1. David okwa li a popi shike kombinga yeifupipiko lyaJehova?

MBELA otatu vulu ngaa okutya Jehova omwiifupipiki? Eeno, otatu vulu. Pompito yimwe David okwa li a popi a ti: “Omuwa, ongoye to gamene ndje e to hupitha ndje; esiloshimpwiyu [‘eifupipiko,’ NW] lyoye olya nenepekitha ndje.” (Eps. 18:35) Otashi vulika David a li ta dhiladhila esiku omuhunganeki Samuel e ya megumbo lyahe, e mu gwayeke a ninge omukwaniilwa gwaIsrael gwomonakuyiwa. Isai okwa li e na oyanamati yahetatu, na David oye a li onkelo. Ihe nonando ongawo, Jehova oye a li a hogolola a pingene po omukwaniilwa Saul. — 1 Sam. 16:1, 10-13.

2. Otatu ka kundathana shike moshitopolwa shika?

² David okwa li ta tsu kumwe lela nomupisalomi ngoka a popi Jehova a ti: “Oha nyongama, a tale egulu nokombanda yevi. Ota kutha mo ohepele. . . . Ote mu kuutumbike paanenentu, opaakwaniilwa yoshilongo shaandjawo.” (Eps. 113:6-8) Moshitopolwa shika, tango otatu ka kundathana iiyilongomwa yimwe ya simana kombinga yeifupipiko, mokutala koonkalo moka Jehova a li u ulike uukwatya mboka. Opo nduno otatu ka kundathana shoka tatu vulu okwiilonga komukwaniilwa Saul, komuhunganeki Daniel nosho wo kuJesus kombinga yankene tu na okukala tu shi omangambeko getu.

3. Jehova ohu ungaunga ngiini natse, naashoka otashi ulike shike?

³ Jehova ohu ulike kutya omwiifupipiki momukalo moka ha ungaunga naalongeli ye inaaya gwanenena. Iha taamba ko owala oku mu longela kwetu, ihe ohe tu tala ko wo tu li ookuume ke. (Eps. 25:14) Opo pu kale uukuume pokati ketu  naye, Jehova okwe tu pa Omwana e li ekuliloyambo omolwoondjo dhetu. Jehova ke shi tuu omunahenda nomunalukeno!

4. Oshike Jehova e tu pa, nomolwashike?

⁴ Natu tale omukalo gumwe moka Jehova hu ulike eifupipiko. Molwaashoka oye Omushiti, Jehova okwa li ta vulu oku tu shita ihaatu vulu okuhogolola shoka twa hala okuninga monkalamwenyo. Ihe ine shi ninga. Okwe tu shita oshifetha she nokwe tu shita tu na uukwatya wokutokola shoka twa hala okuninga. Tu li aantu yonyama nombinzi, Jehova okwa hala tu mu longele nomutima aguhe, molwaashoka tu mu hole. Uuna tatu shi ningi, uuwanawa owetu yene. (Deut. 10:12; Jes. 48:17, 18) Inatu pandula tuu sho Jehova e li omwiifupipiki!

5. Jehova ohe tu longo ngiini tu kale aaifupipiki? (Tala ethano lyokombanda.)

⁵ Jehova ohe tu longo tu kale aaifupipiki momukalo moka hu ungaunga natse. Jehova oye omunandunge a shiga ko meshito alihe. Nonando ongawo, oku na ehalo okupulakena komaetopo gayalwe. Pashiholelwa, Jehova okwa li a pitike Omwana e mu kwathele sho ta shiti iinima ayihe. (Omayel. 8:27-30; Kol. 1:15, 16) Nonando ye omunankondoadhihe, oha pe wo yalwe oonkondopangelo dhontumba. Pashiholelwa, okwa langeka po Jesus a kale Omukwaniilwa gwUukwaniilwa we. Kalunga ota ka pa wo oonkondopangelo dhontumba aantu 144 000, mboka taya ka pangela pamwe naJesus. (Luk. 12:32) Shimwe ishewe, Jehova okwa dheula Jesus a kale Omukwaniilwa nOmusaaseri Omukuluntu. (Heb. 5:8, 9) Oha dheula wo mboka taya ka pangela pamwe naJesus nkene ye na okugwanitha po iinakugwanithwa yawo, ihe iha kala ta konenene nkene taye yi gwanitha po. Pehala lyaashono okwe yi inekela thiluthilu kutya otaya ka gwanitha po ehalo lye. — Eh. 5:10.

