1-2. Oohapu ndhoka dhi li mOmuuvithi 11:6, odha pambathana ngiini niilonga yokuuvitha?

MIILONGO yimwe, aantu ohaya kala ya halelela okwiilonga oshindji uuna yu uvithilwa onkundana ombwanawa. Iinima mbyoka hayi ilongo, oyo ya kala hayi ipula nayo uule wethimbo. Miilongo yilwe, aantu ihaya ulike naanaa ohokwe mu Kalunga nenge mOmbiimbeli. Aantu moshitopolwa sheni ohayi inyenge ngiini? Kutya nduno aantu oye na ohokwe nenge hasho, Jehova okwa tegelela tu tsikile nokuuvitha sigo ta ti kutya iilonga oya pwa.

² Peuthwathimbo lyaJehova, iilonga yokuuvitha otayi ka hula “notaku ya ihe ehulilo.” (Mat. 24:14, 36) Omanga ethimbo ndyoka inaali ya, ongiini tatu vulu okuvulika kelombwelo ndyoka tali ti: ‘Ino vululukitha iikaha yoye’? * — Lesha Omuuvithi 11:6.

3. Oshike tatu ka kundathana moshitopolwa shika?

³ Moshitopolwa sha zi ko, otwa kundathana iinima ine mbyoka twa pumbwa okuninga opo tu kale “aayuli yaantu” haya pondola. (Mat. 4:19) Oshitopolwa shika otashi ka kundathana omikalo ndatu ndhoka tadhi vulu oku tu kwathela tu kale twa tokola toko okuuvitha kutya nduno otwa taalela oonkalo dha fa peni. Otatu ki ilonga nkene sha simana (1) okukala twa pititha komeho iilonga yokuuvitha, (2) okukala aaidhidhimiki nosho wo (3) okukaleka eitaalo lyetu lya kola.

4. Omolwashike twa pumbwa okutsikila okugandja eitulomo kiilonga mbyoka Jehova e tu pa?

⁴ Jesus okwa lombwela aalongwa ye kutya aantu otaya ka kala ye na iikala yini nosho wo iiningwanima mbyoka tayi ka ningwa momasiku  gahugunina. Okwa li e shi kutya iinima mbyoka otashi vulika yi ka piyaganeke aalanduli ye kaaya gandje eitulomo kiilonga yokuuvitha. Okwa li a lombwele aalongwa ye ya kale ya ‘tonata.’ (Mat. 24:42) Pethimbo lyaNoa opwa li pu na iinima oyindji mbyoka ya li ya ningitha aantu kaaya gandje eitulomo kelondodho lye. Iinima mbyoka otayi vulu oku tu ningitha kaatu gandje eitulomo kelondodho lyaJehova nokunena. (Mat. 24:37-39; 2 Pet. 2:5) Onkee ano otwa hala okutsikila okugandja eitulomo kiilonga mbyoka Jehova e tu pa.

5. Okutamunuka mo kwiilonga yokuuvitha okwa hokololwa ngiini mIilonga 1:6-8?

⁵ Kunena otwa pumbwa lela okugandja eitulomo kokuuvitha onkundana ombwanawa yUukwaniilwa. Jesus okwa hunganeke kutya konima yeso lye, aalanduli ye otaya ka tsikila niilonga yokuuvitha, notaya ka ninga oshindji shi vulithe pwaashoka a longa. (Joh. 14:12) Konima sho Jesus a si, aalongwa ye yamwe oya shuna kiilonga yawo yokuyula oohi. Konima yeyumuko lye, okwa li a longo oshikumithalonga, sho a kwathele aalongwa ye ya yule oohi odhindji. Konima sho Jesus a longo oshikumithalonga shoka, okwa li a tsu omuthindo kutya iilonga yokuuvitha nokuninga aantu aalongwa, oyo ya simanenena yi vule kehe shimwe. (Joh. 21:15-17) Manga Jesus inaaya megulu, okwa lombwele aalongwa ye kutya iilonga yokuuvitha mbyoka a tameka otayi ka tamunuka mo notayi ka longwa muuyuni awuhe. (Lesha Iilonga 1:6-8.) Konima yomimvo, Jesus oku ulukile omuyapostoli Johannes emoniko kombinga yaashoka tashi ka ningwa “mesiku lyOmuwa.” * Memoniko ndyoka, Johannes okwa mono wo oshiningwanima shimwe oshikumithi, ano omuyengeli e na “oohapu dhelaka etoye lyaaluhe,” ndhoka dhi na okuuvithilwa aantu ‘yomihoko adhihe, omaludhi agehe, omalaka agehe niigwana ayihe.’ (Eh. 1:10; 14:6) Osha yela kutya Jehova kunena okwa hala tu kuthe ombinga miilonga yokuuvitha mbyoka tayi longwa muuyuni awuhe, sigo ya pu.

