Emoniko lyaakayili yuukambe yane otali monika lya fa oshiholekwa notali tilitha, ihe hasho shi na okukala ngaaka. Omolwashike mbela? Omolwaashoka Ombiimbeli niiningwanima yopethimbo lyetu otayi tu kwathele tu mone kutya omukayili gwokakambe kehe ota thaneke shike. Nonando okukayila kwawo uukambe otaku thaneke uupyakadhi mboka wu li kombanda yevi, otaku vulu wo okukala onkundana ombwanawa kungoye nokaanegumbo lyoye. Ngiini mbela? Natu konakoneni tango kutya omukayili gwokakambe kehe olye.

Emoniko olya tameke ngeyi: “Ngame onda tala nonda mono ko okakambe okatokele. Omukayili gwako okwa li e na uutati nokwa pewa oshishani. Oye okwa yi, a ka sindane, oshoka oye omusindani.” — Ehololo 6:2.

Omukayili gwokakambe okatokele olye? Okwa popiwa membo olyo tuu ndyoka lyEhololo, ndyoka lya ka popya omukayili nguka ta zi megulu e li “Ohapu yaKalunga.” (Ehololo 19:11-13) Jesus Kristus ohi ithanwa Ohapu, oshoka oye omupopikalelipo gwaKalunga. (Johannes 1:1, 14) Oti ithanwa wo “Omukwaniilwa gwaakwaniilwa nOmuwa gwaawa” nokwa popiwa e li “Omwiinekelwa nOmunashili.” (Ehololo 19:16) Osha yela kutya oku na oonkondopangelo dhokukala omukwaniilwa omusindani noiha longitha oonkondo dhe momukalo kaagu li pauyuuki nenge nonyanya. Nonando ongawo, opwa holoka omapulo.

Olye a pe Jesus oonkondopangelo a sindane? (Ehololo 6:2) Omuhunganeki Daniel okwa mono emoniko moka Mesiasa, ngoka a popiwa “a fa omuntu,” ta pewa “epangelo, esimano noonkondo dhuukwaniilwa” “kungoka ta kala e na omwenyo aluhe sigo aluhe,” ano Jehova Kalunga. * (Daniel 7:13, 14) Shika otashi ulike kutya Kalunga Omunakondoadhihe oye a pe Jesus oonkondopangelo nosho wo uuthemba wokupangela nowokupangula. Onkee ano, otashi opalele sho okakambe okatokele taka thaneke iita yi li pauyuuki, mbyoka tayi kondjwa kOmwana gwaKalunga, oshoka Omanyolo oga longitha olundji olwaala olutokele talu ulike kuuyuuki. — Ehololo 3:4; 7:9, 13, 14.

Aakayili yuukambe oya tameke oku wu londa uunake? Ndhindhilika kutya omukayili gwokakambe kotango okwe ka kayile, sho a pewa oshishani. (Ehololo 6:2) Jesus okwa langekwa po uunake e li Omukwaniilwa megulu? Ina langekwa po konima yeso lye, sho a shuna megulu. Ombiimbeli oyu ulika kutya sho a shuna megulu, okwa kala a tegelela uule wethimbo. (Aahebeli 10:12, 13) Jesus okwa pe aalanduli ye endhindhiliko, ya dhimbulule mo kutya ethimbo ndyoka a kala a tegelela, olya hula nonokutya okwa tameka okupangela megulu. Okwa ti kutya petameko lyokupangela kwe, oonkalo dhuuyuni otadhi ka nayipala. Otaku ka kala iita, ondjala nomalega. (Mateus 24:3, 7; Lukas 21:10, 11) Nziya konima yIita yoTango yUuyuni mbyoka ya holoka mo 1914, osha li sha yela kutya aantu oya thika methimbo lyomaudhigu kombanda yevi, ndyoka Ombiimbeli ye li ithana ‘omasiku gahugunina.’ — 2 Timoteus 3:1-5.

