1. Etokolo lini ewanawa kehe gumwe ta vulu okuninga?

OLUNDJI, omatokolo ngoka aavali haya ningi ohaga gumu oyana ethimbo ele. Ngele aavali oya ningi omatokolo kaage li pandunge, otaga vulu oku etela oyana omaupyakadhi. Ihe ngele oya ningi omatokolo gopandunge, oyana otaya kala ye na onkalamwenyo yi nyanyudha notayi ti sha. Odhoshili kutya aanona nayo oya pumbwa okuninga omatokolo gopandunge. Etokolo ewanawa kehe gumwe ta vulu okuninga, okulongela Tate yetu gwomegulu, Jehova. — Eps. 73:28.

2. Jesus naavali ye oya li ya ningi omatokolo geni omawanawa?

² Aavali yaJesus oya li ya tokola toko ya kwathele oyana ya longele Jehova, nomatokolo ngoka aavali ye ya ningi, ogu ulike kutya okulongela Jehova oko oshinima sha simanenena monkalamwenyo yawo. (Luk. 2:40, 41, 52) Jesus naye okwa li a ningi omatokolo omawanawa ngoka ge mu kwathele a gwanithe po shoka Jehova a li a hala a ninge. (Mat. 4:1-10) Sho Jesus a koko, okwa li omulumentu e na olukeno, omudhiginini nomulaadhi. Aavali ayehe mboka ye hole Jehova otaya ka kala ya panda okukala ye na omwanamati a fa Jesus.

3. Omapulo geni tatu ka yamukula moshitopolwa shika?

³ Moshitopolwa shika, otatu ka yamukula omapulo taga landula: Jehova okwa li a ningi omatokolo geni omawanawa kombinga yaJesus? Aavali Aakriste otaya vulu okwiilonga shike komatokolo ngoka Josef naMaria ya li ya ningi? Aagundjuka Aakriste otaya vulu okwiilonga shike komatokolo ngoka Jesus a li a ningi?

4. Etokolo lini lya simana Jehova a li a ningi li na ko nasha nOmwana?

⁴ Jehova okwa li a hogololele Jesus aavali aawanawa. (Mat. 1:18-23; Luk. 1:26-38) Oohapu dhaMaria dha za komutima otadhi  ulike ohole ye yokuhola Jehova nOohapu dhe. (Luk. 1:46-55) Sho Josef a vulika kelombwelo lyaJehova, oshu ulike kutya okuhole Kalunga, nokwa li a longo ehala lyaKalunga. — Mat. 1:24.

5-6. Jehova okwa li a pitike Omwana a pite moonkalo dhini?

⁵ Ndhindhilika kutya Jehova ka li a hogololele Jesus aavali aayamba. Eyambo ndyoka Josef naMaria ya li ya gandja konima sho Jesus a valwa, ota li ulike kutya kaya li ye na iiniwe oyindji. (Luk. 2:24) Josef otashi vulika a li e na okasitola pegumbo lye muNasaret, moka a li ha longo e li omuhongi gwiipilangi. Otashi vulika ya li ye na onkalamwenyo yopaunathangwa, unene tuu molwaashoka oya li ye na aanona yaheyali. — Mat. 13:55, 56.

⁶ Jehova okwa li a gamene Jesus kiiponga yontumba, ihe ka li e mu gamene komashongo agehe. (Mat. 2:13-15) Pashiholelwa, Jesus okwa li e na aakwanezimo mboka ya li inaaye mu itaala. Dhiladhila owala kunkene Jesus a li u uvite, sho petameko aamwayina ye yamwe kaaya li yi itaala kutya oye Mesiasa. (Mark. 3:21; Joh. 7:5) Shimwe ishewe, Josef otashi vulika a sa sho Jesus a li omugundjuka, shoka tashi vulika sha li shu mu uvitha nayi noonkondo. Eso lyaJosef otashi vulika lya ningitha Jesus, ngoka a li osheeli, a tameke okukala ha longo po iilonga mbyoka Josef a li ha longo. (Mark. 6:3) Sho Jesus a koko, okwi ilongo okukala ha sile oshimpwiyu yaandjawo, shoka tashi vulika sha li hashi mu pula a longe nuudhiginini. Onkee ano, okwa li e shi nkene omuntu ha kala u uvite konima yokulonga iilonga iidhigu esiku alihe.

