1. Jesus okwa li a hiya aalumentu aayuli yoohi yane ya ninge shike, noya li yi inyenge ngiini?

AALONGWA yaJesus ngaashi Petrus, Andreas, Jakob naJohannes, oya li ye na oongeshefa dhokuyula oohi. Dhiladhila owala kunkene ya li yu uvite sho yu uvu Jesus te ya lombwele ta ti: “Landulii ndje, ngame otandi mu ningi aayuli yaantu.” * Mbela oya li ya ningi po shike? Ombiimbeli otayi ti: “Mbalambala oye etha iiyulitho yawo, noye mu landula.” (Mat. 4:18-22) Etokolo ndyoka olya li tali ka lundulula onkalamwenyo yawo sigo aluhe. Pehala lyokukala taya yulu oohi dho dhenedhene, oya li taya ka ninga ‘aayuli yaantu.’ (Luk. 5:10) Kunena Jesus ota hiya aantu mboka ye na omitima omiwanawa noye hole oshili, ya ninge sha faathana. (Mat. 28:19, 20) Mbela owa taamba ko ngaa ehiyo lyaJesus lyokuninga omuyuli gwaantu?

2. Omolwashike tu na okutala ko etokolo lyetu lyokuninga aayuli yaantu li li oshinima sha simana, noshike tashi ke tu kwathela tu katuke onkatu ndjono?

² Otashi vulika wa konakona Ombiimbeli uule wethimbo, nowa ninga omalunduluko monkalamwenyo yoye. Ihe ngashingeyi owa pumbwa okutokola ngele oto ningi omuuvithi gwonkundana ombwanawa nenge hasho. Ngele oto kakadhala okutaamba ko ehiyo lyaJesus, ino teka omukumo. Okukakadhala kwoye otashi vulika taku ulike kutya owa tala ko etokolo ndyoka li li oshinima sha simana noonkondo. Odhoshili kutya Ombiimbeli oya ti Petrus nooyakwawo oya thigi po oonete dhawo “mbalambala.” Ihe nonando ongawo, Petrus nomumwayinamati kaya li ya ningi etokolo ndyoka inaaya dhiladhila muule. Manga inaaya ninga etokolo ndyoka, opwa adhika nale pwa pita oomwedhi hamano okuza sho  ya tseya Jesus, noku mu taamba ko e li Mesiasa. (Joh. 1:35-42) Sha faathana, nangoye otashi vulika wi longa oshindji kombinga yaJehova naJesus nowa hala okuninga ehumokomeho pambepo. Ihe ino ninga etokolo ndyoka inoo dhiladhila muule kombinga yaashihe shoka sha kwatelwa mo. Oshike sha li sha kwathele Petrus, Andreas nosho wo yalwe ya taambe ko ehiyo lyaJesus?

3. Omaukwatya geni taga vulu oku ku kwathela wu kale wu na ehalo shi vulithe nale wu taambe ko ehiyo lyaJesus?

³ Aalongwa yotango yaJesus oya li ye na ehalo, ye shi nawa okugwanitha po oshilonga shawo, aalaadhi, noye na eipangelo. Kapu na omalimbililo kutya omaukwatya agehe ngoka oga li ge ya kwathele ya pondole mokuuvitha onkundana ombwanawa. Oshitopolwa shika otashi ka kundathana nkene tatu vulu okukokeka omaukwatya ngoka, opo tu vule okupondola miilonga yokuuvitha noyokuninga aantu aalongwa.

4. Omolwashike Petrus a li omuyuli gwoohi?

⁴ Petrus okwa li ha yulu oohi, opo a yambidhidhe uukwanegumbo we, ihe iilonga mbyoka ka li owala e yi tala ko yi li omukalo gwokwiikongela omboloto. Petrus okwa li lela e hole okuyula oohi. (Joh. 21:3, 9-15) Okwi ilongo wo okukala e hole iilonga yokuyula aantu. Kekwatho lyaJehova, Petrus okwa pondola miilonga mbyoka. — Iil. 2:14, 41.

