1. Shi ikolelela kAafilippi 2:3, ongiini okukala kwetu neifupipiko taku vulu oku tu kwathela tu kale tu na ekwatathano ewanawa nayalwe?

OHATU vulika komithikampango dhaJehova neifupipiko, molwaashoka otu shi kutya oha kala aluhe e shi shoka she tu opalela. (Ef. 4:22-24) Eifupipiko ohali tu inyengitha tu pitithe ehalo lyaJehova komeho yomahalo getu yene, notu tale ko yalwe ye tu vule. Oshizemo, ohatu kala tu na ekwatathano ewanawa naJehova nosho wo nooitaali ooyakwetu. — Lesha Aafilippi 2:3.

2. Omuyapostoli Paulus okwa li a zimine shike, noshike tatu ka kundathana moshitopolwa shika?

² Ngele inatu kotoka, otatu vulu okunwethwa mo kaantu yomuuyuni waSatana, mboka ye na uuntsa noyi ihole yo yene. * Osha fa shi li ngeyi kutya yamwe mboka ya li ko omimvo 2 000 nasha dha ka pita, nayo oya li ya nwethwa mo momukalo moka. Onkee ano, omuyapostoli Paulus okwa li a nyolele Aaroma a ti: “Onda hala oku mu lombwela one amuhe: Inamu idhiladhilila pehala mpoka inaamu adha, ihe dhiladhileni pandjele.” (Rom. 12:3) Paulus okwe shi zimina kutya otwa pumbwa wo okudhiladhila kombinga yetu yene. Ihe nonando ongawo, eifupipiko otali ke tu kwathela tu itale ko pandjele. Oshitopolwa shika otashi ka kundathana iinima itatu, moka eifupipiko tali ke tu kwathela tu yande okudhiladhila unene kombinga yetu. Iinima mbyoka oyo (1) ondjokana, (2) iinakugwanithwa mbyoka tu na mehangano lyaJehova (3) okulongitha kwetu omakwatathano gopaintaneta.

3. Omolwashike mondjokana tashi vulika mu holoke okwaauvathana, nayamwe ohayi inyenge ngiini?

³ Jehova sho a toto po ondjokana, okwa hala omusamane nomukulukadhi ya kale mo ya nyanyukwa. Kapu na omuntu a gwanenena, onkee okwaauvathana otaku vulu okuholoka po. Paulus okwa nyola kutya mboka taya yi mondjokana, oya tegelela oku ka tsakaneka uudhigu wontumba. (1 Kor. 7:28) Yamwe ohayi iyadha taya nyenyeta olundji nookuume kawo kopandjokana, notashi vulika ya thike pehulithodhiladhilo kutya inaya opalelathana. Ngele oya nwethwa mo kuuyuni, otaya ka dhiladhila mbala kutya okuhengana okwo ekandulopo lyomukundu. Ohaya dhiladhila owala kombinga yawo yene, nonokutya otaya vulu owala okukala ya nyanyukwa, ngele oya hengana.

4. Oshike tu na okuyanda?

⁴ Otu na okuyanda okudhiladhila kutya ondjokana yetu oya hulila muunyengwi. Otu shi kutya Ombiimbeli oya pitika owala omuntu a teye ondjokana, ngele kuume ke kopandjokana a yi moluhondelo. (Mat. 5:32) Onkee ano, ngele otwa tsakaneke uudhigu mboka wa popiwa kuPaulus, katu na okweetha nando uuntsa wu tu ningithe tu ipule ngeyi: ‘Mbela ondjokana ndjika otayi gwanitha po oompumbwe dhandje? Kuume kandje ohu ulukile ndje ngaa ohole ndjoka ndi na okuulukilwa? Mbela otandi ka kala lela nda nyanyukwa, ngele onda mono po gumwe?’ Ndhindhilika kutya omuntu momapulo ngoka oku ukitha owala eitulomo kuye mwene. Uunongo wopauyuni otawu ku lombwele wu landule omutima gwoye nowu ninge owala shoka tashi ku nyanyudha, nonando otashi teya po ondjokana yeni. Ihe uunongo wopaKalunga otawu ti kutya “lalakanena uuwanawa wooyakweni wo, haamboka ashike woye mwene.” (Fil. 2:4) Jehova okwa hala wu kale mondjokana yeni, ihe haku henga po kuume koye. (Mat. 19:6) Okwa hala oye wu dhiladhile tango, ihe haku gandja eitulomo kungoye mwene.

