Onda valwa mo 1954, nda valelwa moSt. Paul, shaMinnesota, moAmerika. Aavali yandje oya li ngaa ye na sha, ihe hayo naanaa. Otwa valwa tu li yatano, nangame omutiyali. Tse otwa li Aakatoolika kaRoma. Ngame onda li handi yi kosikola yaKatoolika, nonda li handi kwathele oopata mongeleka. Ihe natango kanda li naanaa ndi na ontseyo oyindji kombinga yOmbiimbeli. Nonando onda li ndi itaala kutya oku na Kalunga ngoka a shita iinima ayihe, kanda li ndi itaala kutya ongeleka yaKatoolika otayi vulu okukwathela ndje ndi mu tseye.

Momumvo gwandje gwotango, sho nda li tandi ilongele uutseyiveta kosikola koWilliam Mitchell, Oonzapo dhaJehova odha konkola pegumbo lyandje. Molwaashoka onda li ndi ipyakidhila nokuyoga iinima yandje, onda li nde ya lombwele ya galuke. Naaihokani mboka oya ka galukila ndje. Sho ya galuka, onde ya pula omapulo ngaka gaali: “Omolwashike aantu mboka aawinayi oyo owala haya pondola muuyuni?” nosho wo kutya “Oshike tashi vulu okweetela aantu enyanyu monkalamwenyo?” Oya pe ndje okambo Oshili ndjoka tayi fala kOmwenyo Gwaaluhe nosho wo Ombiimbeli yOshiingilisa yo-New World Translation yoshipeko oshizizi tashi monika nawa. Onda zimine wo ndi konakone Ombiimbeli nayo. Ekonakonombiimbeli ndyoka  olya kwathele ndje lela, ndi uve ko iinima oyindji tayi nyanyudha. Onda li nda nyanyukwa lela okwiilonga kutya Uukwaniilwa waKalunga, owo epangelo lyolela, ndyoka tali ke ya okupangela kombanda yevi. Onda li wo nda mono kutya omapangelo gopantu oga ndopa thiluthilu noge etela owala aantu uuwehame, okumona iihuna, okwaanuuyuuki niinima yilwe iiwinayi oyindjiyindji.

Ondi iyapulile Jehova petameko lyomumvo 1982. Lwanima momumvo ngoka, onda ninginithwa poshigongi shoshitopolwa shi na oshipalanyolo, “Oshili yUukwaniilwa.” Oshigongi shoka osha ningilwe moSt. Paul Civic Center. Moshiwike sha landula ko, onda shuna ko, ndi ka nyole ekonakono lyandje lyahugunina, opo ndi vule okuninga omutseyiveta. Petameko lyaKotoba, onda tseyithilwa kutya onda pita ekonakono, nonda gwana okuninga omutseyiveta.

Poshigongi shoshitopolwa shoka, onda li nda tsakanene po naMike Richardson, ngoka e li koBetel yaBrooklyn. Okwa lombwele ndje kutya koombelewa dhetu oonene, okwa totwa oshikondo shiikwaveta. Onda dhimbulukwa oohapu dhelenga lyokuEtiopia ndhoka dhi li mIilonga 8:36, nondi ipula nda ti: ‘Oshike tashi imbi ndje ndi ka longe kOshikondo shIikwaveta?’ Okuza mpoka, onda udhithile koBetel.

Aavali yandje kaya li ya nyanyukwa, sho nda ningi Onzapo yaJehova. Tate okwa pula ndje kutya sho tandi ka longa koBetel ndi li ongomutseyiveta, omauwanawa geni tandi ka mona? Onde mu tseyithile kutya otandi ka longa owala ndi li omwiiyambi. Onde mu lombwele kutya otandi ka kala handi mono okandjambi koodola dhaAmerika 75, hoka haka pewa Aabetel ayehe komwedhi.

Molwaashoka onda li nda zimina oku ka longa kompangu konima ngele nda mana eilongo lyandje, kanda li tandi vulu okuya nda ukilila koBetel. Onkee onda ka ya koBetel yaBrooklyn moNew York, mo 1984. Onda tulwa kOshikondo shIikwaveta. Ontseyo ndjoka nda mono sho nda li handi longo mompangu, oya kwathele ndje ndi ilongekidhile shoka shi li komeho.