5. Shi ikolelela kuLukas 5:8-11, omolwashike Petrus a li a tila, noshike tashi vulu oku tu kwathela tu sinde omaiyuvo ga tya ngawo?

⁵ Etompelo lyetu lya simanenena ndyoka hali tu inyengitha tu uvithe, ohole yetu yokuhola Jehova. Ohole yetu yokuhola Jehova otayi ke tu kwathela tu lombwele yalwe kombinga ye, nonando otashi vulika tu kale tu uvite twa fa inaatu gwana oku ya uvithila. Sho Jesus a hiya Petrus a ninge omuyuli gwaantu, okwe mu lombwele a ti:  “Ino tila.” (Lesha Lukas 5:8-11.) Petrus ka li e na uumbanda waashoka tashi vulika shi ke mu ningilwe ngele okwa ningi omulongwa gwaJesus. Pehala lyaashono, okwa li a kuminwa oshikumithalonga shoka Jesus a ningi, sho e ya kwathele ya kwate oohi odhindji, noka li u uvite a gwana okulonga pamwe naye. Nangoye otashi vulika wu kale wu uvite ngaashi Petrus. Otashi vulika wu kale wa limbililwa uuna to dhiladhila kwaashihe shoka sha kwatelwa mo mokukala omulongwa gwaKristus. Ngele osho, koleka ohole yoye yokuhola Jehova, Jesus nosho wo aantu ooyakweni, noto ka kala wa halelela okutaamba ko ehiyo lyaJesus lyokuninga omuyuli gwaantu. — Mat. 22:37, 39; Joh. 14:15.

6. Omolwomatompelo gamwe geni hatu kala twa hala okuuvitha?

⁶ Natu ka taleni komatompelo galwe kutya omolwashike hatu kala tu na ehalo lyokuuvitha. Otwa hala okuvulika kelombwelo lyaJesus ndyoka tali ti: ‘Indeni, ka ningeni aantu aalongwa.’ (Mat. 28:19, 20) Ohatu uvitha wo molwaashoka aantu oyendji oya “hepekwa noya loloka” noya halelela okwiilonga oshili kombinga yUukwaniilwa. (Mat. 9:36) Jehova okwa hala aantu ayehe ya tseye oshili, noya hupithwe. — 1 Tim. 2:4.

7. Aaroma 10:13-15, otaya ulike ngiini kutya iilonga yokuuvitha oya simana?

⁷ Uuna tatu dhiladhila nkene iilonga yokuuvitha hayi vulu okukwathela aantu, otatu ka kala twa halelela oku yi longa. Mepingathano naayuli yoohi mboka haya yulu oohi ye ke dhi landithe po nenge ye ke dhi lye po, tse ohatu ‘yulu’ aantu, ano hatu ya ningi aalongwa, nelalakano lyokuhupitha oomwenyo dhawo. — Lesha Aaroma 10:13-15; 1 Tim. 4:16.

8-9. Omuyuli gwoohi okwa pumbwa okukala e shi shike, nomolwashike?

⁸ Pethimbo lyaJesus, omuyuli gwoohi Omuisraeli okwa li e na okukala e shi kutya oohi dholudhi luni ta vulu okuyula. (Lev. 11:9-12) Okwa li wo e na okukala e shi kutya opehala lini ta vulu okwaadha oohi ndhoka. Olundji oohi ohadhi kala pehala mpoka pu na omeya tage dhi opalele, nopu na iikulya ya gwana. Mbela ethimbo ndyoka omuyuli ha ka kwata oohi olya simana ngaa? Omutumwa gumwe ngoka a li ha zi kokantuntu ke li mEfuta lya Mwena, okwa li i longo kutya opu na ethimbo ewanawa nokuyula oohi. Sho Onzapo yimwe yomoshitopolwa ya li ye mu hiya ya ka yule oohi, omutumwa ngoka okwe mu lombwele a ti: “Otatu tsakanene ongula potundi ontimugoyi.” Omumwatate okwe mu yamukula a ti: “Kandi wete wu uvite ko kaya. Otu na okuya pethimbo ndyoka ewanawa nokukwata oohi, ihe hapethimbo ndyoka tali tu opalele.”

