1, 2. Aantu oyendji ohaya tala ko ngiini iilonga yawo?

AANTU oyendji, olundji iilonga mbyoka haya longo nenge oondondo dhawo odho hadhi ulike kutya oya simana shi thike peni. Momaputuko ogendji, uuna wa hala okutseya omuntu gwontumba, tango oho mu pula epulo ndika: “Oho longo shike?”

² Omathimbo gamwe Ombiimbeli ohayi ithana aantu omadhina gi ikolelela kiilonga mbyoka haya longo. Otayi popi kutya “Mateus, omufendelithi”; “Simon omupeli gwiipa”; notayi ithana “Lukas, ndohotola gwetu omuholike.” (Mat. 10:3; Iil. 10:6; Kol. 4:14) Iinakugwanithwa yopambepo nenge omauthembahenda nayo ohayi ulike kutya omuntu oha ningi shike. Pashiholwa, mOmbiimbeli omwa popiwa omukwaniilwa David, omupolofeti Elia nosho wo omuyapostoli Paulus. Aalumentu mbaka oya li ya lenga iinakugwanithwa yawo mbyoka ya pewa kuKalunga. Sha faathana, natse omauthembahenda ngoka tu na, otu na okukala twe ga lenga.

3. Omolwashike aakokele ya pumbwa okudheulila aagundjuka iinakugwanithwa? (Tala kethano lyopetameko.)

³ Aantu oyendji oye hole iinakugwanithwa yawo mbyoka ya pewa kuKalunga noye hole oku yi longa naanaa ngaashi yi na okulongwa. Shinikitha oluhodhi, okuza kethimbo lyaAdam, omapipi nomapipi ohage  ende taga kulupa nohaga pingenwa po kugalwe. (Omuuv. 1:4) Nokunena, oshinima shika oshi li eshongo enene kAakriste yashili. Kunena iilonga yaJehova yokuuvitha oyi indjipala notaku longithwa omikalo dhopashinanena dhokutaandelitha onkundana ombwanawa kaantu oyendji ngaashi tashi vulika. Opu na omikalo odhindji omipe dhopashinanena dhoku shi ninga, ndhoka kaadhi shi naanaa omipu kaakokele. Aakokele yamwe otashi vulika ya kale ye wete oshidhigu oku dhi longitha. (Luk. 5:39) Nonando shono hasho naanaa uupyakadhi, aagundjuka otashi vulika ye na oonkondo ye vule aakokele. (Omayel. 20:29) Onkee ano, oshi li pahole notashi longo aakokele ya longekidhile aagundjuka iinakugwanithwa iinene. —  Lesha Episalomi 71:18.

4. Omolwashike oshidhigu kaakokele okugandja po iinakugwanithwa yawo kaagundjuka? (Tala oshimpungu “ Omolwashike aakokele yamwe kaaye hole okugandja po iinakugwanithwa yawo?”)

⁴ Aakokele mboka ye na iinakugwanithwa otashi vulika shi kale oshidhigu kuyo oku yi gandja po kaagundjuka. Aakokele yamwe ohaya kala ya tila okukanitha ondondo yawo ndjoka ye hole. Yalwe ohaya kala tayi ipula kutya aagundjuka itaye ke yi longa naanaa ngaashi yi na okulongwa. Niishewe yalwe otashi vulika hayi ipopile kutya kaye na ethimbo lyokudheula yalwe. Mekondjithathano naashino, aagundjuka oye na okukala ya kotokela okukala kaaye na eidhidhimiko uuna itaaya pewa iilonga oyindji kaakokele.

5. Omapulo geni tatu ka kundathana moshitopolwa shika?

⁵ Natu kundathaneni oshinima shika shi na ko nasha nokugandja po iinakugwanithwa momikalo mbali tadhi landula. Gwotango, ongiini aakokole taya vulu okukwathela aagundjuka ya taambe ko iinakugwanithwa, nomolwashike sha simana? (2 Tim. 2:2) Omutiyali, omolwashike sha simana, opo aagundjuka ya kale ye na iikala iiwanawa sho taya kwathele aamwahe mboka ye na owino owindji noyi ilonge sha kuyo? Natu taleni nkene omukwaniilwa David a li a ningile omwana omalongekidho ge na ko nasha niinakugwanithwa ya simana.

