Natu taleni kekwatathano lyopothingweelela aantu haya kala ye na, ano lyaakwanambwiyu. Ohaya kala ye na ekwatathano li ikalekelwa. Omukwanambwiyu Nancy Segal, omukuluntu mo-Twin Studies Center (Oshikondo shokuninga omakonakono kombinga yaakwanambwiyu) okwa ti kutya aakwanambwiyu yamwe “ohaya kala nokuli ye shi shoka mukwawo a hala okutya manga inee shi yelitha.” Omukiintu gumwe okwa popi kombinga yekwatathano ndyoka ye nomukwanambwiyu omukwawo ye na a ti: “Otu shaathane nawanawa.”

Uushili wuni tawu ambidhidha oshinima shono? Omakonakono oge shi ulike kutya, nonando momudhingoloko moka aakwanambwiyu ya putukila nosho wo nkene ya putudhwa ohashi ya gumu, omukalo moka ya shitwa ogwo unene tagu dhana onkandangala.

DHILADHILA KWAASHIKA: Omushiti ngoka a shita uukwatya mbuka uukumithi wu li maakwanambwiyu oku tu shi nawanawa e vule omuntu kehe. Nokuli omupisalomi David okwe shi koleke a ti: “Owa tungile ndje mela lyameme. Omasipa gandje sho ga shitwa noga tulwa kumwe nawa mela lyameme, naasho nda li te koko meholamo, owa li u shi shi. Owa mono ndje, manga inaandi valwa.  . . . Agehe oga nyolelwa membo lyoye.” (Episalomi 139:13, 15, 16) Nonando Kalunga oye owala e shi noku uvite ko kutya otwa shitwa ngiini, oku shi wo iiningwanima ayihe mbyoka ya ningwa moonkalamwenyo dhetu ya nwetha mo uukwatya wetu. Molwaashoka Kalunga oye owala e tu shi nawanawa nokwa tseya kutya otwa shitwa ngiini, otashi tu shilipaleke kutya oku uvite ko nawa oonkalo dhetu.   

David okwa galikana a ti: “Omuwa, ongoye to konakona ndje nowa tseya ndje. Owa tseya ndje, uuna nda kuutumba nongele nda thikama; omadhiladhilo gandje agehe oto ga tseya, manga inaaga holoka. Omuwa, manga inaandi tumbula sha, owa tseya nale shoka tii ka tya.” (Episalomi 139:1, 2, 4) Shimwe ishewe, Jehova oha kala e shi kutya otu uvite lela ngiini ‘nomadhiladhilo getu agehe noondjuulukwe dhetu adhihe oku dhi shi.’ (1 Ondjalulo 28:9; 1 Samuel 16:6, 7) Oovelise ndhino otadhi holola shike kombinga yaKalunga?

Nonando otashi vulika kaatu popye omadhiladhilo getu nomaiyuvo getu megalikano, Omushiti gwetu iha kala owala e wete shoka hatu ningi, ihe oha kala e shi kutya ohatu shi ningile shike. Oha kala wo e shi kutya iinima iiwanawa yini twa hala okuninga, nonando opu na omangambeko ngoka tage tu imbi tu yi ninge. Osha yela kutya sho Kalunga e tu shitila uukwatya wohole momitima, okwa hala oku tu mona tatu dhiladhila pahole notu kale tu na omainyongotompelo gopahole. — 1 Johannes 4:7-10.

Omanyolo otage tu shilipaleke

• “Omeho gOmuwa oge wete aayuuki, naaluhe ota pulakene omaindilo gawo; ihe ota thigi po mboka haa longo uuwinayi.” — 1 PETRUS 3:12.

• Kalunga ote tu uvanekele ta ti: “Otandi ku ulukile ondjila ndjo u na okulandula; otandi ku wilike e tandi ku tonatele.” — EPISALOMI 32:8.

Mbela okukala tu shi kutya Kalunga oku uvite ko onkalo yetu nomaiyuvo getu otaku vulu oku tu kwathela tu idhidhimikile omaupyakadhi? Natu tale kwaashoka sha ningilwa Anna gwokoNigeria. Okwa yelitha a ti: “Onda li handi ipula ngele oshi na ngaa oshilonga okukala nomwenyo, molwaashoka onda li nda lulilwa konkalo yandje. Onda li omuselekadhi handi sile oshimpwiyu okamwandjekadhona hoka ka li moshipangelo ke na omukithi gwo-hydrocephalus (uuluyi wu na omeya ogendji), pethimbo nda li nda monika okankela kegundji nonda li ndi na okutandwa nokuya mepango lyokudhipaga oosele dhokaankela. Osha li oshidhigu noonkondo okukala moshipangelo pethimbo opo tuu mpoka okamwandje nako ke li moshipangelo.”

Oshike sha kwathele Anna i idhidhimike? Okwa ti: “Onda dhiladhila omanyolo ngaashi Aafilippi 4:6, 7, ndjoka tayi ti kutya ‘ombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni.’ Ethimbo kehe enyolo ndika tali ya momadhiladhilo gandje, ohandi kala ndu uvite ndi na ekwatathano naJehova, ndi shi kutya onkalo yandje oku yi uvite ko shi vulithe punkene ndi yi uvite ko. Onda li wo nda mono ehekeleko olindji okuza kaamwatate naamwameme aaholike yopambepo megongalo lyopaKriste.   

“Nonando otandi kondjo nuukolele wandje, onkalo yandje noyomumwandje oya hwepopala. Molwaashoka Jehova oku li pamwe natse, otwi ilonga okukala hatu dhiladhila kiinima iiwanawa uuna tu na uupyakadhi. Jakob 5:11 ote tu shilipaleke ta ti: ‘Tse otatu ya tala aanelago, sho yi idhidhimike. One omu uvu eidhidhimiko lyaJob nomwa tseya, nkene Omuwa e mu kwatha pehulilo. Oshoka Omuwa oye omunesilohenda nomunalukeno.’” Jehova okwa li u uvite ko onkalo yaJob nawa, natse otatu vulu okukala nuushili kutya oku uvite ko uupyakadhi kehe tatu piti muwo.