1. Omolwashike Jesus a li a pula Jehova a gamene aalongwa ye?

UUSIKU we wahugunina kombanda yevi, Jesus okwa kala ti ipula nomashongo ngoka aalongwa ye ya li taya ka taalela. Molwaashoka okwa li e ya hole, Jesus okwa li a pula He e ya “gamene kuMwiinayi.” (Joh. 17:14, 15) Jesus okwa li e shi kutya konima ngele a shuna megulu, Satana Ondiyapoli ota ka tsikila okukondjitha mboka ya hala okulongela Jehova. Osha yela kutya oshigwana shaJehova osha li tashi ka pumbwa egameno.

2. Ongiini tatu vulu okukala nuushili kutya Jehova ota ka yamukula omagalikano getu?

² Jehovah okwa li a yamukula egalikano lyaJesus, molwaashoka oku hole Omwana. Ngele otwa kambadhala okuninga ngaashi tatu vulu tu kale twa hokiwa kuJehova, ota ka kala e tu hole, nota ka pulakena komagalikano getu sho tatu mu pula e tu kwathele noku tu gamene. Jehova oku li Tate omunahole. Onkene ota ka tsikila oku tu sila oshimpwiyu. Ngele okwa kala ihee shi ningi, otashi ka shekitha edhina lye!

3. Omolwashike twa pumbwa egameno lyaJehova kunena?

³ Kunena otwa pumbwa egameno lyaJehova shi vulithe nale. Satana oku umbwa mo megulu, ‘noku udha ondjahi.’ (Eh. 12:12) Okwa ningitha yamwe mboka haye tu pataneke yi itaale kutya sho taya ningi ngawo otaya “longele Kalunga.” (Joh. 16:2) Yamwe mboka inaayi itaala muKalunga, ohaye tu pataneke molwaashoka twa yooloka ko kaantu mboka ihaaya longele Jehova. Kutya nduno omolwashike taye tu pataneke, katu na okukala twa tila. Omolwashike mbela? Omolwaashoka Oohapu dhaKalunga otadhi ti: “Omuwa oye omwiinekelwa. Oye ote mu koleke note mu gamene komuhindadhi.” (2 Tes. 3:3, NW) Jehova ohe tu gamene ngiini?  Natu ka kundathaneni omikalo mbali moka he shi ningi.

4. Shi ikolelela kAaefeso 6:13-17, Jehova okwe tu pa shike shi tu gamene?

⁴ Jehova okwe tu pa iikondjitho mbyoka tayi vulu oku tu gamena komaponokelo gaSatana. (Lesha Aaefeso 6:13-17.) Iikondjitho yopambepo mbyoka oya kola nohayi pondola aluhe! Ihe otayi ke tu gamena owala ngele otwe yi ihomateke ayihe, nokukala hatu yi longitha. Oshikondjitho kehe otashi thaneke shike? Natu yi kundathaneni ayihe.

5. Epaya lyoshili oshike, nomolwashike twa pumbwa okukala hatu li zala?

⁵ Epaya lyoshili otali thaneke oshili ndjoka tayi adhika mOohapu dhaKalunga, Ombiimbeli. Omolwashike tu na okuzala epaya ndika? Omolwaashoka Satana oye ‘he yiifundja ayihe.’ (Joh. 8:44) Okwa kala ta fundju uule womimvo ‘nokupukitha uuyuni awuhe.’ (Eh. 12:9) Ihe oshili ndjoka tayi adhika mOmbiimbeli otayi tu gamene kaatu pukithwe kuye. Ongiini tatu vulu okuzala epaya ndika lyopathaneko? Omokwiilonga oshili kombinga yaJehova, moku mu longela “mombepo nomoshili,” nomokukala aanashili miinima ayihe. — Joh. 4:24; Ef. 4:25; Heb. 13:18.

6. Ehuuyanza lyuuyuuki oshike, nomolwashike twa pumbwa okukala hatu li zala?

⁶ Ehuuyanza lyopontulo lyuuyuuki otali thaneke omithikampango dhaJehova dhi li pauyuuki. Omolwashike twa pumbwa okuzala ehuuyanza pontulo? Ngaashi owala ehuuyanza lyolela hali gamene omutima gwomukwiita kaagu tsuwe, ehuuyanza lyuuyuuki ohali gamene omutima gwetu gwopathaneko nenge uuntu wetu womeni, kaawu nwethwe mo kuuyuni mbuka. (Omayel. 4:23) Jehova okwa tegelela tu kale tu mu hole notu mu longele nomutima gwetu aguhe. (Mat. 22:36, 37) Onkene Satana oha kambadhala oku tu ningitha tu kale tu na omitima mbali, moku tu ningitha tu kale tu hole iinima mbyoka uuyuni wu hole, ano iinima mbyoka Jehova e tonde. (Jak. 4:4; 1 Joh. 2:15, 16) Ngele okwa mono kutya omukalo gwe ngoka inagu pondola, oha ka kambadhala oku tu tilitha, opo tu ninge iinima mbyoka yi li ompinge nomithikampango dhaJehova.