⁹ Sha faathana, aalongwa yaJesus mboka ya ningi aayuli yaantu, oya li haya yi pomahala mpoka pwa li ha pu kala aantu, nopethimbo ndyoka haya kala po. Pashiholelwa, oya li hayu uvithile motempeli, mosinagoga, egumbo negumbo, nopomahala gomalandithilo. (Iil. 5:42; 17:17; 18:4) Natse wo otu na okukala tu shi omikalondjigilile dhaantu mboka haya zi moshitopolwa moka egongalo lyetu hali uvithile. Otwa pumbwa okukala hatu tifuka noku ku uvithila pehala nopotundi ndjoka tashi vulika tu tsakanene naantu oyendji. — 1 Kor. 9:19-23.

10. Ehangano lyaJehova olye tu pa iilongitho yini?

¹⁰ Omuyuli gwoohi okwa pumbwa okukala e na iilongitho tayi opalele noku shi oku yi longitha. Natse wo otwa pumbwa okukala tu na iilongitho tayi opalele uuna tatu ku uvitha. Otwa pumbwa wo okukala tu shi oku yi longitha. Jesus okwa lombwela aalanduli ye nkene ye na okuuvitha onkundana ombwanawa. Okwe ya lombwela shoka ye na okufaalela, mpoka ye na oku ka uvithila naashoka ye na oku ka popya. (Mat. 10:5-7; Luk. 10:1-11) Kunena ehangano lyaJehova olye tu longekidhila Okaketha kiilongitho yokulonga aantu, hoka hake tu kwathele tu pondole miilonga  yetu yokuuvitha. * Ohatu longwa wo nkene tu na okulongitha iilongitho mbyoka. Edheulo ndyoka ohali tu kwathele tu kale tu na omukumo notu kale tu na ontseyo ndjoka twa pumbwa opo tu pondole miilonga yetu. — 2 Tim. 2:15.

11. Omolwashike aayuli yaantu ye na okukala aalaadhi?

¹¹ Aayuli yoohi oya pumbwa okukala aalaadhi. Omathimbo gamwe uuna ye li mefuta, ohayi iyadha moonkalo oondhigu. Olundji ohaya longo uusiku nosho wo momafuta moka hamu tukuka iikungulu. Aayuli yaantu nayo oya pumbwa uulaadhi. Uuna twa tameke okuuvitha noku shi ulika kutya tse Oonzapo dhaJehova, otashi vulika tu patanekwe kaapambele yetu, tu shekwe kaatseyikile, naantu yamwe otashi vulika ya tinde okupulakena ketumwalaka lyetu. Ihe shoka itashi ke tu kumitha. Jesus okwa li a londodha aalanduli ye kutya otaya ka uvithila aantu mboka taye ke ya pataneka. — Mat. 10:16.

12. Metsokumwe naJosua 1:7-9, oshike tashi vulu oku tu kwathela tu kale tu na uulaadhi?

¹² Ongiini to vulu okukala omulaadhi shi vulithe nale? Shotango, kala wa tompwa kutya Jesus ota tsikile okuwilika iilonga yokuuvitha okuza megulu. (Joh. 16:33; Eh. 14:14-16) Oshikwawo, koleka eitaalo lyoye meuvaneko lyaJehova kutya ote ke ku sila oshimpwiyu. (Mat. 6:32-34) Sho eitaalo lyoye tali ende tali kolo, oto ka kala wo wu na uulaadhi shi vulithe nale. Petrus nooyakwawo, oyu ulike kutya oye na eitaalo lya kola, sho ya thigi po iilonga yawo yokuyula oohi, e taya landula Jesus. Sha faathana, nangoye owa ulika  eitaalo lya kola, sho wa lombwele aantu mboka wu shi nosho wo aakwanezimo yoye kutya oto konakona Ombiimbeli nOonzapo dhaJehova noho yi kokugongala. Kapu na omalimbililo kutya owa ninga omalunduluko omanene meihumbato lyoye nomonkalamwenyo yoye, opo wu kale metsokumwe nomithikampango dhaJehova dhi li pauyuuki. Okuninga ngawo nako otaku pula uulaadhi. Sho to ende to kokeke uulaadhi woye, oto vulu okukala nuushili kutya ‘Omuwa Kalunga koye, oku li pungoye shaa nkoka to yi.’ — Lesha Josua 1:7-9.

