NGELE nangoye owa silwa, otashi vulika wa li wu na omaiyuvo gi ili nogi ili. Otashi vulika wa li wa nika oluhodhi, wu uvite uuwike, kuu na ekwatho lya sha, wa geya, wu uvite wu na ondjo nowa tila. Otashi vulika wa li ho ipula ngele onkalamwenyo yoye oyi na ngaa eityo natango.

Kala wu na uushili kutya inashi puka okukala wa nika oluhodhi. Oluhodhi ohalu ulike kutya owu na ko nasha naangoka a sa. Ihe nonando ongaaka, oto vulu okumona epepelelo kuuwehame mboka wu na omolwoluhodhi.

Nonando uuwehame mboka wu na otawu monika wa fa kaapu na siku wu ka hule po, omaetopo taga landula otaga vulu oku ku kwathela wu idhidhimike:

INASHI PUKA OKUKALA WA NIKA OLUHODHI

Ihatu nika oluhodhi momukalo gwa faathana nenge uule wethimbo li thike pamwe. Nonando ongawo, okulila ohaku ku kwathele wu kale wa pepelelwa. Vanessa ngoka a popiwa metetekelo okwa ti: “Onda li owala handi kala tandi lili, opo uuwehame wu ze po.” Sofia ngoka a silwa omumwayinakadhona ombaadhilila okwa ti: “Ngele tandi dhiladhila kwaashoka sha ningwa po, ohashi ehameke ndje noonkondo, sha fa owala oshilalo tashi mangululwa shi opalekwe. Uuwehame mboka ihawu vulu naanaa okwiidhidhimikilwa, ihe ohawu kwathele oshilalo shi pole.”

 LOMBWELA YALWE OMAIYUVO GOYE NAASHOKA TO DHILADHILA

Otashi vulika omathimbo gamwe ho kala wa hala okwiikalela. Ihe ngele oto kambadhala okwiidhidhimikila oluhodhi kungoye mwene, owa fa owala wa humbata omutengi omudhigu ongoye awike. Jared gwomimvo 17, ngoka a silwa he, okwa ti: “Ohandi lombwele yalwe nkene ndi uvite. Nonando otashi vulika ihaaya kala lela yu uvite ko shoka nda hala okutya, onda li handi kala nda pepelelwa uuna nda holola omaiyuvo gandje.” Janice ngoka a popiwa moshitopolwa shotango, okwa gwedha ko a ti: “Okupopya nayalwe osha li hashi hekeleke ndje noonkondo. Onda li ndu uvite kutya yalwe oyu uvite ko omaiyuvo gandje noitandi idhidhimikile onkalo ndjoka ongame awike.”

TAAMBA KO EKWATHO NDYOKA TO PEWA

Ondohotola yimwe oya ti: “Ngele ngoka a silwa okwe etha ookuume ke naakwanezimo ye ye mu kwathele, olundji ohashi kala oshipu kuye i idhidhimikile oluhodhi lwe.” Lombwela ookuume koye kutya otaya vulu oku ku kwathela ngiini. Otashi vulika ya hala oku ku kwathela, ihe kaye shi kutya naye shi ninge ngiini. — Omayeletumbulo 17:17.

HEDHA POPEPI NAKALUNGA

Tina okwa ti: “Sho omusamane gwandje a si ombaadhilila kokankela, kanda li we tandi vulu oku mu lombwela omaupyakadhi gandje, omaiyuvo gandje nenge omaipulo gandje. Onkee ano, onda li handi lombwele Kalunga kehe shimwe. Kehe siku tandi penduka, onda li handi mu pula a kwathele ndje ndi idhidhimike esiku ndyoka. Okwa kwathela ndje momikalo odhindji itaandi vulu oku dhi tumbula.” Tarsha ngoka a li e na omimvo 22 sho yina a si, okwa ti: “Onda li nda mono ehekeleko mokulesha Ombiimbeli esiku kehe. Iinima mbyoka nda lesha mo oya tsa ndje omukumo.”

DHILADHILA KEYUMUKO

Tina okwa gwedha ko a ti: “Petameko etegameno lyeyumuko kalya li hali hekeleke ndje, molwaashoka onda li nda pumbwa omusamane gwandje naamwandjemati, oya li ya pumbwa he. Ihe ngashingeyi, omimvo ne dha ka pita, etegameno ndyoka onde li dhiginina. Ohali hekeleke ndje nokukwathela ndje ndi idhidhimike. Ohandi dhiladhila uuna tandi ke mu mona ishewe nohashi etele ndje ombili nenyanyu.”

Oluhodhi ihalu zi po mbala. Ihe nonando ongawo, shoka Vanessa a popi otashi vulu oku tu hekeleka. Okwa ti: “Otashi vulika wu dhiladhile kutya kalu na siku lu ze po, ihe mokweendela ko kwethimbo ito ka kala wa nika oluhodhi unene.”

Dhimbulukwa kutya oto kala aluhe nokuyuulukwa ngoka a sa, ihe nonando ongawo, oto vulu okukala nonkalamwenyo tayi ti sha. Kekwatho lyaKalunga lyopahole, oto vulu natango okukala wu na ookuume aawanawa nowu na elalakano monkalamwenyo. Masiku Kalunga ota ka yumudha oonakusa. Okwa hala wu ka mone ishewe mboka wa silwa. Uuwehame mboka wu uvite ngashingeyi momutima gwoye, itawu ka kala po we sigo aluhe!