1. Omuyapostoli Paulus okwa zimine shike?

OMUYAPOSTOLI PAULUS okwe shi zimina kutya omathimbo gamwe, okwa li ha kala u uvite kee na oonkondo. Okwe shi zimine kutya olutu lwe olwa li talu “yonuka po,” kokutya okwa li e na okukondja a mana mo, opo a longe shoka shu uka, nonokutya Jehova ka li aluhe ha yamukula omagalikano ge momukalo moka a tegelela. (2 Kor. 4:16; 12:7-9; Rom. 7:21-23) Paulus okwa li wo e shi zimine kutya aapataneki ye oya li ye mu tala ko a nkundipala. * Ihe ka li e etha etaloko ewinayi lyayalwe nenge uunkundi we mwene, wu mu ningithe a kale e uvite kee na oshilonga. — 2 Kor. 10:10-12, 17, 18.

2. Shi ikolelela kAakorinto aatiyali 12:9, 10, oshiilongomwa shini sha simana Paulus i ilongo?

² Paulus okwi ilongo oshinima sha simana kutya omuntu ota vulu okukala e na oonkondo, nonando oku uvite a nkundipala. (Lesha 2 Aakorinto 12:9, 10.) Jehova okwa li a lombwele Paulus kutya oonkondo dhe “oonenenene kwaamboka aankundi.” Shoka osha hala okutya, Jehova okwa li ta ka pa Paulus oonkondo ndhoka a li kee na. Tango, natu ka taleni kutya omolwashike kaatu na okukala twa geya, uuna aatondi yetu taye tu ula nayi.

3. Omolwashike kaatu na okugeya, uuna tatu ulwa nayi?

³ Kapu na omuntu e hole okuulwa nayi. Nonando ongawo, ngele aatondi yetu oye tu ula nayi, e tatu kala tatu ipula nasho unene,  otashi vulika shi tu teye omukumo. (Omayel. 24:10) Ihe ongiini tu na okutala ko omasheko ngoka tage tu zile kaatondi yetu? Ngaashi Paulus, natse otatu vulu ‘okunyanyukilwa okukala mokudhinwa.’ (2 Kor. 12:10) Omolwashike? Omolwaashoka uuna aantu taye tu ula nayi notaye tu pataneke, kungawo otashi ulike kutya tse aalongwa yaJesus yashili. (1 Pet. 4:14) Jesus okwa ti kutya aalanduli ye otaya ka hepekwa. (Joh. 15:18-20) Shoka osho sha li sha ningwa methelemimvo lyotango. Mboka ya li ya nwethwa mo komuthigululwakalo gwOshigreka, oya li ya tala ko Aakriste kaaye na oondunge noya nkundipala. Mokati kAajuda, Aakriste oya li ya talika ko wo “aantu inaa longwa sha,” ngaashi omuyapostoli Petrus naJohannes. (Iil. 4:13) Aakriste oya li talika ko ya fa ya nkundipala, kaya li haya kutha ombinga mopolitika nenge muukwiita nokaya li ya simanekwa kaantu.

4. Aakriste yopetameko oya li yi inyenge ngiini ketaloko ewinayi lyaapataneki yawo?

⁴ Mbela Aakriste yopetameko oya li ye etha etaloko ewinayi lyaapataneki yawo, li ya ethithe po okuuvitha? Aawe. Pashiholelwa, omuyapostoli Petrus naJohannes, oya li ye shi tala ko shi li uuthembahenda okuhepekwa, omolwokulandula Jesus nokulonga yalwe omalongo ge. (Iil. 4:18-21; 5:27-29, 40-42) Aalongwa ye kaya li ye na etompelo lyasha lyokukala ya sa ohoni. Mokweendela ko kwethimbo, Aakriste mboka aaifupipiki yomethelemimvo lyotango, oya ningi oshindji ya kwathele aantu, nonando oya kala nokuningilwa uuwinayi kaapataneki yawo. Pashiholelwa, omambo gOmbiimbeli ngoka ga nyolwa kuyamwe yomAakriste mboka, onkee ngaa taga tsikile okugandja ekwatho netegameno kaantu omamiliyona. Uukwaniilwa mboka ya kala taya uvitha, otawu pangele ngashingeyi megulu, na masiku otawu ka pangela uuyuni awuhe. (Mat. 24:14) Okuyelekanitha nepangelo enene lyopapolitika ndyoka lya li lya hepeke Aakriste, lyo inali kala ko omimvo odhindji, omanga Aakriste mboka aadhiginini, oye li ngashingeyi aakwaniilwa megulu. Ihe aapataneki yawo, ngashingeyi oya sa. Ngele oya ka yumudhwa, otaya ka pangelwa kUukwaniilwa mboka wa li wa humithwa komeho kAakriste mboka ya li ye tonde.— Eh. 5:10.

