1. Oparadisa yopambepo oshike, notu na okukala twa tokola toko okuninga shike?

 KUNENA, kombanda yevi oku na oparadisa yopathaneko, moka tamu longwa iilonga iiwanawa. Omu na aantu omamiliyona mboka taya nyanyukilwa ombili yashili. Mboka ye li nale moparadisa ndjika, oya tokola toko kaaya ze mo nando. Oya hala wo aantu oyendji ngaashi tashi vulika ye ya wayimine mehala ndika lyopathaneko lya ikalekelwa. Ehala ndyoka oshike? Oparadisa yopambepo! a

2. Oshike oshihokithi kombinga yoparadisa yopambepo?

² Jehova okwa shita momukalo omuhokithi omudhingoloko gwa gundjila, mokati kuuyuni mbuka Satana a ninga ehala lyuutondwe, lyuukolokoshi nolya nika oshiponga. (1 Joh. 5:19; Eh. 12:12) Kalunga ketu omunahole oha mono nkene onkalelo ndjika yiinima hayi ehameke aantu, ihe oha kwathele oshigwana she shi kale shi uvite sha gamenwa, opo shi vule okutsikila oku mu longela sha nyanyukwa. Oohapu dhe otadhi popi oparadisa yopambepo yi li “ehala lyegameno” nosho wo “eyana lya kumwa nawa omeya.” (Jes. 4:6; 58:11) Molwashoka mboka ye li moparadisa yopambepo oya yambekwa kuJehova, ohaya kala ya nyanyukwa noya gamenwa momasiku ngaka omadhigu gahugunina. — Jes. 54:14; 2 Tim. 3:1.

3. Ehunganeko ndyoka li li muJesaja ontopolwa 65 olya li lya gwanithwa ngiini muIsraeli shonale?

³ Jehova okwa popi okupitila momuhunganeki Jesaja kutya onkalo otayi ka kala ya tya ngiini kwaamboka taya ka kala moparadisa  yopambepo. Oohapu ndhoka otadhi adhika muJesaja ontopolwa 65, nodha li dha gwanithwa oshikando shotango momumvo 537 K.E.N. Pethimbo mpoka, Aajuda mboka ya iyele ombedhi, oya li ya mangululwa muupongekwa muBabilonia noya shuna koshilongo shawo. Jehova okwa li a laleke nuuyamba oshigwana she, nokwe shi kwathele shi opalekulule Jerusalem, shoka sha li sha hanagulwa po, nokutungulula otempeli, opo yi kale ishewe ehala lyelongelokalunga lyashili muJerusalem. — Jes. 51:11; Sak. 8:3.

4. Jesaja ontopolwa 65 ota gwanithwa ngiini kunena?

⁴ Ehunganeko lyaJesaja olya li lya gwanithwa oshikando oshitiyali mo 1919 E.N., sho aalongeli yaJehova yokunena ya mangululwa muupika waBabiloni Oshinene. Okuza mpono, oparadisa yopambepo oya ende tayi tamunuka mo. Aauvithi aalaadhi yUukwaniilwa oya li ya toto po omagongalo ogendji, noya li ya imike iiyimati yopambepo. Aalumentu naakiintu mboka ya li aakolokoshi yo yeneyene noye na onkalamwenyo ya nyata, oya li ya ‘zala omuntu omupe ngoka a shitwa a fa Kalunga.’ (Ef. 4:24) Odhoshili kutya omalalekonuuyamba ogendji ngoka ga popiwa kuJesaja otaga ka gwanithwa monakuyiwa, muuyuni uupe. Ihe opu na natango omauwanawa ogendji ngoka tatu nyanyukilwa ngashingeyi moparadisa yopambepo. Natu ka taleni nkene oparadisa yopambepo ye tu guma, nomolwashike kaatu na nando okuza mo muyo.