6. Omukwaniilwa David okwa li a hala okuninga shike, noshike Jehova a li e mu lombwele?

⁶ Konima yokukala ondjendi uule womimvo,  David okwa ningi omukwaniilwa nokwa li a kala megumbo ewanawa. Sho a mono kutya Jehova ina tungilwa “egumbo” nenge otempeli, okwa li a hala oku yi mu tungila. Onkene okwa li a lombwele omupolofeti Natana a ti: “Ondi li megumbo lya tungika nomisedeli, ihe oshikethahangano shOmuwa osha pungulwa metsali!” Natana okwe mu yamukula a ti: “Ninga shoka wa dhiladhila, oshoka Kalunga oku ku na.” Ihe Jehova okwa ningi po elongekidho li ili. Okwa lombwele Natana a lombwele David ta ti: “Hangoye nguka to tungile ndje otempeli, ndi kale mo.” Nonando Jehova okwa li a shilipaleke pahole David kutya ota ka tsikila oku mu yambeka, okwa ti kutya omwanamati gwe, Salomo oye ta ka tunga otempeli. Mbela David okwa li i inyenge ngiini? —  1 Ondjal. 17:1-4, 8, 11, 12; 29:1.

7. David okwa li i inyenge ngiini kewiliko lyaJehova?

⁷ David ka li e etha okuyambidhidha iilonga yokutungila Jehova otempeli, noina kala ti ipula shi na ko nasha nesimano lyaangoka te ke yi tungitha. Ano osha li sha tseyika kutya otempeli oya tungithwa kuSalomo, ihe hakuDavid. Nonando David okwa li a yemata sho haaye we ta tungitha otempeli ngaashi a li a hala, okwa kala ta yambidhidha iilonga yoku yi tunga. David oku unganeke oongundu dhoku yi tunga nokwa longekidha iitenda, iikushu, iisiliveli, oshingoli nosho wo omiti dhomisedeli. Niishewe, okwa li a ladhipike Salomo a ti: “Mentu gwandje, Omuwa, Kalunga koye, na kale ano nangoye ye na dhiginine euvaneko lye, e ku lagopaleke moku mu tungila otempeli.” —  1 Ondjal. 22:11, 14-16.

8. Omolwashike David a li a thiki pehulithodhiladhi kutya Salomo ke na ontseyo, ihe oshike a li a ningi po?

⁸ Lesha 1 Ondjalulo 22:5. David otashi vulika a li a thiki pehulithodhiladhilo kutya Salomo ita vulu okutonatela iilonga ya simana yi thike mpoka. Kakele kaashono, otempeli oya li yi na ‘okukala onene noya simana,’ na Salomo ethimbo ndyono okwa li “omunona noke na ontseyo.” Ihe nonando ongaaka, David okwa li e shi kutya Jehova ota ka kwathela Salomo a vule okuungaunga niilonga mbyoka e mu pa. Onkee ano, David okwa li u ukitha eitulomo kwaashoka ta vulu okuninga a kwathele noku longekidhe iitungitho ya gwana.

9. Ongiini aamwatate aakokele taya vulu okukala ya nyanyukwa uuna ya gandja po iinakugwanithwa yawo kaamwatate aagundjuka? Shi thaneka.

⁹ Aakokele kaye na okukala yu uvite nayi uuna taya gandja po iinakugwanithwa yawo kaagundjuka. Ihe oye na okutseya kutya shoka sha simana, okudheulila aagundjuka iilonga yaJehova. Aakuluntugongalo aakokele oye na okukala ya nyanyukwa lela uuna aagundjuka mboka ya dheula taya gwanitha po nawa iinakugwanithwa yawo. Oku shi thaneka, dhiladhila komusamane omuvali ngoka ta longo omwanamati okuhinga. Sho omumati a li omushona, okwa li owala ha kala a tala he sho ta hingi. Sho a koko, he okwe mu longo. Opo nduno omumati sho a mono olisinisa, okwa tameke okuhinga. Ihe he okwa kala ngaa natango he mu pukulula sho ta hingi. Omathimbo gamwe otashi vulika ya kala haya ningi omalufo nahe gokuhinga, ihe konima yethimbo omumati okwa kala owala oye ha hingi, molwaashoka he okwa kulupa. He omunandunge okwa  kala ha kala a nyanyukwa uuna omwana te mu hingile, noiha kala e uvite kutya oku na okukala te mu tonatele. Sha faathana, aakokele oye na okukala ye uvite uuntsa uuna taya dheulile aagundjuka iinakugwanithwa yopaKriste.

