Omuyapostoli Paulus okwa popi kutya Jehova * oye “Kalunga, ngoka kuye haku zi ekwatho alihe. Oye ngoka he tu kwatha muudhigu wetu auhe.” (2 Aakorinto 1:3, 4) Onkee ano, Ombiimbeli otayi tu shilipaleke kutya kapu na omuntu ha vulu okugandja ekwatho li vulithe pulyaJehova. Otayi tu shilipaleke wo kutya Tate yetu gwomegulu iha nyengwa oku tu hekeleka, nonando otu kale muudhigu uunene wu thike peni.

Odhoshili kutya ngele otwa hala tu hekelekwe kuKalunga, otu na okuninga po sha. Ndohotola ota vulu ngiini oku tu kwathela ngele inatu ninga oshilage naye? Omupolofeti Amos okwa pula a ti: “Aalumentu yaali otaye ende ngaa pamwe inaaye shi uvathana?” (Amos 3:3) Omanyolo otage tu ladhipike taga ti: “Hedheni kuKalunga, ye nota hedha kune.” — Jakob 4:8.

Ongiini tatu vulu okukala nuushili kutya Kalunga ota vulu okuhedha popepi natse? Shotango, ote tu lombwele lwiikando kutya okwa hala oku tu kwathela. (Tala oshimpungu  shoshitopolwa shika.) Oshitiyali, otu na uunzapo wu shi okwiinekelwa waantu yoshili mboka ya hekelekwa kuKalunga, pethimbo lyetu nolyonale.

Ngaashi aantu oyendji kunena mboka haya kongo ekwatho kuKalunga, omukwaniilwa David naye okwa li ha adhika komaupyakadhi omanene. Oshikando shimwe okwi indilile Jehova a ti: “Uva ndje, sho tandi ku ithana.” Mbela Kalunga okwa li e mu yamukula? Eno. David okwa gwedha ko a ti: “Oye ta kwatha ndje e ta nyanyudha ndje.” — Episalomi 28:2, 7.

Kalunga okwa kala a lalakanena Jesus a dhane onkandangala mokugandja ehekeleko. Kakele kiilonga yilwe mbyoka a pewa kuKalunga, Jesus okwa li wo e na ‘okwaaludha mboka ye na omwenyo gwa nyanyagulwa’ ‘nokuhekeleka ayehe mboka taa lili.’ (Jesaja 61:1, 2) Ngaashi sha hunganekwa, Jesus okwa li u ulike lela ohokwe maantu mboka ya ‘vulwa noya humbatekwa uudhigu.’ — Mateus 11:28-30.

Jesus okwa li a hekeleke aantu moku ya pa omayele gopandunge, mokuugaunga nayo nawa, nopoompito dhimwe okwe ya aludha. Esiku limwe omunashilundu okwe ya kuJesus, nokwe mu hehela a ti: “Ngele owa hala okwaaludha ndje, oto shi vulu.” Jesus okwe mu uvile olukeno e ta ti kuye: “Onda hala, yela!” (Markus 1:40, 41) Omunashilundu nokwa aluka.

 Kunena Omwana gwaKalunga ke ko kombanda yevi, opo e tu hekeleke. Ihe He, Jehova “Kalunga, ngoka kuye haku zi ekwatho alihe,” ota tsikile okuyambidhidha mboka ye na ompumbwe. (2 Aakorinto 1:3) Natu tale kiilongitho iinene ine mbyoka Kalunga ha longitha okuhekeleka aantu.

• Ombiimbeli. “Ashihe shoka sha nyolwa mOmanyolo, osha nyolwa, shi tu longe, opo tu kale tu na etegameno tali zi mokwiidhidhimika notu mone omukumo, ngele tatu lesha oohapu dhaKalunga.” — Aaroma 15:4.

• Ombepo ondjapuki yaKalunga. Konima owala sho Jesus a si, egongalo alihe lyopaKriste olya tsikile okukala li na ombili. Omolwashike mbela? Omolwaashoka ‘kekwatho lyombepo ondjapuki, egongalo olya simaneke Omuwa.’ (Iilonga 9:31) Ombepo ondjapuki, oonkondo dhaKalunga tadhi longo, oyi na oonkondo dha shiga ko. Kalunga oha vulu oku yi longitha a hekeleke kehe gumwe, kutya nduno oku li monkalo ya tya ngiini.

• Egalikano. Ombiimbeli otayi tu pe omayele taga ti: “Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo. Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni.” — Aafilippi 4:6, 7.

• Aakriste ooyakwetu otaya vulu okukala ookuume kashili mboka taya vulu oku tu hekeleka uuna tu li muudhigu. Omuyapostoli Paulus okwa popi kutya ookuume ke oye li “ekwatho enene” kuye uuna ta ‘hepekwa noku li muudhigu.’ — Aakolossa 4:11; 1 Aatessalonika 3:7.

Ihe otashi vulika wi ipule kutya ongiini iinima ayihe mbika tayi vulu okukwathela omuntu naanaa. Natu tale nawa kiimoniwa ya tumbulwa petameko, yaantu mboka ya li ya taalelwa komaupyakadhi. Ngaashi yo, nangoye oto vulu okumona kutya Kalunga ota gwanitha po natango euvaneko ndika tali nyanyudha omutima, ndyoka tali ti: ‘Otandi ke mu hepulutha ngaashi yina ta hepulutha omwana.’ — Jesaja 66:13.