NKENE MBOKA YE LI MOPARADISA YOPAMBEPO YE UVITE

5. Ngaashi sha uvanekwa muJesaja 65:13, oshike tatu nyanyukilwa moparadisa yopambepo?

⁵ Oye na uukolele noya pepelelwa. Ehunganeko lyaJesaja olya ulike eyooloko enene ndyoka li li pokati konkalamwenyo yaamboka ye li moparadisa yopambepo noyaamboka kaaye mo. (Lesha Jesaja 65:13.) Jehova oha gandja iikulya yopambepo ya gwana kaalongeli ye. Otu na ombepo ye ondjapuki, Oohapu dhe, Ombiimbeli, ‘iikulya niikunuwa ya ha notu na elago,’ nenge tu tye otwa nyanyukwa. (Yelekanitha Ehololo 22:17.) Mepingathano naashono, mboka ye li pondje yoparadisa yopambepo ‘oya sa ondjala nenota noye li momupya.’ Ihaya paluthwa pambepo. — Amos 8:11.

6. Joel 2:21-24 ota hokolola ngiini omasiloshimpwiyu gopambepo, nongiini tatu vulu okumona mo uuwanawa?

⁶ Joel mehunganeko lye okwa li a tumbula iinima mbyoka ya pumbiwa monkalamwenyo, ngaashi iilya, omaviinu nomagadhi gooholivi, a ulike kutya Jehova oha pe aapiya ye nopwaahe na uundalapata shoka ya pumbwa, mwa kwatelwa iikulya yopambepo. (Joel 2:21-24) Shoka ohe shi ningi okupitila mOmbiimbeli nomiileshomwa yetu ya kankamena kOmbiimbeli, okupitila kepandja lyetu lyopaintaneta nosho wo momakugongala nomiigongi iishona niinene. Otatu vulu okumona uuwanawa momasiloshimpwiyu ngoka esiku kehe, noshizemo, ohatu kala tu na uukolele notwa pepelelwa.

7. Oshike hashi tu ningitha tu ‘imbe omahambelelo,’ nenge tu tye, tu kale twa nyanyukwa komutima? (Jesaja 65:14)

⁷ Oya nyanyukwa noya gwanenwa. Oshigwana shaKalunga otashi ka “imba omahambelelo” sha nyanyukwa, molwaashoka osha pandula Jehova noonkondo. (Lesha Jesaja 65:14, yelekanitha OB-1954.) Ooshili tadhi tungu nomauvaneko taga hekeleke, ngoka ge li mOohapu dhaKalunga, netegameno lyetu lya kola lya kankamena kekuliloyambo lyaJesus, ohayi tu kwathele tu kale tu na ‘enyanyu lyokomwenyo.’ Okupopya naamwatate naamwameme kombinga yiinima mbika ohaku tu kwathele tu kale twa nyanyukwa shili. — Eps. 34:8; 133:1-3.

8. Iinima iyali yini tayi dhana onkandangala moparadisa yopambepo?

⁸ Ohole nuukumwe mboka wu li mokati koshigwana shaJehova, oyo iinima iyali tayi dhana onkandangala moparadisa yopambepo.  Ekwatathano lyetu, ndyoka lya fa “epaya,” otali tu kwathele tu mone kutya onkalamwenyo muuyuni uupe otayi ka kala ya tya ngiini, moka aapiya yaJehova taya ka kala ye holathane noonkondo noya hangana shi vulithe kunena. (Kol. 3:14) Omumwameme gumwe okwa popi shoka a ndhindhilika kombinga yoshigwana shaJehova, sho a tsakanene nasho oshikando shotango, a ti: “Kanda li handi kala nda nyanyukwa, nokuli nuuna ndi li noyaandjetu. Oshikando shotango nda mona aantu taya ulukilathana ohole yashili, oosho nda li nda tsakanene nOonzapo dhaJehova.” Kehe ngoka a hala okukala a nyanyukwa shili nokwa gwanenwa, oku na okukala moparadisa yopambepo. Kutya nduno uuyuni mbuka ohawu dhiladhilile shike oshigwana shaJehova, osha iningila edhina lya simana kuJehova nokwaayehe mboka haye mu longele. — Jes. 65:15.

