1. Uunake tashi vulika shi kale oshidhigu okulongela Jehova?

SHO to dhiladhila, uunake hashi kala unene oshidhigu okulongela Jehova? Uuna wu na omaupyakadhi ogendji nenge uuna kuu na omaupyakadhi? Uuna tu li muupyakadhi ohashi kala oshipu kutse okwiinekela muJehova. Ihe ohatu ningi po shike uuna kaatu na omaupyakadhi monkalamwenyo yetu? Mbela omathimbo gamwe ohatu dhimbwa nkene sha simana okulongela Jehova? Jehova okwa li a londodha Aaisraeli kombinga yoshinima shoka. — Deut. 6:10-12.

2. Omukwaniilwa Asa okwa tula po oshiholelwa shini?

² Omukwaniilwa Asa oku li oshiholelwa oshiwanawa shomulumentu ngoka a li a katuka pandunge mokwiinekela thiluthilu muJehova. Ka li owala ha longele Jehova momathimbo omadhigu , ihe nomawanawa wo. Okuza petameko, Asa okwa kala i “itula mOmuwa, nuudhiginini.” (1 Aak. 15:14) Omukalo gumwe moka Asa a li u ulike uudhiginini we kuJehova, oosho a li a hulitha po elongelokalunga lyiifundja muJuda. Ombiimbeli otayi ti: “Okwa yonagula po iiyambelo yiikalunga nomahala giinonoma yuupagani, okwa kumagula po oongundhimanya dhiidhila e ta ke po iiyelekela yoshikalungakiintu Asheera.” (2 Ondjal. 14:3, 5) Okwa kutha yinakulu uuthembahenda wuuvalekele. Omolwashike mbela? Omolwaashoka okwa li ha ladhipike aantu ya longele oshimenka. — 1 Aak. 15:11-13.

3. Oshike tatu ka kundathana moshitopolwa shika?

³ Asa ka li owala a hanagula po iimenka. Okwa li wo a humitha komeho elongelokalunga lya yogoka nokwa li a kwathele aantu yomuJuda ya galukile kuJehova. Jehova okwa li a pe Asa nosho wo  oshigwana shaJuda ombili, uule wethimbo. * Uule womimvo omulongo sho Asa a li ta pangele, ‘opwa piti omimvo odhindji pwaa na iita.’ (2 Ondjal. 14:1, 4, 6) Moshitopolwa shika otatu ka kundathana nkene Asa a li a longitha ethimbo, sho pwa li pu na ombili. Opo nduno, otatu ka kundathana iiholelwa yAakriste yomethelemimvo lyotango mboka nayo ya li ya longitha nawa ethimbo sho pwa li pu na ombili. Hugunina otatu ka yamukula epulo ndika tali ti: Ngele oho kala moshilongo moka mu na emanguluko lyokulongela Kalunga, ongiini to vulu okulongitha nawa ethimbo ndyoka pu na ombili?

4. Shi ikolelela kOndjalulo ontiyali 14:2, 6, 7, Asa okwa li a longitha ngiini ethimbo lyombili?

⁴ Lesha 2 Ondjalulo 14:2, 6, 7. Asa okwa li a lombwele aantu kutya Jehova oye ‘te ya gamene noku ya shiga koombinga adhihe.’ Asa ka li ta dhiladhila kutya ethimbo ndyoka lyombili ethimbo lyokuthuwa po. Pehala lyaashono okwa li a tungu iilando, omadhingililokuma, ooshungo nomiyelo. Okwa li a lombwele aantu yomuJuda a ti: “Otatu pangele oshilongo.” Asa okwa li a hala okutya shike? Okwa li a hala okutya aantu oya li taya vulu okukala ya manguluka mevi ndyoka ya pewa kuKalunga, nokutunga kaapu na okupiyaganekwa kaatondi. Okwa li a ladhipike aantu ya longithe nawa ethimbo ndyoka lyombili.

5. Omolwashike Asa a li a koleke etangakwiita lye?

⁵ Asa okwa li wo a longitha ethimbo lyombili a koleke etangakwiita lye. (2 Ondjal. 14:8) Mbela shika osha hala okutya ka li i inekela muJehova? Hasho nando. Pehala lyaashono, Asa okwa li e shi kutya oshi li oshinakugwanithwa she e li omukwaniilwa, a kale a longekidhila oshigwana kehe shoka tashi vulika shi ka taalele monakuyiwa. Asa okwa li e shi kutya ombili ndjoka ya li muJuda pethimbo ndyoka kaya li tayi ka kalelela, nokwa li e li mondjila.