6-7. Oshike tatu vulu okwiilonga kuTate yetu gwomegulu kombinga yokugandja po iinakugwanithwa kuyalwe?

⁶ Ngele Tate yetu gwomegulu ngoka inaa  pumbwa ekwatho lyagumwe oha gandja po iinakugwanithwa kuyalwe, mbela natse katu na okuninga sha faathana? Pashiholelwa, mbela owu li omutse gwegumbo nenge omukuluntugongalo? Ngele osho, landula oshiholelwa shaJehova shokugandja po iinakugwanithwa kuyalwe. Ihe ino kala to konene kutya otaye yi longo ngiini. Ngele owa landula oshiholelwa shaJehova, nena iilonga otayi ka longwa nawa noto ka dheula yalwe noku ya kwathela ya kale ye na omukumo. (Jes. 41:10) Oshike ishewe mboka ye na oonkondopangelo taya vulu okwiilonga kuJehova?

⁷ Ombiimbeli otayi ulike kutya Jehova oha kala e na ohokwe momaetopo goyanamati yopambepo, aayengeli. (1 Aak. 22:19-22) Aavali, ongiini tamu vulu okulandula oshiholelwa shaJehova? Uuna tashi wapa, puleni omaetopo kaanona yeni nkene oshilonga shontumba shi na okulongwa. Mpoka tashi wapa ningeni ngaashi taya ti.

8. Jehova okwa li u ungaunga ngiini neidhidhimiko naAbraham naSara?

⁸ Eidhidhimiko lyaJehova ohali ulike wo kutya ye omwiifupipiki. Pashiholelwa, Jehova ohi idhidhimike uuna mboka haye mu longele ya limbililwa omatokolo ge. Okwa li a pulakene sho Abraham a li te mu pula kombinga yetokolo lye li na ko nasha nokuhanagula po Sodom naGomorra. (Gen. 18:22-33) Dhimbulukwa wo nkene Jehova a li u ungaunga naSara, omukulukadhi gwaAbraham. Ka li u uvu nayi nenge a geye, sho Sara a yolo kombinga yeuvaneko lye kutya ota ka ninga etegelelo, nonando okwa kulupa. (Gen. 18:10-14) Pehala lyaashono, okwe mu yaalele noku ungaunga naye nesimaneko.

9. Oshike aavali naakuluntugongalo taya vulu okwiilonga koshiholelwa shaJehova?

⁹ Aavali naakuluntugongalo, oshike tamu vulu okwiilonga koshiholelwa shaJehova? Tala kunkene ho inyenge, uuna mboka ye li kohi yetonatelo lyoye ya limbililwa omatokolo goye. Mbela oho endelele wu ya pukulule? Nenge oho kambadhala okuuva ko etaloko lyawo? Omaukwanegumbo nomagongalo ohaga mono mo lela uuwanawa uuna mboka ye na oonkondopangelo haya holele Jehova. Sigo oompaka, otwa kundathana shoka tatu vulu okwiilonga keifupipiko lyaJehova. Ngashingeyi natu ka taleni shoka tatu vulu okwiilonga kombinga yeifupipiko miiholelwa mbyoka ya nyolwa mOohapu dhaKalunga.

10. Jehova oha longitha ngiini iiholelwa yayalwe e tu longe?

¹⁰ E li ‘Omulongi gwetu omunenenene,’ (NW) Jehova okwe tu pa iiholelwa mOohapu dhe e tu longe. (Jes. 30:20, 21) Ohatu ilongo momahokololo gomOmbiimbeli kombinga yaantu mboka ye na omaukwatya ngoka ga hokiwa kuKalunga. Ohatu ilongo sha wo kiiholelwa yaamboka ya li ya ndopa okuulika omaukwatya ngoka omawanawa. — Eps. 37:37; 1 Kor. 10:11.

