1. Uuthembahenda wuni tu na?

KASHI shi tuu uuthembahenda okukala megongalo lyaJehova! Otu li moparadisa yopambepo moka mu udha aantu ye na ombili noya nyanyukwa. Mbela owu na oshilonga megongalo?

2. Ethaneko lini omuyapostoli Paulus a longitha moontumwafo dhe dhi ili nodhi ili?

² Otatu vulu okwiilonga oshindji kombinga yoshitopolwa shika methaneko ndjoka omuyapostoli Paulus a longitha moontumwafo dhe dha nwethwa mo dhi ili nodhi ili. Montumwafo kehe Paulus okwa yelekanitha egongalo nolutu lwomuntu. Okwa yelekanitha wo omuntu kehe megongalo niilyo yolutu. — Rom. 12:4-8; 1 Kor. 12:12-27; Ef. 4:16.

3. Iiyilongomwa itatu yini tatu ka kundathana moshitopolwa shika?

³ Moshitopolwa shika otatu ka kundathana iiyilongomwa itatu ya simana mbyoka tatu vulu okwiilonga methaneko lyaPaulus. Shotango, otatu ki ilonga kutya kehe gumwe gwomutse oku na oshilonga * megongalo lyaJehova. Oshitiyali, otatu ka kundathana shoka tatu vulu okuninga, ngele otwa mono oshidhigu okutseya ngele otu na oshilonga megongalo. Oshititatu, otatu ka kundathana kutya omolwashike twa pumbwa okukala twi ipyakidhila niilonga mbyoka Jehova a pa kehe gumwe gwomutse megongalo.

4. Oshike tatu ilongo mAaroma 12:4, 5?

⁴ Oshiilongomwa shotango shoka tatu vulu okwiilonga methaneko lyaPaulus, osho kutya kehe gumwe gwomutse oku na oshilonga  megongalo lyaJehova. Paulus okwa tameke ethaneko lye ta ti: “Otse otu na iilyo oyindji molutu lumwe, nakehe shimwe shomiilyo mbika oshi na oshilonga shasho shi ili. Osho wo, nonando tse otu li po oyendji, otse olutu lumwe muukumwe naKristus notwa kwatelwa kumwe ongiilyo yolutu lumwe.” (Rom. 12:4, 5) Paulus okwa li a hala okutya shike? Kehe gumwe gwomutse ota dhana onkandangala yi ili megongalo, ihe kehe gumwe gwomutse oku na oshilonga.

5. “Omagano” geni Jehova a pa egongalo?

⁵ Uuna to dhiladhila kombinga yaamboka ye na oshilonga megongalo, otashi vulika wu thike pehulithodhiladhilo nziya kutya oomboka haya kwatele komeho. (1 Tes. 5:12; Heb. 13:17) Odhoshili kutya okupitila muKristus, Jehova okwa pa egongalo lye “aantu ye li omagano,” (NW). (Ef. 4:8) ‘Aantu mboka ye li omagano,’ oya kwatela mo iilyo yOlutuwiliki, aakwatheli yOlutuwiliki, iilyo yOkomitiye yIitayimbelewa, aatonatelishikandjo, aayendinongeki yaBetel, aakuluntugongalo naayakuligongalo. Aamwatate ayehe mboka ohaya langekwa po kombepo ondjapuki, ya sile oshimpwiyu oonzi dhaJehova dhi na ongushu noya koleke egongalo. — 1 Pet. 5:2, 3.

6. Shi ikolelela kAatessalonika yotango 2:6-8, aamwatate mboka ya langekwa po kombepo ondjapuki ohaya lalakanene okuninga shike?