7. Ongiini tatu vulu okuzala ehuuyanza lyuuyuuki?

⁷ Ohatu zala ehuuyanza lyuuyuuki, mokutaamba ko omithikampango dhaJehova kombinga yaashoka shu uka naashoka sha puka noku dhi tula miilonga monkalamwenyo yetu. (Eps. 97:10) Yamwe otashi vulika ya kale yu uvite kutya omithikampango dhaJehova odhe ya ngambeka unene. Ihe ngele otwe etha po okutula miilonga omakotampango gOmbiimbeli monkalamwenyo yetu, otatu ka kala owala twa fa omukwiita ngoka a hula mo ehuuyanza lye manga e li molugodhi, molwaashoka ta dhiladhila kutya edhigu unene. Okuninga ngawo itaku ka kala tuu kwa nika uusama! Kwaamboka ye hole Jehova, iipango ye “kayi shi iidhigu,” ihe otayi hupitha oomwenyo dhawo. — 1 Joh. 5:3.

8. Okwiilongekidha okuuvitha elaka etoye lyombili, li kale oongaku dhokoompadhi dhetu otashi ti shike?

⁸ Paulus okwe tu ladhipika wo tu kale twi ilongekidha okuuvitha elaka etoye lyombili, li kale oongaku dhokoompadhi dhetu. Niitya yimwe, otu na okukala aluhe twi ilongekidha okuuvitha onkundana ombwanawa yUukwaniilwa. Uuna hatu uvithile yalwe etumwalaka lyOmbiimbeli, eitaalo lyetu ohali kolo. Ohashi tu tsu lela omukumo okumona nkene aapiya yaJehova muuyuni awuhe taya kongo oompito dhokuuvitha onkundana ombwanawa kutya nduno okiilonga, okosikola, momahala goongeshefa, uuna taya uvitha egumbo negumbo, moositola, uuna taya talele po aapambele mboka kaaye shi ooitaali nuuna taya popi naatseyikile. Aamwatate naamwameme mboka ihaaya vulu okuza mo momagumbo nayo ohaya ningi ngaashi taya vulu yu uvithe onkundana ombwanawa. Ngele otwa kwatwa kuumbanda, e tatu etha po okuuvitha, otatu ka kala  owala twa fa omukwiita ngoka a hula ko oongaku dhe sho e li molugodhi, e ti iyehameke koombadhi. Shoka otashi ke shi ningitha oshidhigu kuye i igamene uuna ta ponokelwa, noita ka vula okulandula omalombwelo gomuwiliki gwe.

9. Omolwashike twa pumbwa okukala hatu humbata oshikandekitho shetu sheitaalo?

⁹ Oshikandekitho oshinene sheitaalo otashi thaneke eitaalo lyetu muJehova. Otu na einekelo kutya Jehova ota ka gwanitha po omauvaneko ge agehe. Eitaalo otali ke tu kwathela tu vule ‘okudhima iikuti ayihe ya hwama omulilo mbyoka tayi umbwa komuhindadhi.’ Omolwashike twa pumbwa okukala tu na oshikandekitho shoka? Omolwaashoka ohashi tu gamene kaatu pukithwe komalongo gaashunimonima nokaatu teke omukumo uuna aantu taya sheke shoka twi itaala. Ngele otwa kala kaatu na eitaalo, itatu ka vula okukondjitha mboka taya kambadhala oku tu ningitha kaatu vulike komithikampango dhaJehova. Ihe ngele otwa kala hatu popile eitaalo lyetu, kutya nduno okiilonga, nenge kosikola, otashi ulike kutya otwa humbata ehuuyanza lyetu. (1 Pet. 3:15) Oshikando kehe tatu tindi iilonga hayi futu nawa mbyoka tayi ka ya moshipala okulongela kwetu Jehova, otashi ulike kutya otwa humbata natango oshikandekitho shetu. (Heb. 13:5, 6) Noshikando kehe tatu tsikile okulongela Jehova nonando otatu patanekwa, eitaalo lyetu  ndyoka li li ongoshikandekitho otali ke tu gamena kaatu ethe po oku shi ninga. — 1 Tes. 2:2.