6. Aakriste yomethelemumvo lyotango oya li ya longitha ngiini ethimbo ndyoka pwa li pu na ombili?

⁶ Nonando Aakriste yomethelemumvo lyotango oya li haya hepekwa olundji, poompito dhimwe oya li wo haya kala ye na ombili. Ethimbo ndyoka oya li haye li longitha ngiini? Aalumentu naakiintu mbaka aadhiginini, oya li haya uvitha onkundana ombwanawa nopwaa na oluthuwo. MemboMbiimbeli lyIilonga oya popiwa kutya ‘oya kala ye na etilo lyOmuwa.’ Oya tsikile okuuvitha onkundana ombwanawa, shoka she ya ningitha ‘yi indjipale.’ Oshi iwetikile kutya Jehova okwa li a yambeke iilonga yawo yokuuvitha pethimbo ndyoka lyombili. — Iil. 9:26-31.

7-8. Paulus nooyakwawo oya li ya ningi po shike, sho ya mono ompito? Shiyelitha.

⁷ Aakriste yomethelemumvo lyotango oya li haya longitha ompito kehe yu uvithe onkundana ombwanawa. Pashiholelwa, sho Paulus a mono kutya muEfeso omu na aantu oyendji mboka ta vulu okuuvithila, okwa tokola okukala moshilando shoka, u uvithe nokuninga aantu aalongwa. — 1 Kor. 16:8, 9.

⁸ Paulus nAakriste yalwe oya li wo ya mono ompito yilwe yokuuvitha, sho ompata yefukaleko ya kandulwa po momumvo 49 E.N. (Iil. 15:23-29) Konima sho etokolo ndyoka lya tseyithilwa omagongalo, aalongwa oya longo nuudhiginini yu uvithe “oohapu dhOmuwa.” (Iil. 15:30-35) Oshizemo? Ombiimbeli otayi ti: “Omagongalo oga kolekelwa meitaalo nomwaalu gwooitaali ogwi indjipala esiku kehe.” —  Iil. 16:4, 5.

9. Miilongo oyindji kunena omu na emanguluko lyashike, notatu vulu okwiipula shike?

⁹ Miilongo oyindji kunena otu na emanguluko lyokuuvitha. Mbela oho zi moshilongo moka mu na emanguluko lyokulongela Kalunga? Ngele osho, ipula kutya ‘ohandi longitha ngiini emanguluko ndika?’ Momasiku ngaka gahugunina, ehangano lyaJehova olyi ipyakidhila noonkondo niilonga yokuuvitha noyokuninga aantu aalongwa, inaashi monika nando onale. (Mark. 13:10) Otu na oompito odhindji dhe tu egulukila miilonga mbika yokuuvitha.

10. Timoteus omutiyali 4:2, ote tu ladhipike tu ninge shike?

¹⁰ Ongiini to vulu okulongitha nawa ethimbo lyombili? (Lesha 2 Timoteus 4:2.) Mbela ito vulu okutala ngele ngoye nenge omukwanezimo, ota vulu okulonga oshindji miilonga yokuuvitha nenge nokuli a ninge omukokolindjila? Ngashingeyi halyo ethimbo lyokulalakanena iinima yopamaliko, oshoka iinima mbyoka itayi ka hupa puudhigu uunene. — Omayel. 11:4; Mat. 6:31-33; 1 Joh. 2:15-17.

11. Aauvithi yamwe oya ningi shike, opo ya vule okuuvithila aantu oyendji ngaashi tashi vulika?

¹¹ Aauvithi oyendji oyi ilonga elaka epe, opo ya vule okulonga yalwe kombinga yaJehova. Ehangano lyaJehova olya nyanyangidha iileshomwa oyindji mbyoka hayi tu kwathele tu uvithile aantu yomalaka gi ili nogi ili. Pashiholelwa, mo 2010, iileshomwa yetu oya li momalaka 500. Kunena, omwaalu ngoka ogwa konda pomalaka 1 000.

12. Aantu ohaya mono mo ngiini uuwanawa uuna taya pulakene ketumwalaka lyUukwaniilwa melaka ndyoka ya yama? Gandja oshiholelwa.

