1. Shi ikolelela kuMateus 24:9, omolwashike kaatu na okukala twa kumwa sho uuyuni wu tu tonde?

JEHOVA okwe tu shita hatu vulu okuulukila yalwe ohole nokukala twa hala ya kale wo ye tu hole. Onkee ano, uuna gumwe e tu tonde, ohashi tu uvitha nayi nohashi vulika wo nokuli tu kale twa tila. Pashiholelwa, omumwameme Georgina, ngoka ha zi moEuropa, okwa ti: “Sho nda li ndi na omimvo 14, meme okwa li e tonde ndje, molwaashoka handi longele Jehova. Onda li ndu uvite nde ekelwahi nonda tameke okwiipula ngele ngaye omuntu ngaa omwaanawa.” * Omumwatate gwedhina Danylo, okwa nyola a ti: “Sho aakwiita ya li taya dhenge ndje, taya tuku ndje, noku ningila ndje omatilitho molwaashoka ndi li Onzapo yaJehova, osha li sha tilitha ndje nosha li sha sitha ndje ohoni.” Ohashi tu uvitha nayi noonkondo uuna yalwe ye tu tonde, ihe inashi tu kumitha. Jesus okwa hunganeka kutya otatu ka tondika. — Lesha Mateus 24:9.

2-3. Omolwashike aalanduli yaJesus ye tondike?

² Uuyuni owu tonde aalanduli yaJesus. Omolwashike mbela? Omolwaashoka ngaashi Jesus, tse ‘katu shi yomuuyuni.’ (Joh. 15:17-19) Onkee ano, nonando ohatu simaneke omapangelo, ohatu tindi oku ga galikana nenge omandhindhiliko ngoka ge ga lile po. Ohatu longele Jehova oye awike. Ohatu ambidhidha uuthemba waKalunga wokupangela aantu, uuthemba mboka Satana nosho wo ‘oluvalo’ lwe ye li ompinge nawo. (Gen. 3:1-5, 15) Ohatu uvitha kutya Uukwaniilwa waKalunga owo awike tawu vulu okukandula po omaupyakadhi gaantu nonokutya masiku otawu ka hanagula po ayehe mboka ye li ompinge nawo. (Dan. 2:44; Eh. 19:19-21) Etumwalaka ndyoka oli li onkundana ombwanawa kwaamboka ye na  omitima omiwanawa, ihe oli li onkundana ombwinayi kaakolokoshi. — Eps. 37:10, 11.

³ Otu tondike wo molwaashoka ohatu vulika komithikampango dhaKalunga dhi li pauyuuki. Omithikampango ndhoka odhi li ompinge naashoka uuyuni wa tala ko shi li mondjila. Pashiholelwa, aantu oyendji kunena oye na eihumbato lya nyata ndyoka lya li lya ningitha Kalunga a hanagule po Sodom naGomorra. (Jud. 7) Molwaashoka ohatu vulika komithikampango dhOmbiimbeli dhi na ko nasha neihumbato, aantu oyendji ohaye tu sheke nohaye tu ula kutya otwi ishi unene aayuuki. — 1 Pet. 4:3, 4.

4. Omaukwatya geni taga vulu oku tu kwathela twi idhidhimikile okukala tu tondike kaantu?

⁴ Oshike mbela tashi vulu oku tu kwathela tu idhidhimikile okukala tu tondike nokutukwa kaantu? Otwa pumbwa okukala tu na eitaalo lya kola kutya Jehova ote ke tu kwathela. Ngaashi ehuuyanza, eitaalo lyetu otali vulu ‘okudhima iikuti ayihe ya hwama omulilo [yomuhindadhi].’ (Ef. 6:16, NW) Ihe eitaalo halyo owala lya pumbiwa. Otwa pumbwa wo ohole. Omolwashike mbela? Omolwaashoka ohole “ihayi ningi omwenyo omwiinayi.” Ihayi tonyala nohayi idhidhimikile ayihe. (1 Kor. 13:4-7, 13) Ngashingeyi natu ka taleni nkene ohole yokuhola Jehova, ooitaali ooyakwetu nosho wo aatondi yetu, tayi vulu oku tu kwathela tu idhidhimikile okukala tu tondike.

