1. Jehova okwa pitika tu ninge shike?

JEHOVA okwe tu pitika tu tokole shoka twa hala okuninga monkalamwenyo. Ohe tu longo nkene tu na okuninga omatokolo omawanawa, nohe tu kwathele tu pondole, uuna tatu ningi omatokolo ngoka a hokwa. (Eps. 119:173) Onkee ano, uuna tatu tula miilonga omayele gopandunge ngoka twi ilonga mOmbiimbeli, otatu ka ninga omatokolo omawanawa. — Heb. 5:14.

2. Omashongo geni hashi vulika tu tsakaneke konima yokuninga etokolo?

² Nokuli nuuna twa ninga omatokolo gopandunge, otashi vulika shi kale oshidhigu okuhulitha shoka twa tameka. Natu tale kiiholelwa yimwepo: Omumwatate omugundjuka okwa tokola okulesha Ombiimbeli ayihe. Okwa kala te shi ningi uule wiiwike yontumba, ihe lwanima okwe shi etha po, omolwetompelo lyontumba. Omumwameme gumwe okwa tokola okuninga omukokolindjila gwondjigilile, ihe okwa kala ta kakadhala okutameka. Olutu lwaakuluntugongalo olwa tokola lu kale halu ningi omatalelopo guusita, ihe opwa piti oomwedhi odhindji inaalu ninga po sha. Oonkalo ndhoka odha yoolokathana, ihe mudho omu na sha sha faathana. Omatokolo ngoka oga li ga ningwa, ihe inaga tulwa miilonga. Aakriste mboka ya li ko omimvo 2 000 nasha dha ka pita muKorinto, oya li ya taalela uupyakadhi wa fa mboka. Natu ka taleni shoka tatu ilongo kuyo.

3. Etokolo lini Aakorinto ya li ya ningi, ihe oshike sha ningwa po?

³ Lwomomumvo 55 E.N., Aakriste yomuKorinto oya li ya ningi etokolo lya simana. Oya uvu kutya aamwahe yomuJerusalem naJudea, otaya mono iihuna noye niwe koluhepo. Oya uvu wo kutya omagongalo galwe, oga li taga gongele iimaliwa ge ya kwathele. Molwaashono Aakorinto oya li ye na olukeno nohaya gandja, oya li ya tokola oku ya kwathela noya pula omuyapostoli Paulus nkene ye na oku shi ninga. Okwa tumu omalombwelo kegongalo  lyawo nokwa hogolola Titus oye a ka gongele iimaliwa. (1 Kor. 16:1; 2 Kor. 8:6) Ihe konima yoomwedhi dhontumba, Paulus okwa uvu kutya inaye shi ninga. Oshizemo, omagano gawo otashi vulika ga li inaaga longekidhwa pethimbo, opo ga falwe kuJerusalem pamwe nomayambidhidho gomagongalo galwe. — 2 Kor. 9:4, 5.

4. Paulus okwa li a ladhipike Aakorinto ya ninge shike, mAakorinto aatiyali 8:7, 10, 11?

⁴ Aakorinto oya li ya ningi etokolo ewanawa, na Paulus okwa li e ya pandula, omolweitaalo lyawo lya kola nosho wo ehalo lyawo lyokugandja. Okwa li wo e na oku ya ladhipika ya mane oshilonga shoka ya tameka. (Lesha 2 Aakorinto 8:7, 10, 11.) Oshimoniwa shawo otashi tu kwathele tu mone kutya nokuli nAakriste aadhiginini, otashi vulika shi kale oshidhigu kuyo okutula miilonga etokolo ewanawa ndyoka ya ninga.

5. Omapulo geni tatu ka yamukula?

⁵ Ngaashi Aakorinto, natse otashi vulika tu mone oshidhigu okutula miilonga omatokolo getu. Omolwashike? Otashi vulika tu kakadhale, omolwokwaagwanenena. Nenge tashi vulika oonkalo inaadhi tegelelwa dhi shi ninge oshidhigu kutse tu tule miilonga omatokolo getu. (Omuuv. 9:11; Rom. 7:18) Ongiini tatu vulu okutalulula etokolo lyetu nokutala ngele otwa pumbwa oku li lundulula? Ongiini tatu vulu okukala nuushili kutya otatu ka mana shoka twa tameka?

6. Uunake tashi vulika twa pumbwa okulundulula omatokolo getu?

⁶ Omatokolo gamwe ga simana katu na oku ga lundulula nando. Pashiholelwa, ohatu dhiginine etokolo lyetu lyokulongela Jehova, notwa tokola okukala aadhiginini kookuume ketu kopandjokana. (Mat. 16:24; 19:6) Nonando ongawo, omatokolo galwe otashi vulika ga kale ga pumbwa okulundululwa. Omolwashike? Omolwaashoka oonkalo ohadhi lunduluka. Oshike tashi vulu oku tu kwathela tu ninge omatokolo omawanawa?

