1-2. Oolye taya vulu okukwathela omukonakonimbiimbeli a ninge ehumokomeho noku ninginithwe?

OMUMWAMEME Amy gwokoFiji, okwa ti: “Onda li ndi hole shoka handi ilongo pekonakonombiimbeli lyandje. Onda li ndi shi kutya oshili. Sho nda tameke okweendathana naamwatate naamwameme osha kwathele ndje ndi ninge omalunduluko nonda ningi ehumokomeho, e tandi ninginithwa.” Oshimoniwa shaAmy otashi tu longo oshili ndjika ya simana: Ngele omukonakonimbiimbeli oha kwathelwa kuyalwe megongalo, ohashi kala oshipu kuye a ninge ehumokomeho noku thike poshitsa shokuninginithwa.

² Kehe omuuvithi ota vulu okukwathela mboka aape ya kale oshitopolwa shegongalo. (Ef. 4:16) Omukokolindjila gwedhina Leilani, ngoka ha zi moVanuatu, okwa ti: “Opu na eyeletumbulo hali ti, ngele tashi ya pokuputudha okanona, ohashi pula oonkambadhala dhaayehe. Shoka osha faathana nokuninga aantu aalongwa; ohashi pula egongalo alihe okweeta gumwe moshili.” Osha yela kutya aavali, aapambele, ookuume nosho wo aalongi kosikola, ohaya dhana onkandangala mokuputudha okanona sigo ka ningi omukuluntu. Shoka ohaye shi ningi, mokukala taye ka ladhipike nomoku ka longa iinima ya simana. Sha faathana, aauvithi otaya vulu okupa aakonakonimbiimbeli omayele, oku ya ladhipika noku ya tulila po oshiholelwa oshiwanawa, shoka tashi ke ya kwathela ya ninge ehumokomeho noya ninginithwe. — Omayel. 15:22.

3. Oshike to ilongo kwaashoka sha popiwa kuAna, Dorin naLeilani?

³ Omolwashike omuuvithi ngoka ha konakona nomukonakoni e na okutaamba ko ekwatho ndyoka aauvithi yalwe taya vulu oku pa omukonakoni gwe? Ndhindhilika shoka omukokolindjila i ikalekelwa gwedhina Ana, gwokoMoldova, a ti: “Sho omukonakonimbiimbeli  te ende ta ningi ehumokomeho, ohashi kala oshidhigu noonkondo okugwanitha po ongoye awike oompumbwe adhihe ndhoka ha kala e na.” Dorin, omukokolindjila i ikalekelwa ngoka ha longele moshilongo omo tuu moka, okwa ti: “Olundji, aauvithi yalwe ohaya popi oohapu tadhi gumu omutima gwomukonakoni, ndhoka tashi vulika kaandi na siku ndi dhi mu lombwele.” Leilani okwa popi wo oshinima shilwe, a ti: “Ohole nolukeno ndwoka omukonakoni hu ulukilwa, otalu vulu oku mu kwathela a mone kutya tse aalongeli yaJehova shili.” — Joh. 13:35.

4. Oshike tatu ka kundathana moshitopolwa shika?

⁴ Nonando ongawo, otashi vulika wi ipule to ti: ‘Otandi vulu ngiini okukwathela omukonakonimbiimbeli a ninge ehumokomeho ngele hangame handi konakona naye?’ Natu ka taleni kwaashoka tatu vulu okuninga uuna twa pulwa kugumwe tu mu wayimine sho ta konakona nomuntu nosho wo shoka tatu vulu okuninga, uuna omukonakoni ngoka a tameke okukala he ya kokugongala. Otatu ka tala wo nkene aakuluntugongalo taya vulu okukwathela aakonakoni ya hume komeho noya ninginithwe.

5. Onkandangala yini ho dhana, uuna gumwe e ku pula wu kale po sho ta konakona nagumwe?

⁵ Pekonakonombiimbeli, ngoka ha konakona nomuntu ngoka oye e na unene oshinakugwanithwa shoku mu kwathela u uve ko Oohapu dhaKalunga. Ngele okwe ku pula wu mu wayimine, owu na okukala wu shi kutya ngoye omukwathi gwe. Elalakano lyoye oku mu kwathela. (Omuuv. 4:9, 10) Mbela oshike kondandalunde to vulu okuninga, opo mu ninge ekonakono tali ti sha?