5. Ohole yaJesus yokuhola He oye mu kwathele a vule okuninga shike?

⁵ Uusiku mboka wa tetekele eso lye, Jesus okwa li a lombwele aalanduli ye aadhiginini, a ti: “Ngame ondi hole Tate. Onkee otandi longo ayihe, ngaashi a lombwele ndje.” (Joh. 14:31) Ohole yaJesus yokuhola Jehova oya li ye mu kwathele i idhidhimikile omamakelo agehe ngoka ga li tage ke mu adha. Natse ohole yetu yokuhola Jehova otayi vulu oku tu kwathela tu ninge sha faathana.

6. Shi ikolelela kAaroma 5:3-5, aapiya yaJehova oyu uvitile ngiini okwiidhidhimikila okutondika kuuyuni?

⁶ Ohole yokuhola Kalunga oya kala nokukwathela aapiya yaJehova yi idhidhimikile omapataneko. Pashiholelwa, sho aayapostoli ya li ya lombwelwa kompangu yopombanda yOshijuda kaayu uvithe we, ohole yawo yokuhola Kalunga oya li ye yi inyengitha ya ‘vulike kuKalunga, ihe hakaantu.’ (Iil. 5:29; 1 Joh. 5:3) Nokunena ohole ndjoka oyo hayi kwathele aamwatate yi idhidhimike sho taya patanekwa komapangelo omakwanyanya nomanankondo. Pehala lyokuteka omukumo, okwiidhidhimikila okutondika kuuyuni otwe ku tala ko ku li uuthembahenda. — Iil. 5:41; lesha Aaroma 5:3-5.

7. Otu na okwiinyenga ngiini uuna yaandjetu taye tu pataneke?

⁷ Ohashi vulu okukala unene oshidhigu okwiidhidhimika, ngele ngoka te tu pataneke ogwaandjetu. Ngele yamwe yoyaandjetu ya mono kutya otwa hala okwiilonga kombinga yaJehova, otashi vulika ya dhiladhile kutya otatu pukithwa. Yamwe otashi vulika ya dhiladhile kutya omutse gwetu ogwe enda ko. (Yelekanitha Markus 3:21.) Otashi vulika wo ya tameke oku tu ehameka palutu nopamadhiladhilo. Shoka kashi na oku tu kumitha. Jesus okwa ti: ‘Aanegumbo yomuntu otaya ningi aatondi ye.’ (Mat. 10:36) Kutya nduno yaandjetu oya kale ye tu tala ko ngiini, katu na okukala tu ya tonde. Pehala lyaashono, sho ngaa ohole yetu yokuhola Jehova tayi ende tayi koko, osho ngaa nohole yetu yokuhola aantu tayi ka koka. (Mat. 22:37-39) Ihe itatu ke etha po nando omithikampango nomakotampango gOmbiimbeli nenge tu gi ipwililikile, molwaashoka owala twa hala okuhokiwa kaantu.

8-9. Oshike sha li sha kwathele omumwameme gumwe i idhidhimikile omapataneko ga kwata miiti?

⁸ Omumwameme Georgina ngoka a popiwa metetekelo, okwa li a vulu okwiidhidhimikila okupatanekwa kuyina. Ota ti: “Ngame nameme otwa li twa tameke okukonakona Ombiimbeli nOonzapo. Ihe konima yoomwedhi hamano sho nda  tameke okukala nda hala okuya kokugongala, meme okwa tameke okupataneka ndje. Onde shi mono mo kutya oha popi naashunimonima, naasho a li ha kambadhala okutompathana nangame osha li shi iwetikile kutya okwa nwethwa mo kaashunimonima. Okwa li wo ha tuku ndje, ha hili ndje momafufu, ha pondo ndje nokweekelahi iileshomwa yandje. Sho nda gwanitha omimvo 15, onda ninginithwa. Meme okwa li wo a kambadhala okwiindika ndje ndi longele Jehova, mokufala ndje kegumbo lyokukwathela aakadhona mboka ye na uupyakadhi wopamadhiladhilo, nosho wo mboka ya li haya longo omiyonena nohaya longitha iingangamithi. Oshidhigu lela okwiidhidhimikila okupatanekwa, unene tuu uuna to patanekwa komuntu ngoka e na okukala e ku hole nohe ku sile oshimpwiyu.”