9. Jesaja 65:16, 17 okwa uvaneka shike kombinga yomaupyakadhi gonkalamwenyo?

⁹ Oya mbilipalelwa noya ngungumana. Jesaja 65:14 okwa popya kombinga yaamboka ya hogolola okukala kondje yoparadisa yopambepo kutya otaya “ka ula nomutima gwa nyanyagulwa.” Ongiini kombinga yiinima ayihe mbyono ya kala nokweetela oshigwana shaKalunga uuwehame nosho wo emonolyiihuna? Mokweendela ko kwethimbo, iinima ayihe mbyoka ‘otayi ka hula po notayi ka dhimbiwa.’ (Lesha Jesaja 65:16, 17.) Jehova ota ka kutha po omaupyakadhi getu, nomokweendela ko kwethimbo itatu ka dhimbulukwa we nkene omaupyakadhi ngoka ga li hage tu ningitha tu kale tu uvite.

10. Omolwashike wu uvite kutya oshi li elalekonuuyamba okweendathana naamwatate naamwameme? (Tala wo ethano.)

¹⁰ Nokuli nongashingeyi, ohatu kala twa ngungumana, uuna tu li pokugongala kwopaKriste, mpoka hatu vulu okukala twa mbilipalelwa, mokwaagandja eitulomo kiinima mbyoka hayi tu ningitha tu kale twa gwililwa po. Ohatu kwathele wo aamwatate naamwameme ya kale ye uvite ya ngungumana, uuna tatu ulike ohole, enyanyu, ombili, uukuume neifupipiko, omaukwatya ngoka ge li oshitopolwa shiiyimati yombepo yaKalunga. (Gal. 5:22, 23) Kashi shi tuu elalekonuuyamba enene sho hatu endathana nehangano lyaKalunga! Mboka taya tsikile okukala moparadisa yopambepo otaya ka mona egwanitho lyehunganeko lyaKalunga li na ko nasha ‘negulu epe nevi epe.’

11. Sha ikolelela kuJesaja 65:18, 19, oparadisa yopambepo ndjoka Jehova e tu pa oyi na oku tu guma ngiini?

¹¹ Oya pandula noya nyanyukwa. Jesaja okwa yelitha kutya omolwashike tu na okukala twa ‘nyanyukwa nokuligola pombanda,’ sho tu li moparadisa yopambepo. Oparadisa yopambepo oya shitwa kuJehova. (Lesha Jesaja 65:18, 19.) Onkee ano itashi kumitha sho Jehova te tu  longitha tu kwathele aantu ya thige po omahangano gomuuyuni mbuka, ngoka tage ya sitha ondjala pambepo, moku ya longa oshili kombinga ye, noku ya kwathela ya kale oshitopolwa shoparadisa yetu ombwanawa yopambepo. Otwa nyanyukwa omolwomalalekonuuyamba ngoka hatu mono molwaashoka tu li moshili, nohashi tu inyengitha tu lombwele yalwe kombinga yago. — Jer. 31:12.