MuNovomba 1983, otwa landa po ehala lyokuningilwa omaudhano moJersey City, moNew Jersey. Aamwatate oya ningi eindilo lyokulongulula omalusheno nominino dhetungo ndyoka. Sho aamwatate ya tsakanene naakwanepangelo, oye ya lombwele kutya oya hala ehala ndika lyaStanley ye li ninge ehala lyokuningila iigongi yOonzapo dhaJehova. Shoka oshe eta uupyakadhi. Elelo lyoshilando olya tula po oompango kutya omahala gomalongelokalunga, oge na owala okukala kombinga hoka ku na omagumbo. Ehala lyokuningila omaudhano lyaStanley, olya li mondoolopa komahala gomangeshefelo. Onkee elelo lyoshilando olya tindi eindilo lyetu. Aamwatate oya tula mo oshipotha, noshipotha oshe ekelwahi.

 Moshiwike shotango nde ya moBetel, ehangano olya tula mo oshipotha mompangu yomoshitopolwa, shi na ko nasha nokutindilwa uuthemba kelelo lyoshilando. Molwaashoka onda longa omimvo mbali mompangu yomoshitopolwa St. Paul, moMinnesota, iipotha yoludhi ndoka oya li okati komokutsi kungame. Omutseyiveta omukwetu gumwe okwa ti ehala lyokuningilwa omaudhano lyaStanley, ohali longithwa miiningwanima yi ili noyi ili, okuza ngaa kookino sigo okoongalo. Omolwashike kaashi li pampango li longithwe miinima yopalongelokalunga? Ompangu yomoshitopolwa oya popi kutya elelo lyaJersey City, kalya li lya simaneka nando uuthemba wetu wokulongela Kalunga. Ompangu oya gandja elombwelo kutya elelo lyoshilando nali gandje uuthemba kaamwatate. Onda mono nkene Jehova ta yambeke ehangano lye, okupitila moshikondo shiikwaveta a humithe komeho iilonga ye. Onda li nda nyanyukwa, sho nda kutha ombinga moshipotha shoka.

Aamwatate oya ningi oshikonga oshinene shokwoopalekulula etungo ndyoka, niilonga oya pu nziya. Nokuli mOshinyanga shIigongi shomoJersey City, omo mwa ka ningilwa egandjo lyoonzapo yOsikola yaGilead yongundu onti-79, mo 8 Septemba 1985. Osha li uuthembahenda kungame okukwathela miilonga yaJehova. Oshe etela ndje enyanyu enene, li vulithe pwaandyoka nda li ndi na, manga inaandi ya koBetel. Kanda li ndi shi ngele Jehova ona ka longithe ndje miipotha oyindji.

Mo 1980 nasha, oondohotola naapangi kaya li ya hala Oonzapo tadhi pangwa nopwaa na okutulwa ombinzi. Aakulukadhi mboka ye li momategelelo, oya li ye li muupyakadhi unene, molwaashoka aapanguli olundji oya li haya kala yu uvite kutya aakulukadhi kaye na uuthemba wokutinda okutulwa ombinzi. Aapanguli oya li haya gandja omatompelo kutya ngele omukulukadhi okwa kala inaa tulwa ombinzi, nena okanona otaka vulu okuninga othigwa.

Mo 29 Desemba 1988, omumwameme Denise Nicoleau, okwa li a kanitha ombinzi oyindji konima yokumona okanona ke kokamati. Ombinzi ye oya li ya gu pevi sigo 5,0. Molwaashoka onkalamwenyo ye oya li moshiponga, ndohotola gwe okwa li a hala omumwameme a zimine okutulwa ombinzi. Ihe omumwameme Nicoleau okwa li e shi tindi. Esiku lya landula ko, oshipangelo osha pula omupanguli, opo shi pewe epitikilo shi tule omumwameme ombinzi. Omupanguli ina pa nando omumwameme Nicoleau nenge omusamane gwe ompito, opo ya popye nkene yu uvite. Nenge e ya tseyithile kutya okwa gandja nale epitikilo koshipangelo, opo shi mu tule ombinzi.