⁹ Oshike sha li sha kwathele Georgina i idhidhimike? Ota ti: “Esiku meme a tameke okupataneka ndje, opo owala nda adhika nda mana ko okulesha Ombiimbeli ayihe. Onda li nda tompwa lela kutya onda mona oshili, nonda li ndi uvite nda hedha popepi lela naJehova. Onda kala noku mu galikana lwiikando, nokwa li u uvu ndje. Sho nda li megumbo lyaamboka ya pumbwa ekwatho, omumwameme gumwe okwa hiya ndje kaandjawo, notwa li twa konakona Ombiimbeli. Ethimbo alihe ndyoka, aamwatate naamwameme oya kala taya tsu ndje omukumo pOshinyanga shUukwaniilwa. Oya kala ya tala ndje ko ndi li oshilyo shuukwanegumbo wawo. Shoka osha kwathele ndje ndi mone kutya Jehova omunene lela e vule aapataneki yetu kutya nduno oya kale oolye.”

10. Einekelo lini tu na muJehova Kalunga ketu?

¹⁰ Omuyapostoli Paulus okwa nyola kutya kapu na nando osha tashi vulu “oku tu topola ko kohole yaKalunga yi li muJesus Kristus, Omuwa gwetu.” (Rom. 8:38, 39) Nonando otu kale tatu mono iihuna uule wethimbo, Jehova ota ka kala aluhe pamwe natse, opo e tu hekeleke noku tu nkondopaleke. Ngaashi oshimoniwa shaGeorgina she tu ulukila, Jehova ohe tu kwathele wo okupitila maamwatate naamwameme.

11. Ohole ndjoka Jesus a popi muJohannes 15:12, 13 oya li ya tayi ka kwathela ngiini aalongwa ye? Gandja oshiholelwa.

¹¹ Uusiku mboka wa tetekele eso lye, Jesus okwa li a dhimbulukitha aalongwa ye ya kale ye holathane. (Lesha Johannes 15:12, 13.) Okwa li e shi kutya ngele oya kala ye na ohole yokwiiyamba, otashi ke ya kwathela ya kale ya hangana noyi idhidhimikile okukala ye tondike kuuyuni. Natu taleni koshiholelwa shegongalo lyomuTessalonika.  Okuza ngaa sho lya totwa po, aakwanegongalo lyamo oya kala taya patanekwa. Nonando ongawo, aamwatate naamwameme mboka oye tu tulila po oshiholelwa oshiwanawa shokukala aadhiginini notu na ohole. (1 Tes. 1:3, 6, 7) Paulus okwa li e ya ladhipike ya tsikile okuulika ohole ‘shi vule shito.’ (1 Tes. 4:9, 10) Ohole oye yi inyengitha ya tse omukumo mboka ya gwililwa po komaupyakadhi noya ambidhidhe aankundi. (1 Tes. 5:14) Oya li ya vulika komalombwelo gaPaulus, oshoka montumwafo ye ontiyali, ndjoka e ya nyolele konima yomumvo lwaampono, okwa li e ya lombwele, a ti: “Eitaalo lyeni otali koko nohole yeni yokuholathana otayi indjipala noondondo.” (2 Tes. 1:3-5) Ohole yawo oya li ye ya kwathele yi idhidhimikile oonkalo oondhigu nomapataneko.