⁶ Aamwatate ohaya langekwa po kombepo ondjapuki ya gwanithe po iinakugwanithwa yi ili noyi ili. Ngaashi owala iikaha noompadhi hadhi longele kumwe, omolwuuwanawa wolutu, aamwatate mboka ya langekwa po kombepo ondjapuki, nayo ohaya longele kumwe nuudhiginini omolwuuwanawa wegongalo. Ihaya kongo esimano lyawo yene. Pehala lyaashono, ohaya lalakanene okutunga aamwatate naamwameme noku ya koleka. (Lesha 1 Aatessalonika 2:6-8.) Otwa pandula Jehova omolwaamwatate mboka ya pyokoka nohaya pititha oompumbwe dhayalwe komeho yodhawo.

7. Omayambeko geni oyendji mboka ye li miilonga yethimbo lyu udha haya mono?

⁷ Yamwe megongalo otashi vulika ya langekwe po ye li aatumwa, aakokolindjila yi ikalekelwa nenge aakokolindjila yondjigilile. Odhoshili kutya aamwatate naamwameme muuyuni awuhe oya hogolola okuya miilonga yethimbo lyu udha yokuuvitha noyokuninga aantu aalongwa. Mokuninga ngawo, oya kwathela aantu oyendji ya ninge aalongwa yaKristus Jesus. Nonando mboka haya longo miilonga yethimbo lyu udha kaye na iiniwe oyindji, Jehova okwe ya laleka nuuyamba pamikalo odhindji. (Mark. 10:29, 30) Aamwatate naamwameme mbaka, otu ya hole notwa pandula sho ye li oshitopolwa shegongalo.

8. Omolwashike omuuvithi kehe gwonkundana ombwanawa, e na ongushu kuJehova?

⁸ Mbela aamwatate mboka ya langekwa po nosho wo mboka ye li miilonga yethimbo lyu udha oyo owala ye na oshilonga megongalo? Hasho nando. Omuuvithi kehe gwonkundana ombwanawa okwa simana kuKalunga nokegongalo. (Rom. 10:15; 1 Kor. 3:6-9) Omolwashike? Omolwaashoka limwe lyomomalalakano ga simanenena gegongalo olyo okuninga aantu aalongwa yOmuwa gwetu Jesus Kristus. (Mat. 28:19, 20; 1 Tim. 2:4) Ayehe mboka haya endathana negongalo, kutya nduno oya ninginithwa nenge hasho, ohaya kambadhala okupititha komeho iilonga mbika. — Mat. 24:14.

9. Omolwashike twa simaneka aamwameme yetu Aakriste?

⁹ Jehova okwa simaneka aamwameme nokwe ya pa iilonga ya simana megongalo. Okwa lenga aakulukadhi, oomeme, aaselekadhi naamwameme inaaya hokanwa mboka haye mu longele nuudhiginini. Ombiimbeli oya popya lwiikando kombinga yaakiintu mboka ye li oshiholelwa oshiwanawa noya hokiwa kuKalunga. Aakiintu mboka oye shi okupandulwa, sho ya tula po oshiholelwa oshiwanawa mokukala ye na uunongo, eitaalo, uulaadhi, omukumo, ye na  ombepo yokugandja nohaya longo iilonga iiwanawa. (Luk. 8:2, 3; Iil. 16:14, 15; Rom. 16:3, 6; Fil. 4:3; Heb. 11:11, 31, 35) Inatu pandula tuu Jehova sho tu na momagongalo getu aakiintu Aakriste mboka ye na omaukwatya ngaka omawanawa!

10. Omolwashike twa lenga aakokele yetu?

¹⁰ Otwa nyanyukwa wo sho tu na aakokele oyendji megongalo. Omagongalo gamwe oge na aamwatate naamwameme aakokele mboka ya longela Jehova nuudhiginini onkalamwenyo yawo ayihe. Aakokele yamwe otashi vulika opo ya tseya oshili. Oyendji yomaakokele mbaka, oye na uupyakadhi wuukolele, molwaashoka otaye ende taya kulupa. Omaupyakadhi ngoka otashi vulika ge ya ningitha ya kale ihaaya vulu okuninga oshindji megongalo nomiilonga yokuuvitha. Nonando ongawo, aakokele mbaka ohaya ningi ngaashi taya vulu muukalele, nohaya longitha oonkondo dhawo mokuladhipika nomokudheula yalwe. Shimwe ishewe, ohatu mono mo uuwanawa montseyo yawo oyindji. Oye na lela oshilonga kuJehova nokutse. — Omayel. 16:31.