7. Otu na okugalikana tu pewe shike, nomolwashike?

⁷ Galikana wu pewe oondunge. Jehova okwa nwetha mo Jakob a nyole ta ti: “Ngele oku na gumwe gwomune a pumbwa oondunge, ne dhi indile kuKalunga, oye note dhi mu pe. Oshoka Kalunga ke shi omundalapata, ihe oha pe ayehe.” (Jak. 1:5) Poompito dhimwe, atuheni ohatu kala twa “pumbwa oondunge.” Onkee ano, inekela Jehova uuna to ningi etokolo nuuna to li talulula. Opo ihe, Jehova ote ke ku kwathela wu ninge omatokolo gopandunge.

8. Omapekapeko geni tu na okuninga, manga inaatu ninga omatokolo?

⁸ Ninga omapekapeko gomuule. Konga omayele mOohapu dhaKalunga, lesha iileshomwa yehangano lyaJehova nokupopya naantu mboka to vulu okwiinekela. (Omayel. 20:18) Osha simanenena okuninga omapekapeko ngoka, manga inoo tokola okulundulula iilonga yoye, inoo tembuka nenge inoo hogolola elongo ndyoka tali ke ku kwathela wu mone iilonga mbyoka tayi ku pe okamaliwa ka gwana wu ikwathele nowu tsikile okulongela Jehova.

9. Uuwanawa wuni tatu ka mona, ngele otu li aanashili?

⁹ Talulula omainyengotompelo goye. Omainyengotompelo getu otaga ti sha kuJehova. (Omayel. 16:2) Okwa hala tu kale aanashili miinima ayihe. Onkee ano, uuna tatu ningi omatokolo, inatu hala twi ifundjaleke nosho wo ooyakwetu kombinga yaashoka tashi tu inyengitha. Otashi vulu okukala oshidhigu okudhiginina omatokolo getu, ngele katu shi aanashili thiluthilu. Pashiholelwa, omumwatate omugundjuka otashi vulika a tokole okuninga omukokolindjila gwondjigilile. Ihe konima yethimbo, osha kala oshidhigu kuye okugwanitha po oowili ndhoka dha tegelelwa, noina kala we ha nyanyukilwa uukalele we. Otashi vulika a li e wete kutya etompelo lye lya simanenena lyokukokola ondjila, olyo okunyanyudha Jehova. Ihe paushili wo wene, otashi  vulika a li a hala okunyanyudha aavali ye nenge omuntu gwontumba.

10. Opo omuntu a ninge omalunduluko, oshike a pumbwa okuninga?

¹⁰ Dhiladhila kombinga yomukonakonimbiimbeli ngoka a tokola okweetha po okuhila omakaya. Okwe ga etha po uule woshiwike nenge iyali, nonando osha li oshidhigu kuye, ihe konima yethimbo okwe ga tameke ishewe. Lwanima, okwa ka pondola! Ohole ye yokuhola Jehova nokukala a hala oku mu nyanyudha oye mu kwathele a sinde omukalondjigilile ngoka. — Kol. 1:10; 3:23.

11. Omolwashike twa pumbwa okukala tu na omalalakano gokondandalunde?

¹¹ Kala wu na omalalakano gokondandalunde. Ngele owu na omalalakano gokondandalunde, nena oto ka vula oku ga adha. Pashiholelwa, otashi vulika wa tokola okukala ho lesha Ombiimbeli shi vulithe nale. Ngele ino itulila po elandulathano lyoku shi ninga, otashi vulika kuu shi ninge. * Nenge tashi vulika aakuluntugongalo ya tokole okukala haya ningi omatalelopo guusita shi vulithe nale, ihe lwanima inaye shi tula we miilonga. Opo ya pondole, oye na okwiipula omapulo ngaashi: “Mbela otwa ndhindhilika ngaa aamwatate naamwameme mboka ya pumbwa okukala haya talelwa po shi vulithe nale? Mbela otwi itulila po ngaa ethimbo lyokondandalunde tu ya talele po?”

12. Oshike tashi vulika twa pumbwa okuninga, nomolwashike?

¹² Kala wu na ondjele. Kapu na omuntu e na ethimbo lya gwana, iiniwe nenge oonkondo dhokuninga ayihe mbyoka a hala okuninga. Onkene, otwa pumbwa okukala tu na etaloko ewanawa nosho wo ondjele. Uuna sha pumbiwa, omathimbo gamwe otashi vulika wu na okulundulula etokolo ndyoka wa mona kutya ito vulu we oku li gwanitha po. (Omuuv. 3:6) Natu tye nduno owa talulula etokolo lyoye nokuninga omalunduluko mpoka sha pumbiwa, e to mono kutya oto vulu oku li tula miilonga. Natu ka taleni kiinima itano mbyoka tayi vulu oku ku kwathela wu vule okumana shoka wa tameka.

13. Ongiini to vulu okumona oonkondo ndhoka wa pumbwa wu tule etokolo lyoye miilonga?

¹³ Galikana wu pewe oonkondo wu katuke oonkatu. Jehova Kalunga ote ke ku pa ‘oonkondo wu tsakanithe’ elalakano lyoye. (Fil. 2:13) Onkee ano, mu pula e ku pe ombepo ye ondjapuki yi ku nkondopaleke. Tsikila okugalikana, nonando owu wete omagalikano goye ga fa itaaga yamukulwa. Jesus okwa ti: “Indileni, e tamu pewa [ombepo ondjapuki].” — Luk. 11:9, 13.

