Uutondwe okukala kuu hole nando omuntu gwontumba nenge omuhoko gwontumba. Uutondwe kawu shi owala okukala wa geyela omuntu pakathimbo, ihe oshinima sha menena mo omidhi.

Aantu oye na omatompelo ogendji ngoka ge ya ningitha ya kale ye na uutondwe. Olundji aantu oye tonde yalwe, hamolwaashoka ya ninga sha sha puka, ihe omolwomuhoko gwawo. Otashi vulika ya kale ye ya tonde, molwaashoka taya dhiladhila kutya omuhoko gwawo osho owala gu li ngaaka. Omuhoko omwiinayi kagu na siku gu lunduluke. Otashi vulika gwa dhinika, hagu thindilwa kongudhi nenge gwa talika ko ogwo hagu eta omaupyakadhi. Mboka ye tondike kuyalwe otashi vulika ya longelwe omiyonena, okwaanuuyuuki nenge ya ningilwe iinima yilwe mbyoka tayi vulu oku ya ningitha nayo ya tameke okukala ye na uutondwe.

Omuntu ota vulu okutonda nokuli naantu mboka inaa tsakaneka nale. Pashiholelwa, olundji omuntu otashi vulika a kale e tonde omuhoko gwontumba, molwaashoka owala yaandjawo ye gu tonde nenge ookuume ke. Kungawo, uutondwe mbono ohawu vulu okutaandela nuupu nokuli nomomudhingoloko gwawo.

Ngele otwa tseya kutya uutondwe ohawu taandele ngiini nuupu, otatu ka uva ko kutya omolwashike aantu oyendji ye tonde yalwe. Ihe opo tu yande uutondwe mboka wa taandela muuyuni awuhe, otwa pumbwa okutseya kutya owa tameke ngiini. Eyamukulo ndyono, otatu vulu oku li adha mOmbiimbeli.

AANTU HAYO ONZO YUUTONDWE. Owa tameke sho omuyengeli gumwe megulu ngoka e ki ithanwa Satana Ondiyapoli, a tsu ondumbo naKalunga. Ondiyapoli oya ningi “omudhipagi okuza” sho ya tameke okukala itaayi vulika kuKalunga. Yi li “omufundja nahe yiifundja ayihe” otayi tsikile nokuhumitha komeho uutondwe nongeyo. (Johannes 8:44; 1 Johannes 3:11, 12) Ombiimbeli otayi yi popi kutya oyu udha ondjahi. — Job 2:7; Ehololo 12:9, 12, 17.

OSHIPU KAANTU INAAYA GWANENENA YA YANDE UUTONDWE. Omuntu gwotango Adam okwa yono ngaashi Satana. Naashono osha ningitha aantu ayehe ya thigulule uulunde nokwaagwanenena. (Aaroma 5:12) Kain, omwanamati gwaAdam gwosheeli, okwa li a dhipaga omumwayina Abel, omolwuutondwe. (1 Johannes 3:12) Oshoshili kutya aantu oyendji oye na ohole nohenda. Ihe molwaashoka otwa thigulula uulunde, oyendji yomutse otwi ihole tse yene, otu na efupa nuuntsa, ano uukwatya mboka hawu ningitha aantu ya kale ye na uutondwe. — 2 Timoteus 3:1-5.

OMUNTU NGOKA KEE HOLE OMIHOKO DHILWE, OYE HA KALA UNENE E NA UUTONDWE. Uuyuni kunena otawu humitha komeho uutondwe mboka hawu ningitha omuntu a kale kee na ohenda, e na iikala neihumbato ewinayi. Uutondwe, omatukano, okuhindwa nokulongelwa omiyonena oya ha, molwaashoka “uuyuni auhe owu li mepangelo lyomuhindadhi.” — 1 Johannes 5:19.

Ombiimbeli inayi popya owala kutya uutondwe owa tameka ngiini, ihe oya popya wo ekandulopo lyawo.