5. Shi ikolelela kAaefeso 5:33, omusamane nomukulukadhi oye na okuungaungathana ngiini?

 ⁵ Omusamane nomukulukadhi oye na okuungaungathana nohole nonesimaneko. (Lesha Aaefeso 5:33.) Ombiimbeli otayi tu longo tu gandje eitulomo kokugandja pehala lyokupewa. (Iil. 20:35) Uukwatya wuni tawu ka kwathela aaihokani yu ulukilathane ohole nesimaneko? Eifupipiko. Aasamane naakulukadhi mboka aaifupipiki, ihaya longo owala shoka she ya opalela, ihe ‘ohaya tala wo shoka tashi opalele yakwawo.’ — 1 Kor. 10:24.

6. Oshike wi ilonga kwaashoka sha popiwa kuSteven naStephanie?

⁶ Eifupipiko olya kwathela aaihokani oyendji Aakriste, ya kale ya nyanyukwa mondjokana. Pashiholelwa, omusamane gwedhina Steven, okwa ti: “Ngele ohamu kwathelathana, otamu ka longela kumwe, unene tuu ngele pwa holoka uupyakadhi. Pehala lyokudhiladhila kutya ‘oshike sho opalela ndje’ oto ka dhiladhila to ti, ‘oshike she tu opalela?’” Omukulukadhi gwe, Stephanie, naye ota tsu kumwe naye. Ota ti: “Kapu na ngoka a hala okukala nomuntu ngoka e hole okunyenyeta. Uuna pwa holoka okwaauvathana, ohatu tala kutya oshike she etitha uupyakadhi. Opo nduno tatu galikana, tatu ningi omapekapeko nokutala kutya otatu wu kandula po ngiini. Ohatu kambadhala okukandula po uupyakadhi, ihe ihatu iyuka po tse yene.” Omusamane nomukulukadhi ohaya mono mo uuwanawa, uuna kaapu na ngoka ta dhiladhila kutya okwa simana e vule mukwawo.

7. Uuna omumwatate a pewa oshinakugwanithwa, oku na okukala e na iikala yini?

⁷ Okulongela Jehova momukalo kehe tatu vulu, otwe ku tala ko ku li uuthembahenda. (Eps. 27:4; 84:10) Ngele omumwatate oku na ehalo lyokulonga oshindji mehangano lyaJehova, oshi shi okupandulwa. Ombiimbeli otayi ti: “Omulumentu ngoka a hala okuninga omuwiliki gwegongalo lyaKalunga, oye okwa hala oshilonga oshiwanawalela.” (1 Tim. 3:1) Nonando ongawo, uuna a pewa oshinakugwanithwa, ke na okudhiladhila kutya ngashingeyi oku li omuntu a simana. (Luk. 17:7-10) Elalakano lye oli na okukala okuyakula yalwe neifupipiko. — 2 Kor. 12:15.

8. Oshike tatu ilongo koshiholelwa shaDiotrefes, Ussia naAbsalom?

⁸ MOmbiimbeli omu na iiholelwa tayi londodha yaantu mboka ya li yi itala ko ya simana. Diotrefes ka li omwiifupipiki, molwaashoka okwa li i iholele ‘komeho’ megongalo. (3 Joh. 9) Ussia okwa li a kambadhala neinenepeko a longe oshilonga shoka Jehova inee mu pula e shi longe. (2 Ondjal. 26:16-21) Absalom okwa li a hala okuninga omukwaniilwa, onkene okwa kambadhala okwiininga a fa e hole aantu nelalakano ye mu ambidhidhe. (2 Sam. 15:2-6) Ngaashi iiholelwa yomOmbiimbeli mbyoka ye shi ulike sha yela, Jehova iha kala a hokwa aantu mboka hayi ikongele esimano. (Omayel. 25:27) Pehulilo, uuntsa nesimano ohayi fala owala omuntu moshiponga. — Omayel. 16:18.

9. Jesus okwe tu tulila po oshiholelwa shini?

⁹ Mepingathano niiholelwa mbyoka twa zi nokukundathana, natu ka tale kuJesus. Ombiimbeli otayi ti: “Oye okwa li e na uukwatya waKalunga, ye ina dhiladhila nando olumwe, a kambadhale nokuhakana okukala a fa Kalunga.” (Fil. 2:6) Nonando Jehova oye owala e na oonkondopangelo dhi vule dhaJesus, Jesus ini idhiladhilila pehala mpoka itaa adha. Okwa lombwele aalongwa ye a ti: “Ngoka gwomokati keni omudhinwa kwaayehe, oye omukuluntu.” (Luk 9:48) Kashi li tuu elalekonuuyamba okulonga pamwe naakokolindjila, naayakuligongalo, naakuluntugongalo nosho wo naatonatelishikandjo mboka haya holele Jesus mokuulika eifupipiko! Aapiya yaJehova aaifupipiki ohaya ulukilathana ohole, ndjoka hayi ndhindhilikitha mo ehangano lyaKalunga. — Joh. 13:35.