Omolwashike tu wete oonkalo tadhi nayipala pehala lyokuhwepopala, okuza sho Jesus a pewa oshishani mo 1914? Omolwaashoka pethimbo mpoka, Jesus okwa tameke okupangela megulu, ihe hakombanda yevi. Iita oya tukuluka megulu, nOmukwaniilwa nguka omupe, Jesus, ngoka hi ithanwa Mikael, oku umbile Satana noompwidhuli dhe kombanda yevi. (Ehololo 12:7-9, 12) Okuza ngaa sho Satana u umbilwa kombanda yevi, okwa kala u udha ondjahi, oshoka oku shi shi kutya oku na ko owala okathimbo okafupi. Masiku Jehova ota ka gwanitha po elalakano lye lyoku mu katukila onkatu. (Mateus 6:10) Ngashingeyi natu taleni nkene aakayili yalwe yuukambe yatatu taya koleke shili kutya otu li methimbo edhigu ‘lyomasiku gahugunina.’ Mepingathano nomukayili gwokakambe kotango, ngoka ta thaneke omuntu kondandalunde, aakayili mboka  yatatu otaya thaneke oonkalo kombanda yevi ndhoka dha guma aantu ayehe.

Emoniko olya tsikile ngeyi: “Okakambe okakwawo okatiligane oka holoka. Omukayili gwako okwa pewa oonkondo dhokuhomonena evi alihe iita, aantu [oya] tameke okudhipagathana. Oye nokwa pewa egonga enene.” — Ehololo 6:4.

Omukayili gwokakambe haka ota thaneke iita. Ndhindhilika kutya ota kutha po ombili kevi alihe, ihe hamiigwana yimwepo. Iita yoTango yUuyuni oya holoka mo 1914, shoka shi li oshikando shotango mondjokonona. Oya landulwa kIita Iitiyali yUuyuni, mbyoka ya li ye eta ehanagulo enene. Okwa tengenekwa kutya okuza mo 1914, aantu ye vulithe poomiliyona ethele oya sa, omolwiita nomaipumomumwe gaantu ya homata. Aantu yalwe oyendji oya li ye ehamekwa noonkondo.

Mbela iita otayi dhana onkandangala shi thike peni, yi li endhindhiliko lyethimbo ndyoka tu li mulyo? Aantu otaya monika ya fa taya vulu okuhulitha po aantu ayehe kombanda yevi. Nokuli nomahangano gokukaleka po ombili, ngaashi Iigwana ya Hangana, oga ndopa okuya moshipala omukayili gwokakambe okatiligane.

Emoniko olya tsikile ko ishewe ngeyi: “Nena Onzigona okwa matula oshihako oshititatu; nondu uvu oshinamwenyo oshititatu sha ti: ‘Ila!’ Onda tala nonda mono ko okakambe okaluudhe. Omukayili gwako okwa li e na oshiviha moshikaha she. Ngame ondu uvu ewi lya zi mokati kiinamwenyo mbyoka ine lya ti: ‘Okatungwa kiilyawala oke thike pondjambi yomesiku nosho wo uutungwa utatu womahangu. Ihe omagadhi nomaviinu ino ga etela oshiponga.’” — Ehololo 6:5, 6.

Omukayili gwokakambe haka ota thaneke ondjala. Memoniko ndika otamu popiwa iikulya tayi vihwa, ihe oyi na ondilo noonkondo, oshoka omimvo 2 000 nasha dha ka pita, okatungwa kiilyawala (olita 1.08) oka li ke thike pondenari, ondjambi yesiku limwe. (Mateus 20:2) Oshimaliwa osho tuu shono, osha li tashi vulu okulanda uutungwa utatu womahangu (oolita 3.24), ngoka ga talika ko ge vulike kiilyawala. Mbela iikulya mbyoka otayi ka gwanena ngaa egumbo moka mu na aantu oyendji? Aantu oya londodhwa ya kale haya kwata nawa iikulya yesiku kehe, mbyoka tayi thanekwa kiikulya mbyoka ya li hayi liwa unene pethimbo lyonale nokomagadhi nomaviinu ngoka haga longithwa momuthigululwakalo.