5. Shi ikolelela kuJohannes 15:19, omolwashike aapiya yaJehova ya dhinika?

⁵ Kunena, tu li aapiya yaJehova, aantu omathimbo gamwe ohaya kala ye tu dhina nohaye tu sheke kutya katu na oondunge notwa nkundipala. Omolwashike? Omolwaashoka ihatu tsu kumwe niikala yaantu mboka ye tu kundukidha. Ohatu kambadhala okukala aaifupipiki naavuliki. Ihe aantu muuyuni, oye hole uuntsa, aainenepeki naanashipotha. Shimwe ishewe, ihatu kutha ombinga mopolitika noihatu wayimine omatangakwiita goshilongo shontumba. Aantu muuyuni kunena oye tu dhina, molwaashoka otwa yooloka ko kuyo. — Lesha Johannes 15:19; Rom. 12:2.

6. Jehova oha kwathele aapiya ye ya longe oshilonga oshinene shini?

⁶ Kutya nduno uuyuni owe tu tala ko ngiini, Jehova ohe tu longitha tu longe iilonga iinene. Ota gwanitha po oshilonga oshinenenene shokuuvitha inaashi monika nando onale. Aapiya ye kunena ohaya nyanyangidha iileshomwa ya kankamena kOmbiimbeli nohaye yi andjaganeke muuyuni. Ohaya longitha Ombiimbeli ya kwathele aantu omamiliyona ya hwepopaleke oonkalamwenyo dhawo. Olupandu aluhe nalu ye kuJehova, omolwaashihe shoka sha pondolwa po, oshoka oye e shi ningitha tashi wapa. Oha longitha aantu mboka ya talika ko ya nkundipala ya longe iilonga mbyoka iikumithi. Mbela ongiini kombinga yetu pauhandimwe? Mbela Jehova ota vulu oku tu kwathela tu kale tu na oonkondo? Ngele osho, oshike tu na okuninga, opo e tu kwathele? Ngashingeyi natu ka  taleni kiinima itatu yokondandalunde, mbyoka tatu vulu okwiilonga moshiholelwa shoka twa tulilwa po komuyapostoli Paulus.

7. Oshiilongomwa shimwe shini tatu ilongo moshiholelwa shaPaulus?

⁷ Oshiilongomwa shimwe tatu ilongo koshiholelwa shaPaulus osho shika: Ino inekela moonkondo dhoye nenge muunkulungu woye, uuna to longele Jehova. Pataloko lyopantu, Paulus okwa li e na etompelo lyokukala e na uuntsa, nokwi inekela muye mwene. Okwa kokela muTarso, oshilandopangelo shoshitopolwa shaRoma. Tarso osha li oshiyamba nomwa li mwa tseyikila oshiputudhilo shelongo lyopombanda. Paulus okwa li omulongwantu. Okwa longwa kugumwe gwomaawiliki Aajuda mboka ya simanekwa, omulumentu gwedhina Gamaliel. (Iil. 5:34; 22:3) Pompito yimwe, Paulus okwa li omuntu a simana mokati kAajuda ooyakwawo. Okwa ti: “Ngame onda li ependa ndi vule Aajuda ooyakwetu oyendji yepipi lyandje mokukala meitaalo lyopaShijuda.” (Gal. 1:13, 14; Iil. 26:4) Ihe Paulus ka li i inekela muye mwene.