6. Uuna wa pulwa kugumwe wu mu wayimine sho ta ka ninga ekonakono, ongiini to vulu okutula miilonga omayele ngoka taga adhika mOmayeletumbulo 20:18?

⁶ Ilongekidhila ekonakonombiimbeli ndyoka. Tango, pula ngoka to ka longa pamwe naye e ku lombwele paufupi kombinga yomukonakoni. (Lesha Omayeletumbulo 20:18.) Oto vulu oku mu pula to ti: “Omukonakoni gwoye omuntu a taya ngiini? Oshikando shino otamu ka kundathana kombinga yashike? Oshike naanaa wa hala i ilonge pekonakono ndika? Mbela opu na shoka ndi na okuninga nenge kaandi na okuninga nenge ndi na okuyanda okupopya sho tatu konakona? Ongiini tandi vulu oku mu ladhipika a ninge ehumokomeho?” Odhoshili kutya ngoka ha konakona naye ite ke ku lombwela iiholekwa yomukonakoni, ihe shoka te ku lombwele kombinga yomukonakoni otashi vulu oku ku kwathela. Omutumwa gumwe gwedhina Joy, oku na ondjigilile yokukundathana iinima mbyoka naamboka haya mu wayimine sho ta ka ninga omakonakono. Okwe shi zimine, a ti: “Oonkundathana dha tya ngawo ohadhi kwathele mboka tandi longo pamwe nayo, ya kale ye na ohokwe momukonakoni noya mone kutya oya pumbwa oku ka popya kombinga yashike pekonakono.”

7. Ngele owa hiywa wu kale pekonakonombiimbeli lyagumwe, omolwashike nangoye wa pumbwa oku li ilongekidhila?

⁷ Ngele owa pulwa wu kale pekonakono lyagumwe, oshi li pandunge wu li ilongekidhile. (Esra 7:10) Omumwatate Dorin ngoka a popiwa  metetekelo, ota ti: “Ohandi shi pandula uuna ngoka tatu longo pamwe naye i ilongekidhila ekonakono ndyoka tatu ka ninga. Kungawo ohashi kala oshipu kuye a ka kuthe ombinga pekonakono, mokugandja omatyokosha taga ti sha.” Shimwe ishewe, omukonakoni naye otashi vulika a mono kutya amuhe omwi ilongekidha nawa, naashoka otashi ka kala oshiholelwa oshiwanawa kuye. Ngele ino vula okwiilongekidhila oshikundathanwa ashihe thiluthilu, shilipaleka kutya owu shi nawa enenedhiladhilo lyasho.

8. Ongiini to vulu okushilipaleka kutya egalikano lyoye pekonakonombiimbeli otali ti sha?

⁸ Egalikano oli li oshitopolwa sha simama shekonakonombiimbeli, onkene dhiladhila komeho yethimbo shoka to ka tya ngele owa pulwa ongoye wu galikane. Kungawo egalikano lyoye otali ka kala li na omungunda. (Eps. 141:2) Hanae, ngoka ha kala moJapani, ota dhimbulukwa natango omagalikano gomumwameme ngoka a li he ya pamwe nomumwameme ngoka a li ha konakona naye. Ota ti: “Osha li shi iwetikile kutya omumwameme ngoka oku na ekwatathano lya kola naJehova, nonda li nda hala okukala nde mu fa. Uuna a tumbula edhina lyandje megalikano, osha li hashi ningitha ndje ndi kale ndi uvite ndi holike.”

9. Shi ikolelela kuJakob 1:19, oshike to vulu okuninga wu kwathele ngoka ta kwatele komeho ekonakonombiimbeli?

⁹ Ambidhidha ngoka ta kwatele komeho ekonakonombiimbeli. Omumwameme Omamuyovbi, omukokolindjila i ikalekelwa gwokoNigeria, ota ti: “Ohashi kwathele lela ngele ngoka e li pamwe nangoye pekonakono ota landula. Ota vulu okugandja omatyokosha omawanawa, ihe haye e na okukala ta popi oshindji, oshoka haye ta kwatele komeho ekonakonombiimbeli.” Ongiini to vulu okutseya kutya ethimbo lini to vulu okutya sha naashoka wu na okupopya? (Omayel. 25:11) Kala to pulakene neitulomo sho ngoka ta kwatele komeho ekonakonombiimbeli ta kundathana nomulongwa gwe. (Lesha Jakob 1:19.) Kungawo opo owala to ka vula okutseya kutya egwedhelopo lini wa pumbwa okuninga. Odhoshili kutya owa pumbwa okudhiladhila nawa manga inoo tya sha. Pashiholelwa, ino pumbwa okupopya iinima oyindji, ino kwata omulongi melaka, nenge wu ete po oshikundathanwa inaashi pamba shoka tamu kundathana. Pehala lyaashono, oto vulu okuninga etyokosha efupi, okugandja ethaneko nenge okupula epulo, wu yelithe oshitsa shoka tamu kundathana. Omathimbo gamwe otashi vulika wu kale wu uvite kuu na egwedhelopo lyasha sho tamu konakona. Nonando ongawo, okupandula omukonakoni nokuulika ohokwe muye, otashi ke mu kwathela noonkondo a hume komeho.