7. (a) Omapulo geni taga vulu okukwathela aaihokani sho taya putudha oyana? (b) Omayeletumbulo 2:1-6, otaya vulu ngiini okukwathela aavali ya dheule oyana?

⁷ Ngele ne aaihokani, nomwa hala okumona aanona, ipuleni omapulo taga landula: ‘Mbela tse aantu aaifupipiki mboka ye hole Jehova nOohapu dhe? Mbela Jehova ote ke tu inekelela okutekula okanona?’ (Eps. 127:3, 4) Ngele owu li nale omuvali, ipula to ti: ‘Mbela ohandi longo ngaa aamwandje nkene okulonga nuudhiginini kwa simana?’ (Omuuv. 3:12, 13) ‘Mbela ohandi ningi ngaa ngaashi tandi vulu ndi gamane aamwandje kenwethomo ewinayi lyuuyuni waSatana?’ (Omayel. 22:3) Ito vulu okugamena aamwoye komashongo agehe ngoka tashi vulika tayi iyadha mugo. Ihe oto vulu oku ya dheula nkene ye na okutaalela omashongo monkalamwenyo, moku ya longa okukala haya kongo ewiliko lyaKalunga mOohapu dhe. (Lesha Omayeletumbulo 2:1-6.) Pashiholelwa,  ngele omukwanezimo okwe etha po okulongela Jehova, kwathela aanona yoye yi ilonge okuza mOohapu dhakalunga kutya omolwashike okukala omudhiginini kuJehova kwa simana. (Eps. 31:23) Nenge ngele owa silwa omuholike, ulukila aanona yoye nkene taya vulu okulongitha Oohapu dhaKalunga ya mone ehekeleko nombili. — 2 Kor. 1:3, 4; 2 Tim. 3:16.

8. Shi ikolelela kuDeuteronomium 6:6, 7, Josef naMaria oya li ye na okuninga shike?

⁸ Josef naMaria oya li ya vulu okukwathela Jesus a kale omulumentu a hokiwa kuKalunga, molwaashoka oya li ya landula ewiliko lyaJehova ndyoka a pa aavali. (Lesha Deuteronomium 6:6, 7.) Josef naMaria oya li ye hole Jehova noonkondo, nelalakano lyawo lya simanenena, olya li okukwathela oyana ya kale wo ye hole Jehova.

9. Omatokolo geni ga simana Josef naMaria ya li ya ningi?

⁹ Josef naMaria oya hogolola okukala ye na ondjigilile yokulongela Kalunga pamwe nuukwanegumbo wawo. Kapu na omalimbililo kutya oya li haya ka gongala kosinagoga muNasaret oshiwike kehe. (Luk. 2:41; 4:16) Otashi vulika molweendo lwawo kuJerusalem ya li haya longo Jesus naamwayina ye kombinga yondjokonona yoshigwana shaKalunga, tashi vulika wo ya li haya yi komahala ngoka ga popiwa mOmanyolo. Otashi vulika kaasha li oshipu kuJosef naMaria ya kale haya longele Jehova pandjigilile, sho aanona yawo ye ende taya ningi oyendji. Nonando ongawo, oonkambadhala dhawo odhe ya etele uuwanawa. Molwashoka oya li ya pititha komeho okulongela Jehova, uukwanegumbo wawo owa li hawu kala wa silwa oshimpwiyu nawa pambepo.

10. Oshike Aavali Aakriste taya vulu okwiilonga koshiholelwa shaJosef naMaria?

¹⁰ Aavali aatilikalunga otaya vulu okwiilonga shike kuJosef naMaria? Shoka sha simanenena, ulukila aamwoye okupitila moohapu nomiilonga kutya owu hole Jehova noonkondo. Kala wu shi kutya omagano ga dhenga mbanda ngoka to vulu okupa aamwoye, oku ya kwathela ya kale ye hole Jehova. Shimwe ishewe, oshiilongomwa sha simanenena shoka to vulu oku ya longa, onkene ye na okukonakona Ombiimbeli pandjigilile, okugalikana, okukala haya yi komakugongala nokukala haya kutha ombinga miilonga yokuuvitha. (1 Tim. 6:6) Odhoshili kutya owa pumbwa wo okusila oshimpwiyu aamwoye palutu. (1 Tim.  5:8) Ihe dhimbulukwa kutya shoka tashi ke ya kwathela ya ka hupe sho uuyuni mbuka waSatana tawu ka hanagulwa po, noya ye muuyuni uupe, kashi shi iinima yawo yopamaliko, ihe ekwatathano lyawo ewanawa naJehova. * — Hes. 7:19; 1 Tim. 4:8.