10. Oto ka ninga po shike, ngele owu wete megongalo mu na uupyakadhi wontumba, nowu uvite kutya itawu ungaungiwa nawo momukalo moka shi na okuningwa?

 ¹⁰ Oto ka ninga po shike, ngele owu wete megongalo mu na uupyakadhi wontumba nowu uvite kutya itawu ungaungiwa nawo momukalo moka shi na okuningwa? Pehala lyokunyenyeta, oto vulu okuulika eifupipiko, mokwaambidhidha mboka taya kwatele komeho. (Heb. 13:17) Opo wu shi ninge, ipula ngeyi: ‘Mbela uupyakadhi mboka ndi wete, owa kwata lela miiti nowa pumbwa okukatukilwa onkatu? Mbela ndika olyo ngaa ethimbo lyo opala wu katukilwe onkatu? Mbela shika oshinakugwanithwa shandje? Paulelalela, mbela otandi kambadhala okuhumitha komeho uukumwe megongalo nenge otandi kambadhala okwiimonikitha nda simana?’

11. Shi ikolelela kAaefeso 4:2, 3, iizemo yini tatu ka mona, ngele otwa longele Jehova neifupipiko?

¹¹ Jehova okwa lenga eifupipiko shi vulithe puunkulungu, nokwa lenga uukumwe shi vulithe pokupondola. Onkee ano, ninga ngaashi to vulu wu longele Jehova neifupipiko. Mokuninga ngawo, oto ka humitha komeho uukumwe megongalo. (Lesha Aaefeso 4:2, 3.) Kala omulaadhi muukalele. Konga omikalo wu kwathele yalwe, moku ya ningila sha oshiwanawa. Kala ho yakula aantu ayehe, mwa kwatelwa naamboka kaaye na iinakugwanithwa megongalo. (Mat. 6:1-4; Luk. 14:12-14) Uuna to longo neifupipiko pamwe negongalo, yalwe itaya ka ndhindhilika owala uunkulungu woye, ihe neifupipiko lyoye.

12. Mbela Ombiimbeli oye tu ladhipika tu kale tu na ookuume? Shi yelitha.

¹² Jehova okwa hala tu kale hatu nyanyukilwa pamwe nookuume ketu nonaantu yaandjetu. (Eps. 133:1) Jesus okwa li e na ookuume aawanawa. (Joh. 15:15) Ombiimbeli oya popya omauwanawa ngoka haga zi mokukala tu na ookuume  yashili. (Omayel. 17:17; 18:24) Otayi tu lombwele wo kutya okwiiyoolola ko kaantu kaku shi okuwanawa. (Omayel. 18:1) Oyendji oyu uvite kutya omakwatathano gopaintaneta ogo omukalo gwokumona ookuume oyendji nokuyanda okwiikalela. Nonando ongawo, otwa pumbwa okukala twa kotoka, uuna tatu longitha omukalo nguka gwomakwatathano.

13. Omolwashike yamwe mboka haya longitha omakwatathano gopaintaneta, hayi iyadha yu uvite uuwike noya polimana?

¹³ Omakonakono oge shi ulika kutya aantu mboka haya longitha ethimbo olindji mokutala omathano gayalwe komakwatathano gopaintaneta, otashi vulika yi iyadhe yu uvite uuwike noya polimana. Omolwashike mbela? Etompelo limwe olyo kutya olundji aantu komakwatathano gopaintaneta, ohaya tula ko omathano gawo ngoka ga simanenena monkalamwenyo yawo, gawo ngoka ga dhenga mbanda, gookuume kawo nogomahala omawanawa hoka ya li. Omuntu ngoka ta tala omathano ngoka, otashi vulika a thike pehulithodhiladhilo kutya okwa thigala po nenge nokuli a dhiladhile kutya ye omuntu gwowala. Omumwameme gwomimvo 19, okwa ti: “Kanda li handi kala nda nyanyukwa, uuna nda mono yalwe ya tyapula omahuliloshiwike, omanga nda li megumbo nda sa ezaza.”