10. Moses okwa li u uvite ngiini kombinga yesimano noyoonkondopangelo ndhoka a li e na?

¹⁰ Ngaashi aamwatate aakokele, natse otu na okukala ihaatu tsile ondumbo iinakugwanithwa yayalwe. Tala nkene Moses a li i inyenge sho yamwe mokamba yAaisraeli ya li ya tameke okwiihumbata ya fa aapolofeti. (Lesha Numeri 11:24-29.) Josua ngoka a li omuyakuli gwaMoses okwa li a hala oku yi indika. Okwa li ta dhiladhila kutya otaya yi moshipala esimano noonkondopangelo dhaMoses. Ihe Moses okwe mu yamukula a ti: “Owa sila ndje efupa? Ngame onda hala, Omuwa a pe aantu ayehe ombepo; ya hunganeke!” Moses okwa li e wete kutya Jehova oye a li te ya wilike. Moses ka li owala a hala oye a pewe esimano, ihe okwa li a popi kutya omagano gopambepo gokuhunganeka oge na okukala ge niwe kaapiya yaJehova ayehe. Ngaashi Moses, mbela natse ihatu kala twa nyanyukwa ngele yalwe taya mono inaakugwanithwa mbyoka tashi vulika otse twa li tu na oku yi pewa?

11. Omumwatate gumwe okwa ti shike kombinga yokugandja po oshinakugwanithwa she?

¹¹ Kunena, opu na iiholelwa oyindji yaamwatate mboka ya longa noonkondo adhihe uule womimvo noya dheulila aamwatate aagundjuka iinakugwanithwa. Pashiholelwa, omumwatate gwedhina Peter okwa longa uule womimvo dhi vulithe 74 miilonga yethimbo lyu udha, nomimvo 35 dhomudho okwe dhi longo moshitayimbelewa shomoEuropa. Methimbo opo lya zi ko, okwa kala ta longo e li omutonateli gwOshikondo shIilonga. Ngashingeyi omugundjuka gumwe Paul, ngoka a longa pamwe naye uule womimvo, oye ha longo iilonga mbyoka ya li hayi longwa komumwatate Peter. Sho omumwatate Peter a li a pulwa kutya oku uvite ngiini sho oshinakugwanithwa she sha lunduluka, okwa ti: “Onda nyanyukwa noonkondo sho pu na aamwatate mboka ya dheulilwa okutaamba ko iinakugwanithwa ya simana notaye yi gwanitha po nawa.”

12. Oshiilongomwa shini tatu ilongo mehokololo lyOmbiimbeli kombinga yaRehoboam?

¹² Konima sho Salomo a si, omwanamati Rehoboam okwa ningi omukwaniilwa. Sho Rehoboam a li a pumbwa omayele ge na ko nasha nankene e na okuungaunga niinakugwanithwa ye, tango okwe ke ga pula kaasamane aakulupe. Ihe omayele gawo okwe ga dhini. Pehala lyaashono, okwa taamba ko omayele gaagundjuka yepipi lye, mboka ya li ya putukila pamwe naye noya li aagandjindunge ye. Oshilanduliko osha li oshiwinayi noonkondo. (2 Ondjal. 10:6-11, 19) Oshike tatu ilongo mo moshiholelwa shaRehoboam? Oshi li pandunge okukonga omayele kaakokele nokudhiladhila nawa kugo, oshoka oye na owino. Nonando aagundjuka kaye na okukala yu uvite taya thiminikwa okuninga iinima ngaashi naanaa ya li hayi ningwa nale kaakokele, oye na okukala ya simaneka omayele gaakokele noku ga taamba ko.

13. Aagundjuka oye na okulongela kumwe ngiini naakokele?

¹³ Aagundjuka yamwe otashi vulika ya pewe iilonga yokuunganeka mbyoka ya li hayi longwa nale kaamwatate aakokele. Nonando aamwatate mboka oya pewa iinakugwathwa mbyoka, otashi ka kala oshiwanawa okwiilonga sha montseyo nomiimoniwa yaakokele, manga inaaya ninga omatokolo. Paul ngoka a tumbulwa metetekelo, ngoka a pingena po omumwatate Peter mokutonatela oshikondo shomoBetel okwa ti: “Onda li nda kongo ethimbo lyokupula omayele komumwatate Peter, nonda li nda ladhipike yalwe moshikondo shandje ya ninge sha faathana.”

14. Oshike twi ilonga kelongelokumwe pokati kaTimoteus nomuyapostoli Paulus?

¹⁴ Omulumentu omugundjuka Timoteus, okwa  li a longo pamwe nomuyapostoli Paulus uule womimvo. (Lesha Aafilippi 2:20-22.) Paulus okwa li a nyolele kegongalo lyokuKorinto a ti: “Otandi mu tumine Timoteus. Oye omumwandje omuholike nomwiinekelwa mOmuwa. Oye te ke mu dhimbulukitha omikalo adhihe ndi dhi na mokukala kwandje akuhe muKristus Jesus, naandhoka tandi longo aantu momagongalo agehe.” (1 Kor. 4:17) Oohapu ndhika dhi li paufupi otadhi ulike ekwatathano lyopothingo ndyoka lya li pokati kaPaulus naTimoteus. Paulus okwa li a kongo ethimbo a longe Timoteus ‘omikalo adhihe e na mokukala kwe akuhe muKristus Jesus.’ Paulus okwa li e shi nawa Timoteus noku mu hole, nokwa li e na einekelo kutya Timoteus ota ka sila oshimpwiyu pambepo aantu yokuKorinto. Shika kashi shi tuu oshiholelwa oshiwanawa kaakuluntugongalo aakokele yokunena sho taya dheula aalumentu aagundjuka nkene ye na okugwanitha po iinakugwanithwa yawo megongalo!