6. Ongiini tatu vulu okutsikila okupititha komeho iilonga yokuuvitha monkalamwenyo yetu?

 ⁶ Ngele otwa kala hatu dhiladhila kombinga yaashihe shoka Jehova e tu ningila, otashi ke tu kwathela tu tsikile okugandja eitulomo kiilonga yokuuvitha. Pashiholelwa, okupitila momupiya omudhiginini nomunandunge, Jehova ohe tu longekidhile iikulya yopambepo oyindji, ngaashi iileshomwa ya pilindwa, yopaelektronika, mbyoka ya kwatwa momawi, uuvidio nosho wo oopoloholama dhokepandja lyetu lyokointaneta. Dhiladhila kwaashika, kepandja lyetu lyokointaneta oku na omauyelele ge li momalaka ge vulithe 1 000. (Mat. 24:45-47) Mokati kaantu muuyuni omu na etopoko enene ndoka lye etithwa kopolotika nokomalongelokalunga. Oya topoka wo oshoka yamwe aayamba, yo yamwe oohepele. Ihe aapiya yaJehova ye vulithe pomamiliyona gahetatu, oya hangana shili ye li aamwayinathana muuyuni awuhe. Pashiholelwa mEtitano, 19 Apilili 2019, Oonzapo dhaJehova muuyuni awuhe odha li dha tala okavidio taka kundathana kombinga yenyolo lyesiku. Kongulohi yesiku ndyoka, aantu ye li 20 919 041 oya li ya gongala ya dhimbulukwe eso lyaJesus. Ohatu kala twa hala okutsikila okuuvitha onkundana ombwanawa yUukwaniilwa uuna tatu dhiladhila kuuthembahenda wokumona iiningwanima mbika iiwanawa tayi ningwa, nokukutha ombinga muyo.

7. Oshiholelwa shaJesus otashi tu kwathele ngiini tu kale twa pititha komeho iilonga yokuuvitha?

⁷ Omukalo gulwe tatu vulu okutsikila okupititha komeho iilonga yokuuvitha, omokulandula oshiholelwa shaJesus. Ka li nando e etha sha shi mu piyaganeke u uvithe onkundana ombwanawa. (Joh 18:37) Ka li a zimine sho Satana te mu pe “omapangelo agehe gomuuyuni nomasimano gago,” noka li e shi pitike sho yalwe ya li ya hala oku mu ninga omukwaniilwa. (Mat. 4:8, 9; Joh. 6:15) Ine etha a nwethwe mo kehalo lyiinima yopamaliko, noka li e etha omapataneko ga kwata miiti ge mu teye omukumo. (Luk. 9:58; Joh. 8:59) Ngele eitaalo lyetu tali yelekwa, otatu vulu okutsikila okupititha komeho iilonga yokuuvitha, ngele otwa dhimbulukwa omayele gomuyapostoli Paulus. Okwa li a ladhipike Aakriste ya landule oshiholelwa shaJesus, opo kaaya ‘kanithe omukumo nenge ya hulile ondjilakati.’ — Heb. 12:3.

