kala nda halelela okukala pokugongala.”

18. Owu uvitile ngiini okugongala kwetu, nowa tokola toko okuninga shike?

¹⁸ Mbela nangoye osho ngaa ho kala wu uvite ngawo ngele tashi ya pokulongela Jehova? Ngele osho, kambadhala wa mana mo wu kale ho gongala naamwaho, nonando kashi shi oshipu. Ulukila Jehova kutya nangoye owu uvite ngaashi omukwaniilwa David a li u uvite, sho a ti: “Omuwa, ondi hole egumbo lyoye.” — Episalomi 26:8.