Onda valelwa moPaddington, oshitopolwa shoka shi na ondumba yaantu shi li moLondona, moIngilanda. Ngame naamwamemekadhona yatatu aakuluntu otwa putudhwa kumeme. Tate okwa kala he tu pumbu lela, molwaashoka okwa li ombwii.

Sho nda li okanona, meme okwa lombwele ndje ndi kale handi galikana ongulohi kehe. Onda li ndi na okaMbiimbeli okashona hoka ke na owala Omapisalomi. Onda toto po ongowela, opo ndi kale handi imbi Omapisalomi. Esiku limwe sho tandi lesha kamwe komuunamambo wandje, onda lesha mo etumbulo tali ti: “Esiku lyomomasiku ono ka sa.” Etumbulo ndyoka ihandi li dhimbwa nando. Olya ningitha ndje ndi lale ondangala, tandi ipula nonakuyiwa tandi ti: ‘Omolwashike ndi li kombanda yevi? Mbela elalakano lyonkalamwenyo olyo owala okuvalwa nokusa?’ Kanda li nda hala okusa.

Onda tameke okukala ndi hole unene iinima yuumpulile. Onda li handi popi naathithi, hatu yi komayendo nookuume kandje yokosikola nokutala oomuvi tadhi zitha omahwilili. Otwa li tu wete oombwanawa, nonando otadhi tilitha.

Onda tameke nokwaahavulika sho ndi na owala omimvo omulongo. Onda tameke okuhila omakaya gofakata, noga piki ndje meendelelo. Konima osho nda ka hila nepangwe. Sho ndi na omimvo 11, onda tameke okunwa iikolitha. Nonando kanda li ndi hole omulyo gwomalovu, onda li handi kala nda panda, uuna nda kolwa. Onda li wo ndi hole oongalo nokundanisa. Uututhi womainyanyudho nokuya omausiku kookalaba oyo ya li iilonga yandje. Onda li handi iyaka mo megumbo uusiku nokwiiyakela mo koongulasha. Esiku tali landula ohandi kala nda vulwa, nolundji onda li handi iyaka kosikola. Uuna ndi li kosikola, onda li handi nu omalovu pokati kootundi.

Onda zi mo niitsa iishona nayi mondondo yandje yahugunina kosikola. Shoka osha yemateke nokugeyitha meme, molwaashoka opo owala e shi wete kutya nani onda teya omutse. Otwa nyenyeta e tandi yi uuthondolo. Uule wokathimbo onda kala ndo otekwa kuTony, ngoka a li meitaalo lyoolasta. Tony okwa li ha yugu aantu, ha landitha iingangamithi nokwa tseyika e li omukolokoshi. Sho ndi na omimvo 16 onda ningi omusimbakadhona, nonda pulumutha okamati.

Onda tsakanene nOonzapo dhaJehova oshikando shotango, sho ndi li mehala lyaamwali mboka inaaya hokanwa. Mehala moka onda li nda pewa mo ondunda kaahungimwenyo. Opwa li aamwali aagundjuka yamwe mboka haya talelwa po kaakiintu yaali, Oonzapo dhaJehova. Esiku limwe onda kala poonkundathana dhawo. Elalakano lyandje olya li okutompa Oonzapo kutya dho odha puka. Odha li dha yamukula omapulo gandje ogendji nombili noku ga yelithila ndje, tadhi longitha Ombiimbeli. Odha popi nangame nohenda nonolukeno, oshinima shoka nda li nda hokwa. Onkee ano, onda zimine tu konakone Ombiimbeli nadho.

Konima owala yokathimbo, ondi ilongo sha mOmbiimbeli shoka sha lundulula onkalamwenyo yandje. Sho nda li omugundjuka onda kala handi tila eso, ihe ngashingeyi ondi ilonga oohapu dhaJesus kombinga yeyumuko. (Johannes 5:28, 29) Ondi ilonga wo kutya Kalunga oku na ko nasha nangame paumwene. (1 Petrus 5:7) Onda li nda gumwa unene koohapu dhaJeremia 29:11, ndhoka tadhi ti: “Ongame awike ndi shi shoka nde mu dhiladhilila, omadhiladhilo gandje ogelago, hagomupya; otandi mu pe onakuyiwa netegameno.” Onda tameke okwiitaala kutya otandi vulu oku ka kala nomwenyo sigo aluhe mOparadisa kombanda yevi. —  Episalomi 37:29.