8. Eidhidhimiko oshike, nomolwashike lya pumbwa unene tuu kunena?

⁸ Aantu aaidhidhimiki ohaya tegelele nengungumano, sigo onkalo ya lunduluka. Otwa pumbwa eidhidhimiko kutya nduno otwa tegelela onkalo yontumba yi lunduluke nenge twa tegelela egwanitho lyoshinima shontumba shoka twa hala shi ningwe. Omuhunganeki Habakuk okwa li a halelela elongithonkondo muJuda li hule. (Hab. 1:2) Aalongwa yaJesus oya li ya hala Uukwaniilwa waKalunga wu ‘ye mbala’ noya manguluke ko kepangelo lyaRoma. (Luk. 19:11) Natse otwa tegelela nondjuulukwe esiku ndyoka Uukwaniilwa waKalunga tawu ka hulitha po uukolokoshi kombanda yevi nokweeta uuyuni uupe moka tamu ka kala uuyuuki. (2 Pet. 3:13) Ihe nonando ongawo, otwa pumbwa okwiidhidhimika nokutegelela Jehova a katuke oonkatu peuthwathimbo lye. Natu ka tale komikalo dhimwe moka Jehova he tu longo tu kale aaidhidhimiki.

9. Iiholelwa yini tayi ulike kutya Jehova omwiidhidhimiki?

⁹ Jehova okwe tu tulila po oshiholelwa sha dhenga mbanda sheidhidhimiko. Okwa li a pe Noa ethimbo lya gwana a tunge onguluwato, noku kale “omuuvithi guuyuuki.” (2 Pet. 2:5; 1 Pet. 3:20) Jehova okwa li wo a pulakene neidhidhimiko kuAbraham sho a kala noku mu pula lwiikando shi na ko nasha netokolo lye lyokuhanagula po iilando yaSodom naGomorra, moka mwa li tamu longwa uukolokoshi. (Gen. 18:20-33) Uule womimvo odhindji, Jehova okwa kala ti idhidhimikile oshigwana, shaIsraeli, oshitangalali. (Neh. 9:30, 31) Eidhidhimiko lyaJehova olyi iwetikile kunena, sho a pa ayehe mboka ha hilile kuye, ethimbo “ye ethe uulunde wawo.” (2 Pet.  3:9; Joh. 6:44; 1 Tim. 2:3, 4) Oshiholelwa shaJehova otashi tu kwathele wo tu kale aaidhidhimiki sho tatu tsikile okuuvitha nokuninga aantu aalongwa. Jehova ote tu longo wo tu kale hatu idhidhimike, okupitila methaneko ndyoka li li mOohapu dhe.

10. Oshike tatu ilongo koshiholelwa shomunepya ngoka a popiwa muJakob 5:7, 8?

¹⁰ Lesha Jakob 5:7, 8. Oshiholelwa shomunepya otashi tu longo nkene tu na okukala aaidhidhimiki. Odhoshili kutya opu na iimeno yimwe mbyoka hayi mene mbala. Ihe iimeno oyindji, unene tuu mbyoka hayi imi iiyimati, ohayi kutha ethimbo nuule iiyimati yi pye nawa. Ethimbo lyokulonga omapya muIsraeli olya li hali kwata oomwedhi hamano. Aanamapya muIsraeli oya li haya kunu uuna omvula ya temuna petameko lyoshikufuthinge, noya li haya teya iikunomwa yawo pokwenye ngele omvula ya sheka. (Mark. 4:28) Natse otatu vulu okuholela eidhidhimiko lyaanamapya mboka. Ihe kashi shi oshipu oku shi ninga.

11. Eidhidhimiko lyetu otali ke tu kwathela ngiini miilonga yetu yokuuvitha?

¹¹ Aantu inaya gwanenena ohaya kala ya hala okumona nziya iizemo yiilonga yawo. Ihe ngele otwa hala oshikunino shetu shi mene nawa, otwa pumbwa oku shi longa nawa, oku shi kuna, oku shi helela noku shi tekela. Ngele otwa hala okuninga aantu aalongwa, natse otwa pumbwa okulonga nuudhiginini. Ohashi pula ethimbo okulonga aakonakonimbiimbeli yetu ya kale kaaye na okatongo noyu ulukile yalwe ohole. Eidhidhimiko lyetu otali ke tu kwathela kaatu teke omukumo uuna twa taalela oonkalo oondhigu. Uuna yalwe ye na ehalo lyokupulakena nokwiilonga ooshili dhOmbiimbeli, otu na okutsikila okukala aaidhidhimiki. Itatu vulu okuthiminika omukonakonimbiimbeli a kale e na eitaalo. Poompito dhimwe, naalongwa yaJesus kaya li yu uvite ko shoka a li te ya longo. (Joh. 14:9) Natu dhimbulukwe kutya tse otashi vulika tu kune nokutekela, ihe Kalunga oye ha kokitha oshimeno. — 1 Kor. 3:6.