13. Okutedhatedha nokugalikana otaku vulu oku ku kwathela ngiini wu kale wu na uulaadhi?

¹³ Ongiini ishewe to vulu okukala wu na uulaadhi? Omokukala ho galikana. (Iil. 4:29, 31) Jehova ota ka yamukula omagalikano goye, noke na esiku e ku ekelehi. Okwi ilongekidha aluhe e ku ambidhidhe. Shimwe ishewe, oto vulu okutedhatedha kunkene Jehova a li a hupitha yalwe monakuziwa. Dhiladhila wo kunkene e ku kwathele wu sinde omashongo, nankene e ku pe oonkondo wu vule okuninga omalunduluko monkalamwenyo yoye. Odhoshili kutya Ngoka a li a kwathele aapiya ye ya taaguluke Efuta Etiligane, ota vulu oku ku kwathela wo wu ninge omulongwa gwaKristus. (Eks. 14:13) Kala wu na eitaalo muJehova ngaashi omupisalomi ngoka a ti: “Omuwa oku li pamwe nangame, onkee itandi tila sha; aantu otaa ningi ndje shike?” — Eps. 118:6.

14. Oshike to ilongo koshimoniwa shaMasae noshaTomoyo?

¹⁴ Omukalo gulwe to vulu okukala wu na uulaadhi, omokwiilonga kombinga yankene Jehova a li kwathele aantu mboka ye na oohoni, e ta yi ilongo okukala ye na uulaadhi. Natu ka taleni koshimoniwa shomumwameme gwedhina Masae. Okwa li e na oohoni nokwa li u uvite kutya ita vulu okugandja uunzapo womontaneho kombinga yeitaalo lye. Okupopya naantu mboka kee ya shi, kuye okwa li owala kwa fa ekuma eleeleeka, ndyoka a li itaala kutya ke na siku e li londe. Okwa ningi oonkambadhala a kokeke ohole ye yokuhola Kalunga nosho wo aantu ooyakwawo. Okwa dhiladhila kombinga yankene etumwalaka lyetu lye endelela nokwa galikana a pewe oonkondo, opo a vule okuuvitha. Okwa sindi uumbanda mboka a li e na, e ta ningi omukokolindjila gwondjigilile. Jehova ota vulu wo okukwathela aauvithi aape ya kale yi “ikolelela,” nenge tu tye ye na uulaadhi. Dhiladhila koshimoniwa shomumwameme Tomoyo. Sho a tameke okuuvitha egumbo negumbo, omunegumbo ngoka u uvithile tango okwe mu ganda a ti: “Inandi hala okupopya nOonzapo dhaJehova,” nokwa dhenge po omweelo. Tomoyo okwa lombwele nuulaadhi ngoka a li ta longo pamwe naye a ti: “Owu uva ko ngaa? Nonando inandi popya sha, okwa li nale e shi kutya ngaye Onzapo yaJehova. Onda nyanyukwa noonkondo.” Tomoyo ngashingeyi omukokolindjila gwondjigilile.

15. Eipangelo oshike, nomolwashike lya simana kAakriste?

¹⁵ Aayuli yoohi mboka haye shi pondola, oye na eipangelo. Eipangelo oshike? Olyo “uukwatya wokwiiyila mo mwene, wu ninge shoka wu na okuninga.” Aayuli yoohi oye na okukala ye na eipangelo, opo ya penduke ongula onene, ya longe iilonga yawo sigo ya pu, noya pule komeho nonando onkalo yombepo kayi li nawa. Natse wo otwa pumbwa eipangelo opo tu idhidhimike notu mane iilonga yetu. — Mat. 10:22.

