OSHIPALANYOLO SHOKOMBANDA

NKENE WU NA OKULONGITHA ETHIMBO LYOYE NAWA

Iikando ingapi wa popya to ti: “Ando onda li ngaa ndi na ethimbo olindji!” Aantu ayehe oye na owala ethimbo lyoowili 24 mesiku. Sha hala okutya, mboka ye na oonkondopangelo, aayamba noohepele ayehe oye na ethimbo li thike pamwe. Shimwe ishewe, kutya nduno omuntu omuyamba nenge ohepele, ita vulu okwiilikolela ethimbo nenge e li kaleke po. Ngele olya yi, opuwo ito li mono we. Onkee oshinima shi li pandunge, okulongitha nawa ethimbo ndyoka tu na. Ngiini mbela? Tala kiinima ine mbyoka ya kwathela aantu oyendji ya longithe ethimbo lyawo nawa.

Oshinima 1: Tula iinima yoye melandulathano

Pititha komeho iinima mbyoka ya simana. Ombiimbeli otayi gandja omayele tayi ti kutya, natu kale hatu “yoolola iinima mbyoka yi na oshilonga” unene. (Aafilippi 1:10) Ninga omusholondondo gwiinima mbyoka ya simana nenge ye endelela, nenge ya simana yo oye endelela. Kaleka momadhiladhilo kutya oshinima shoka sha simana otashi vulika shi kale inaashi endelela. Pashiholelwa, ngaashi okulanda iikulya yuulalelo. Oshinima shimwe otashi vulika wo shi kale sha endelela, ngaashi okutala opolohalama ndjoka wu hole kotiivii, ihe otashi vulika shi kale inaashi simana.

Ilongekidha kuyele. Omuuvithi 10:10 otayi ti: “Ngele ekuya olya simpa, nomuntu ite li upike, nena nge te li longitha, ota hepeke oonkondo. Ihe omunawino ote li upike.” Oshike tatu ilongo movelise ndjika? Upika ekuya lyoye pathaneko, ano wu ilongekidhe kuyele, opo wu ka vule okulongitha nawa ethimbo lyoye. Iinima mbyoka inaayi simana, ihe ohayi mana po ethimbo noonkondo, oto vulu wu ke yi ninge nale nenge wu kale inoo yi ninga nando nando. Ngele owa mono kutya owu na ethimbo, konima sho wa mana oshilonga shono wa li to longo, omolwashike itoo li longitha wu longe po oshilonga shono wa li wa hala oku ke shi longa nale? Ngele owa kala ho ilongekidha komeho yethimbo, otashi ke ku kwathela wu kale ho longo iilonga oyindji, ngaashi omulumentu omunandunge ngoka ha upike ekuya lye.

Yanda iinima mbyoka inaayi simana. Ilonga okutinda okuninga iinima mbyoka inaayi simana nenge hayi mana po ethimbo. Omaipyakidhilo nomalongekidho ogendji unene, otaga vulu oku ku ningitha wu kale wa gwililwa po, noku ku yuga enyanyu lyoye.

Oshinima 2: Yanda iinima mbyoka hayi mana po ethimbo

Okuundulila iinima komeho nokukakadhala okuninga omatokolo. Ombiimbeli otayi ti: “Oongoka ha tala ombepo, ita kunu; naangoka ha tala iikogo, ita teya.” (Omuuvithi 11:4) Oshike tatu ilongo movelise ndjika? Okukakadhala ohaku mana po ethimbo nohaku imbi omuntu a longe sha. Omunepya ngoka ha tegelele onkalo yombepo yi kale yi li nawa, opo a longe nawa epya lye, otashi vulika kee ke li kune we nenge e li teye. Sha faathana, otashi vulika tu kakadhale okuninga etokolo, oshoka katu shi kutya iinima yini tayi ka holoka po. Nenge tashi vulika tu kale tu uvite kutya otu na okutegelela sigo twa mono uuyelele awuhe, opo nawa tu li ninge. Odhoshili kutya manga inaatu ninga omatokolo ga simana, otu na okuninga omapekapeko nokudhiladhila nawa kombinga yago. Omayeletumbulo 14: 15 otayi ti: “Onkotoki ota ndhindhilike oonkatu dhe.” Ihe uushili owo kutya omatokolo ogendji ngoka hatu ningi, ihatu kala tu shi kutya oshike tashi ka holoka po. — Omuuvithi 11:6.