12. Ongiini tatu vulu okuulika eidhidhimiko uuna tatu uvithile aakwanezimo yetu mboka kaaye shi ooitaali?

 ¹² Otashi vulu shi kale oshidhigu kutse okukala aaidhidhimiki, uuna tatu uvithile aakwanezimo yetu mboka kaaye shi Oonzapo. Ekotampango ndyoka tali adhika mOmuuvithi 3:1, 7, otali vulu oku tu kwathela. Otali ti: ‘Opu na ethimbo lyokumwena nethimbo lyokupopya.’ Eihumbato lyetu ewanawa otali vulu okukwathela aakwanezimo yetu ya kale ya hala okupulakena ketumwalaka lyOmbiimbeli. Ihe uuna pwa holoka ompito ombwanawa, otu na aluhe okukala twi ilongekidha tu ya longe kombinga yaJehova. (1 Pet. 3:1, 2) Otu na okuuvitha nokulonga aantu nehwamo, ihe natu kale aluhe hatu idhidhimikile aantu ayehe, mwa kwatelwa aakwanezimo yetu.

13-14. Iiholelwa yini yeidhidhimiko tatu vulu okulandula?

¹³ Otatu vulu okwiilonga eidhidhimiko kiiholelwa yaapiya yaJehova yopethimbo lyOmbiimbeli nosho wo kiiholelwa yopethimbo lyetu. Habakuk okwa li a halelela uukolokoshi wu hule, ihe oku ulike eidhidhimiko sho a ti: “Otandi londo koshungo, ndi tegelele.” (Hab. 2:1) Omuyapostoli Paulus okwa li a popi kutya okwa halelela “okutsakanitha” uukalele we. Ihe okwa tsikile ‘okuuvitha elaka etoye’ neidhidhimiko. — Iil. 20:24.

¹⁴ Natu ka tale koshiholelwa shaaihokani yamwe mboka ya pita Osikola yaGilead noya li ya tuminwa koshilongo hoka ku na aantu oyendji kaaye shi Aakriste. Oyendji yomuyo kaya li ye na ehalo lyokukonakona Ombiimbeli. Ihe yamwe mboka ya li ya hiti Osikola yaGilead pamwe nayo, noya li ya tuminwa kiilongo yilwe, oya li haye ya lombwele kombinga yaakonakonimbiimbeli yawo oyendji taya humu komeho. Nonando ongawo, aaihokani mbaka oya tsikile okuuvitha neidhidhimiko, nonando aantu oyendji kaya li ya hala okupulakena. Konima sho ya kala nokuuvithila moshilongo moka uule womimvo hetatu, pehulilo oya li ya nyanyukwa noonkondo sho gumwe gwomaakonakonimbiimbeli yawo a ninginithwa. Iiholelwa yopethimbo lyonale naambyoka yopethimbo lyetu, otayi tu longo shike? Ooitaali ayehe mbaka aadhiginini kaya li ya tyololoka nenge ya vululukithe iikaha yawo, na Jehova ote ke ya laleka nuuyamba omolweidhidhimiko lyawo. Natu “holeleni mbeyaka yi itaale noyi idhidhimike, sigo ya pewa shoka Kalunga e shi uvaneka.” — Heb. 6:10-12.

15. Omomukalo gumwe guni eitaalo hali tu kwathele tu kale twa tokola toko okuuvitha?

¹⁵ Otu na eitaalo metumwalaka ndyoka hatu uvitha, nomolwaashono tu na ehalo okuuvithila aantu oyendji ngaashi tashi vulika. Otwi inekela thiluthilu omauvaneko ngoka ge li mOohapu dhaKalunga. (Eps. 119:42; Jes. 40:8) Otwa mona nkene omauvaneko gOmbiimbeli taga gwanithwa pethimbo lyetu. Otwa mona wo nkene onkalamwenyo yaantu hayi hwepopala uuna ya tameke okutula miilonga omayele gOmbiimbeli. Uumbangi awuhe mboka ohawu tu shilipaleke kutya onkundana ombwanawa yUukwaniilwa oya pumbwa okuuvithilwa aantu ayehe.