MEtitano mo 30 Desemba, oshipangelo osha tula omumwameme Nicoleau ombinzi, nonando omusamane gwe nosho wo aakwanezimo yalwe mboka ya li ye mu kalela moshipangelo, oya li ye shi tindi. Ongulohi oyo tuu ndjoka aakwanezimo yamwe nosho wo aakuluntugongalo yaali lwaampono oya li ya mangwa po, molwaashoka aniwa oya li ya kundukidha ombete yomumwameme Nicoleau, taya keelele opo kaa tulwe ombinzi. Esiku lya landula ko, iifokundaneki, ootiivii  nooradio dhomoNew York City, oya li tayi kundaneke ekwatopo ndyoka.

Ongula yOmaandaha, onda popi nomupanguli gwompangu yopombanda, Milton Mollen. Onde mu yelithile kombinga yoshipotha shoka kutya aapanguli yamwe, oya gandja elombwelo omumwameme a tulwe ombinzi nopwaa na oku mu pula epitikilo. Omupanguli Mollen okwa pula ndje ndi galukile kombelewa ye komatango, opo tu ye tu kundathane kombinga yoshipotha shoka, nokutala wo oompango ndhoka tadhi popile oshipotha shoka. Kongulohi omutonateli goshikondo shetu, Philip Brumley, otwa yi pamwe naye kombelewa yomupanguli Mollen. Omupanguli okwiithana wo ahende gwoshipangelo, opo e tu wayimine. Oonkundathana dhetu odha li lela dha kwata miiti. Manga tu li mokati koonkundathana, omumwatate Brumley okwa mono kutya onda lya moonyandi, nokwa nyola mokambo ke moka ta ndhindhilike kutya “nandi ngungumane.” Omayele ngoka a pe ndje, oga li omawanawa, molwaashoka onda li nda geya nonda li nda hala okuulukila ahende gwoshipangelo kutya okwa puka.

Konima yowili lwaampono, omupanguli Mollen, okwa popi kutya oshipotha shoka osho tashi ka kala shotango ngula mompangu. Sho tatu zi mombelewa yomupanguli Mollen, okwa popi ahende gwoshipangelo kutya “ngula oku na okutsa nondhikwa.” Shika itashi ka kala oshipu kuye okuyelitha kutya oshipangelo, oshi na uuthemba wokutula omumwameme ombinzi. Okuza mpoka, onda li ndi uvite Jehova ta shilipaleke ndje kutya otatu ka sindana po oshipotha shoka. Osha li sha kumitha ndje okumona nkene Jehova te tu longitha tu gwanithe po ehalo lye.

Otwa ka lala uusiku, molwaashoka otwa tokelwa tatu longekidha shoka tatu ka popya ngula mompangu. Molwaashoka oombelewa dhompangu odha li popepi noBetel yaBrooklyn, aantu oyendji yomoshikondo shetu, oya li ye ende kolupadhi ya ka pulakena kompangu. Konima sho aapanguli yane ya pulakene koshipotha shetu, oya tokola kutya elombwelo lyokugandja ombinzi kali li pampango. Ompangu yopombanda oya popile omumwameme Nicoleau, noya ti kutya okugandja elombwelo omanga inoo pula ngoka te ehama nkene u uvite, oshi li ompinge nuuthemba womuntu.

Konima yaashono, ompangu yopombandaelela yaNew York, oye shi popi kutya omumwameme Nicoleau, okwa li e na uuthemba wokupangwa nopwaa na okutulwa ombinzi. Osho sha li oshikando shandje shotango, okukala ndi na uuthembahenda wokukutha ombinga miipotha ine, yi na ko nasha nokutulwa ombinzi moompangu dhopombanda dhaAmerika. (Tala oshimpungu “ Omasindano mOmpangu yopombandambanda yomoshilongo.”) Onda li wo nda wayimine aatseyiveta ooyakwetu moBetel, miipotha ngaashi mbyoka ya kwatela mo onkalonawa yaanona,  omahengathano nosho wo iinima yi nasha nomalanditho gomahala nomatungo.

