Kalunga okwa lombwele Adam a ti: “Iiyimati yomuti ngoka ino yi lya; ngele oto shi ningi, oto si shili.” (Genesis 2:17) Andola elombwelo ndika inali kala tali ti sha, ngele Kalunga okwa li owala a shiti Adam nelalakano lyokukulupa nokusa. Adam okwa li e shi shi kutya ngele ina lya ko komuti ngono, ando ita si.

Adam naEva kaya li ya pumbwa okulya ko komuti ngoka opo ya kale nomwenyo, oshoka moshikunino moka ya li, omwa li omiti odhindji dhiiyimati. (Genesis 2:9) Aaihokani mboka yotango ando oya li inaaya lya ko komuti ngoka, andola oyu ulike kutya otaya vulika kwaaNgoka e ya pa omwenyo. Ando oya ulika wo kutya oye shi kutya Kalunga oye owala e na uuthemba woku ya lombwela shoka ye na okuninga.

Opo tu uve ko kutya omolwashike Adam naEva ya si, otwa pumbwa okukonakona oonkundathana ndhoka dhe tu guma atuheni. Satana Omuhindadhi okwa longitha eyoka li popye iifundja iinyanyalithi. Ombiimbeli otayi ti: “Eyoka olya li li na omakoto unene li vule iinamwenyo ayihe mbyoka Omuwa Kalunga e yi shiti. Eyoka olya pula omukiintu lya ti: ‘Kalunga okwe mu lombwele shili, mwaa lye komiti adhihe dhomeyana?’” — Genesis 3:1.

Eva okwa yamukula a ti: “Ohatu li iiyimati yomiti adhihe dhomeyana. Iiyimati yomuti ngoka gu li pokati kalyo, Kalunga okwe tu lombwele, twaaye yi lye tse twaa gume omuti; ngele tatu shi ningi, ota tu ka sa.” Opo ihe eyoka olye mu yamukula lya ti: “Itamu si shili. Oshoka Kalunga okwa tseya kutya uuna tamu li ko, omeho geni otaga tonata, one notamu fe Kalunga mokutseya uuwanawa nuuwinayi.” Kungawo, Satana okwa ti kutya Jehova omufundja nokali a halela aavali yetu yotango uuwanawa. — Genesis 3:2-5.

Eva okwi itaale shoka a uvu. Okwa tongolola omuti. Ogwa li gwo opala notagu etitha olwiho. Okwa toonona ko iiyimati yimwe, e ta li. Ombiimbeli oya gwedha ko tayi ti: “Okwa pe wo omulume, naye wo okwa li.” — Genesis 3:6.

Kasha li tuu sha yemateke Kalunga sho a mono oyana aaholike taya yonene owina! Okwa ningi po shike? Jehova okwa lombwele Adam a ti: ‘Oto ka shuna mevi moka wa kuthwa mo. Owa kuthilwe mevi nou na okushuna mevi.’ (Genesis 3:17-19) Oshizemo, “Adam okwa si e na omimvo 930.” (Genesis 5:5) Adam inaya megulu nenge kehala lilwe. Kali e na mpo e li manga Jehova inee mu shita okuza  montsi yevi. Onkee ano, sho a si, okwa ningi owala ontsi yevi moka a kuthilwe. Okwa hulu po. Itashi nikitha tuu oluhodhi!

Molwaashoka Adam naEva oya yonene owina, inaya kala we ya gwanenena noya kanitha omwenyo gwaaluhe. Oya tameke haya kulupa nohaya yono. Ihe okwaavulika kwawo kuKalunga inaku ya guma oyo ayeke. Oya taambekidha uulunde wawo koluvalo lwawo. Aaroma 5:12 otayi ti: “Uulunde owe etwa muuyuni komuntu gumwe [Adam], nuulunde we owe etelele eso. Onkee ano eso olya taandele maantu ayehe, oshoka ayehe oya yono.”

Ombiimbeli otayi popi uulunde neso kutya oyi li “esiikilo ndyoka tali kwidhidhike iigwana ayihe.” (Jesaja 25:7) Esiikilo ndika olya kwidhidhika aantu lya fa olwithi lwuuzigo moka aantu itaaya vulu okuza mo. Odhoshili kutya ‘aantu ayehe oye na okusa omolwuukumwe wawo naAdam.’ (1 Aakorinto 15:22) Omuyapostoli Paulus okwa pula ta ti: “Olye ta mangulula ndje molutu nduka talu etele ndje eso?” Opu na ngaa ngoka ta vulu oku shi ninga? — Aaroma 7:24.