11. Oshike tatu vulu okwiilonga koshiholelwa oshiwinayi shaSaul?

¹¹ Dhiladhila kwaashoka sha li sha ningilwa omukwaniilwa Saul. Sho a li omugundjuka okwa li e na eifupipiko. Okwa li e shi omangambeko ge nokwa li nokuli a kakadhala okutaamba ko iinakugwanithwa ya gwedhwa po. (1 Sam. 9:21; 10:20-22) Ihe mokweendela ko kwethimbo, Saul okwa tameke okuninga iinima mbyoka inaa pitikwa e yi ninge. Okwa tameke okuulika iikala mbyoka iiwinayi, nziya sho a ningi omukwaniilwa. Pompito yimwe sho a li a tegelela omuhunganeki Samuel, ka li i idhidhimike. Pehala lyokwiinekela Jehova neifupipiko, oye a hupithe oshigwana she peuthwathimbo lye, Saul okwa yamba efikiloyambo, nonando ka li e na uuthemba woku shi ninga. Oshilanduliko? Saul ka li we a hokiwa kuJehova nomokweendela ko kwethimbo, okwe mu kutha uuthemba wokukala omukwaniilwa. (1 Sam. 13:8-14) Otashi ka kala pandunge ngele otwi ilongo sha koshiholelwa shika tashi londodha nokuyanda okuninga iinima mbyoka inaatu pitikwa oku yi ninga.

12. Daniel oku ulike ngiini eifupipiko?

 ¹² Mepingathano noshiholelwa oshiwinayi shaSaul, natu ka taleni koshiholelwa oshiwanawa shomuhunganeki Daniel. Daniel onkalamwenyo ye ayihe, okwa kala omupiya gwaKalunga omwiifupipiki noku shi omangambeko ge nokwa kala ha kongo aluhe ewiliko lyaJehova. Pashiholelwa, sho a li a longithwa kuJehova a fatulule ondjodhi yaNebukadnezzar, esimano ka li e li ukitha kuye mwene. Pehala lyaashono, okwa gandja neifupipiko esimano alihe kuJehova. (Dan. 2:26-28) Oshiilongomwa? Ngele aamwatate oye hole okupulakena kiipopiwa yetu nenge ngele hatu shi enditha nawa muukalele, otwa hala aluhe esimano tu kale hatu li ukitha kuJehova. Otu na oku shi zimina neifupipiko kutya iinima ayihe mbyoka ohatu yi pondola owala kekwatho lyaJehova. (Fil. 4:13) Ngele osho twa ningi, kungawo otatu landula wo oshiholelwa oshiwanawa shaJesus. Ngiini mbela?

13. Oshike tatu ilongo koohapu dhaJesus ndhoka tadhi adhika muJohannes 5:19, 30, kombinga yeifupipiko?

¹³ Nonando Jesus okwa li Omwana gwaKalunga a gwanenena, okwa kala i ikolelela muJehova. (Lesha Johannes 5:19, 30.) Ina kambadhala nando okukutha ko oonkondo kuHe gwomegulu. Aafilippi 2:6, otayi tu lombwele kutya Jesus “ina dhiladhila nando olumwe, a kambadhale nokuhakana okukala a fa Kalunga.” E li Omwana ha vulika, Jesus okwa li e shi omangambeko ge nokwa li a simaneka oonkondopangelo dhaHe.

14. Jesus okwa li i inyenge ngiini, sho a pulwa a ninge oshinima shoka kaali e na uuthemba woku shi ninga?

¹⁴ Dhiladhila kunkene Jesus a li i inyenge sho aalongwa ye, Jakob naJohannes pamwe nayina ye ya kuye e taye mu pula e ya ningile sha shoka a li kee na uuthemba woku shi ninga. Jesus ka li a kakadhala oku ya lombwela kutya He gwomegulu oye owala ta vulu okutokola kutya olye e na okukuutumba kolulyo nokolumoho lwe mUukwaniilwa. (Mat. 20:20-23) Jesus okwa li u ulike kutya oku shi omangambeko ge. Okwa li wo omwiifupipiki. Ka li nando ha ningi sha shoka Jehova inee mu pa epitikilo lyoku shi ninga. (Joh. 12:49) Ongiini tatu vulu okulandula oshiholelwa oshiwanawa shaJesus?

15-16. Ongiini tatu vulu okutula miilonga omayele gopaMbiimbeli ngoka taga adhika mAakorinto yotango 4:6?

¹⁵ Ohatu landula oshiholelwa shaJesus sheifupipiko, mokutula miilonga omayele gOmbiimbeli ngoka taga adhika mAakorinto yotango 4:6. Movelise ndjoka otwa lombwelwa taku ti: “Ino konda shoka shu uthwa.” Onkee ano, uuna twa pulwa omayele, katu na nando okuhumitha komeho omaetopo getu yene nenge okupopya  shaashoka she ya momadhiladhilo getu. Pehala lyaashono, omayele getu naga kale gi ikolelela kOmbiimbeli nosho wo kiileshomwa yetu yopaMbiimbeli. Ngele otwe shi ningi, nena otatu ka kala tu shi kutya otu na omangambeko. Ngele otu shi omangambeko getu, otatu ka gandja esimano ‘kiilonga yuuyuuki’ mbyoka Omunankondoadhihe a longa. — Eh. 15:3, 4.