11. (a) Omayele ngoka taga adhika muTimoteus gwotango 6:17-19, otaga vulu ngiini okukwathela aavali ya ninge omatokolo gopandunge sho taya putudha oyana? (b) Omalalakano geni yaandjeni taya vulu okwiitulila po? (Tala oshimpungu “ Omalalakano geni tamu ki itulila po?”)

¹¹ Oshiwanawa lela okumona aavali Aakriste oyendji taya ningi omatokolo gopandunge, opo ya kwathele oyana ya kale popepi naJehova. Ohaya longele Kalunga pamwe. Ohaya ya yi komakugongala nokiigongi. Ohaya kutha wo ombinga miilonga yokuuvitha. Aanegumbo yamwe ohaya vulu nokuli oku ku uvithila kiitopolwa hoka ihaaku uvithilwa olundji. Yo yalwe ohaya ka talela po koBetel nenge ya ka kwathele mooproyeka dhokutunga omatungo gehangano. Ohashi pula oshimaliwa, opo aanegumbo ya ninge iinima mbyoka, notashi vulika wo shi kale oshidhigu kuyo. Ihe uuwanawa mboka haya mono mo, ohawu koleke eitaalo lyawo. (Lesha 1 Timoteus 6:17-19.) Aanona mboka haya putudhwa momagumbo ngoka, olundji uuna ya koko ohaya tsikile okuninga iinima mbyoka, nohaya kala ya pandula sho aavali yawo ye ya putudha momukalo ngoka. * — Omayel. 10:22.

12. Jesus okwa li e na okuninga shike sho a koko?

¹² He yaJesus gwomegulu aluhe oha ningi omatokolo omawanawa. Josef naMaria oya li wo ningi omatokolo gopandunge. Nonando ongawo, sho Jesus a koko, okwa li e na okuninga omatokolo kuye mwene. (Gal. 6:5) Ngaashi aantu ayehe, okwa li e na emanguluko lyokuninga omatokolo. Okwa li ta vulu okutokola okulalakanena tango omahalo ge gopaumwene. Ihe pehala lyaashono, okwa tokola okukaleka po ekwatathano lye ewanawa naJehova. (Joh. 8:29) Oshiholelwa she otashi vulu ngiini okukwathela aagundjuka kunena?

13. Jesus okwa li a ningi etokolo lini lya simana sho omugundjuka?

¹³ Manga a li omugundjuka, Jesus okwa hogolola okuvulika kaavali ye. Ka li nando e ya dhina, nenge u uvite kutya oku shi oshindji e ya vule. Pehala lyaashono, “okwa kala ha vulika kuyo.” (Luke 2:51) Kapu na omalimbililo kutya Jesus okwa li a ha gwanitha po oshinakugwanithwa she e li osheeli. Oku na okukala a li ha longo nuudhiginini i ilonge okuhonga iipilangi kuJosef, opo naye a vule okwaambidhidha yaandjawo pashimaliwa.

14. Otu shi shi ngiini kutya Jesus okwa li ha konakona nawa Oohapu dhaKalunga?

 ¹⁴ Aavali yaJesus otashi vulika ya li haye mu hokololele kombinga yoku valwa kwe kwopashikumithalonga. (Luk. 2:8-19, 25-38) Jesus ka li a gwanenwa kwaashoka a li ha lombwelwa kaavali ye kombinga ye, ihe okwa li wo ha konakona Omanyolo kuye mwene. Otu shi shi ngiini kutya Jesus okwa li ha konakona nawa Oohapu dhaKalunga? Omolwaashoka manga a li okamatyona, aalongi muJerusalem oya li ya “kuminwa oondunge dhe nomayamukulo ge.” (Luk. 2:46, 47) Shimwe ishewe, sho Jesus a li owala e na omimvo 12, okwa li nale e shi kutya Jehova oye He. — Luk. 2:42, 43, 49.