¹² Ohashi gumu ngiini aantu uuna yu uvu Oohapu dhaKalunga melaka ndyoka ya yama? Natu ka tale koshimoniwa shomumwameme gumwe ngoka a li a mono uuwanawa mOshigongi shoshitopolwa, shoka sha li sha ningwa moMemphis, Tennessee, shaAmerika. Oshigongi shoka osha li sha ningwa mOshikinyarwanda, elaka ndyoka hali popiwa unene moRwanda, Kongo (Kinshasa) naUganda. Konima yoshigongi, omumwameme ngoka ha popi Oshikinyarwanda, okwa ti: “Okuza sho nda tembukile koAmerika, konima yomimvo 17 ngashingeyi, shino osho oshikando shandje shotango ndu uvite ko nawa poshigongi.”  Osha yela kutya omumwameme ngoka okwa li a gumwa komutima, sho a pulakene oshigongi shoka melaka ndyoka a yama. Ngele oonkalo dhoye otadhi ku pitike, mbela ito vulu okwiilonga elaka lilwe, opo wu vule okukwathela yalwe moshitopolwa sheni? Mbela moshitopolwa shegongalo lyeni omu na aantu mboka haya kala unene ya manguluka okupopya melaka ndyoka ya yama? Okulonga kwoye nuudhiginini otaku ke ku etela enyanyu.

13. Aamwatate moRusia oya li ya longitha ngiini ethimbo sho ya li ye na emanguluko lyokuuvitha?

¹³ Haamwatate yetu ayehe ye na emanguluko lyokuuvitha. Miilongo yimwe aamwatate ihaya vulu okuuvitha ya manguluka, molwaashoka omapangelo miilongo mbyoka ogi indika iilonga yetu yokuuvitha. Pashiholelwa, natu taleni kaamwatate moRusia. Konima yokupatanekwa uule womimvo odhindji, muMaalitsa 1991, epangelo olye ya pitike ishewe ya kale haya gongala nokuuvitha. Pethimbo ndyoka, moRusia omwa li mu na aauvithi tayi ihilile 16 000. Konima yomimvo omilongo mbali, omwaalu gwaauvithi ogwa li gu vulithe 160 000. Osha yela kutya aamwatate mboka oya li ya longitha nawa ethimbo lyawo, sho ya li ye na emanguluko lyokuuvitha. Ihe ethimbo ndyoka inaali kalelela. Nonando onkalo yawo oya li ya lunduluka, shoka inashi ya teya omukumo kaaya kale taya longele Jehova nuulaadhi. Otaya tsikile okulongela Jehova nuudhiginini, ngaashi taya vulu.

14-15. Jehova okwa li a longitha ngiini oonkondo dhe a kwathele Asa?

¹⁴ Pethimbo lyaAsa, ethimbo lyombili kalya li lya kalelele. Pompito yimwe okwa li a taalelwa ketangakwiita enene lya za kuEtiopia, li na aakwiita ya konda pemiliyona limwe. Ondjayi yetangakwiita ndyoka, Sera, okwa li e na omukumo kutya etangakwiita lye otali ka sinda Juda. Ihe omukwaniilwa Asa ka li i inekela momwaalu gwetangakwiita lye, ihe omuKalunga ke, Jehova.  Asa okwa li a galikana a ti: “Ngashingeyi tu kwatha, Omuwa, Kalunga ketu, oshoka otwe ku inekela nomedhina lyoye twa piti mo, tu kondjithe ongundu ndjika onenenene.” — 2 Ondjal. 14:11.

¹⁵ Etangakwiita lyaEtiopia olya li li na aakwiita oyendji noonkondo, ihe Asa okwa li e shi kutya Jehova omunankondo nota vulu okukwathela oshigwana She. Jehova okwa li a kwathele oshigwana she, nosha li sha sindi etangakwiita lyaEtiopia. — 2 Ondjal. 14:8-13.

