Onkundana ombwanawa yUukwaniilwa waKalunga otayi uvithwa muuyuni awuhe, ngaashi naanaa Jesus a popile. (Mateus 24:14) EmboMbiimbeli lyaDaniel otali tu lombwele kutya Uukwaniilwa mboka owo epangelo lyaKalunga. Montopolwa onti-2 yembo ndyoka omu na ehunganeko tali popi kombinga yomaukwaniilwa nenge yomapangelo gontumba omanankondo muuyuni, okuza kepangelo lyaBabilonia sigo okwaandyoka li li ko kunena. Ovelise 44 otayi hunganeke shoka tashi ka ningwa monakuyiwa tayi ti:

“Kalunga komegulu ota ka dhika po oshilongo shoka shaa na hulilo. Itashi ka sindika nando, ihe otashi ka yonagula po iilongo mbyoka ayihe, nosho shene otashi kala sigo aluhe.”

Ehunganeko ndika nomahunganeko galwe gOmbiimbeli otaga popi kutya Uukwaniilwa waKalunga otawu ka pingena po omapangelo agehe gopantu e tawu etele aantu ombili nelandulathano kombanda yevi. Onkalamwenyo otayi ka kala ya tya ngiini kohi yUukwaniilwa mboka? Mpaka otapu landula omauvaneko  omawanawa ngoka masiku taga ka gwanithwa.

• ITAPU KA KALA WE IITA

  Episalomi 46:9: “[Kalunga] ota hulitha po omalugodhi kombanda yevi alihe; ota teya omatati, ta ndonyona omagonga, niikandekitho ote yi fike po.”

  Dhiladhila nkene uuyuni tawu ka kala wu li ngele iimaliwa ayihe nontseyo ndjoka hayi longithwa mokunduluka iikondjitho, tayi longithwa miinima mbyoka tayi etele aantu uuwanawa, pehala lyoku ya dhipaga. Euvaneko ndyoka otali ka gwanithwa po kohi yUukwaniilwa waKalunga.

• ITAPU KA KALA WE UUWEHAME

  Jesaja 33:24: “Kape na nando ogumwe muSioni ta ka tya: ‘Otandi ehama.’”

  Dhiladhila ando muuyuni kaamu na ngoka ta monithwa iihuna kuuvu womutima, kokankela, komalaria nenge komikithi dhilwe. Iipangelo nomiti itayi ka kala we ya pumbiwa. Monakuyiwa aantu kombanda yevi otaya ka kala ye na uukolele wi ihwapo.

• ITAPU KA KALE WE ONDJALA

  Episalomi 72:16: “Moshilongo namu kale eloolo lyiilya; kiikulundundu naku kale omapya.”

  Evi otali ka mena iikulya ya gwanena kehe gumwe, naayehe otaya ka vula okukala ye yi na. Itapu ka kala we ondjala nomanyutu.

• ITAPU KA KALE WE UUWEHAME, OLUHODHI NESO

  Ehololo 21:4: “[Kalunga] ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.”

  Meviparadisa aantu otaya ka kala nomwenyo sigo aluhe. Shoka osho Omushiti gwetu omunahole, Jehova Kalunga, u uvaneka.

Iinima ayihe mbyoka otayi ka ningwa ngaa shili? Nonando aantu oyendji otashi vulika ya zimine kutya onkalamwenyo ombwanawa ndjoka yu uvanekwa noya popiwa mOmbiimbeli oye yi hala, omolwomatompelo gi ili nogi ili, oyendji oye wete kutya okukala nomwenyo sigo aluhe oku li oshinima oshidhigu okwiitaala. Shoka itashi kumitha, oshoka kapu na omuntu e yi mona, opo a vule oku tu lombwela kombinga yayo.

Molwaashoka aantu oya kala uule wethimbo muupika wuulunde neso, taye ehama, taya mono iihuna noye na omaupyakadhi galwe, oyendji oye shi taamba ko kutya onkalamwenyo ndjika osho owala yi na okukala ngawo. Ihe Omushiti gwetu, Jehova Kalunga, hasho a li a halela aantu.

Opo Kalunga e tu kwathele tu kale tu na uushili kutya ashihe shoka a hunganeka otashi ka gwanithwa shili, okwa popi nomuthindo shi na ko nasha noohapu dhe a ti: “Itadhi galukile kungame owala inaadhi gwanitha ehalo lyandje; otadhi tsakanitha elalakano ndyoka nde dhi li tumine.” — Jesaja 55:11.

Jehova okwa popiwa mOmbiimbeli e li Kalunga “ngoka ihaa fundju.” (Titus 1:2) Molwaashoka oku uvaneka kutya monakuyiwa otamu ka ningwa iinima ayihe mbino iiwanawa, oshi li pandunge okwiipula ngeyi: Mbela omuntu ota vulu ngaa shili okukala nomwenyo sigo aluhe moparadisa ndjoka u uvaneka kombanda yevi? Oshike tu na okuninga, opo tu ka mone shoka Kalunga u uvaneka? Miitopolwa tayi landula, oto ka adha mo uuyelele mboka tawu ku kwathele wu mone omayamukulo gomapulo ngoka.