10. Iimoniwa yoye otayi vulu ngiini okukwathela omukonakonimbiimbeli?

¹⁰ Kuthila ko omukonakoni kiimoniwa yoye. Ngele otashi wapa, mu lombwela paufupi nkene wa mona oshili, nkene wu ungaunga nomaupyakadhi nenge kombinga yankene Jehova e ku kwathela monkalamwenyo yoye. (Eps. 78:4, 7) Shoka to mu lombwele otashi vulika shi mu kwathele. Otashi vulika shi ka koleke eitaalo lye nenge shi mu ladhipike a tsikile okuninga ehumokomeho noku ninginithwe.  Otashi vulika wo shi mu kwathele a mone nkene e na okuungaunga nomashongo ngoka a taalela. (1 Pet. 5:9) Gabriel, ngoka ha zi moBrazil noku li ngashingeyi omukokolindjila, ota dhimbulukwa shoka she mu kwathele, sho a li ta konakona Ombiimbeli. Ota ti: “Sho ndu uvu iimoniwa yaamwatate, onda mono kutya Jehova oha kala e wete omashongo ngoka twa taalela. Ngele yo oya vula oku ga sinda, nangaye otandi vulu oku shi ninga.”

11-12. Omolwashike twa pumbwa okutaamba ko nomaako agehe aakonakonimbiimbeli mboka haye ya kokugongala?

¹¹ Opo omukonakonimbiimbeli a ninge ehumokomeho noku ninginithwe, oku na okukala ha gongala pandjigilile nokumona mo uuwanawa. (Heb. 10:24, 25) Ngoka ha konakona naye otashi vulika oye e mu hiye kokugongala kwe kwotango. Uuna e ya ko, atuheni otatu vulu oku mu ladhipika a kale he ya aluhe kokugongala. Omomikalo dhini mbela tatu vulu oku shi ninga?

¹² Natu taambe ko omukonakoni nomaako agehe. (Rom. 15:7) Ngele omukonakoni okwa kala u uvite a taambiwa ko nomaako agehe kegongalo, otashi vulika a kale a hala okutsikila okuya aluhe kokugongala. Natu mu popithe nohamu noku mu kwathela a tseye yalwe, nopwaahe na oku mu ngundumanena. Ino dhiladhila kutya oku li metonatelo lyaangoka ha konakona naye, oshoka ngoka ha konakona naye otashi vulika a lata nenge i ipyakidhila niinakugwanithwa yilwe pOshinyanga. Gandja eitulomo kwaashoka omukonakoni ta ti noku mu ulukila kutya owu na ko nasha naye. Mbela oku mu taamba ko kwoye nomaako agehe otaku vulu ku mu gume ngiini? Ndhindhilika shoka sha li sha ningilwa omumwatate Dmitrii, ngoka a ninginithwa owala pwa pita omimvo dhontumba, noku li ngashingeyi omuyakuligongalo. Natango ota dhimbulukwa oshikando she shotango e ya kokugongala. Okwa popi, a ti: “Omumwatate gumwe sho a mono ndje nda thikama pondje yOshinyanga shUukwaniilwa, okwa fala ndje meni. Aamwatate naamwameme oyendji oya li ye ya okupopitha ndje. Osha li sha kumitha ndje shili. Onda li nokuli handi kala nda hala ando okugongala ku kale haku ningwa kehe esiku. Inandi mona nando onale oshinima sha fa mpoka.”

