Uuyelele mboka wu li mOmbiimbeli owu shi okwiinekelwa
Mondjokonona ayihe, aantu yomomaputuko ogendji oye shi zimina kutya Ombiimbeli oyi na uuyelele wu shi okwiinekelwa. Kunena aantu omamiliyona ohaya landula shoka Ombiimbeli tayi ti. Ihe yalwe ohaya ti kutya kayi na oshilonga nokayi li paushili. Ngoye oto ti ngiini? Mbela mOmbiimbeli otamu adhika ngaa oshili yasha?
OMOLWASHIKE WU NA OKWIINEKELA OMBIIMBELI?
Oshike tashi ku kwathele wu inekele etumwalaka lyomOmbiimbeli? Natu tale koshiholelwa. Ngele kuume koye okwa kala noku ku lombwela oshili uule womimvo odhindji, mbela ito ka kala we mu inekela? Mbela Ombiimbeli nayo otatu vulu oku yi yelekanitha nakuume koye ngoka ha popi aluhe oshili? Tala kiiholelwa tayi landula.
Aanyoli yOmbiimbeli aanashili
Aanyoli yOmbiimbeli oya li aanashili, nolundji oya nyola omapuko nomayono gawo. Pashiholelwa, omuhunganeki Jona okwa nyola kombinga yokwaahavulika kwe. (Jona 1:1-3) Okwa hulitha nokuli embo lye ta hokolola nkene Kalunga a li e mu pukulula, ihe ka li a gandja eitulomo kuye mwene mokunyola nkene a lundulula iikala ye. (Jona 4:1, 4, 10, 11) Uushili waanyoli ayehe yOmbiimbeli owa holola kutya oya lenga oshili.
Oshili yOmbiimbeli otayi kwathele aantu
Mbela Ombiimbeli ohayi gandja ngaa aluhe omayele omawanawa kombinga yiinima ya simana? Eeno. Pashiholelwa, tala sho ya popi kombinga yankene aantu taya vulu okukala nekwatathano ewanawa nayakwawo tayi ti: “Onkee ano shaa shoka mwa hala aantu ye mu ningile, osho ya ningileni wo.” (Mateus 7:12) Otayi ti wo: “Eyamukulo etalala otali loteke ondjahi, ihe elaka lyoshihanyeko otali tukula ongeyo.” (Omayeletumbulo 15:1) Ombiimbeli oyi na shili omayele taga longo nokunena, ngaashi owala pethimbo ya li ya nyolwa.
Ondjokonona yi li paushili
Aalafululi oyendji momukokomoko gwomimvo oya mona iinima mbyoka tayi ulike kutya aantu nomahala gontumba oko ga li. Oya mona wo kutya iiningwanima mbyoka ya popiwa mOmbiimbeli oya ningwa shili. Pashiholelwa, natu tale kuumbangi wumwe. Ombiimbeli oya popya kutya, pethimbo lyaNehemia, aantu yamwe [Aafoinikia ya za kuTiro] mboka ya kala muJerusalem ‘oye eta mo oohi niinima yi ili noyi ili, ye yi landakanithe.’ — Nehemia 13:16.
Mbela opu na uumbangi mboka tawu ambidhidha ovelise ndjoka? Eeno, opo wu li. Aalafululi yiikulunima oya mona iinima yAafoinikia muIsraeli, shoka tashi ulike kutya iigwana mbyoka iyali oya li hayi landakanithathana iinima. Shimwe ishewe, muJerusalem omwa adhika oohi dha za mEfuta lyopokati. Aalafululi yiinima oyi itaala kutya oohi ndhoka odha kuthwa komunkulofuta gulwe gu li kokule kaapingakanithi yiinima. Omulongwantu gumwe sho a konakona uumbangi mboka, okwa thiki pehulithodhiladhilo a ti: “Oohapu ndhoka dhi li muNeh[emia] 13:16 kutya Aatiro oya li haya landitha oohi muJerusalem, odhoshili lela.”
Oshili tayi tsu kumwe nuunongononi
Ombiimbeli embo tali popi unene kombinga yaKalunga nolya popya iinima mbyoka ya ningwa shili mondjokonona. Ihe otayi tsu wo kumwe niinima yopaunongononi. Tala koshiholelwa shimwe.
Konima yomimvo 3 500 lwaampono, Ombiimbeli oya popya kutya evi oli li “powalawala.” (Job 26:7) Uushili mbuka owa yooloka ko lela kiifundja mbyoka kutya evi olya kaama kombanda yomeya, nenge lyi li kohima onenenene. Konima yomimvo 1 100 sho embo lyaJob lya nyolwa nale, aantu oya kala yi itaala kutya itashi vulika evi li kale powalawala, ihe oli na okukala li li koshinima shontumba. Ihe mo 1687, ngashingeyi pwa pita omimvo 300 nasha, Isaac Newton, okwa nyanyangidha uuyelele womakonakono ngoka a ningi kombinga yoonkondo dhevi nokuyelitha kutya evi oli li ongonga, lya kwatwa koonkondo ihaadhi monika. Uuyelele mbuka wopaunongononi otawu shi koleke kutya shoka sha popiwa konima yomimvo 3 000, oshoshili!
Iinima ya hunganekwa e tayi gwanithwa shili
Omahunganeko ogendji gomOmbiimbeli ogoshili ngaa? Tala koshiholelwa shika: Ehunganeko lyaJesaja kombinga yokuteka po kwaBabilon.
Ehunganeko: Lwopomumvo 732 K.E.N., omunyoli gumwe gwOmbiimbeli Jesaja okwa li a hunganeke kutya Babilon, shoka sha ka ninga oshilando shepangelo enankondo, otashi ka hanagulwa po noitashi ka kala we hashi kala aantu. (Jesaja 13:17-20) Jesaja okwa li nokuli a tumbula omulumentu ngoka te ke shi ponokela kutya oKores. Okwa li wo a popi kutya Kores ote ke shi enda ngiini, sho a ti kutya omilonga otadhi ka ‘kukuta.’ Nokwa hunganeke kutya omiyelo dhoshilando shoka otadhi ka thigwa dhe ekama. — Jesaja 44:27–45:1.
Nkene lya gwanithwa: Konima yomimvo 200 dhehunganeko lyaJesaja, omukwaniilwa gumwe gwaPersia okwa ponokele Babilon. Edhina lye? oKores. Molwaashono Babilon osha li shi na enkolokuma lya kola, Kores netangakwiita lye oya panuna omulonga gwaEufrat ngoka gwa li gwe enda mokati nogwa dhingoloka oshilando shaBabilon. Omeya momulonga oga shuna lela pevi netangakwiita olya li lya vulu okutaaguluka omulonga ngoka gwa li gwa tsa kekuma. Oshihokithi, Aababiloni oya thigi omiyelo ndhoka dha taalela komulonga dhe ekama! Kores netangakwiita lye oya yi mo moshilando e ta ye shi hanagula po.
Ihe opu na uuyelele wulwe natango: Mbela Babilon osha ka kala we ngaashi na aantu? Uule womimvo omathele osha kala hashi kala aantu. Ihe kunena, omakulukuma owala gasho ge li popepi naBaghdad, shaIrag, shoka tashi ulike kutya ehunganeko ndyoka lyomOmbiimbeli olya gwanithwa. Eeno, Ombiimbeli oyi shi okwiinekelwa nuuna tayi popi iinima tayi ka ningwa monakuyiwa.