8. Shi ikolelela kAafilippi 3:8, Paulus okwa li a tala ko ngiini iinima mbyoka a thigi po, nomolwashike a li a “nyanyukilwa okukala muunkundi”?

⁸ Paulus okwa li a nyanyukwa okuthiga po iinima mbyoka ye mu ningitha a kale a fa a simana. Okwe ke shi mona mo kutya iinima mbyoka a li e na, oyo “iiyagaya yowala.” (Lesha Aafilippi 3:8.) Paulus okwa li a tsakaneke omashongo ogendji molwaashoka a ningi omulanduli gwaKristus. Okwa li a tondika kaantu yomoshigwana she. (Iil. 23:12-14) Okwa li wo a dhengwa nokutulwa mondholongo kaakwashigwana ooyakwawo, ano Aaroma. (Iil. 16:19-24, 37) Shimwe ishewe, Paulus okwa li e shi ndhindhilike kutya ina gwanenena nosha li oshidhigu kuye okulonga shoka shu uka. (Rom. 7:21-25) Ihe pehala lyokweetha aapataneki ye nenge omapuko ge mwene ge mu ethithe po okulandula Kristus, okwa li a “nyanyukilwa okukala muunkundi.” Omolwashike? Omolwaashono uuna a nkundipala, okwa li ha mono nkene Kalunga te mu kwathele monkalamwenyo ye. — 2 Kor. 4:7; 12:10.

9. Otu na okutala ko ngiini iinima mbyoka hayi tu ningitha tu kale twa fa twa nkundipala?

⁹ Ngele otwa hala Jehova e tu pe oonkondo,  inatu dhiladhila kutya oonkondo dhopalutu, elongo, eputuko lyetu nenge iinima yopamaliko oyo hayi ulike kutya otu na ongushu yi thike peni. Iinima mbyoka hayo hayi tu ningitha tu longithwe kuJehova. Odhoshili kutya haapiya yaJehova oyendji “aanongo nenge aanankondo nenge ya valekeka.” Pehala lyaashono, Jehova okwa hogolola okulongitha mboka ya talika ko “aankundi” muuyuni. (1 Kor. 1:26, 27) Onkee ano, ngele ku na iinima mbyoka ya popiwa petameko lyokatendo haka, ino dhiladhila kutya ito vulu okulongela Jehova. Pehala lyaashono, yi tala ko yi li ompito yokumona nkene Jehova te ku pe oonkondo. Pashiholelwa, ngele owu uvite wa tilithwa kwaamboka ye li ompinge neitaalo lyoye, galikana kuJehova e ku pe omukumo, wu popile eitaalo lyoye. (Ef. 6:19, 20) Ngele oto kondjo nomukithi gwoshinamenena, galikana Jehova e ku pe oonkondo ndhoka wa pumbwa, opo wu kale wi ipyakidhila ngaashi to vulu miilonga ye. Ethimbo kehe to mono Jehova te ku kwathele, eitaalo lyoye ohali kolo noho kala wu na ekwatathano lya kola naye.

10. Omolwashike tu na okukonakona iiholelwa yaapiya aadhiginini mboka ya popiwa mOmbiimbeli, ngaashi mbyoka yi li mAahebeli 11:32-34?

¹⁰ Paulus okwa li ha konakona Omanyolo a mana mo. Okwi ilonga iinima oyindji, ihe okwi ilonga wo kiiholelwa yaantu mboka ya popiwa mOohapu dhaKalunga. Sho a nyolele Aakriste Aahebeli, okwa li e ya pula ya dhiladhile kombinga yiiholelwa mbyoka twa tulilwa po kaapiya aadhiginini yaJehova yonale. (Lesha Aahebeli 11:32-34.) Natu tale gumwe gwomuyo, omukwaniilwa David. Omapataneko ngoka a li a tsakaneke, kaga li owala ga ziilile kaatondi ye, ihe nokuyamwe mboka ya li ookuume ke. Sho tatu tala koshiholelwa shaDavid, otatu ka mona nkene Paulus a li a nkondopalekwa, sho a tedhatedha koshiholelwa shaDavid, nankene tatu vulu okuholela Paulus.