16. Otu shi shi ngiini kutya emanguluko ndyoka tu na itali kalelele?

¹⁶ Katu shi naanaa kutya oshike tashi ke tu ningilwa monakuyiwa, ihe otu shi kutya emanguluko ndyoka tu na ngashingeyi tu li aapiya yaJehova, itali kalelele. Dhimbulukwa kutya Jesus okwa hunganeka kutya momasiku gahugunina, aalongwa ye ‘otaya ka kala ye tondike kaantu ayehe.’ (Mat. 24:9) Sha faathana, omuyapostoli Paulus okwa ti kutya “ayehe mboka ya hala okulongela Kalunga nesimaneko muukumwe naKristus Jesus, otaa ka tidhaganwa.” (2 Tim. 3:12) Satana oku “udha ondjahi” notatu iningilile mo owala, ngele otatu dhiladhila kutya katu na siku tu ka gumwe kondjahi ye. — Eh. 12:12.

17. Omomikalo dhini eitaalo lyetu tashi vulika li ka makelwe?

¹⁷ Monakuyiwa yi li popepi, eitaalo lyetu otali ka makelwa. Masiku uuyuni otawu ka taalela “uudhigu inaawu kala ko nale okuza ketameko lyuuyuni sigo ongashingeyi.” (Mat. 24:21) Pethimbo ndyoka, aakwanezimo yetu otashi vulika ye ke tu pilukile po, niilonga yetu yokuuvitha otashi vulika yi ki indikwe. (Mat. 10:35, 36) Ngaashi Asa, mbela kehe gumwe gwomutse ota ka kala ngaa i inekela muJehova oye e tu kwathele noku tu gamena?

18. Shi ikolelela kAahebeli 10:38, 39, oshike tashi vulu oku tu kwathela tu vule okutaalela onakuyiwa?

¹⁸ Jehova okwa kala te tu longekidha tu vule okutaalela onakuyiwa, moku tu kwathela tu kale tu na uupambepo wa kola. Okwa langeka po “[omupiya, NW] omudhiginini nomunandunge” e tu pe “oondja pethimbo [lyo opala, NW]” opo tu tsikile okulongela Jehova nuudhiginini. (Mat. 24:45) Ihe kehe gumwe gwomutse oku na okulonga nuudhiginini a kale e na eitaalo lya kola muJehova. — Lesha Aahebeli 10:38, 39.

19-20. Shi ikolelela kOndjalulo yotango 28:9, omapulo geni twa pumbwa okwiipula, nomolwashike?

¹⁹ Ngaashi omukwaniilwa Asa, natse otwa pumbwa tu “konge Jehova.” (2 Ondjal. 14:4, NW;  15:1, 2) Ohatu tameke okukonga Jehova uuna twi ilongo kombinga ye nokuninginithwa. Ohatu ningi ashihe shoka tatu vulu tu koleke ohole yetu yokuhola Jehova. Opo tu mone kutya otatu shi enditha ngiini, otashi vulika tu na okwiipula tatu ti, ‘Mbela ohandi yi ngaa kokugongala pandjigilile?’ Pokugongala ohatu tsuwa omukumo kaamwatate naamwameme, opo tu vule okutsikila okulongela Jehova. (Mat. 11:28) Otashi vulika wo tu na okwiipula kutya ‘Mbela ohandi konakona ngaa Ombiimbeli paumwene pandjigilile?’ Ngele oho zi naanegumbo lyeni, ‘mbela oho itulile po ngaa ethimbo kehe oshiwike mu ninge elongelokalunga lyuukwanegumbo? Ngele oho zi megumbo ongoye awike, mbela oho itulile po ngaa ethimbo lyokukonakona Ombiimbeli ngaashi owala uukwanegumbo hawu ningi? Shimwe ishewe, mbela oho kutha ngaa ombinga pakuudha miilonga yokuuvitha noyokuninga aantu aalongwa?’

²⁰ Omolwashike twa pumbwa okwiipula omapulo ngono? Ombiimbeli otayi ti kutya Jehova oha konakona omadhiladhilo getu naashoka shi li momitima dhetu, onkee natse otu na okuninga sha faathana. (Lesha 1 Ondjalulo 28:9.) Ngele otwa ndhindhilike kutya otwa pumbwa okulundulula omalalakano getu, iikala yetu nenge okudhiladhila kwetu, otwa pumbwa okupula Jehova e tu kwathele tu ninge omalunduluko ngoka. Ngashingeyi olyo ethimbo tu ilongekidhile omayeleko ngoka tatu ki iyadha mugo monakuyiwa. Ino etha nando osha shi ku imbe wu longithe nawa ethimbo lyombili.