12. Iinima mbyoka ya uvanekwa muJesaja 65:20-24 ohayi ku uvitha ngiini, nomolwashike?

¹² Otwa pandula notwa nyanyukwa omolwetegameno ndyoka tu na, omolwekwatathano lyetu ewanawa naJehova. Dhiladhila owala kiinima ayihe mbyoka tatu ka mona notatu ka ninga muuyuni uupe waKalunga! Ombiimbeli oya uvaneka kutya: “Uuhanona itau ka sila we muumputu. . . . Omasiku gaantu yandje otaga ka kala omale ga fa omasiku gomuti.” Otatu ka ‘tunga omagumbo, opo tu kale mo tse yene. Otatu ka tsika omiviinu, opo tu lye iiyimati yadho tse yene. Itatu “ki ihepeka owala,” oshoka Jehova ote ke tu ‘yambeka.’ Okwe tu uvanekela onkalamwenyo ya gamenwa, yinyanyudha noyi na eityo. ‘Manga nokuli inaatu galikana,’ Jehova ota kala e shi shoka kehe gumwe a pumbwa, nota ka “kutitha iinamwenyo ayihe.” — Jes. 65:20-24; Eps. 145:16.

13. Jesaja 65:25 ota hokolola omalunduluko geni, ngoka aantu haya ningi monkalamwenyo yawo, uuna ya tameke okulongela Jehova?

¹³ Oye na ombili noya gamenwa. Kekwatho lyombepo ondjapuki yaKalunga, oyendji mboka ya li ye na omaukwatya ga fa giinamwenyo, oya ninga omalunduluko omandhindhilikwedhi monkalamwenyo yawo. (Lesha Jesaja 65:25.) Oya ninga ngaashi taya vulu ya ethe po omaukwatya gawo omawinayi. (Rom. 12:2; Ef. 4:22-24) Odhoshili kutya oshigwana shaKalunga inashi gwanenena natango, onkee otatu tsikile okuninga omapuko. Ihe nando ongawo, Jehova okwa hanganitha “aantu [yomaludhi agehe, NW]” mboka ye holathane noye na ombili yashili. (Tit. 2:11) Kalunga Omunankondoadhihe oye owala ta vulu okulonga oshikumithalonga shoka.

14. Ongiini omumwatate gumwe a gwanithilwa oohapu ndhoka dhi li muJesaja 65:25?

¹⁴ Mbela aantu otaya vulu ngaa okulundulula lela omaukwatya gawo? Natu ka taleni koshimoniwa tashi landula. Omulumentu omugundjuka, ngoka a ya mondholongo lwiikando oyindji sho a li e na omimvo 20, okwa li lela e na eihumbato lya nyata nomukolokoshi. Okwa li a tulwa mondholongo omolwokuyaka ohauto, okuteya omahala gaantu nomolwomiyonena dhilwe dha kwata miiti. Okwa li wo ha kala a hala okukondja nakehe gumwe. Sho a uvu oshili yOmbiimbeli oshikando shotango, okwa tameke okukala ha yi kokugongala kwOonzapo dhaJehova, nokwa li a tompwa kutya okwa mona kutya elalakano lyonkalamwenyo oshike, ano okulongela Jehova moparadisa yopambepo. Konima sho a ninginithwa okwa li ha dhiladhila aluhe nkene a gwanithilwa Jesaja 65:25. Okwa li a lundulula uukwatya we mboka wa fa wonime, ano omulongi gwomuyonena, e ta kala omunambili a fa onzi.

15. Omolwashike tu na okuhiya yalwe ye tu wayimine moparadisa yopambepo, nongiini tatu vulu oku shi ninga?

¹⁵ Jesaja 65:13 okwa tameke noohapu ndhoka Jehova a popi tadhi ti: ‘Otandi mu lombwele kutya.’ Ovelise 25 oya hula noohapu tadhi ti: “Osho Omuwa ta popi.” Oohapu dhe aluhe ohadhi gwanithwa. (Jes. 55:10, 11) Oparadisa yopambepo opo yi li nale. Jehova oku na uukwanegumbo mboka tawu mu longele wa hangana shili. Oshigwana she oshi na ombili noshi uvite sha gamenwa, muuyuni mbuka wa kolokosha. (Eps. 72:7) Omolwomatompelo ngoka, otwa hala okukwathela oyendji ngaashi tashi vulika ye tu wayimine muumwayinathana wetu wopaKriste. Shoka otatu vulu oku shi ninga, mokukala tatu gandja eitulomo kokuninga aantu aalongwa. — Mat. 28:19, 20.