13. Oshiholelwa shoye oshiwanawa otashi vulu okuguma omukonakonimbiimbeli gwoye ngiini?

¹³ Tula po oshiholelwa oshiwanawa. Eihumbato lyoye otali vulu okuulukila omukonakoni kutya okwa mona oshili. (Mat. 5:16) Vitalii, ngoka ngashingeyi e li omukokolindjila moMoldova, ota ti: “Onda ndhindhilike kutya yalwe megongalo oye na onkalamwenyo ya tya ngiini, nkene haya dhiladhila nankene hayi ihumbata. Shoka osha shilipaleke ndje kutya Oonzapo dhaJehova Aakriste yashili.”

14. Oshiholelwa shoye otashi vulu ongiini okukwathela gumwe a hume komeho pambepo?

¹⁴ Opo omukonakoni a kale a gwana okuninginithwa, tango okwa pumbwa okutula miilonga shoka ti ilongo. Shoka ihashi kala aluhe oshipu okuninga. Ihe uuna omukonakoni a ndhindhilike nkene okutula miilonga omakotampango gOmbiimbeli kwe  ku etela uuwanawa, otashi vulika shi mu inyengithe e ku holele. (1 Kor. 11:1) Natu taleni koshimoniwa shaHanae, ngoka a tumbulwa metetekelo. Ota ti: “Aamwatate naamwameme oya li haya tula nale miilonga shoka tandi ilongo. Onda li nda mono nkene tandi vulu okuladhipika nokudhimina po yalwe nankene tandi vulu oku yu ulukila ohole. Aluhe oya li haya popile yalwe muuwanawa, nonda kala nda hala oku ya holela.”

15. Omayeletumbulo 27:17 otage tu kwathele ngiini tu mone kutya omolwashike tu na okupanga uukuume naakonakonimbiimbeli uuna ya tameke okukala haye ya kokugongala?

¹⁵ Panga uukuume nomukonakoni. Sho omukonakoni ta tsikile okukala he ya kokugongala, tsikila oku mu ulukila kutya owu na ko nasha naye. (Fil. 2:4) Kambadhala oku mu tseya nawa.Oto vulu oku mu pandula omolwomalunduluko gontumba ngoka a ninga noku mu pula nkene u uvitile ekonakono lye, kaapu na oku mu pula kombinga yiinima ye yopaumwene. Oto vulu wo oku mu pula kombinga yoyaandjawo noyiilonga ye. Okukundathana kombinga yiinima mbyoka otaku vulu oku mu kwathela mu kale mu na ekwatathano ewanawa. Okupanga uukuume naye otaku vulu oku mu kwathela a ninge ehumokomeho noku ninginithwe. (Lesha Omayeletumbulo 27:17.) Omumwameme Hanae ngashingeyi omukokolindjila gwondjigilile. Ota dhimbulukwa oshikando she shotango e ya kokugongala, ta ti: “Sho nda panga uukuume nayalwe megongalo, onda tameke okukala ndi hole okuya kokugongala, nonda li nokuli handi yi ko, nonando onda vulwa. Onda li handi nyanyukilwa eendathano nookuume kandje aape, naashoka osha kwathele ndje ndi ethe po okweendathana nookuume mboka ihaaya longele Jehova. Onda li nda hala okuhedha popepyeelela naJehova nosho wo naamwatate naamwameme.”

16. Oshike ishewe to vulu okuninga wu kwathele omukonakonimbiimbeli a kale u uvite uugumbo megongalo?

¹⁶ Sho omukonakoni te ende ta ningi ehumokomeho nokuninga omalunduluko, mu kwathela a kale u uvite uugumbo megongalo. Shoka oto vulu oku shi ninga mokukala ho mu yakula nawa. (Heb. 13:2) Denis, ngoka ha longele moMoldova, ota dhimbulukwa ethimbo a li ta konakona, ta ti: “Olundji aamwatate naamwameme oya li haya hiya ndje pamwe nanekulu lyandje komagumbo gawo. Oya li haye tu lombwele kombinga yankene Jehova e ya kwathela. Shoka osha li hashi tu tsu omukumo. Oompito ndhoka odhe tu kwathele tu kale twa hala okulongela Jehova nonokutya ngele otwe shi ningi ote ke tu yambeka.” Uuna omukonakonimbiimbeli a ningi omuuvithi, oto vulu wo oku mu pula mu ka longe pamwe naye muukalele. Diego, omuuvithi ngoka a za koBrazilia, okwa ti: “Aamwatate oyendji oya li haya pula ndje ndi ka longe pamwe nayo muukalele. Shoka osha kwathele ndje ndi ya tseye nawa. Ondi ilongo oshindji sho nda kala handi ka longa pamwe nayo, nonda kala ndi uvite nda hedha popepyeelela naJehova nosho wo naJesus.”

