AANTU

Shoka Ombiimbeli tayi ti: Kalunga evi “ine li shita li mbugale, ihe ehala lyokukala aantu.”  — JESAJA 45:18.

EVI

Shoka Ombiimbeli tayi ti: “Epipi limwe tali ka pita nekwawo otali ya, ihe evi otali kala sigo aluhe.”  — OMUUVITHI 1:4.

OOVELISE NDHONO OTADHI TI SHIKE?: Evi kali na siku li ka hanagulwe po, noli na okukalwa kaantu sigo aluhe. Sho Ombiimbeli tayi popi ehulilo lyuuyuni, oshike lela tashi ka hula po?

SHOKA WU NA OKUKALEKA MOMADHILADHILO: Ombiimbeli otayi yelekanitha ehulilo lyuuyuni mbuka naashoka sha li sha ningwa pethimbo lyaNoa. Pethimbo ndyono, ‘uuyuni owa li wu udha iilonga iiwinayi.’ (Genesis 6:13) Ongiini kombinga yaNoa? Ye okwa li omuyuuki. Onkee Kalunga okwe mu hupitha pamwe naanegumbo lye, ihe aakolokoshi okwe ya hanagula po neyelu. Ombiimbeli oya popi shoka sha li sha ningwa po, ya ti kutya “nokomeya geyelu wo uuyuni owa hanagulwa po.” (2 Petrus 3:6) Ndyoka olya li ehulilo lyuuyuni pethimbo lyaNoa. Mbela oshike sha li sha hanagulwa po? Kasha li evi, ihe aantu aakolokoshi mboka ya li kombanda yevi. Onkee ano, uuna Ombiimbeli tayi popi ehulilo lyuuyuni, kali shi evi lyo lyene tali ka hanagulwa po. Pehala lyaashono, otayi popi ehanagulo lyaantu aakolokoshi kombanda yevi nosho wo omahangano ngoka ya tota po.

OMAUPYAKADHI NOSHO WO UUKOLOKOSHI

Shoka Ombiimbeli tayi ti: “Aadhudhu otaa ka kana po mbala; nando u ya konge, ito ya mono. Aayifupipiki otaa ka thigulula evi notaa ka mona uulinawa nombili.” — EPISALOMI 37:10, 11.

OOVELISE NDHONO OTADHI TI SHIKE?: Eyelu lyaNoa inali hulitha po uukolokoshi thiluthilu kombanda yevi alihe. Aantu yamwe oya ka tsikila ishewe nuukolokoshi konima yEyelu. Oya kala natango taya etele aantu ooyakwawo omaupyakadhi. Masiku Kalunga ota ka hulitha po aakolokoshi sigo aluhe. Ombiimbeli mEpisalomi otayi ti kutya “aadhudhu otaa ka kana po mbala.” Kalunga ota ka hulitha po aakolokoshi okupitila mUukwaniilwa we. Uukwaniilwa waKalunga oshike? Owo epangelo lyomegulu ndyoka tali ka lela aantu mboka aayuuki okuza megulu.

SHOKA WU NA OKUKALEKA MOMADHILADHILO: Mbela aapangeli yopantu otaya ka vulika ngaa kUukwaniilwa waKalunga? Ombiimbeli otayi shi ulike kutya itaya ka vulika. Pehala lyaashono, otaye ke wu kondjitha. (Episalomi 2:2) Uukwaniilwa waKalunga otawu ka ninga po shike? Otawu ka hulitha po omapangelo agehe gopantu, notawu ka “kala sigo aluhe.” (Daniel 2:44) Omolwashike omapangelo gopantu ga pumbwa okuhulithwa po?

Shoka Ombiimbeli tayi ti: “Omuwa, ondi shi shi kutya omuntu iha vulu okupangela shoka u uthilwa; kaku na omuntu hu utha okukalamwenyo kwe.” — JEREMIA 10:23.

OVELISE NDJINO OTAYI TI SHIKE?: Aantu inaya shitwa ya kale taya pangele ooyakwawo. Itaya vulu oku shi ninga noitaya vulu okukandula po omaupyakadhi gaantu ooyakwawo.

SHOKA WU NA OKUKALEKA MOMADHILADHILO: Uuyelele wumwe wa za moshileshomwa Britannica Academic otawu ulike kutya omapangelo oga nyengwa “okukandula po omaupyakadhi gaantu. Omaupyakadhi ngoka ongaashi: oluhepo, ondjala, omikithi, iiponga yopaunshitwe, iita nelongithonkondo.” Oshileshomwa osha tsikile ko tashi ti: “Aantu yamwe . . . oyi itaala kutya omaupyakadhi ngono otaga ka kandulwa po owala uuna muuyuni mu na epangelo limwe.” Ihe nonando omapangelo gopantu agehe oga hangane, natango uuyuni otawu pangelwa owala kaantu yonyama nombinzi, mboka itaaya vulu okukandula po omaupyakadhi ngoka twa tumbula metetekelo. Uukwaniilwa waKalunga owo owala tawu ka hulitha po omaupyakadhi agehe ngoka ge tu kondeka kombanda yevi.

Onkee ano, ngaashi Ombiimbeli tayi shi popi, aantu mboka haya tila Kalunga, kaye na okukala ya tila ehulilo lyuuyuni mbuka. Pehala lyaashono, oye li tegelela, oshoka uuyuni mbuka wa yonuka, otawu ka pingenwa po nuuyuni uupe mboka itoo wu pewa komuntu.

Uunake iinima ayihe mbyono tayi ka ningwa? Oshitopolwa tashi landula otashi tu kwathele tu mone eyamukulo okuza mOmbiimbeli.