Okuza mo 1914, mbela otu wete uumbangi mboka tawu ulike kutya omukayili gwokakambe okaluudhe ota pula komeho? Eeno! Aantu oomiliyona 70 lwaampono oya sa kondjala, momukokomoko gwomumvo 1901-2000. Omukwanepangelo gumwe okwa ti: “Aantu oomiliyona 805, konyala omuntu gumwe maantu omugoyi muuyuni, oya li ya konenwa kondjala momumvo 2012-2014.” Olopota yimwe oya tengeneka kutya: “Ondjala ohayi dhipaga aantu oyendji omumvo kehe, shi vulithe omukithi gwo-AIDS, omalaria no-TB dha tulwa kumwe.” Nonando oyendji oya ninga oonkambadhala dha mana mo ya paluthe aasindjala, omukayili gwokakambe okaluudhe onkee ngaa ta pula komeho.

Emoniko olya tsikile ko natango ngeyi: “Ngame onda mono ko okakambe okakwaya. Omukayili gwako oye ngoka e na edhina Eso, Oshaasi noshe mu landula. Mbika iyali oya pewa oonkondo dhokupangela oshitine shevi nokudhipagitha aantu kiita, kondjala, komalega nokiilikama.” — Ehololo 6:8.

Omukayili gwokakambe okatine ota thaneke eso ndyoka hali etithwa komalega nokiinima yilwe. Nziya konima yomumvo 1914, eshikisha lyaSpania olya dhipaga aantu omamiliyona omilongo. Otashi vulika aantu oomiliyona 500 ya li ya kwatwa kulyo. Konyala omuntu 1 maantu 3, okwa li e li na.

Eshikisha lyaSpania olya li owala etameko. Aatseyinawa oya tengeneka kutya aantu omamiliyona omathele oya sa koshikoloha (smallpox), momukokomoko gwomumvo 1901-2000. Sigo onena, onkalamwenyo yaantu oyendji oya fupipikwa ko-AIDS, ko-TB nokomalaria, nonando opwa ningwa omakonakono gopaunamiti ga kwata miiti.

 Iita, ondjala nomalega ayihe ohayi eta eso. Oshaasi otashi gongele aantu pwaa na oluthuwo nokashi na etegameno.

Omathimbo omadhigu ngaka tu li mugo otaga ka hula masiku. Dhimbulukwa kutya Jesus “okwa yi, a ka sindane” mo 1914, noku umbile Satana kevi, ihe Jesus ka li a sindana thiluthilu pethimbo mpoka. (Ehololo 6:2; 12:9, 12) Masiku puArmagedon, Jesus ota ka kutha po iinima mbyoka hayi etithwa kuSatana nota ka hanagula po mboka haye mu ambidhidha. (Ehololo 20:1-3) Jesus ita ka hulitha po owala aakayili yuukambe yatatu, ihe ota ka hulitha po wo iilanduliko mbyoka ye etitha. Ngiini mbela? Natu taleni shoka Ombiimbeli yu uvaneka.

Pehala lyiita, ombili oyo tayi ka pangela kevi. Jehova “ota hulitha po omalugodhi kombanda yevi alihe; ota teya omatati, ta ndonyona omagonga.” (Episalomi 46:9) Aantu mboka yehole ombili, ‘otaa ka mona uulinawa nombili.’ — Episalomi 37:11.

Pehala lyondjala, otaku ka kala iikulya ya gwana. Ombiimbeli otayi ti: “Moshilongo namu kale eloolo lyiilya; kiikulundundu naku kale omapya.” — Episalomi 72:16.

Pehala lyomalega neso, aantu ayehe otaya ka kala ye na uukolele wi ihwapo nomwenyo gwaaluhe. Kalunga “ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame.” — Ehololo 21:4.

Sho Jesus a li kombanda yevi, okwa longo iinima iiwanawa mbyoka tayi ulike nkene onkalo tayi ka kala monakuyiwa, sho ta ka pangela. Okwa humitha komeho ombili nokwa longo iikumithalonga, sho a palutha aantu omayovi, a aludha aavu nokuyumudha aasi. — Mateus 12:15; 14:19-21; 26:52; Johannes 11:43, 44.

Oonzapo dhaJehova otadhi ka kala dha nyanyukwa oku ku ulukila mOmbiimbeli yoye, nkene to vulu okwiilongekidhila ethimbo itaapu ka kala we aakayili yuukambe. Mbela ino hala okwiilonga oshindji?