17. Aakuluntugongalo otaya vulu okukwathela ngiini aakonakonimbiimbeli?

¹⁷ Konga ethimbo wu popye naakonakoni. Aakuluntugongalo, ngele omwa kala hamu ulukile aakonakoni  ohole nokukala mu na ko nasha nayo, shoka otashi ke ya kwathela ya ninge ehumokomeho noya ninginithwe. Mbela itamu vulu okukala hamu popi nayo pandjigilile pokugongala? Ngele ohamu dhimbulukwa omadhina gawo, otaya ka kala ye uvite kutya omu na ko nasha nayo, unene tuu uuna ya tameke okugandja omatyokosha pokugongala. Mbela omathimbo nomathimbo ito vulu okwiitulila po ethimbo lyokuya pamwe nomuuvithi gwontumba kaakonakoni ye? Ino kala wa dhina ekwatho ndyoka to vulu okupa omukonakoni, oshoka otali vulu oku mu kwathela noonkondo. Omukokolindjila gwedhina Jackie, gwokoNigeria, ota ti: “Aakonakoni yandje oyendji oya li haya kala ya kumwa uuna yu uvu kutya omumwatate ngoka tatu longo pamwe naye omukuluntugongalo. Omukonakonimbiimbeli gumwe okwa ti: ‘Omusita gwetu ke na siku e shi ninge. Oha talele po owala aayamba ngele ye mu futu!’” Omukonakonimbiimbeli ngoka ngashingeyi ohe ya kokugongala.

18. Ngaashi sha popiwa mIilonga 20:28, aakuluntugongalo otaya vulu ngiini okugwanitha po oshinakugwanithwa shawo shoka yi inekelelwa?

¹⁸ Dheuleni nokutsa omukumo mboka haya konakona naakonakonimbiimbeli. Aakuluntugongalo, omu na oshinakugwanithwa sha simana shokukwathela aauvithi ya kale haye shi enditha nawa muukalele, mwa kwatelwa wo okukonakona kwawo naantu. (Lesha Iilonga 20:28.) Ngele omuuvithi okwa sa ohoni okukwatela komeho ekonakonombiimbeli sho wu li po, oto vulu okwiiyamba wu li kwatele komeho. Jackie, ngoka a popiwa metetekelo, ota ti: “Olundji aakuluntugongalo ohaya pula ndje kombinga yaakonakoni yandje. Uuna ndi wete oshidhigu okuninga ekonakonombiimbeli lyontumba, ohaya pe ndje omayele omawanawa ngoka haga kwathele ndje.” Aakuluntugongalo otaya vulu okuninga oshindji ya ladhipike nokutsa omukumo aauvithi ya tsikile okulongela Jehova nuudhiginini. (1 Tes. 5:11) Jackie okwa gwedha ko, a ti: “Ohashi nyanyudha ndje uuna aakuluntugongalo taya ladhipike ndje nokulombwela ndje kutya oya pandula iilonga yandje yuudhiginini. Oohapu dhawo ndhoka ohadhi talaleke ndje noonkondo. Ohadhi kumike ndje wo, nenyanyu lyandje ndyoka handi mono mokuninga omakonakonombiimbeli ohali indjipala.” — Omayel. 25:25.

19. Oshike atuheni tatu vulu okunyanyukilwa?

¹⁹ Nonando ngashingeyi katu na omukonakonimbiimbeli, otatu vulu natango okukwathela gumwe a ninge ehumokomeho. Otatu vulu okukwathela ngoka ta kwatele komeho ekonakono, mokuninga omatyokosha ga longekidhwa nawa nopwaa na okupopya unene oshindji. Otatu vulu okupanga uukuume naakonakoni uuna ye ya kOshinyanga shUukwaniilwa, notatu vulu wo oku ya tulila po oshiholelwa oshiwanawa. Aakuluntugongalo otaya vulu okuladhipika aakonakoni, mokukonga ethimbo ya popye nayo. Otaya vulu wo okukwathela mboka haya konakona nayo, moku ya dheula noku ya pandula. Odhoshili kutya otwa nyanyukwa noonkondo sho tatu vulu okuninga sha, nokuli nando oshishona, tu kwathele gumwe a kale e hole Tate yetu, Jehova, noku mu longele.