16. Ongiini tatu vulu okukala tu na eipangelo?

¹⁶ Inatu valwa tu na eipangelo. Mepingathano naashono, otu na egamo lyokuninga owala shoka oshipu kutse. Ihe iinima mbyoka ya simanenena, haaluhe hayi kala iipu kutse okuninga. Onkene otwa pumbwa okwiidheula tu ninge iinima mbyoka tashi vulika yi kale tayi monika iidhigu. Jehova ohe tu pe ekwatho okupitila mombepo  ye ondjapuki, tu vule oku yi ninga. — Gal. 5:22, 23.

17. Ngaashi sha popiwa mAakorinto yotango 9:25-27, Paulus okwa ti kutya okwa li e na okuninga shike, opo a kale e na eipangelo?

¹⁷ Omuyapostoli Paulus okwa li e na eipangelo. Ihe okwa zimine kutya okwa li e na ‘okukolondeka’ olutu lwe, opo a vule okulonga shoka shi li mondjila. (Lesha 1 Aakorinto 9:25-27.) Okwa li a ladhipike yalwe ya kale ye na eipangelo, noya ninge iinima ayihe “palandulathano nopamukalo omwaanawa.” (1 Kor. 14:40) Otwa pumbwa okukala tu na eipangelo, opo tu tsikile okulongela Jehova, shoka sha kwatela mo okukutha ombinga pandjigilile miilonga yokuuvitha. — Iil. 2:46.

18. Oshike tashi ka ningitha Jehova a kale e tu tala ko twa pondola miilonga yokuuvitha?

¹⁸ Omuyuli gwoohi okwa li owala ha pondola ngele a kwata oohi odhindji. Mepingathano naashono, okupondola kwetu miilonga yokuuvitha inaku ikolelela komwaalu gwaantu mboka twa kwathela ye ye mehangano lyaJehova. (Luk. 8:11-15) Ngele otwa tsikile okwiidhidhimika miilonga yokuuvitha onkundana ombwanawa nokulonga aantu, nena otatu ka kala twa pondola momeho gaJehova. Omolwashike mbela? Oshoka otatu vulika kuye nosho wo kOmwana. — Mark. 13:10; Iil. 5:28, 29.

19-20. Omolwetompelo lini lya gwedhwa po tu na okuuvitha ngashingeyi?

¹⁹ Miilongo yimwe, okuyula oohi okwa pitikwa owala moomwedhi dhontumba. Miilongo mbyoka, omuyuli gwoohi otashi vulika a kale u uvite tu ulumikwa a yule oohi sho oomwedhi dhokuyula oohi dhi li pokupwa ko. Tu li aayuli, etompelo limwe ishewe lya gwedha po lyokuuvitha twa mana ngashingeyi olyo kutya ehulilo lyuuyuni mbuka otali hedha popepi. Ethimbo ndyoka lya thigala ko miilonga mbika yokuhupitha oomwenyo dhaantu, eshona noonkondo. Ino kakadhala nenge wu kale wu uvite kutya owa pumbwa okutegelela ethimbo tali opalele, opo nawa wu kuthe ombinga miilonga mbika ya simanenena. — Omuuv. 11:4.

²⁰ Katuka oonkatu ngashingeyi wu kale wu na ehalo lyokuninga omulongwa gwaKristus, wi ilonge oshindji kombinga yetumwalaka lyOmbiimbeli, nowu kale wu na uulaadhi neipangelo. Wayimina aayuli yaantu ye vulithe pomamiliyona gahetatu, noto ka mona enyanyu ndyoka hali zi kuJehova. (Neh. 8:10) Kala wa tokola toko wu kuthe ombinga miilonga yokuuvitha ngaashi tashi vulika, sigo ya pu. Oshitopolwa tashi landula otashi ka kundathana omikalo ndatu ndhoka tadhi vulu oku tu kwathela tu kale twa tokola toko okutsikila okuuvitha onkundana ombwanawa yUukwaniilwa tu li aayuli yaantu.