15. Omayele gaPaulus ngoka a pe Aakriste yokuRoma otage tu kwathele ngiini uuna twa gumwa komalunduluko?

¹⁵ Otu li methimbo lituntula. Ehangano lyaJehova lyokombanda yevi otali koko momikalo odhindji, ihe ekoko lyalyo otali endele pamwe nomalunduluko. Uuna omalunduluko ge tu gumu paumwene, natu ifupipike e tatu gandja eitulomo kiinima yaJehova peha lyoyetu. Okuninga ngawo otaku humitha komeho uukumwe. Paulus okwa li a nyolele Aakriste yokuRoma a ti: “Onda hala oku mu lombwela one amuhe: Inamu idhiladhilila pehala mpoka inaamu adha, ihe dhiladhileni pandjele. Kehe gumwe gwomune ni iyeleke pamuthika gweitaalo ndyoka Kalunga e li mu pa. Otse otu na iilyo oyindji molutu lumwe, nakehe shimwe shomiilyo mbika oshi na oshilonga shasho shi ili. Osho wo, nonando tse otu li po oyendji, otse olutu lumwe muukumwe naKristus.” —  Rom. 12:3-5.

16. Aakuluntugongalo aakokele naalumentu aagundjuka nosho wo aakulukadhi yawo oye na okuninga shike, opo ya kaleke ombili nuukumwe mehangano lyaJehova?

¹⁶ Kutya nduno onkalo yetu oya fa peni, atuheni natu ninge ngaashi tatu vulu tu pitithe komeho esimano lyUukwaniilwa waJehova. Ne aakuluntugongalo aakokele, kwatheleni aalumentu aagundjuka ya kale taya vulu okulonga shoka mwa li hamu longo. Ne aalumentu aagundjuka, taambii ko neifupipiko iinakugwanithwa mbyoka tamu pewa kaakuluntugongalo aakokele nokukala mwe ya simaneka. Ne aakulukadhi, holeleni omukulukadhi gwaAkula, Priskila, ngoka a li he ende pamwe naAkula nohe mu yambidhidha nuudhiginini sho oonkalo dhawo dha li dha lunduluka. —  Iil. 18:2.

17. Jesus okwa li i inekelele aalongwa ye shike, nokwa li e ya dheulile shike?

¹⁷ Moshinima shi na ko nasha nokudheula yalwe ya taambe ko iinakugwanithwa mbyoka tayi indjipala, oshiholelwa shaJesus osho oshiwanawa nokulandulwa. Jesus okwa li e shi kutya uukalele we wokombanda yevi otawu ka hula po nonokutya yalwe otaya ka longa iilonga mbyoka a li ha longo. Nonando aalongwa ye oya li inaaya gwanenena, okwa li e yi inekela nokwa li e ya lombwele kutya otaya ka longa iilonga iinene yi vule mbyoka a li ha longo. (Joh. 14:12) Okwa li e ya dheula nawa, noya li yu uvitha onkundana ombwanawa muuyuni awuhe. —  Kol. 1:23.

18. Iilonga yini tatu ka longa monakuyiwa, noshike tatu vulu okuninga ngashingeyi?

¹⁸ Jesus konima yeso lye lyopayambo, okwa yumudhwa a ka kale megulu moka a pewa iilonga oyindji yokupangela ‘aapangeli ayehe, aaleli aanankondo naawa.’ (Ef. 1:19-21) Ngele otwa si aadhiginini manga Armagedon inee ya, otatu ka yumuka tu ka kale muuyuni uupe, moka tamu ka kala iilonga oyindji noyinyanyudha kutse. Ihe nonando ongaaka, ngashingeyi opu na iilonga ya simanenena mbyoka atuheni tatu vulu oku yi longa, iilonga yokuuvitha onkundana ombwanawa noyokuninga aantu aalongwa. Atuheni, aagundjuka nenge aakulupe, natu kaleni twi “ipyakidhila aluhe niilonga yOmuwa.” —  1 Kor. 15:58.