11-12. Omomukalo guni ho tsuwa omukumo kaagundjuka yomegongalo lyeni?

¹¹ Dhiladhila wo kombinga yaagundjuka yetu. Ohaya taalele omaupyakadhi ogendji, molwaashoka oye li muuyuni mbuka tawu pangelwa kuSatana Ondiyapoli nowa nwethwa mo kuye. (1 Joh. 5:19) Nonando ongawo, ohashi tu tsu omukumo uuna tu wete aagundjuka yetu taya gandja omatyokosha pokugongala, taya kutha ombinga muukalele nuuna taya popile eitaalo lyawo. Onkee ano, ne aagundjuka, omu na lela oshilonga megongalo lyaJehova. — Eps. 8:2.

¹² Ihe nonando ongawo, yamwe yomaamwatate naamwameme ohaya mono oshidhigu okwiitaala kutya oye na oshilonga megongalo. Oshike tashi vulu oku tu kwathela tu kale tu uvite kutya otu na oshilonga megongalo? Natu ke shi kundathaneni.

13-14. Omolwashike yamwe tashi vulika ya dhiladhile kutya kaye na oshilonga megongalo?

¹³ Oshiilongomwa oshitiyali shoka tatu vulu okwiilonga methaneko lyaPaulus, otashi tu dhimbulukitha  uupyakadhi mboka oyendji kunena ye na. Ohashi kala oshidhigu kuyo okwiitaala kutya oye na oshilonga megongalo. Paulus okwa nyola a ti: “Ompadhi ando tayi ti: ‘Ngame kandi shi gwomolutu, oshoka kandi shi oshikaha,’ shika itashi yi ningi, yi kale yaa shi yomolutu. Nongele okutsi taku ti: ‘Ngame kandi shi gwomolutu, oshoka kandi shi eho,’ shika itashi ku ningi, ku kale kwaa shi kwomolutu.” (1 Kor. 12:15, 16) Paulus okwa li a hala okutya shike?

¹⁴ Ngele owa kala ho iyelekanitha nayalwe megongalo, otashi vulu oku ku dhiladhilitha kutya ku na oshilonga megongalo. Yamwe megongalo otashi vulika ya kale ye na omagano gokulonga aantu, ye shi okuunganeka nawa iinima nenge ye shi nawa okuhekeleka yalwe noku ya tsa omukumo. Otashi vulika wu dhiladhile kutya ngoye ku na omagano gokuninga iinima mbyono, ngaashi yo haye yi ningi. Ngele osho ho dhiladhila ngawo, nena otashi ulike kutya ngoye omwiifupipiki nowu shi omangambeko goye. (Fil. 2:3) Ihe kala wa kotoka. Ngele owa kala ho iyelekanitha naamboka ye na omagano gokuninga iinima yontumba, nena oto ki iteya owala omukumo. Otashi vulika nokuli wu kale wu uvite ngaashi Paulus a ti, ano wu uvite kutya ku na nando oshilonga megongalo. Oshike tashi ke ku kwathela wu ungaunge nomadhiladhilo ngono?

15. Shi ikolelela kAakorinto yotango 12:4-11, oshike tu na okukala tu shi kombinga yomagano ngoka tashi vulika tu na?

¹⁵ Dhiladhila kwaashika: Jehova okwa li a pe yamwe yomAakriste yomethelemimvo lyotango omagano gopashikumithalonga, okupitila mombepo ondjapuki, ihe ayehe kaya li ya pewa omagano ga faathana. (Lesha 1 Aakorinto 12:4-11.) Jehova okwa li e ya pe omagano ga yoolokathana, ihe omuKriste kehe okwa li e na oshilonga. Kunena ihatu pewa omagano gopashikumithalonga okupitila mombepo ondjapuki. Ngaashi owala sha li methelemimvo lyotango, otashi vulika kaatu na omagano ga faathana, ihe atuheni otu na oshilonga kuJehova.