10. Egala lyosheela oshike, nomolwashike twa pumbwa okukala hatu li zala?

¹⁰ Egala lyosheela olyo etegameno ndyoka Jehova e tu pa, ano kutya ota ka laleka nuuyamba ayehe mboka haya longo ehala lye nosho wo kutya ngele otwa si, ote ke tu yumudha. (1 Tes. 5:8; 1 Tim. 4:10; Tit. 1:1, 2) Ngaashi owala egala lyosheela lyolela hali gamene omutse gwomukwiita, etegameno lyehupitho ohali gamene okudhiladhila kwetu. Omomukalo guni mbela? Etegameno ndyoka ohali tu kwathele tu kale tatu gandja eitulomo komauvaneko gaKalunga nohali tu kwathele kaatu kale twa gwililwa po komaupyakadhi getu. Ongiini tatu vulu okuzala egala lyosheela ndika? Omokukala hatu tala ko iinima ngaashi Kalunga he yi tala ko. Pashiholelwa, ihatu kala twi inekela miinima yopamaliko, ihe omuKalunga. — Eps. 26:2; 104:34; 1 Tim. 6:17.

11. Egongamwele lyombepo oshike, nomolwashike twa pumbwa okukala hatu li longitha?

¹¹ Egongamwele lyombepo olyo Oohapu dhaKalunga, Ombiimbeli. Egongamwele ndyoka oli na oonkondo dhokwaaneka pomutenya omalongo agehe giifundja nokumangulula aantu kuupika womikalondjigilile inaadhi yogoka. (2 Kor. 10:4, 5; 2 Tim. 3:16, 17; Heb. 4:12) Ohatu ilongo nkene tu na okulongitha egongamwele ndyoka nawa okupitila mekonakono lyopaumwene, nomedheulo ndyoka hatu pewa kehangano lyaJehova. (2 Tim. 2:15) Kakele kokwiihomateka iikondjitho, Jehova ohe tu gamene wo momukalo gulwe hagu pondola. Oguni mbela?

12. Jehova ohe tu pe ishewe ekwatho lini, nomolwashike?

¹² Omukwiita ngoka e na owino oku shi kutya ita vulu okusinda etangakwiita enankondo oye awike, ihe okwa pumbwa ekwatho lyaakwiita ooyakwawo. Sha faathana, itatu vulu okukondjitha Satana naalanduli ye otse atuke, ihe otwa pumbwa ekwatho lyaamwatate naamwameme. Jehova okwe tu pa ‘ooitaali ooyakwetu’ omamiliyona muuyuni awuhe, notaya vulu oku tu kwathela. — 1 Pet. 2:17.

13. Shi ikolelela kAahebeli 10:24, 25, uuwanawa wuni hatu mono mokukala pomakugongala?

¹³ Omukalo gumwe moka hatu mono ekwatho, okupitila mokukala pomakugongala. (Lesha Aahebeli 10:24, 25.) Uuna tu uvite twa teka omukumo, ngaashi hatu shi ningilwa atuheni omathimbo gamwe, okuya kokugongala otaku vulu oku tu kumika. Ohatu tsuwa omukumo komatyokosha gaamwatate naamwameme taga zi komutima. Iipopiwa ya kankamena kOmbiimbeli nomauliko ngoka haga ningwa po, ohage tu kwathele tu kale twa tokola toko tu tsikile okulongela Jehova. Okupopya wo naamwatate naamwameme manga okugongala inaaku tameka naasho kwa pita mo, otaku vulu oku tu tsa omukumo. (1 Tes. 5:14) Kakele kaashono, omakugongala ohage tu pe ompito tu mone enyanyu ndyoka hali zi mokukwathela yalwe. (Iil. 20:35; Rom. 1:11, 12) Omakugongala getu ohage tu kwathele wo momikalo dhilwe. Ohage tu kwathele tu kale aauvithi yonkundana ombwanawa ya pyokoka. Pashiholelwa, pokugongala ohatu longwa nkene tu na okulongitha nawa Okaketha kiilongitho yokulonga aantu. Onkee ano, otwa pumbwa okukala hatu ilongekidhile nawa okugongala. Uuna tu li pokugongala natu kale hatu pulakene neitulomo. Ngele okugongala kwa zimbuka, tula miilonga shoka wi ilonga po. Ngele owa kala ho ningi iinima ayihe mbyoka, oto ka kala ‘omukwiita ofule gwaJesus Kristus.’ — 2 Tim. 2:3.