11. Omolwashike David a li ta monika a fa kee na oonkondo? (Tala ethano lyokombanda.)

¹¹ Ependafule Goliat olya li lya tala ko David kee na oonkondo. Sho Goliat a mono David, okwe “mu dhini.” Goliat okwa li omulumentu omunene, okwa li a homata nokwa dheulilwa nawa iita. Ihe David okwa li owala omugundjuka nokwa li inaa dheulilwa iita. Nonando osho a li ta monika ngawo, paushili wo wene okwa li e na oonkondo. Okwa li i inekela Jehova e mu pe oonkondo, nokwa vulu okusinda omutondi gwe. — 1 Sam. 17:41-45, 50.

12. Eshongo lilwe lini David a li a tsakaneke?

¹² David okwa li a tsakaneke eshongo lilwe, ndyoka lya li tali vulu oku mu ningitha a kale e uvite kee na oonkondo. David okwa li a longele Saul nuudhiginini, omukwaniilwa gwaIsraeli, ngoka a li a langekwa po kuJehova. Petameko, omukwaniilwa Saul okwa li a simaneka David. Lwanima, uuntsa owa ningitha Saul a kale a sila ondumbo David. Saul okwa ungaunga nayi naDavid, nokuli e ta kambadhala e mu dhipage. — 1 Sam. 18:6-9, 29; 19:9-11.

13. David okwi inyenge ngiini, sho a li ta ungaungiwa naye nayi komukwaniilwa Saul?

¹³ Nonando David okwa li a ungaungiwa naye momukalo omwiinayi komukwaniilwa Saul, okwa li a tsikile okusimaneka omukwaniilwa ngoka a langekwa po kuJehova. (1 Sam. 24:6) David ka li a pe Jehova uusama, omolwiinima iiwinayi mbyoka a ningilwa kuSaul. Pehala lyaashono, David okwa li i inekela Jehova e mu pe oonkondo ndhoka a pumbwa, opo i idhidhimikile uupyakadhi mboka. — Eps. 18:1, enyolo lyopombanda.

14. Omuyapostoli Paulus okwa li a taalele onkalo yini, ndjoka ya faathana noyaDavid?

¹⁴ Omuyapostoli Paulus naye okwa li a taalele onkalo ya faathana naandjoka yaDavid. Aatondi yaPaulus oya li ye na oonkondo dhi vule dhe kokulekule. Aawiliki oyendji ya tseyika nawa yopethimbo lye, oya li ye mu tonde. Olundji oya li ye  mu dhengitha noku mu tulitha mondholongo. Ngaashi David, Paulus okwa li a ungaungiwa naye nayi kaantu mboka ya li ye na okukala ookuume ke. Nokuli nayamwe yomegongalo lyopaKriste, oya li ye mu pataneke. (2 Kor. 12:11; Fil. 3:18) Ihe Paulus okwa li a sindi ayehe mboka ya li taye mu pataneke. Ngiini mbela? Okwa li a tsikile okuuvitha, nonando okwa li ta patanekwa. Okwa kala omudhiginini kaamwahe, nonando oya li ye mu uvitha nayi. Shoka sha simanenena, okwa kala omudhiginini kuKalunga sigo omeso. (2 Tim. 4:8) Okwa li a vulu okusinda omashongo omanene, molwaashoka okwa li i inekela muJehova, ihe hamoonkondo dhe dhopalutu.