16. Omuyapostoli Paulus okwe tu pa omayele geni ngoka twa pumbwa okutula miilonga?

¹⁶ Pehala lyokwiiyelekanitha nAakriste yalwe, otu na okutula miilonga omayele gaPaulus ga nwethwa mo, ngoka taga ti: “Kehe gumwe na konakone ye mwene, iilonga ye nkene ya  tya. Iilonga ye ngele iiwanawa, nena ota vulu okwiitangela shoka e shi longo, ihe ita vulu okuyelekanitha iilonga ye niilonga yamukwawo.” — Gal. 6:4.

17. Otashi ke tu etela uuwanawa wuni, ngele otwa tula miilonga omayele gaPaulus?

¹⁷ Ngele otwa tula miilonga omayele gaPaulus ga nwethwa mo nokukonakona iilonga yetu, otashi vulika tu tameke okumona kutya otu na omagano ga yooloka ko kugayalwe. Pashiholelwa, otashi vulika omukuluntugongalo gwontumba a kale kee na omagano gokulonga aantu komutuni, ihe otashi vulika he shi pondola, ngele tashi ya piilonga yokuninga aantu aalongwa. Nenge tashi vulika a kale ihu unganeke nawa iinima ye ngaashi aakuluntugongalo yalwe megongalo lyawo, ihe otashi vulika a tseyika nawa kutya omunambili, naamwatate naamwameme ohaya kala ye mu mangulukila oku mu pula omayele gopaMbiimbeli. Nenge tashi vulika nokuli a tseyika ha yakula aayenda nawa. (Heb. 13:2, 16) Uuna tu shi omagano ngoka tu na, otatu ka kala tu na etompelo lyokukala tu uvitile nawa shoka tatu vulu okuningila egongalo. Shimwe ishewe, itatu ka tsila ondumbo aamwatate mboka ye na omagano ga yooloka ko kugetu.

18. Ongiini tatu vulu okuhwepopaleka omukalo gwetu gwokulonga aantu?

¹⁸ Kutya nduno otu na oshilonga shini megongalo, atuheni otu na okukala tu na ehalo lyokuhwepopaleka omagano getu. Opo e tu kwathele tu hwepopale, Jehova ohe tu pe edheulo ewanawa okupitila mehangano lye. Pashiholelwa, pokugongala kwetu kwomokati koshiwike, ohatu pewa omalombwelo gankene tatu vulu okupondola muukalele. Mbela edheulo ndyoka oho li longitha ngaa ngaashi tashi vulika?

19. Ongiini to vulu okwaadha elalakano lyokuhita Osikola yAauvithi yUukwaniilwa?

¹⁹ Omukalo gulwe ishewe omuwanawa tatu vulu okumona edheulo, omokuhita Osikola yAauvithi yUukwaniilwa. Osikola ndjika ohayi hitwa kaamwatate naamwameme mboka ye li miilonga yethimbo lyu udha, noye li pokati komimvo 23 no 65. Otashi vulika wu dhiladhile kutya ku na esiku wu adhe elalakano lyokuhita osikola ndyoka. Ihe pehala lyokuninga omusholondondo gwomatompelo kutya omolwashike itoo vulu oku yi hita, ninga omusholondondo gwomatompelo kutya omolwashike wa hala oku yi hita. Opo nduno, katuka oonkatu ndhoka tadhi vulu oku ku kwathela wu vule okugwanitha po iitegelelwa mbyoka. Kekwatho lyaJehova nokokulonga kwoye nuudhiginini, oto ka vula okuninga shoka sha li tashi monika sha fa itaa shi wapa.