14. Oolye ishewe taya vulu oku tu kwathela?

¹⁴ Jehova ohe tu kwathele wo okupitila maayengeli aanankondo omamiliyona. Dhiladhila owala shoka omuyengeli gumwe awike ta vulu okuninga! (Jes. 37:36) Ngashingeyi dhiladhila ne shoka etangakwiita enene lyaayengeli tali vulu okupondola. Kapu na omuntu nenge ompwidhuli yi na oonkondo dhi vule dhetangakwiita lyaJehova lyomegulu. Jehova oye omunankondo a  shiga ko. Onkee ano, uuna e li kombinga yetu, otatu ka vula aluhe okusinda aatondi yetu kutya nduno oya kale ye thike peni. (Aatok. 6:16) Shoka oshoshili! Kala aluhe ho dhimbulukwa oshinima shoka uuna omuniilonga pamwe nangoye, omunasikola omukweni nenge omupambele ngoka kee shi omwiitaali a popya nenge e ku ningila sha shoka she ku ningitha wu kale wa teka omukumo. Ino dhimbwa kutya olugodhi kalu shi lwoye ongoye awike. Otashi vulika wi iyadha monkalo ndjoka, molwaashoka to landula ewiliko lyaJehova.

15. Shi ikolelela kuJesaja 54:15, 17, omolwashike kaapu na nando omuntu gumwe ta vulu okuhulitha po iilonga yetu yokuuvitha?

¹⁵ Uuyuni mbuka tawu pangelwa kuSatana, owu na omatompelo ogendji goku tu tonda. Ihatu kutha ombinga mopolotika noihatu yi kiita. Ohatu tseyithile aantu edhina lyaKalunga, ohatu uvitha kutya Uukwaniilwa owo owala tawu ke eta ombili kombanda yevi, nohatu vulika komithikampango dhaJehova dhi li pauyuuki. Ohatu yelithile aantu kutya omupangeli gwuuyuni mbuka omufundja nomudhipagi. (Joh. 8:44) Ohatu uvitha wo kutya masiku Satana nuuyuni we otawu ka hanagulwa po. Nonando ongawo, Satana naalanduli ye itaya vulu nando okuhulitha po iilonga yetu yokuuvitha. Mepingathano naashoka, otatu ka tsikila okutanga Jehova, momukalo kehe tatu vulu. Nonando Satana oku na oonkondo, ina vula okukeelela etumwalaka lyUukwaniilwa li tseyithilwe aantu muuyuni awuhe. Shoka osha vulu owala okuningwa, molwaashoka Jehova ote tu gamene. — Lesha Jesaja 54:15, 17.

16. Jehova ota ka hupitha ngiini oshigwana she pethimbo lyuudhigu uunene?

¹⁶ Oshike mbela tashi ka ningwa po monakuyiwa? Pethimbo lyuudhigu uunene, Jehova ote ke tu hupitha momikalo mbali omikumithi. Gwotango, ota ka hupitha aapiya ye aadhiginini, sho ta ka ningitha omapangelo ga hanagule po Babiloni oshinene, ano omalongelokalunga giifundja. (Eh. 17:16-18; 18:2, 4) Opo nduno, ota ka hupitha ishewe oshigwana she mokuhanagula po oshihupe shuuyuni waSatana, puArmagedon. — Eh. 7:9, 10; 16:14, 16.

17. Okukala popepi naJehova ohaku tu gamene ngiini?

¹⁷ Ngele otwa kala popepi naJehova, Satana ke na siku e tu ningile sha shoka tashi vulu oku tu etela oshiponga tashi kalelele. Ye oye ta ka hanagulwa po sigo aluhe. (Rom. 16:20) Onkee ano, zala iikondjitho yoye ayihe, e to kala ho yi longitha! Ino kambadhala okukondjitha Satana nuuyuni we ongoye awike. Ambidhidha ooitaali ooyakweni, e to kala ho landula ewiliko lyaJehova. Ngele owe shi ningi, oto vulu okukala neinekelo kutya Tate gwoye gwomegulu omunahole ote ke ku koleka noku ku gamena. — Jes. 41:10.