15. Elalakano lyetu olini, nongiini tatu vulu oku li gwanitha po?

¹⁵ Mbela oho ulwa nayi nenge ho patanekwa kaanasikola ooyakweni, kaaniilonga pamwe nangoye nenge kaakwanezimo yoye mboka kaaye shi Oonzapo? Mbela owu ungaungilwe nayi nale kugumwe megongalo? Ngele osho, dhimbulukwa oshiholelwa shaDavid naPaulus. Oto vulu okutsikila ‘okusinda uuwinayi nuuwanawa.’ (Rom. 12:21) Uuna aantu taye tu pataneke, ihatu ya kondjitha ngaashi David a li a kondjitha Goliat. Pehala lyaashono, elalakano lyetu okusinda uuwinayi, mokukambadhala okukwathela aantu yi ilonge kombinga yaJehova nOmbiimbeli. Shoka oto vulu oku shi ninga, ngele owa longitha Ombiimbeli wu yamukule omapulo gaantu, ngele owa kala wa simaneka nowu na ombili naamboka haya ungaunga nayi nangoye nongele owa kala ho ningile aantu ayehe uuwanawa, nokuli naatondi yoye. — Mat. 5:44; 1 Pet. 3:15-17.

16-17. Oshike shoka Paulus a li inaa dhimbwa nando?

¹⁶ Manga omuyapostoli Paulus inaa ninga omulongwa gwaKristus, okwa li omugundjuka kee na esimaneko, ngoka a li ha hepeke aalanduli yaJesus. (Iil. 7:58; 1 Tim. 1:13) Jesus oye mwene a li a keelele Paulus, ngoka a li a tseyika nawa Saulus, kaa ponokele egongalo lyopaKriste. Jesus okwa popi naPaulus okuza megulu, e te mu tsikitha. Opo Paulus a vule okumona ko ishewe, okwa li e na okukonga ekwatho kaantu mboka a kala nokuhepeka. Okwa taamba ko neifupipiko ekwatho ndyoka a pewa komulongwa Ananias, ngoka a tsikulula omeho ge. — Iil. 9:3-9, 17, 18.

 ¹⁷ Lwanima, Paulus okwa ningi oshilyo sha simana shegongalo lyopaKriste, ihe ka li a dhimbwa oshinima shoka a longwa kuJesus mondjila yokuya kuDamaskus. Paulus okwa tsikile okukala omwiifupipiki nokwa li a taamba ko nehalo ewanawa ekwatho lyaamwahe. Okwe shi zimine kutya oya li “ekwatho enene” kuye. — Kol. 4:10, 11.

18. Omolwashike omathimbo gamwe hatu kala inaatu hala okutaamba ko ekwatho lyayalwe?

¹⁸ Oshike tatu vulu okwiilonga kuPaulus? Petameko sho twa tameke okweendathana nOonzapo dhaJehova, otashi vulika twa li twa halelela yalwe ye tu kwathele, oshoka otwa li tu shi owala kashona kombinga yOmbiimbeli, notwa li tu na okwiilonga oshindji. (1 Kor. 3:1, 2) Ihe ngashingeyi owu uvite ngiini? Ngele otwa kala nokulongela Jehova omimvo odhindji notwa mona ontseyo oyindji, otashi vulika tu kale inaatu hala okutaamba ko ekwatho lyagumwe, unene tuu ngoka inaa menekela mo moshili ngaashi tse. Nonando ongawo, olundji Jehova oha longitha aamwatate naamwameme ye tu tse omukumo. (Rom. 1:11, 12) Onkee ano, ngele otwa hala Jehova e tu pe oonkondo, otwa pumbwa okutaamba ko ekwatho lyaamwatate naamwameme.

19. Omolwashike Paulus a li a pondola?

¹⁹ Konima sho Paulus a ningi Omukriste, okwa longo iilonga yontumba iindhindhilikwedhi. Omolwashike? Omolwaashoka okwi ilongo kutya okupondola kwomuntu inaku ikolelela koonkondo dhe dhopalutu, kelongo ndyoka a mona, kuuyamba we nenge keputuko lye. Ihe okwi ikolelela keifupipiko lye nokeinekelo lye muJehova. Atuheni natu holeleni Paulus (1) mokwiinekela muJehova, (2) mokwiilonga kiiholelwa yomOmbiimbeli nosho wo (3) mokutaamba ko ekwatho lyooitaali ooyakwetu. Opo nduno, nonando otu kale tu uvite twa nkundipala shi thike peni, Jehova ote ke tu pa oonkondo!