Oshikando shotango nda tsakanena naDawn, ngoka a ka ninga omukulukadhi gwandje, onde mu adha a hengwa noku na uunona utatu. Okwa li ngaa ha mono iiyemo nokwa li omukokolindjila. Okwa li a tsakaneka iipyu niitalala monkalamwenyo ye, nosha li sha kumitha ndje okumona nkene a tokola toko okulongela Jehova. Mo 1992, otwa li tu na oshigongi shoshitopolwa sha li moNew York City, shi na oshipalanyolo, “Uuyelele weni nawu yele.” Poshigongi mpoka, onde mu pula ngele ota vulu okuninga omuyalekwa gwandje, nokonima yomvula otwa hokana. Okumona nkene omukulukadhi gwandje e hole Jehova, noku na omwenyo omwaanawa, osha li lela elalekonuuyamba lya za kuJehova. Dawn okwa kala shili ta ningile ndje uuwanawa momasiku agehe gokukalamwenyo kwetu. — Omayel. 31:12.

Sho twa hokana, osheeli she osha li shi na omimvo 16, ontowele 13 nonkelo 11. Onda li nda halelela okukala he e li nawa. Onkee onda lesha nuukeka nokutula miilonga omayele ngoka ge li miileshomwa yetu, taga popi kombinga yaavali mboka taya tekula aanona mboka kaaye shi yawo. Opwa li ngaa omashongo omimvo dhontumba, ihe onda nyanyukwa, sho aanona ya taamba ndje ko, ndi li ongakuume kawo omwiinekelwa nahe omunahole. Ookuume kaanona yetu aluhe oya li haye ya megumbo lyetu ya manguluka. Otwa li lela tu hole okukala pamwe naagundjuka.

Mo 2013, tse naDawn otwa tembukile koWisconsin, opo tu ka sile aavali yetu aakokele oshimpwiyu. Onda li nda kumwa, sho nda mono kutya iilonga yandje yaBetel hapo ya hulile mpoka, oshoka onda li nda pulwa ndi kale handi kwathele ehangano miipotha yi ili noyi ili.

MuSeptemba 2018, onda li handi kala nda fa ndi uvite ndi na oshinima pothingo, nonda li handi ikolomona olundji. Ndohotola gwetu okwa konakona ndje, ihe ka li a mono kutya osheetithi shuupyakadhi oshike. Lwanima, muJanuali mo 2019, ndohotola gumwe okwa lombwele ndje kutya otashi vulika ndi na omukithi gwa pumba, ngoka konima yethimbo tagu ke ehameka ndje noonkondo.

Konima yomasiku gatatu, onda li tandi dhana uudhano mboka ndi hole, nondi ihata po e tandi teka poshikesho shokolulyo. Onda kala handi dhana uudhano mbuka monkalamwenyo yandje nonda li nda pyokoka muwo. Onkee onda ndhindhilike kutya ondi na uunkundi wokuutha oontumba dhandje. Onda li nda kumwa, sho nda mono kutya omukithi nguka otagu ende tagu nayipala noonkondo. Ogwe shi ningitha oshidhigu kungame okupopya, okwiinyenga nokupona.

Onda nyanyukwa, sho nda longitha ontseyo yandje ndi kwathele ehangano lyaJehova miilonga yuutseyiveta. Onda nyanyukwa wo unene, sho nda vulu okunyola iitopolwa oyindji miileshomwa mbyoka ya nuninwa oondohotola, aatseyiveta nenge ndi tye ooahende naapanguli. Onda gandja wo iipopiwa miitopolwa oyindji muuyuni, mbyoka tayi popile uuthemba woshigwana shaJehova, opo shi hogolole etando nenge epango ndyoka inaali kwatela mo okutulwa ombinzi. Natango, otandi popi ngaashi omunyoli gwOmbiimbeli Lukas, ngoka a nyola muLukas 17:10, a ti: ‘Ngame onda longo shoka ndi na oku shi longa.’