Edhina lyaKalunga olye? Ombiimbeli otayi ti: “Jehova Ofule; edhina lye Jehova.” (Eksodus 15:3, OB-1954) Edhina lyaKalunga olya holoka mo iikando 7 000 lwaampono mOmbiimbeli. Ihe momatoloko gOmbiimbeli ogendji edhina ndyoka olya pingenwa po nedhinasimaneko “Omuwa.” Kalunga okwa hala wu ninge kuume ke, onkee ano, ote ku ladhipike wu ‘ithane edhina lye.’ — 1 Ondjalulo 16:8, OB-1954.

Omadhinasimaneko gaJehova. Ombiimbeli oya popya omadhinasimaneko gaJehova ngaashi, “Kalunga,” “Omunankondoawike,” “Omushiti,” “Tate,” “Omuwa” nosho wo “Omupangeliawike.” MOmbiimbeli omu na omagalikano ogendji moka Jehova i ithanwa nomadhinasimaneko nosho wo kedhina lye lela, Jehova. — Daniel 9:4.

 Olupe lwaKalunga. Kalunga ombepo, iha monika. (Johannes 4:24) Ombiimbeli otayi shi koleke kutya ‘kaku na omuntu a mona Kalunga.’ (Johannes 1:18) Ombiimbeli oya holola omaiyuvo ge. Aantu otaya vulu oku mu uvitha nayi, nenge oku mu ‘nyanyudha.’ — Omayeletumbulo 11:20; Episalomi 78:40, 41.

Omaukwatya gaKalunga omawanawa. Kalunga aantu ayehe ohe ya tala ye thike pamwe kutya nduno oyomiigwana nenge oyomeputuko lini. (Iilonga 10:34, 35) Oku li wo ‘omunamutimahenda, omunalukeno nomutalanteni, iha geye mbala noku udha esilohenda nuudhiginini.’ (Eksodus 34:6, 7) Ihe omaukwatya galwe gaKalunga gane ogo unene ga dhenga mbanda.

Oonkondo. Molwaashoka oku li “Kalunga Omunankondoawike,” oonkondo dhe inadhi ngambekwa okugwanitha omauvaneko ge. — Genesis 17:1.

Uunongo. Uunongo waKalunga owu vule wakehe gumwe. Shoka osho Ombiimbeli tayi ti sho ya ti kutya “omunandunge awike.” — Aaroma 16:27.

Uuyuki. Kalunga oha longo aluhe shoka shu uka. Iilonga ye “oyolela” ye ‘ke na uugoyoki.’ — Deuteronomium 32:4.

Ohole. Ombiimbeli otayi ti kutya “Kalunga oye ohole.” (1 Johannes 4:8) Kalunga iha ulike owala ohole, ihe oye ohole. Ohole ndjoka e na ya dhenga mbanda oyo hayi mu wilike mukehe shimwe ta longo, nohayi tu etele uuwanawa momikalo odhindji.

Uukuume pokati kaKalunga naantu. Kalunga oTate gwetu omunahole e li megulu. (Mateus 6:9) Ngele otwa tula einekelo lyetu muye, otatu vulu okuninga ookuume ke. (Episalomi 25:14) Kalunga ote ku hiya nokuli wu hedhe popepi naye okupitila megalikano nowu mu ‘tsike iimpwiyu yoye ayihe, oshoka oye omusilishimpwiyu gwoye.’ — 1 Petrus 5:7; Jakob 4:8.

Jesus ke shi Kalunga. Jesus okwi ikalekelwa, oye owala a shitwa kuKalunga ye mwene. Nomolwaashoka Ombiimbeli tayi mu ithana kutya Omuvalwa awike gwaKalunga. (Johannes 1:14) Konima sho a shiti Jesus, Jehova okwa longitha Omwana ngoka omutango e li “engomba” a shite iinima yilwe ayihe naantu wo. — Omayeletumbulo 8:30, 31; Aakolossa 1:15, 16.

 Kapu na nando esiku limwe Jesus Kristus a tile kutya ye oKalunga. Pehala lyaashono, okwa popi a ti: “Onda zi [kuKalunga] noye a tuma ndje.” (Johannes 7:29) Sho a li ta popi nagumwe gwomaalongwa ye, Jesus okwa popi Jehova a ti: ‘Tate, naKalunga kandje nokeni wo.’ (Johannes 20:17) Sho Jesus a si, Jehova okwe mu yumudha e tayi megulu nokwe mu pe oonkondo oonene dhokupangela kolulyo Lwe. — Mateus 28:18; Iilonga 2:32, 33.

Jesus Kristus ota vulu oku ku kwathela wu hedhe popepi naKalunga

Jesus okwi ile kombanda yevi e tu longe kombinga yaHe. Jehova okwa li a popi kombinga yaJesus a ti: “Nguka oye Omumwandje omuholike, mu uveni!” (Markus 9:7) Jesus oku shi nawa Kalunga e vule kehe gumwe. Okwa ti: “Kaku na ngoka a tseya kutya Tate oye lye, Omwana oye awike, naangoka Omwana a hala oku mu hololela.” — Lukas 10:22.

Jesus ohu ulike uukwatya wa fa waKalunga thiluthilu. Jesus okwa li a holele uukwatya waHe lelalela nomolwaasho a ti: “Kehe ngoka a mono ndje, okwa mona wo Tate.” (Johannes 14:9) Jesus okwa li a kwathele aantu ya hedhe popepi naKalunga, molwaashoka okwa li hu ungaunga nayo pahole moohapu nomiilonga ngaashi He. Okwa ti: “Ongame ondjila noshili nomwenyo. Kape na ngoka ta vulu okuya kuTate, okuninga ta pitile mungame.” (Johannes 14:6) Okwa ti wo: “Aagalikani yashili taa ka galikana Tate mOmbepo nomoshili. Oshoka aagalikani ya tya ngaaka oyo naanaa mboka Tate e ya hala.” (Johannes 4:23) Shoka kashi shi tuu oshiwanawa! Jehova ota kongo aantu ngaashi ngoye mboka ya hala okutseya oshili kombinga ye.