15. Jesus okwa li u ulike ngiini kutya okwa hogolola okulonga ehalo lyaJehova?

¹⁵ Sho Jesus i ilongo shoka Jehova a hala a ninge, okwa hogolola okulonga ehalo Lye. (Joh. 6:38) Okwa li e shi kutya oyendji otaya ka kala ye mu tonde, notashi vulika a li hi ipula muule kombinga yasho. Nonando ongawo, okwa hogolola a vulike kuJehova. Sho Jesus a ninginithwa mo 29 E.N., okulonga ehalo lyaJehova osho oshinima sha li sha simanenena kuye. (Heb. 10:5-7) Shimwe ishewe, sho a li pokusa e endjelela komuti gwomahepeko, okwa li a tokola toko a longe ehalo lyaHe. — Joh. 19:30.

16. Oshiilongomwa shimwe shini aanona taya vulu okwiilonga kuJesus?

¹⁶ Kala ho vulika kaavali yoye. Ngaashi owala Josef naMaria, aavali yoye nayo inaya gwanenena. Nonando ongawo, Jehova okwa pa aavali yoye oshinakugwanithwa shoku ku gamena noku ku dheula. Ngele owa kala ho pulakene komayele gawo nowa simaneka oonkondopangelo dhawo, nena oto ka ‘kala wu na okukalamwenyo okuwanawa.’ — Ef. 6:1-4.

17. Shi ikolelela kuJosua 24:15, etokolo lini aagundjuka ye na okuninga kuyo yene?

¹⁷ Hogolola kutya olye to ka longela. Owu na okukala wa tompwa kutya Jehova oye lye, ehalo lye olya kwatela mo shike, nankene to vulu okukala ho longo ehalo lye monkalamwenyo yoye. (Rom. 12:2) Kungawo opo to ka vula okuninga etokolo ndyoka lya simanenena monkalamwenyo yoye, ano etokolo lyoye lyokulongela Jehova. (Lesha Josua 24:15; Omuuv. 12:1) Ngele owa tsikile okukala ho lesha Ombiimbeli pandjigilile noku yi konakona, oto ka kala wu hole Jehova shi vulithe nale neitaalo lyoye muye ota li ka kala lya kolelela.

18. Etokolo lini aagundjuka ye na okuninga, nota li ke ya etela shike?

 ¹⁸ Hogolola okukala wa pititha komeho ehalo lyaJehova monkalamwenyo yoye. Uuyuni waSatana ohawu uvanekele aantu kutya ngele oya longitha ontseyo ndjoka ye na omolwuuwanawa wawo yene, otaya ka kala ya nyanyukwa. Ihe uushili owo kutya mboka haya lalakanene iinima yopamaliko ohaya “yono po oomwenyo dhawo niimpwiyu oyindji.” (1 Tim. 6:9, 10) Mepingathano naashono, ngele owa pulakene kuJehova e to hogolola okupititha komeho ehalo lye monkalamwenyo yoye, oto ka kala wu na onkalamwenyo tayi ti sha “noto ka katuka pandunge” onkalamwenyo yoye ayihe. — Jos 1:8, NW.

19. Aavali oye na okudhimbulukwa shike?

¹⁹ Aavali, ningeni ngaashi tamu vulu mu kwathele aanona yeni ya longele Jehova. Kaleni mwi ikolelela muye, note ke mu kwathela mu ninge omatokolo gopandunge. (Omayel. 3:5, 6) Dhimbulukweni kutya shoka unene tashi vulu okunwetha mo oyana yeni, kashi shi shoka hamu popi, ihe iilonga yeni. Onkene kaleni hamu ningi omatokolo ngoka taga vulu okukwathela aanona yeni ya kale ya hokiwa kuJehova.

20. Omalalekonuuyamba geni aagundjuka taya ka mona, ngele oya hogolola okulongela Jehova?

²⁰ Aagundjuka, aavali yeni otaya vulu oku mu kwathela mu ninge omatokolo gopandunge monkalamwenyo yeni. Ihe ongoye mwene wu na okuninga omatokolo ngoka, opo wu kale wa hokiwa kuKalunga. Onkee ano, holela Jesus wu longele Tate yetu gwomegulu omunahole. Ngele owe shi ningi, oto ka kala wu na onkalamwenyo yi na eityo, noto ka kala wa nyanyukwa. (1 Tim. 4:16) Monakuyiwa yi li popepi, oto ka kala wo wu na onkalamwenyo itaayi vulu okuyelekwa nasha!