¹⁶ Kakele owala kokusimanekitha Jehova, otu na wo omatompelo galwe omawanawa gokuulika eifupipiko. Ngashingeyi natu ka taleni nkene eifupipiko nokukala tu shi omangambeko getu, tayi vulu oku tu etela enyanyu noku tu kwathela tu longele kumwe nayalwe.

17. Omolwashike aantu mboka aayifupipiki noye shi omangambeko gawo haya kala ya nyanyukwa?

¹⁷ Ngele otwa kala aaifupipiki notu shi omangambeko getu, ohashi kala oshipu kutse tu kale twa nyanyukwa. Omolwashike mbela? Ngele otwa kala tu shi omangambeko getu, otatu ka kala hatu pandula nohatu nyanyukilwa ekwatho kehe tatu pewa kuyalwe. Pashiholelwa, dhiladhila koshikando shoka Jesus a li a aludha aanashilundu omulongo. Gumwe owala gwomuyo a li a galuka a pandule Jesus, sho e mu aludha komukithi ngoka omudhipagi, oshinima shoka kaa li ta vulu okwiiningila ye mwene. Omulumentu ngoka omwiifupipiki noku shi omangambeko ge, okwa pandula omolwekwatho ndjoka a li a pewa, e ta simanekitha Kalunga nokuli. — Luk. 17:11-19.

18. Eifupipiko nokukala tu shi omangambeko getu, ohayi tu kwathele ngiini tu longele kumwe nayalwe? (Aaroma 12:10)

¹⁸ Aantu mboka aayifupipiki noye shi omangambeko gawo, ohaya longele kumwe nuupu naantu yalwe nolundji ohaya panga uukuume wopothingo naantu. Omolwashike mbela? Omolwaashoka ohaya kala ye shi kutya aantu yalwe oye na omaukwatya omawanawa nohaya ulike einekelo muyo. Aantu mboka aayifupipiki noye shi omangambeko gawo ohaya kala ya nyanyukwa uuna  yalwe taye shi enditha nawa miilonga yawo. Ohaye ya pandula noku ya simaneka. — Lesha Aaroma 12:10.

19. Omolwashike tu na okuyanda uuntsa?

¹⁹ Ohashi kala oshidhigu kaantu mboka ye na uuntsa okupandula yalwe. Oye hole owala oyo taya pandulwa. Oye hole okwiiyelekanitha nayalwe nohaya humitha komeho ombepo yethigathanopo. Pehala lyokudheula yalwe nokugandja po iinakugwanithwa kuyo, olundji ohaya ti: “Ngele owa hala oshinima shi longwe nawa,” sha hala okutya, shi ningwe momukalo moka yo ya hokwa, “ongoye wu na oku shi ninga mwene.” Omuntu ngoka e na uuntsa olundji oha kala a hala okukala a simana noku na efupa. (Gal. 5:26) Omuntu a tya ngawo iha panga naanaa uukuume tawu kalelele. Ngele otwa mono kutya otu na uuntsa, otu na okugalikana Jehova twa mana mo e tu kwathele ‘tu shitulule omadhiladhilo getu,’ opo iikala mbyoka iiwinayi kaayi mene omidhi mutse. — Rom. 12:2.

20. Omolwashike tu na okukala aaifupipiki notu shi omangambeko getu?

²⁰ Otwa pandula noonkondo, sho Jehova e tu tulila po oshiholelwa sheifupipiko. Otu shi iwetele momukalo moka hu ungaunga naapiya ye, notwa hala okulandula oshiholelwa she. Kakele kaashono, otwa hala wo okulandula iiholelwa iiwanawa yaantu mboka ya li ye shi omangambeko gawo ya popiwa mOmbiimbeli, mboka ya li ya longele Kalunga neifupipiko. Onkee ano, natu tumbaleke Jehova noku mu pa esimano ndyoka i ilongela. (Eh. 4:11) Ngele otwe shi ningi, nena otatu ka enda pamwe naTate yetu gwomegulu, ngoka e hole aantu mboka aaifupipiki noye shi omangambeko gawo.