 NKENE TATU VULU OKUKWATHELA YALWE YE YE MOPARADISA YOPAMBEPO

16. Oshike tashi vulu okukwathela aantu ya kale ya hala okuya moparadisa yopambepo?

¹⁶ Kehe gumwe gwomutse ota dhana onkandangala ya simana, ngele tashi ya pokukwathela yalwe ye ye moparadisa yopambepo. Opo tu shi ninge, otu na okuholela Jehova. Iha kondjithile aantu mehangano lye, ngele inaya hala mo. Pehala lyaashono, oha “eta” aantu nehalo ewanawa kuye. (Joh. 6:44; Jer. 31:3) Aanamitima omiwanawa mboka ya ilonga kombinga yomaukwatya omawanawa gaJehova, ohaya hedha popepi naye nuupu. Ongiini omaukwatya neihumbato lyetu ewanawa tayi vulu okwiinyengitha yalwe ye ye moparadisa yopambepo?

17. Ongiini tatu vulu okwiinyengitha yalwe ye ye moparadisa yopambepo?

¹⁷ Omukalo gumwe moka tatu vulu okukwathela yalwe ye ye moparadisa yopambepo, omokuungaunga nAakriste ooyakwetu nohole nonolukeno. Uuna aantu aape ye ya kokugongala kwetu, otwa hala ya kale ye uvite ngaashi yamwe, mboka ya li kaaye shi ooitaali, ya li ye uvite, mboka tashi vulika ya li ye ya kokugongala muKorinto shonale. Oya ti: “Kalunga oku li mpaka mokati keni.” (1 Kor. 14:24, 25; Sak. 8:23) Onkee ano otu na okuvulika komayele ngoka taga ti kutya “kaleni mu na ombili mokati keni.” — 1 Tes. 5:13.

18. Oshike tashi vulu okwiinyengitha aantu ye ye mehangano lyetu?

¹⁸ Otu na aluhe okutala ko aamwatate naamwameme ngaashi Jehova he ya tala ko. Shoka ohatu shi ningi mokugandja eitulomo komaukwatya gawo omawanawa, ihe hakokwaagwanenena kwawo, hoka lwanima taku ka kala kaaku po we. Otatu vulu okukandula po okwaauvathana kehe momukalo gwopahole, ngele otwa ‘kala tu na uukuume nolukeno. Hatu silathana ohenda nokudhiminathana po oondjo.’ (Ef. 4:32) Shoka otashi ka inyengitha aantu, mboka ya  hala okuungaungiwa nayo momukalo gwa faathana, ye ye moparadisa yopambepo. b

KALA MOPARADISA YOPAMBEPO

19. (a) Sha ikolelela koshimpungu “ Oya zile mo e taya galukile mo,” oshike shoka yamwe ya popya sho ya galukile moparadisa yopambepo? (b) Otu na okukala twa tokola toko okuninga shike? (Tala wo ethano.)

¹⁹ Inatu pandula tuu oparadisa yetu yopambepo! Ombwanawa shi vulithe nale nomu na aalongeli yaJehova oyendji shi vulithe nale. Otwa hala okutsikila okukala twa pandula oparadisa yopambepo ndjoka Jehova e tu pa. Kehe gumwe ngoka a hala okukala a pepelelwa, a gwanenwa, a ngungumana nokwa gamenwa, oku na okuya moparadisa ndjika yopambepo, noke na oku yi thiga po. Ihe otwa pumbwa okukala twa kotoka, molwaashoka Satana ota ningi ngaashi ta vulu e tu heke tu ze mo. (1 Pet. 5:8; Eh. 12:9) Katu na nando oku mu pitika e shi ninge. Natu longeni nuudhiginini, opo oparadisa yopambepo tu yi kaleke ombwanawa, ya yela nomu na ombili.