16. Metsokumwe nEpisalomi 46:1-3, eitaalo lyetu muJehova nosho wo muJesus otali ke tu kwathela ngiini tu kale twa tokola toko tu tsikile okuuvitha?

¹⁶ Otu na wo eitaalo muJehova, ngoka e li Onzo yetumwalaka ndyoka hatu uvitha nosho wo muJesus, ngoka a langeka po e li Omukwaniilwa wuukwaniilwa we. (Joh. 14:1) Kutya nduno otwa taalela oonkalo dha fa peni, Jehova ota ka kala aluhe epopilongulu noonkondo dhetu. (Lesha Episalomi 46:1-3.) Shimwe ishewe, otwa tompwa kutya Jesus ota wilike iilonga yokuuvitha okuza megulu, ta longitha oonkondopangelo ndhoka Jehova e mu pa. — Mat. 28:18-20.

17. Gandja oshiholelwa shoka tashi ulike kutya omolwashike tu na okutsikila okuuvitha.

¹⁷ Eitaalo ohali tu kwathele tu kale tu na einekelo kutya Jehova ota ka yambeka oonkambadhala dhetu momikalo ndhoka omathimbo gamwe ihaatu kala twa tegelela. (Omuuv. 11:6) Pashiholelwa, kehe esiku aantu omayuvi ohaya  ende piitaafula nopuutemba wiileshomwa yetu. Mbela omukalo nguka gwokugandja uunzapo ohagu pondola ngaa? Osho lela. Mokafo kUukalele wetu wUukwaniilwa kaNovomba 2014, omwa li mu na oshitopolwa tashi popi kombinga yomunasikola omugundjuka wokounivesiti, ngoka a li a hala okunyola etotwahokololo kombinga yOonzapo dhaJehova. Ka li a vulu okumona Oshinyanga shUukwaniilwa, ihe okwa mono oshitaafula shi na iileshomwa kounivesiti yawo nokwa li a vulu okumona uuyelele mboka a li a hala. Mokweendela ko kwethimbo, okwa ningi Onzapo ya ninginithwa noku li ngashingeyi omukokolindjila gwondjigilile. Iimoniwa ya fa mbyoka ohayi tu tsu omukumo tu tsikile okuuvitha, molwaashoka ohayi ulike kutya opu na natango aantu oyendji mboka ya pumbwa okuuva etumwalaka lyUukwaniilwa.

18. Omolwashike tu na uushili kutya iilonga yokuuvitha Uukwaniilwa otayi ka pwa, ngaashi Jehova a hala?

¹⁸ Otatu vulu okukala nuushili kutya iilonga yokuuvitha Uukwaniilwa otayi ka hula pethimbo lyo opala. Ndhindhilika shoka sha li sha ningwa po pethimbo lyaNoa. Jehova okwa li u ulike kutya oku li Omudhiginini gwethimbo kaaku na we. Omimvo 120 manga Eyelu inaali ya, Jehova okwa li nale a tokola kutya otali ke ya uunake. Konima yomimvo odhindji, Jehova okwa lombwele Noa a tunge onguluwato. Uule womimvo 40 nenge tashi vulika 50 manga Eyelu inali ya, Noa okwa li a tsikile okulonga nuudhiginini iilonga mbyoka a pewa kuJehova. Nonando aantu kaya li ya pulakene kuye, okwa tsikile nokuuvitha etumwalaka lyelondodho sigo oosho Jehova e mu lombwele a fale iinamwenyo monguluwato. Opo nduno pethimbo lyo opala, “Omuwa okwa pata omweelo.” — Gen. 6:3; 7:1, 2, 16.

19. Oshike tashi ke tu ningilwa ngele otwa tsikile okukala itaatu vululukitha iikaha yetu?

¹⁹ Masiku Jehova ota ka hulitha po iilonga yokuuvitha, opo ihe ta hanagula po uuyuni waSatana, e te eta uuyuni uupe moka tamu ka kala aantu mboka haya vulika kuKalunga. Manga twa tegelela shoka shi ningwe, natu tsikile okuholela Noa, Habakuk nosho wo yalwe mboka inaaya vululukitha iikaha yawo. Natu kale twa pititha komeho iilonga yokuuvitha, hatu idhidhimike nokukaleka eitaalo lyetu muJehova nomomauvaneko ge lya kola.