Okukala inoo hala okuninga omapuko. Jakob 3:17 otayi ti: ‘Uunongo wokombanda [nenge wa za kuKalunga] owu na ondjele.’ Yelekanitha NW. Okukala twa hala okuninga iinima yo opala, oshinima oshiwanawa lela! Ihe omathimbo gamwe, otashi vulika tu kale inaatu hala okuninga omapuko nohatu ki iyadha owala twa yemata nenge nokuli inaatu shi enditha nawa. Pashiholelwa, omuntu ngoka ti ilongo elaka lilwe, na kale e shi shi kutya ota ka ninga omapuko, ihe otage ke mu longa sha. Ashike ngele ke hole okuninga omapuko, ota ka kala a tila okupopya iinima ya puka, iikala mbyoka tayi ke mu imba a tseye elaka ndyoka. Kashi li tuu nawa tu kale tu na ondjele! Omayeletumbulo 11:2 otayi ti: “Eishonopeko olyo owino.” Shimwe ishewe, omuntu ngoka i ishonopeka noku na ondjele, iha kala a tila okuninga omapuko, na oha vulu okwiiyola ye mwene.

Oshinima 3: Kala wu na ondjele

Kala wu na ondjele, ngele tashi ya piilonga nomainyanyudho. Ombiimbeli otayi ti: “Ekaminina lyevululuko oli vule eshambekela lyu udha uupyakadhi nokutidha ombepo.” (Omuuvithi 4:6) Aantu mboka haya kala aluhe taya longo, ohayi iyimbi okumona uuwanawa ‘weshambekela lyu udha uupyakadhi,’ nenge tu tye, lyiilonga yawo yuudhiginini. Osha yela kutya ihaya kala we ye na ethimbo noonkondo. Omanga omuntu ngoka omunanyalo, oha kala a hala eshambekela lyokuvululukwa noha hepitha ethimbo. Ombiimbeli otayi tu ladhipike tu kale tu na etaloko li li pandjele, kutya natu kale hatu longo nuudhiginini notu nyanyukilwe iiyimati yiilonga yetu. Okutyapula iiyimati yiilonga yetu, “omagano gaKalunga.” — Omuuvithi 5:19.

Kala ho kotha sha gwana. Omunyoli gumwe gwOmbiimbeli okwa ti: “Ngele tandi ka lala, otandi kotha nombili.” (Episalomi 4:8) Aakuluntu oya pumbwa okukotha oowili hetatu opo omalutu gawo nomadhiladhilo gawo ga longe nawa noya kale yu uvite ombili. Okutala kiinima mbyono, otashi ulike kutya okukotha okwa simana oshoka ohaku kwathele omuntu a gandje eitulomo nokukoneke iinima, kungawo oha vulu okutseya iinima mbala. Ihe ngele omuntu iha kotha nawa, iha kwata mbala shoka ti ilongo, oha eta iiponga, oha ningi omapuko noha kala e uvite ta ningilwa nayi.

Itulila po omalalakano ngoka to vulu okugwanitha po. Ombiimbeli otayi ti: “Okuligamena nomeho oku vule okweendagula kuuhalu.” (Omuuvithi 6:9) Oshike tatu ilongo movelise ndjoka? Omuntu ngoka omunandunge, iha etha a kale ta pangelwa komahalo ge, unene tuu gokukala a hala iinima mbyoka itaa vulu okumona nenge i itulile po omalalakano ngoka itaa vulu okugwanitha po. Onkee, iha hekwa komatseyitho giipindi nenge a hekwe a lye oongunda. Pehala lyaashono, ohi ilongo okukala a gwanenwa kwaashoka ha mono, ano shoka ha ‘ligamene nomeho [ge].’

Oshinima 4: Etha omakotampango gOmbiimbeli ge ku wilike

Tala komakotampango ngoka wi itulila po. Omakotampango goye ohage ku kwathele wu mone kutya oshinima shini oshiwanawa, sha simana noshi na oshilonga. Andola onkalamwenyo yoye oya li ya fa oshikuti, nena omakotampango goye ogo ge na okuwilika oshikuti shoka. Onkee omakotampango ngoka omawanawa, otage ku kwathele wu pitithe komeho iinima mbyoka ya simana nokulongitha nawa ethimbo lyoye esiku kehe. Omakotampango ngoka oto vulu oku ga adha peni? Aantu oyendji ohaya landula ngoka ge li mOmbiimbeli, molwaashoka oye yi tala ko kutya oyi na omayele gopandunge noga dhenga mbanda. — Omayeletumbulo 2:6, 7.

