Otashi vulika tu kale tu uvite twa gwililwa po uuna kuume ketu gumwe ta mono iihuna kuuvu wopamadhiladhilo. Ihe otatu vulu okuulika kutya otu na ko nasha naye moku mu kwathela a ungaunge nuupyakadhi we mboka. Ngiini mbela?

‘Kala ho pulakene mbala.’ — JAKOB 1:19.

Omukalo gumwe gwa dhenga mbanda to vulu okukwathela kuume koye omokupulakena kuye uuna a hala okupopya. Ino kala wu uvite kutya owu na oku mu yamukula mukehe shimwe shoka ta popi. Ulika kutya owa pulakena kuye nosho wo kutya owu na ko nasha naye. Kambadhala okuuva ko nkene e uvite, shimwe ishewe ino mu pangula. Dhimbulukwa kutya ohashi vulika a popye iinima mbyoka kaali a hala okupopya, mbyoka lwanima he ki ipa ombedhi omolwayo. — Job 6:2, 3.

‘Tsa aambanda omukumo.’ — 1 AATESSALONIKA 5:14.

Kuume koye otashi vulika a kale ti ipula unene, nenge a kale e uvite kee na oshilonga. Uuna we mu shilipaleke kutya owu na ko nasha naye, kungawo oto vulu oku mu hekeleka noku mu tsa omukumo, nonando ku shi kutya popya naanaa shike.

“Kuume oku na ohole aluhe.” — OMAYELETUMBULO 17:17.

Mu pa ekwatho ndyoka a pumbwa. Pehala lyokudhiladhila kutya owu shi nkene wu na okukwathela kuume koye, mu pula shoka to vulu oku mu ningila. Ngele oha mono oshidhigu okupopya kutya okwa pumbwa shike, kambadhala oku mu lombwela  oshinima shoka tamu vulu okuninga pamwe naye, ngaashi oku ka iyutha momagulu. Nenge oto vulu oku mu kwathela mu ka lande ko kiinima ye, okwoopaleka ko, nenge oku mu ningila sha shilwe shi ili. — Aagalati 6:2.

‘Idhidhimika.’ — 1 AATESSALONIKA 5:14.

Kuume koye otashi vulika kaa kale aluhe i ilongekidha okupopya sha. Mu shilipaleka kutya oto ka kala wa nyanyukwa okupulakena kuye, nonando ina hala okupopya sha. Omolwuuvu we, kuume koye otashi vulika a popye nenge a ninge iinima mbyoka tayi ku uvitha nayi. Otashi vulika a kaleke omalongekidho ngoka mwa ninga naye, nenge a kale a lulilwa. Kala wu na eidhidhimiko nolukeno sho to mu pe ekwatho ndyoka a pumbwa. — Omayeletumbulo 18:24.

Farrah, a ngoka kuume ke e na uunkundi wokulya nosho wo iimpwiyu ya pitilila, nepolimano okwa ti: “Ohandi shilipaleke kutya kuume kandje ota vulu okupopya nangame. Nonando itandi vulu okukandula po uupyakadhi we, ohandi kambadhala aluhe okupulakena kwaashoka ta popi. Omathimbo gamwe oha kala owala a pumbwa omuntu a pulakene kuye, opo a pepelelwe.”

Ha-eun, ngoka e na epolimano okwa ti: “Kuume kandje gumwe oku na olukeno noha tsu ndje omukumo. Okwa li a hiya ndje kegumbo lye tu ka lye pamwe iikulya tayi tokola elaka. Sho nda yi ko, okwa li a ulukile ndje olukeno, nokwe shi ningitha oshipu kungame ndi popye nkene ndi uvite. Shoka osha li sha tsu ndje lela omukumo!”

Jacob, ngoka omukulukadhi gwe e na epolimano okwa ti: “Eidhidhimiko olya simana lela. Uuna omukulukadhi gwandje a ningi oshinima shoka hashi uvitha ndje nayi, ohandi idhimbulukitha kutya uuvu we owo tawu mu ningitha a ninge ngaaka. Shika ohashi kwathele ndje ndi yande okugeya nohashi ningitha ndje ndi mu yaalele.”

Enrico, ngoka e na iimpwiyu ya pitilila okwa ti: “Omukulukadhi gwandje okwa kala nokukwathela ndje nokuhekeleka ndje noonkondo. Uuna ndi uvite nda gwililwa po uunene, iha kondjitha ndje ndi ninge oshinima shoka inaandi hala okuninga. Onkee omathimbo gamwe iha ningi nokuli niinima mbyoka a hala okuninga. Onde mu tala ko lela e li omukulukadhi i ikalekelwa, molwaashoka oku hole okugandja, ye ki ihole ye mwene.”