Onda putukila moPuerto Limón, oshilando shetulilosikepa shi li kuuzilo womunkulofuta gwaKosta Rika. Otwa valwa yahetatu, na ngame omutiheyali. Tate okwa si, sho ndi na omimvo hetatu. Onkene meme okwe tu putudha oye awike.

Onda kala ndi hole nayi uudhano wokatanga haka dhengwa noshiti (Baseball) okuza kuunona wandje. Sho ndi na omimvo omulongo nasha, onda wayimine okasipana kamwe kaamati mboka opo taya tameke. Sho ndi na omimvo 20 nasha, omudheuli gumwe okwa pula ndje ndi ye ndi ka dhanene osipana yimwe onene moNicaragua. Onda tindi, oshoka onda li tandi sile meme oshimpwiyu, ngoka a li a nika uunkundi pethimbo ndyoka. Onkee ano, kanda li nda hala okuya koNicaragua. Konima yethimbo, omudheuli gulwe okwa pula ndje ndi ye mosipana yopashigwana yobaseball yaKosta Rika, ndjoka ya thikama po maadhani ya hogololwa okuza muusipana mboka opo tawu tameke. Oshikando shino, onda zimine. Onda kala mosipana ndjoka okuza mo 1949-1952. Onda dhana omaudhano ogendji moKuba, moMeksiko nomoNicaragua. Uudhano mbono onda li nde wu funda nawa nonda dhana nokuli omaudhano 17, inaandi ninga okapuko kasha. Onda li handi kala ndu uvite uuntsa, uuna aantu tayi igidha edhina lyandje!

Oshinima shimwe, onda li ndi hole iipala. Onda li ndi na okakadhona kamwe, ihe hako akeke nda kala ndi na. Onda li wo handi nu nayi. Esiku limwe, onda li nda kolwa, naasho nda penduka, kegumbo ite dhimbulukwa kutya onde ya ko ngiini. Onda li natango ndi hole okundombola.

Pethimbo ndi li monkalamwenyo ya tya ngawo, meme okwa ningi Onzapo yaJehova. Okwa kambadhala okuuvithila ndje, ihe inashi za, oshoka onda li nda pwila thiluthilu muudhano. Ando onda li mokapale tandi idheula pethimbo lyomuha, ando nondjala itandi yi uvu nokuli. Onda li lela nda pwila muudhano, nonda li ndi wu hole shimwe to nyengwa.

 Sho ndi na omimvo 29, onda mono oshiponga oshinene, nda adhika tandi kambadhala okukwata okatanga mokapale. Konima sho nda aluka, onde etha po okudhanena osipana yopashigwana. Onda kala handi dheula osipana yaamati mboka opo taya tameke, pokapale ke li popepi negumbo lyandje.

Mo 1957, onda yi koshigongi shoshitopolwa shOonzapo dhaJehova, sha li mokapale moka twa li hatu dhanene. Sho ndi li poshigongi, onda mono eyooloko enene pokati keihumbato lyOonzapo naandyoka lyaantu mboka haye ya okutala uudhano wobaseball. Shoka oshi inyengitha ndje ndi tameke okukonakona Ombiimbeli nOonzapo nokuya kokugongala kwadho.

Onda li nda kuminwa iinima oyindji mbyoka ndi ilongo mOmbiimbeli. Pashiholelwa, Jesus okwa hunganeke kutya momasiku gahugunina, aalongwa ye otaye ku uvitha onkundana ombwanawa muuyuni awuhe. (Mateus 24:14) Ondi ilongo wo kutya Aakriste yashili ihayu uvitha nelalakano lyokukonga oshimaliwa. Jesus okwa ti: “One mwa pewa oshindji omagano, gandjeni wo omagano.” — Mateus 10:8.

Sho nda tsikile nokukonakona Ombiimbeli, onda yelekanitha shoka tayi ti naashoka nda mono mokati kOonzapo dhaJehova. Onda li nda kuminwa oonkambadhala dhawo dha mana mo, dhokuuvitha onkundana ombwanawa yUukwaniilwa waKalunga muuyuni awuhe. Onda mono kutya odhi na ombepo yokugandja, ndjoka Jesus a ladhipikile Aakriste. Sho nda lesha oohapu dhaJesus muMarkus 10:21, ndhoka tadhi ti: ‘Ila, u landule ndje,’ onda kala nda hala okuninga Onzapo.

Osha pula ndje ethimbo, ndi ninge Onzapo. Pashiholelwa, uule womimvo odhindji, onda kala handi dhana onomola ndjoka hayi etele ndje elago aniwa, oshiwike kehe tandi ndombola. Ondi ilongo mOmbiimbeli kutya Kalunga oku tonde mboka haya simaneke “Gad [oshimenka shelago]” nosho wo aanalwiho. (Jesaja 65:11; Aakolossa 3:5) Onda ningi po shike? Onde etha po okundombola. Konima sho nde ku etha po, Osoondaha ya ka landula ko, onomola ndjoka hayi etele ndje elago aniwa, oya longithwa kugulwe e ta sindana. Aantu oya li ya yolo ndje, sho inaandi dhana oshiwike shoka. Oya kondjitha ndje ndi tameke okudhana ishewe, ihe onda tindi. Sigo onena, inandi yelekela we okundombola.

Konima sho nda zala “omuntu omupe,” sha hala okutya, esiku nda ninginithwa poshigongi shoshitopolwa shOonzapo dhaJehova, onda li nda taalela ishewe eshongo limwe. (Aaefeso 4:24) Kongulohi sho nde ya mohotela moka nda li, onda adha omukadhona ngoka a li gwandje, a tegelela ndje pomweelo gwondunda. Okwa ti: “Sammy, mentu ngweye, ila tu iyuvithe nawa!” Onde mu yamukula nziya nda ti: “Ahawe!” Onde mu dhimbulukitha kutya ngashingeyi onkalamwenyo yandje oyi li metsokumwe nomithikampango dhOmbiimbeli. (1 Aakorinto 6:18) Okwi igidha a ti: “Shike?” Okuza mpono, okwa sheke shoka Ombiimbeli tayi ti kombinga yiipala nokwa kondjitha ndje tu ishunine. Onda ningi po shike? Onda yi mondunda, e tandi i patele mo. Ondu uvite uuntsa okupopya kutya okuza ngaa sho nda ningi Onzapo mo 1958, kii na siku nda shunine kiinima mbyoka nde etha po.

Onda mona omauwanawa ogendji, sho nda tameke okulandula omayele gOmbiimbeli! Omauwanawa gamwe ongaashi: Ookuume kashili oyendji, onkalamwenyo tayi ti sha nombili yashili.

Ondi hole natango obaseball, ihe hangaashi nale. Moku yi dhana onda li nda mono mo esimano niimaliwa, iinima mbyoka ihaayi kalelele. Ongiini kombinga yekwatathano lyandje naKalunga nosho wo naamwatate naamwameme muuyuni? Lyo otali kalelele. Ombiimbeli otayi ti: “Uuyuni niinima ayihe yi li mo mbyoka aantu ye yi hokwa, otayi hulu po. Ihe ngoka ta longo shoka Kalunga a hala, ota kala e na omwenyo aluhe.” (1 Johannes 2:17) Ngashingeyi ondi hole Jehova Kalunga noshigwana she, shi vulithe iinima ayihe!