Kala omunahole. Aakolossa 3:14 otayi ti kutya ohole oyo “epaya tali vulu okumangela iinima ayihe kumwe.” Itatu vulu okukala twa nyanyukwa shili notu uvite ombili ngele katu na ohole, unene tuu momagumbo getu. Aantu mboka hayi ipwililikile oshinima shono, tashi vulika ya pititha owala komeho iilonga nenge okwiikongela omaliko, ihaya kala ya nyanyukwa. Onkee ano, Ombiimbeli oya tumbula ohole iikando oyindji, shono tashi ulike kutya ohole oya simana noonkondo. — 1 Aakorinto 13:1-3; 1 Johannes 4:8.

Itulila po ethimbo lyokuhedha popepi naKalunga. Omusamane gwedhina Geoff, oku na omukulukadhi omunahole, aanona yaali aanyanyukwi, ookuume aawanawa niilonga hayi futu nawa yokulonga moambulansa. Ihe nonando ongawo, miilonga ye okwa kala ha mono mo aantu ye li monkalo ombwinayi, yo otaya si. Okwi ipula ta ti: “Onkalamwenyo osho ngaa yi na okukala ngeyi?” Esiku limwe, okwa lesha oshifo shi ikolelela kOmbiimbeli, sha nyanyangidhwa kOonzapo dhaJehova, nokwa mono mo omayamukulo tage mu mbilipaleke.

Geoff okwa yelithile omukulukadhi gwe naanona ye shono a li ti ilongo, nayo e taya tameke okukala ye na ohokwe mokukonakona Ombiimbeli. Shoka osha ningitha aanegumbo mboka ayehe ya tameke okukonakona Ombiimbeli, noshe ya etele enyanyu. Oshe ya kwathele ya kale haya longitha ethimbo lyawo nawa shi vulithe shito. Sho ya konakona Ombiimbeli, oshe ya ningitha wo ya kale ye na etegameno ewanawa lyomwenyo gwaaluhe, muuyuni kaamu na okutidha ombepo nokumona iihuna. — Ehololo 21:3, 4.

Oshimoniwa shaGeoff otashi tu dhimbulukitha oohapu dhaJesus Kristus ndhoka a popile a ti: “Mboka ye shi kutya oya pumbwa ewiliko lyaKalunga otaya ka kala ya nyanyukwa.” (Mateus 5:3, NW) Mbela ino hala wi itulile po ethimbo wu konge ewiliko lyaKalunga nenge wi ilonge kombinga ye? Uushili owo kutya ngele owi itulile po ethimbo wu konge owino ndjono, oyo owala tayi ke ku kwathela wu kale nonkalamwenyo ombwanawa.

[Oohapu dha simana]

“Iinima iho yi futu lela niimaliwa, oho yi futu nethimbo.” — Embo What to Do Between Birth and Death

[Oshimpungu]

UUYELELE WULWE

OOWILI 50.2

Ethimbo ndyoka aaniilonga moKanada haya kala taya longo kiilonga oshiwike kehe, shi ikolelela kaaniilonga 25 000 mboka ya li ya pulwapulwa.

OMINUTE 242

Ethimbo ndyoka konyala aantu yomimvo ne okuuka pombanda ya kala taya tala otiivii esiku kehe mo 2011 moAmerika.

OMINUTE 8

Ethimbo ndyoka ootate moIndia haya popi noyana esiku kehe. Oomeme mboka haya yi kiilonga moshilongo shoka, ohaya popi noyana konyala ominute 11; naamboka haya kala momagumbo, ominute konyala 30.

[Oshimpungu]

OTASHI KU PULA ETHIMBO LI THIKE PENI?

Manga inoo landa oshinima shontumba, lundululila ondando yasho methimbo ndyoka wu na okulongitha wi ilikolele oshimaliwa shoka, “opo nduno tala natango ngele owa gwana ngaa oku shi landa,” omunyoli gumwe ye omukonakoni gweihumbato lyaantu, Charles Spezzano, osho a ti ngaaka.

[Oshimpungu]

OSHIKE SHA SIMANA KUNGOYE?

AANEGUMBO

IILONGA

ELONGO

OOKUUME

EKWATATHANO LYAANTU MOSHITOPOLWA SHENI

EKWATATHANO LYOYE NAKALUNGA

OMAINYANYUDHO

UUKOLELE