14. Ekotampango ndyoka li li mOmayeletumbulo 21:5, otali vulu ngiini oku ku kwathela wu tule miilonga etokolo lyoye?

¹⁴ Ninga oompangela. (Lesha Omayeletumbulo 21:5.) Opo wu mane oshilonga shoka wa tameka, owa pumbwa okuninga ompangela. Opo nduno owa pumbwa okulonga wi ikolelela kuyo. Sha faathana, uuna to ningi etokolo, ninga omusholondondo gwiinima ayihe mbyoka wa pumbwa okuninga, wu vule oku li gwanitha po. Uuna wa pumbwa okulonga oshilonga oshinene, enda to kutha ko kashona nakashona, opo wu vule okumona kutya owa longa ko shi thike peni. Paulus okwa li a ladhipike Aakorinto ya kale haya pungula sha shomayambidhidho, “mesiku lyotango lyoshiwike kehe,” pehala lyoku shi ninga ngele e ya. (1 Kor. 16:2) Okutopola oshilonga oshinene muulonga uushona, otaku vulu wo oku ku kwathela kuu gwililwe po.

15. Konima ngele wa ningi ompangela, oshike wu na okuninga?

¹⁵ Ngele shoka wa hala okuninga owe shi nyola, nena otashi ka kala oshipu kungoye wu shi ninge. (1 Kor. 14:40) Pashiholelwa, olutu  lwaakuluntugongalo ohalu pewa omalombwelo lu hogolole omukuluntugongalo gwontumba a kale ha nyola kehe shoka talu tokola, mwa kwatelwa ngoka e na oku shi ninga nesiku ndyoka shi na okupwa. Aakuluntugongalo mboka haya landula omalombwelo ngoka, olundji ohaya gwanitha po shoka ya tokola okuninga. (1 Kor. 9:26) Nangoye oto vulu okuninga sha faathana, ngele tashi ya piinima yopaumwene. Pashiholelwa, oto vulu okuninga omusholondondo gwiinima mbyoka wa hala okuninga esiku kehe, we yi tula melandulathano. Shoka itashi ke ku kwathela owala wu mane shoka wa tameka, ihe owu shi ninge wo muule wethimbo efupi.

16. Oshike wa pumbwa okuninga, opo wu tule miilonga etokolo lyoye, nongiini Aaroma 12:11 taye shi ambidhidha?

¹⁶ Ninga oonkambadhala wi itula mo. Ohashi pula oonkambadhala okutula miilonga shoka wa tokola okuninga nowu shi mane. (Lesha Aaroma 12:11.) Paulus okwa li a lombwele Timoteus a ‘tsikile okulongitha ethimbo lye’ noku ‘dhiginine’ okukala omulongi omwaanawa. Otatu vulu okutula miilonga omayele gaPaulus ngoka, mukehe shoka tatu ningi. — 1 Tim. 4:13, 16.

17. Aaefeso 5:15, 16, otaya vulu ngiini oku tu kwathela tu tule miilonga etokolo ndyoka twa ninga?

¹⁷ Longitha ethimbo lyoye nawa. (Lesha Aaefeso 5:15, 16.) Itulila po ethimbo wu tule miilonga shoka wa tokola, e to li dhiginine. Yanda okutegelela okumona ethimbo lyo opala wu katuke oonkatu, oshoka otashi vulika kuu li mone. (Omuuv. 11:4) Kotoka kuu ethe iinima mbyoka inaayi simana yi mane po ethimbo lyoye noonkondo ndhoka wa pumbwa, wu ninge iinima mbyoka ya simanenena. (Fil. 1:10) Ngele otashi wapa, hogolola ethimbo ndyoka wu shi kutya ito ka piyaganekwa naanaa kuyalwe. Lombwela yalwe kutya owa pumbwa ethimbo wu gandje eitulomo kwaashoka wa hala okuninga. Oto vulu wo okukala ho dhimi ongodhi yoye, nokukala ho lesha omatumwalaka goye nenge okuya komakwatathano gopaintaneta konima yethimbo. *

18-19. Oshike tashi vulu oku ku kwathela kuu ethe po etokolo ndyoka wa ninga, uuna pu na oondjindikila?

¹⁸ Gandja eitulomo kiizemo. Oshizemo shetokolo lyoye, otashi vulu okufaathanithwa nokuthika hoka to yi. Ngele owa halelela oku ka thika hoka to yi, oto ka tsikila okupula komeho. Nokuli nonando ondjila ndjoka oyi kale ya patwa, oto ka konga po yimwe. Sha faathana, ngele otwa gandja eitulomo kiizemo yomatokolo getu, itatu ka teka omukumo, nonando otu tsakaneke oondjindikila nenge omaimbo. — Gal. 6:9.

¹⁹ Okuninga omatokolo omawanawa ihaku kala okupu, noku ga tula miilonga ohaku vulu okukala eshongo. Ihe kekwatho lyaJehova, oto vulu okumona oondunge noonkondo ndhoka wa pumbwa, wu mane shoka wa tameka.