20. Oshike tatu vulu okwiilonga mAaroma 12:6-8?

²⁰ Oshiilongomwa oshititatu shoka tatu vulu okwiilonga methaneko lyaPaulus, otashi adhika mAaroma 12:6-8. (Lesha.) Paulus menyolo ndyoka oku ulike ishewe kutya mboka ye li megongalo oye na omagano gi ili. Ihe ngashingeyi ota tsu omuthindo kutya otu na okulongitha omagano ngoka tu na, tu tunge egongalo notu li koleke.

21-22. Oshike tatu vulu okwiilonga komumwatate Robert nomumwatate Felice?

²¹ Natu ka taleni koshiholelwa shomumwatate ngoka tatu ithana Robert. Konima sho a kala ta longele koshilongo shilwe, okwi ithanwa a ka longele koBetel yokoshilongo shawo. Nonando aamwatate oya li ye mu shilipaleke kutya oshinakugwanithwa she inashi lundululwa molwaashoka a ninga sha sha puka, okwa ti: “Uule woomwedhi onda kala nda yemata, molwaashoka onda li tandi dhiladhila kutya onda ndopa okugwanitha po oshinakugwanithwa shandje. Pompito yimwe onda li nda hala nokuli okuthiga po iilonga yaBetel.” Oshe ende ngiini, opo a kale ishewe a nyanyukwa? Omukuluntugongalo omukwawo okwe mu dhimbulukitha kutya Jehova  okwe tu dheula miinakugwanithwa yetu iikulu, opo a vule oku tu longitha wo miinakugwanithwa mbyoka tu na ngashingeyi. Robert okwa li e shi mono kutya okwa pumbwa okweetha po okutala konakuziwa nokutameka okugandja eitulomo kwaashoka ta vulu okuninga ngashingeyi.

²² Omumwatate Felice Episcopo, okwa li a taalele onkalo ya faathana. Ye nomukadhi oya piti Osikola yaGilead mo 1956 noya yi miilonga yuutonatelishikandjo koBolivia. Mo 1964, oya mono okanona. Omumwatate Felice okwa ti: “Osha li oshidhigu okweetha po oshinakugwanithwa shetu shoka twa li tu hole noonkondo. Otandi zimine kutya onda kala nda teka omukumo uule womvula. Ihe kekwatho lyaJehova, onda lundulula iikala yandje nonda taamba ko oshinakugwanithwa shandje oshipe shokukala omuvali.” Mbela nangoye owu uvite ngaashi Robert nenge Felice? Mbela oho kala wa teka omukumo, molwaashoka ngashingeyi kuu na we oshinakugwanithwa shoye oshikulu? Ngele osho, oto vulu okukala wa nyanyukwa ishewe, ngele owa lundulula etaloko lyoye nokugandja eitulomo kwaashoka to vulu okuninga ngashingeyi wu longele Jehova nokuyakula aamwaho. Kala aluhe wi ipyakidhila, mokulongitha omagano goye wu kwathele yalwe noto ka kala wa nyanyuka, sho to tungu egongalo.

23. Otu na okukutha ethimbo tu ninge shike, noshike tatu ka kundathana moshitopolwa tashi landula?

²³ Kehe gumwe gwomutse oku na ongushu momeho gaJehova. Jehova okwa hala tu kale oshitopolwa shuukwanegumbo we. Ngele otwa kutha ethimbo tu tedhatedhe kushoka tatu vulu okuninga tu tunge aamwatate naamwameme nokulonga nuudhiginini tu gwanithe po oshinakugwanithwa shoka, otashi ke tu kwathela tu kale tu uvite kutya otu na oshilonga megongalo. Ihe ongiini kombinga yankene hatu tala ko yalwe megongalo? Ongiini tatu vulu okuulika kutya otu ya hole notwe ya simaneka? Moshitopolwa tashi landula, otatu ka kundathana kombinga yepulo ndyoka lya simana.