14. Ongiini omayele gopaMbiimbeli ngoka taga adhika muPetrus gwotango 3:8, tage tu kwathele tu longithe omakwatathano gopaintaneta pandunge?

¹⁴ Odhoshili kutya omakwatathano gopaintaneta, otaga vulu okulongithwa nelalakano ewanawa. Pashiholelwa, otatu vulu oku ga longitha tu kwatathane noyaandjetu nonookuume ketu. Nonando ongawo, owe shi koneka ngaa kutya yimwe yomiinima mbyoka aantu haya tula ko, onelalakano lyokwiisimanekitha? Oya fa ya hala okutya, “owu wete ndje ngaa?” Yamwe nokuli pomathano gawo nenge ngoka ya tuminwa kuyalwe, ohaya nyola po iinima yaa na omutse nandungu. Shoka nasho oshi li ompinge neifupipiko nosho wo uukwawo wanankali, mboka Aakriste ya ladhipikwa ya kale ye na.— Lesha 1 Petrus 3:8.

15. Ombiimbeli otayi vulu ngiini oku tu kwathela tu yande okwiitala ko twa simana?

¹⁵ Ngele oho longitha omakwatathano gopaintaneta, ipula to ti: ‘Mbela iinima mbyoka handi nyola ko, omathano ngoka handi tula ko nenge uuvidio, otayi ulukile yalwe kutya otandi inomo? Mbela otandi ningitha yalwe ya kale ya sa ondumbo?’ Ombiimbeli otayi ti: “Iinima ayihe mbyoka  yi li muuyuni, inayi za muTate, ihe oyomuuyuni. Iinima mbika oyo uuhalu wopantu okuhola mbyoka aantu taye yi tala notaye yi itangele.” (1 Joh. 2:16) Ombiimbeli yimwe oya toloka uutumbulilo “okuhola mbyoka aantu taye yi tala notaye yi itangele” kutya “okukala wa hala okumonika wa simana.” Aakriste inaya pumbwa okukala yu uvite ya simana ye vule yalwe. Ohaya landula omayele gOmbiimbeli ngoka taga ti: “Inatu kaleni tu na uuntsa, tu hindathaneni nenge tu silathaneni efupa.” (Aag. 5:26) Eifupipiko otali ke tu kwathela tu yande ombepo yuuyuni, yokwiitala ko twa simana.

16. Omolwashike tu na okuyanda uuntsa?

¹⁶ Otwa pumbwa okukala tu na eifupipiko, molwaashoka aantu mboka ye na uuntsa, ihaya ‘dhiladhila pandjele.’ (Rom. 12:3) Aantu mboka ye na uuntsa, oye hole okutsa oompata noyi ihole yo yene. Okudhiladhila kwawo niilonga yawo, olundji ohaku ya etele eyeme nosho wo yalwe. Ngele itaya lundulula omukalo gwawo gwokudhiladhila, omadhiladhilo gawo otaga ka pukithwa nokuvundakanithwa kuSatana. (2 Aakor. 4:4; 11:3) Ihe omuntu ngoka omwiifupipiki, oha dhiladhila pandjele. Ohi itala ko pandjele noha kala e shi kutya yalwe oye mu vule momikalo odhindji. (Fil. 2:3) Oku shi wo kutya “Kalunga oha tondo aainenepeki, ihe oha sile ohenda aaishonopeki.” (1 Pet. 5:5) Mboka haya dhiladhila pandjele, ihaya kala ya hala Jehova a ninge omutondi gwawo.

17. Oshike tu na okuninga, opo tu tsikile okukala aaifupipiki?

¹⁷ Opo tu tsikile okukala aaifupipiki, otu na okutula miilonga omayele gOmbiimbeli, ngoka taga ti kutya natu ‘ihule omuntu gwetu omukulu pamwe nomikalo dhe, nokuzala omuntu omupe.’ Shoka otashi pula okulonga nuudhiginini. Otwa pumbwa okukonakona oshiholelwa shaJesus nokukambadhala oku mu holela naanaa ngaashi tashi vulika. (Aakol. 3:9, 10; 1 Pet. 2:21) Ngele otwe shi ningi, otashi ke tu etela uuwanawa noonkondo. Ngele otwa kala aaifupipiki, yaandjetu otaya ka kala ya nyanyukwa shi vulithe nale, otatu ka humitha uukumwe megongalo notatu ka kala tu shi okuyanda okulongitha omakwatathano gopaintaneta momukalo omwiinayi. Komeho gaayihe, Jehova ote ke tu laleka nuuyamba nota ka kala e tu hokwa.