12. Aamwatate naamwameme yomoshilongo shimwe oya li yu ulukilathana ngiini ohole pethimbo lyiita?

¹² Natu taleni koshimoniwa shaDanylo, ngoka a popiwa metetekelo nosho wo omukulukadhi gwe. Sho mondoolopa yawo mwa tukuluka iita, oya tsikile okukala haya gongala, haya uvitha ngaashi taya vulu, nokutopolelathana iikulya mbyoka ye na nooitaali ooyakwawo. Opo nduno esiku limwe aakwiita ya homata oye ya kuDanylo. Danylo ota ti: “Aakwiita mboka oya lombwele ndje ndi ethe po eitaalo lyandje. Sho nda tindi, oya dhenge ndje noya kala taya umbu oondjembo dhawo popepi nomutse gwandje, opo ya tilithe ndje. Manga inaaya shuna, oya ningile ndje omatilitho kutya otaya galuka ye ye ya kwate omukulukadhi gwandje onkonga. Ihe aamwatate oye tu kwathele tu londe eshina nziya, opo tu ye kondoolopa yilwe. Kandi na siku ndi dhimbwe ohole ndjoka tu ulukilwa kaamwatate mboka. Sho twa thiki kondoolopa ndjoka, aamwatate yaahoka oye tu pe iikulya noya kwathele ndje ndi mone iilonga nosho wo egumbo. Onkene konima natse otwa ka vula okukwathela Oonzapo dhilwe ndhoka dha li dha pumbwa ehala lyokukala, sho dha tembuka komahala hoka dha li hadhi zi, omolwiita.” Iimoniwa ya fa mbyoka otayi ulike kutya ohole yopaKriste otayi vulu oku tu kwathela tu idhidhimikile okutondwa.

13. Ombepo ondjapuki ohayi tu kwathele ngiini tu idhidhimike sho tatu longele Jehova nonando aantu oye tu tonde?

¹³ Jesus okwa lombwela aalanduli ye ya kale ye hole aatondi yawo. (Mat. 5:44, 45) Mbela shoka oshipu? Hasho. Ihe kekwatho lyombepo ondjapuki yaKalunga, otatu vulu oku shi ninga. Iiyimati yombepo yaKalunga oya kwatela mo ohole, eidhidhimiko, olukeno, engungumano nosho wo eipangelo. (Gal. 5:22, 23) Omaukwatya ngoka ohage tu kwathele tu idhidhimikile okukala  tu tondike. Aapataneki oyendji oya lundulula iikala yawo, molwaashoka omusamane, omukulukadhi, okanona nenge omushiinda omwiitaali u ulika omaukwatya ngoka gopaKalunga. Oyendji yomuyo oya ninga nokuli aamwatate naamwameme. Onkee ano, ngele owu wete oshidhigu okukala wu hole mboka ye ku tonde molwaashoka owala ho longele Jehova, galikana Jehova e ku pe ombepo ye ondjapuki. (Luk. 11:13) Kala wo wa tompwa kutya okuvulika aluhe kuKalunga itaku vulu okuyelekwa nasha. — Omayel. 3:5-7.

14-15. Aaroma 12:17-21 oya kwathele ngiini Yasmeen u ulukile omusamane gwe ohole, nonando okwa li he mu pataneke?

¹⁴ Natu taleni koshiholelwa shomumwameme Yasmeen, ngoka ha zi kUuzilo woPokati. Sho a ningi Onzapo yaJehova, omusamane gwe okwa li ta dhiladhila kutya okwa pukithwa, nokwa kambadhala oku mu keelela a longele Jehova. Okwa li e mu tuku nokwa lombwele aapambele yomukadhi, aasita nosho wo omulodhi gwontumba ye mu ningile omatilitho noye mu lundile kutya ota teya po uukwanegumbo we. Esiku limwe pokugongala, omusamane gwe okwa li nokuli a tuku aamwatate ti igidha mokule. Olundji Yasmeen okwa li ha kala ta lili, omolweihumbato lyomusamane gwe.

¹⁵ Uuna Yasmeen e ya kOshinyanga shUukwaniilwa, aamwatate naamwameme oya li haye mu hekeleke noku mu tsa omukumo. Aakuluntugongalo oye mu ladhipike a tule miilonga oohapu ndhoka tadhi adhika mAaroma 12:17-21. (Lesha.) Yasmeen ota ti: “Osha li oshidhigu, ihe onda pula Jehova a kwathele ndje, nonda ningi ngaashi tandi vulu ndi tule miilonga shoka Ombiimbeli tayi ti. Onkee uuna omusamane gwandje a kakeke owina mokombitha, onda li owala handi opaleke mo kaapu na okunyenyeta. Uuna a tuku ndje, onda li owala handi mu yamukula nombili. Uuna te ehama, onda li handi mu sile oshimpwiyu.”

16-17. Oshike wi ilonga moshiholelwa shomumwameme Yasmeen?