Oonzapo dhaJehova odha li dhu ulukile ndje ohole yashili. Oshikando shotango nda gongala pamwe nadho, onda li ndu uvite uugumbo, nakehe gumwe oku na ombili nuukuume. (Johannes 13:34, 35) Omukalo moka dhu ungaunga nangame ogwa li gwa yooloka ko thiluthilu kwaangoka handi ungaungwa nagwo kongeleka yetu. Oonzapo odha li dha popitha ndje nohamu, nonando onda li nda gwa komulunga. Odhu ulike kutya odhi na ko nasha nangame. Odha kwathele ndje wo momikalo dhontumba nodhongandi. Onda li ndu uvite nda fa nda ninga oshilyo shegumbo enene moka mu na aantu ye holathane.

Sho tandi konakona Ombiimbeli, onda mono kutya ondi na okuninga omalunduluko, opo ndi kale metsokumwe nomithikampango dhOmbiimbeli. Onda kala tandi kondjo ndi hulithe po okuhila omakaya. Pethimbo opo tuu mpoka, onda ndhindhilike kutya oongalo dhimwe ohadhi hwahwameke ndje ndi hile epangwe, onkee onde etha po oku dhi pulakena. Opo kaandi kolwe, onda hulitha po okuya kuututhi womainyanyudho nokookalaba. Onda panga uukuume naantu mboka taya vulu okukwathela ndje ndi tsikile okuninga omalunduluko. —  Omayeletumbulo 13:20.

Konima yethimbo, Tony naye okwa tameke okukonakona Ombiimbeli nOonzapo dhaJehova. Sho dha yamukula omapulo ge tadhi longitha Ombiimbeli, naye okwa tompwa kutya shoka ti ilongo oshili. Okwa ningi omalunduluko omanene monkalamwenyo ye. Okwe etha po okukala naakolokoshi, okuyuga aantu nosho wo okuhila epangwe. Opo tu vule okukala twa hokiwa kuJehova thiluthilu, otwa hokana paveta momumvo 1982. Otwe shi ningi, opo tu putudhile omwanamati gwetu megumbo mu na elongelokumwe.

Otandi dhimbulukwa sho nda li tandi kongo iitopolwa mOoshungolangelo nomoo-Awake! * tayi popi kombinga yaantu mboka ya ninga omalunduluko ngoka nda hala okuninga. Iiholelwa yawo oya li ya tsu ndje omukumo. Oya nyatipaleke ndje ndi tsikile okuninga ngaashi te vulu nokaandi teke omukumo. Onda kala tandi galikana Jehova kee ekelehi ndje. Ngame naTony otwa ningi Oonzapo dhaJehova, sho twa ninginithwa muJuli 1982.

Sho nda tameke okukala nekwatathano naJehova Kalunga osha gamena ndje. Tse naTony otwa mona wo nkene Jehova e tu ambidhidha, uuna tu li muudhigu notwi ilongo okukala twe mu inekela. Otu wete kutya okwa kala noku tu gamena aluhe nokwa kwathela uukwanegumbo wetu wu pule komeho. —  Episalomi 55:22.

Onda nyanyukwa sho nda kwathela omumati nomukadhona gwetu, yi ilonge kombinga yaJehova ngaashi ngame nde shi ningi. Onda nyanyukwa wo sho ndi wete taya kwathele aatekulu yandje ya kokeke ontseyo yawo yokutseya Kalunga.

Ihandi penduka we uusiku tandi ipula kombinga yonakuyiwa nenge yeso. Ngame naTony ohatu talele po omagongalo gOonzapo dhaJehova gi ili nogi ili oshiwike kehe, opo tu ga tse omukumo. Ohatu yi pamwe naakwanegongalo sho taya ka longa yalwe kutya ngele oya kala ye na eitaalo muJesus, otaya vulu oku ka mona omwenyo gwaaluhe.