Uumbangi otawu ulike kutya Jesus okwa ningi Omuyambi Omukuluntu, sho a ninginithwa mo 29 E.N. Otu shi shi ngiini? Sho Jesus a ninginithwa, oku ulike kutya okwa li e na ehalo lyokuyamba po omwenyo gwe koshiyambelo shopathaneko, shoka tashi ulike “kehalo” lyaKalunga. (Gal. 1:4; Heb. 10:5-10) Molwaashono oshiyambelo shoka shopathaneko osha kala ko okuza peninginitho lyaJesus okuuka komeho, otempeli onene yopambepo, ndjoka tayi thaneke kelongekidho lyelongelokalunga lyaJehova lyashili lya kankamena kekuliloyambo, nalyo oli na okukala lya kala ko okuza pethimbo ndyoka. Oshiyambelo osho oshitopolwa sha simanenena shotempeli yopambepo. — Mat. 3:16, 17; Heb. 5:4-6.

Otempeli onene yopambepo, oya li ya pumbwa omuyambi omukuluntu. Opo ompumbwe ndjoka yi gwanithwe po, Jesus okwa li a gwayekwa ‘nombepo ondjapuki noonkondo.’ (Iil. 10:37, 38; Mark. 1:9-11) Ongiini tatu vulu okukala nuushili kutya Jesus okwa langekwa po e li Omuyambi Omukuluntu, manga inaa sa noinaa yumudhwa? Otu na etompelo lya simana, ngele otwa tala koshiholelwa shAaron naalanduli ye, ngoka a li omuyambi omukuluntu kohi yOmpango yaMoses.

Ngaashi sha li sha tegelelika paMpango, omuyambi omukuluntu oye owala a li ha vulu okuya mUuyapukielela wetsalihangano, na lwanima omUuyapikielela wotempeli. Etopolitho olyo lya li lya topola ko Uuyapukielela kUuyapuki. Omuyambi omukuluntu okwa li owala ha yi mUuyapukielela mEsiku lyEkwatakanitho. (Heb. 9:1-3, 6, 7) Ngaashi owala Aaron naalanduli ye ya li ya langekwa po ye li aayambi aakuluntu, manga inaaya ‘pitila metopolitho’ lyetsalihangano, Jesus oku na okukala a li a langekwa po e li Omuyambi Omukuluntu gwotempeli onene yaJehova yopambepo, manga inaa sa. Opo nduno, okwa “pitile metopolitho, nokutya molutu lwe” a ka kale megulu. (Heb. 10:20) Omolwetompelo ndyoka, omuyapostoli Paulus okwa popi a ukitha kuJesus, te ya e li “omuyambi omukuluntu,” e ta piti ‘metsali moka ta yakula, li na esimano enene nolya gwana,’ nosho wo “megulu lyo lyene.” — Heb. 9:11, 24.

Ehangano epe olya li lya kolekwa uunake? Sho Jesus a londo a yi megulu naasho a yamba po omwenyo gwe gwa gwanenena pehala lyetu, okwa katuka onkatu ndjoka ya koleke ehangano epe. Oonkatu dhini dha li dha kwatelwa mo mokuninga ngawo?

Yotango, Jesus okwa li a holoka koshipala shaJehova; onkwawo, Jesus okwa yamba kuJehova eyambo li na ongushu, hugunina, Jehova okwa taamba ko ongushu yombinzi yaJesus ndjoka ya tika. Sigo oonkatu ndhika dha katukwa, ehangano epe kalya li natango tali longo.

Ombiimbeli inayi tu lombwela naanaa kutya uunake Jehova a taamba ko ekuliloyambo lyaJesus, ndyoka li na ondilo. Onkee ano, itatu vulu naanaa okupopya kondandalunde kutya uunake ehangano epe lya kolekwa nokutulwa miilonga. Nonando ongawo, otu shi kutya Jesus okwa londo a yi megulu manga ku na omasiku omulongo kOpentekoste. (Iil. 1:3) Oshikando shimwe muule wethimbo ndyoka efupi, okwa gandja ongushu yeyambo lye kuJehova, ngoka e li taamba. (Heb. 9:12) Uumbangi kutya ehangano epe olya li lya tulwa miilonga owu iwitikile kwaashoka sha li sha ningwa po pOpentekoste

. (Iil. 2:1-4, 32, 33) Osha yela kutya ehangano epe olya li lya totwa po notali longo.

Paufupi, ehangano epe olya li lya kolekwa, konima sho Jehova a taamba ko ongushu yombinzi yaJesus ndjoka ya tika, nokwa kwatele mo aagwayekwa mehangano ndyoka. Opo nduno, ehangano olya tameke okulonga li na Omuyambi Omukuluntu, Jesus, e li Omupokati. — Heb. 7:25; 8:1-3, 6; 9:13-15.