¹⁶ Jehova okwa laleke nuuyamba Yasmeen, sho a kala tu ulukile omusamane gwe ohole. Yasmeen okwa ti: “Omusamane gwandje okwa tameke okukala i inekela ndje shi vulithe nale, molwaashoka oku shi kutya aluhe ohandi popi oshili. Okwa tameke okukala ha pulakene kungame nesimaneko uuna tatu popi kombinga yelongelokalunga, nokwa zimine tu pange ombili megumbo. Ngashingeyi oha ladhipike ndje ndi ye kokugongala. Onkalamwenyo yetu oya hwepopala noonkondo, notu na lela ombili megumbo. Ondi na etegameno kutya omusamane gwandje ota ka taamba ko oshili esiku limwe, e tameke okulongela Jehova pamwe nangame.”

¹⁷ Oshiholelwa shaYasmeen otashi ulike kutya ohole ‘ohayi idhidhimikile ayihe, . . . ohayi tegamene  ayihe, e tayi idhidhimike sigo okehulilo.’ (1 Kor. 13:4, 7) Ngele otwa kala hatu ulukile yalwe ohole, otashi vulika ya lundulule etaloko lyawo kombinga yetu nosho wo yaJehova, naashoka ohashi mu nyanyudha. Ihe nonando aapataneki yetu oya tsikile okukala ye tu tonde, natango otatu vulu okukala twa nyanyukwa. Ngiini mbela?

18. Omolwashike tatu vulu okukala twa nyanyukwa uuna tu tondike?

¹⁸ Jesus okwa ti: “One aanelago, aantu ngele taye mu tondo.” (Luk. 6:22) Ihatu hogolola okukala tu tondike. Ihatu kala twa nyanyukwa uuna tatu hepekwa omolweitaalo lyetu. Omolwashike nduno tu na okukala twa nyanyukwa uuna tu tondike? Natu taleni komatompelo gatatu kutya omolwashike. Lyotango, ngele otwa kala hatu idhidhimike, Kalunga ota kala e tu hokwa. (1 Pet. 4:13, 14) Etiyali, uuna tatu yelekwa e tatu idhidhimike, eitaalo lyetu ohali kolo. (1 Pet. 1:7) Etitatu, otatu ka mona ondjambi itaayi yi vulu okuyelekwa nasha, ano omwenyo gwaaluhe. — Rom. 2:6, 7.

19. Omolwashike aayapostoli ya li ya nyanyukwa konima sho ya dhengwa?

¹⁹ Nziya konima yeyumuko lyaJesus, sho aayapostoli ya li taya hepekwa oya li ya nyanyukwa ngaashi owala Jesus a li e ya lombwele. Nonando oya li ya dhengwa e taya lombwelwa kaayu uvithe we, oya li ya nyanyukwa noonkondo. Omolwashike mbela? Omolwaashoka ‘Kalunga okwa li e ya tala ya gwana okuhepekelwa edhina lyaJesus.’ (Iil. 5:40-42) Oya li ye hole Omuwa gwawo noonkondo shi vulithe okutila okutondika kaatondi yawo. Oya li wo yu ulike ohole yawo ‘mokutsikila’ okuuvitha onkundana ombwanawa. Kunena aamwatate oyendji otaya tsikile okulongela Jehova nuudhiginini, nonando oya taalelwa komaupyakadhi. Oye shi kutya Jehova ita dhimbwa iilonga yawo yuudhiginini nosho wo ohole yawo yokuhola edhina lye. — Heb. 6:10.

20. Oshike tatu ka kundathana moshitopolwa tashi landula?

²⁰ Manga ngaa onkalelo yuuyuni mbuka inaayi hulithwa po, uuyuni otawu ka tsikila oku tu tonda. (Joh. 15:19) Ihe inatu pumbwa okukala twa tila. Ngaashi tatu ke shi mona moshitopolwa tashi landula, Jehova oha ‘koleke nokugamena’ aapiya ye aadhiginini. (2 Tes. 3:3) Onkee ano, natu tsikileni okukala tu hole Jehova, ooitaali ooyakwetu nosho wo aatondi yetu. Ngele otwe shi ningi, otatu ka kala twa hangana, twa kola pambepo, notatu ka simanekitha Jehova nokuulika kutya ohole oyi na oonkondo yi vule uutondwe.